O Le Togiola e Aofia ai Tiga Uma
Saunia e Elder Kent F. Richards
O Le Fitugafulu
O la tatou lu’itau patino lava i le olaga nei o le avea lea “o se tagata amiotonu e ala i le togiola a Keriso.”
A o avea au o se fomai tipitipi, sa tele se vaega o le taimi o la’u galuega e alu i le mataupu o le tiga. Ona o se tulaga e tatau ai, sa toetoe o aso uma ou te faamatua’ia se tiga i le taotoga—ma o le tele lava o a’u taumafaiga e faaalu i le taumafai e taofiofi ma faaitiitia le tiga.
Sa ou mafaufau loloto lava i le faamoemoega o le tiga. E leai se tasi o i tatou ua puipuia mai le oo i tiga. Ua ou vaai i tagata a o taulimaina i se tulaga e matua ese lava. E i ai nisi ua liliuese ma le ita i le Atua, a o nisi ua faatagaina o latou mafatiaga e latalata atili ai i le Atua.
E faapei foi o outou, ua oo foi a’u lava ia i le tiga. E fesoasoani le tiga e faatautaia ai le faagasologa o le faamalologa. E tele ina aoao ai i tatou i le onosai. Atonu o le mafuaaga lea tatou te faaaogaina ai le upu patient e faatatau i le tagata ma’i.
Na tusia e Elder Orson F. Whitney: “E leai se tiga tatou te mafatia ai, leai se tofotofoga tatou te oo i ai e maimau. E a’otauina ai i tatou, e fesoasoani tatou te atiina ae ai uiga auau mama e pei o le onosai, faatuatua, lototoa, ma le lotomaulalo. … E ala mai i faanoanoaga ma puapuaga, fita ma faigata, tatou te maua ai le malamalama lea ua tatou o mai ai iinei ia maua.”1
E faapena foi le saunoaga a Elder Robert D. Hales:
“O le tiga e aumaia ai oe i se lotomaualalo e mafai ai ona e manatunatu loloto. O se aafiaga ou te faafetai ai lava ina ua ou onosaia. …
… Sa ou aoaoina e faapea, o le tiga faaletino ma le faamaloloina o le tino pe a mavae se taotoga tele, e talitutusa lava ma le tiga faaleagaga ma le faamaloloina o le agaga i le faagasologa o le salamo.”2
O le tele lava o o tatou puapuaga e le ona o i tatou. E i ai mea e tutupu e le’i fuafuaina, o tulaga feteena’i pe lē fiafia ai foi, o ma’i e tula’i mai, e oo lava i le oti, e vagaia i tatou ma osofaia ai lo tatou aafiaga i le olaga faitino. E le gata i lea, atonu foi tatou te puapuaga i mafatiaga ona o mea e fai e isi.3 Na matauina e Liae e faapea o Iakopo na “tigaina … i puapuaga ma le faanoanoa tele ona o le faalevao o [ona] uso.”4 O mea faafeagai o se vaega o le fuafuaga o le fiafia a le Tama Faalelagi. Ua lava mafatiaga ua tatou feagai uma ai lava e iloa ai le alofa o lo tatou Tama ma lo tatou manaomia o le fesoasoani a le Faaola.
O le Faaola e le o se tamalii e matau lē leoa. Ua loa ona Ia silafia patino ia tiga tatou te feagai.
“E onosai o ia i tiga o tagata uma, e moni, o tiga o tagata ola uma, o tane ma fafine atoa ma le fanau.”5
“O le mea lea ia tatou faalatalata atu ai ma le faamalosi i le nofoaalii o le alofa tunoa, ina ia alofaina ai o i tatou, ia maua ai foi le alofa tunoa e fesoasoani mai i ona aso e tatau ai.”6
O nisi taimi i le lotolotoi o le tiga, e tofotofoina ai i tatou e fesili, “E le i ai ea ni pulupāsama i Kiliata; e le o i ai ea se fomai iina?”7 Ou te molimau atu o le tali o le ioe, o loo i ai se fomai. O le Togiola a Iesu Keriso e aofia uma ai tulaga nei ma faamoemoega o le olaga nei.
E i ai se isi ituaiga o tiga lea e nafa ma i tatou. O tiga faaleagaga e ta’oto i le lualoto o o tatou agaga ma mafai ona lagonaina le le faamalieina, e oo lava ina “tigaina” ai i se“mata’u tele e le mafaamatalaina” lea na faamatalaina e Alema.8 E afua mai i a tatou amioga e tumu i le agasala ae leai se salamo. O lea foi tiga e i ai se vaifofo e laugatasia ai, ma e tonu lava. E mai le Tama, e ala mai i le Alo, ma e mo i tatou taitoatasi o e naunau e faia mea uma e tatau ai ina ia salamo. Na fetalai mai Keriso, “Pe tou te le foi mai nei ea ia te au, … ma ia faaliliuina, ina ia ou faamaloloina outou?”9
O Keriso lava Ia na aoao mai:
“Na auina mai a’u e le Tama, ina ia siitia a’u i luga o le satauro; ma ina ua uma ona siitia a’u i luga o le satauro, ia tosina mai tagata uma ia te au. …
“O lea, e tusa ai ma le mana o le Tama, ou te tosina mai ai tagata uma ia te au;”10
Atonu o Lana galuega aupito taua o loo i ai lea i le galulue pea lava pea ma i tatou taitoatasi, ina ia siitia, ia faamanuia, ia faamalolosia, ia lagolagoina, ia taialaina ma ia faamagaloina i tatou.
E pei ona vaaia e Nifae i se faaaliga, o le tele lava o le galuega a Keriso i le tino nei sa tuuto atu lea i le faamanuiaina ma le faamaloloina o e mama’i i ituaiga ma’i eseese—faaletino, faalelagona, ma faaleagaga. “Ma ua ou iloa foi motu o tagata o e ua mama’i, ma e ua tigaina i ma’i eseese. … Ma ua faamaloloina i latou i le mana o le Tamai Mamoe a le Atua.”11
Na valoia foi e Alema e faapea “e onosai o ia i mea tiga, ma puapuaga ma tofotofoga uiga eseese; ma … na te ave i ona luga puapuaga ma ma’i o lona nuu. …
“Ina ia faatumuina lonaalo i le alofa … ina ia silafia e ia e tusa ma le tino le ala e tausi a’i lona nuu e tusa ma o latou vaivai.”12
O le tuneva o se tasi po, a o ou taoto i se moega o le falemai, o se tagata ma’i ae ua le o se fomai, sa ou faitau ai ma toe faitau i na fuaiupu. Sa ou mafaufau loloto: “E faapefea ona fai? Mo ai? O le a le mea e manaomia ina ia agavaa ai? Pe tutusa ma le faamagaloina o se agasala? Pe i ai ea se mea e tatau ona tatou faia ia maua ai Lona alofa ma le fesoasoani?” A o ou mafaufau, sa oo ina ou malamalama e faapea, i le taimi o Lona soifua ai i le tino, na filifili ai Keriso ia oo i le tiga ma mafatiaga ina ia malamalama ai ia te i tatou. Atonu e manaomia foi ona tatou oo i le o’oo’oga o aafiaga o le olaga nei, ina ia malamalama ai ia te Ia ma o tatou faamoemoega e faavavau.13
Na aoao mai ia Peresitene Henry B. Eyring: “O le a faamafanafanaina i tatou pe a tatau ona tatou faatalitali ma le faanoanoa i le toomaga folafolaina o loo Ia silafia, mai le poto masani, i le ala e faamalolo ai ma fesoasoani mai ia i tatou. … O le faatuatua foi i lena mana o le a tatou maua ai le onosai pe a tatou tatalo ma galulue ma faatalitali mo le fesoasoani. Semanu e mafai lava ona Ia silafia le ala e fesoasoani mai ai ia i tatou e ala i se faaaliga, peitai na Ia filifili lava e aoao mai i Lona lava aafiaga patino.”14
Sa ou lagonaina le fusia [o a’u] i aao o Lona alofa i lena po.15 Sa maligi faavai o’u loimata o le lotofaafetai. Mulimuli ane, sa ou faitau i le Mataio e uiga i le galuega a Keriso i le olaga nei, ma sa ou iloa ai se isi mea: “Ua oo i le afiafi, ona latou aumai ai lea ia te ia o tagata e toatele … ma ua … faamaloloina e ia o i latou uma na mama’i.”16 Sa Ia faamaloloina i latou uma na o mai ia te Ia. E leai se tasi na teena.
E pei ona sa aoao mai e Elder Dallin H. Oaks: “E tele auala e oo mai ai faamanuiaga o le faamalologa, e fetaui lava ma o tatou manaoga taitoatasi, e pei ona silafia ai e Ia o lē e alofa silisili ia i tatou. O nisi taimi e faamaloloina e se ‘faamalologa’ o tatou ma’i pe faamatuu ese atu ai a tatou avega. Peitai, o nisi taimi e ‘faamaloloina’ i tatou e ala i le tuuina mai o le malosi po o le malamalama po o le onosai e onosaia ai avega ua tuu mai i o tatou luga.”17 O i latou uma lava e o mai, e mafai ona “fusifusia i aao o Iesu.”18 E mafai ona faamaloloina agaga uma i Lona mana. E mafai ona faamalieina ia tiga uma. E mafai ona tatou “maua le malologa o o [tatou] agaga” ia te Ia.19 Atonu o le a le vave suia o tatou tulaga i la le tino, ae e mafai ona faaumatia o tatou tiga, mafatiaga, ma le fefe i Lona filemu ma le pulupāsama faamalolo.
Ua ou matauina e tele lava ina talileleia e tamaiti ia tiga ma puapuaga. Latou te onosaia ma le filemu i le lotomaulalo ma le agamalu. Sa ou lagonaina se agaga matagofie, toamalie e siomia ai nei fanau iti.
Sa faia se taotoga e sefulufa itula o Sherrie e sefulutolu ona tausaga, o se fula sa i lona maea alio. Ina ua toe ala mai a o i ai i le potu o gasegase tigaina, sa ia fai mai: “Papa, o lea e i i Aunt Cheryl, ma … Tamamatua Norman … ma Tinamatua Brown. Ae Papa, a o ai lena e tu i ou tafatafa? … E pei uma lava o oe, ae fai si umi atu. … Fai mai o ia o lou uso, o Simi.” Na maliu ia Simi le uso o lona tama i le 13 o ona tausaga, i le cystic fibrosis.
“Toeitiiti atoa le itula, o faamatala mai e Sherrie i latou na asiasi mai ia te ia, o tagata uma o lona aiga ua maliliu. Ona toe moe ai lea, ua vaivai.”
I se taimi mulimuli ane sa ia fai atu ai i lona tama, “Papa, e tofu uma lava tamaiti ia e i ai i le potu o ma’i tigaina, ma agelu o loo fesoasoani ia i latou.”20
Na fetalai mai le Faaola ia i tatou uma lava:
“Faauta, o tama ninii outou, tou te le mafai nei foi ona tauave mea uma; e ao ina tutupu outou i le alofa tunoa ma le malamalama i le upu moni.
“Aua le matata’u, fanau iti e, aua e a a’u lava outou. …
“O lea, ou te ia te outou, o a’u foi le leoleo mamoe lelei.”21
O la tatou lu’itau patino lava i le olaga nei o le avea lea “o se tagata amiotonu e ala i le togiola a Keriso.”22 O tiga tatou te oo i ai atonu o iina e sili ona fuaina ai lenei faagasologa. I se tulaga o’oo’o, e mafai ona avea i tatou e faapei o tamaiti i o tatou loto, faamaulalo i tatou lava, ma “tatalo ma galulue ma faatalitali”23 ma le onosai mo le faamalologa o o tatou agaga ma o tatou tino. O la Iopu, a uma ona faaleleia atoa i tatou e ala i tofotofoga, ona tatou “sao atu lea e pei o le auro.”24
Ou te molimau atu o Ia o lo tatou Togiola, o la tatou Uo, ma lo tatou Faufautua, o le Fomai Sili, o le Taulasea Sili. E mafai ona tatou maua ia te Ia le filemu ma le toomaga mai o tatou tiga ma a tatou agasala pe afai tatou te o atu ia te Ia ma le lotomaualalo. Ua “lava Lona alofa tunoa.”25 I le suafa o Iesu Keriso, amene.