Lipoti a le Matagaluega Suetusi a le Ekalesia, 2010
I le Au Peresitene Sili O Le Ekalesia a Iesu Keriso o le Au Paia o Aso e Gata Ai
Uso Pele: E pei ona faamanino mai i le faaaliga o loo i le vaega e 120 o le Mataupu Faavae ma Feagaiga, o le Aufono e Faafoeina ia Sefuluai, e faatagaina tupe faaalu o tupe a le Ekalesia. O lea aufono e aofia ai le Au Peresitene Sili, o le Korama a Aposetolo e Toasefululua, ma le Au Epikopo Pulefaamalumalu. O lenei aufono latou te faamaonia ia paketi mo matagaluega a le Ekalesia, o faagaoioiga, ma le vaevaega i iunite faalelotu. E faaaogaina e matagaluega a le Ekalesia ia tupe ia ogatasi ma paketi ua faamaonia, ma ia tusa ai foi ma aiaiga ma faiga faavae a le Ekalesia.
Ua tuuina mai i le Matagaluega Suetusi a le Ekalesia le faatagaga e maua ai faamaumauga uma ma polokalama e tatau ai, ina ia iloilo ai le tulaga solo lelei o le faafoeina o tupe maua, o tupe faaalu, ma le malupuipuia o aseta a le Ekalesia. E tutoatasi lava le Matagaluega Suetusi a le Ekalesia mai isi matagaluega uma ma galuega fai a le Ekalesia ma o le aufaigaluega e aofia ai tausitusi lautele ua faamaonia, o suetusi faamaonia mai le li’o, o suetusi faamaonia o polokalama faakomepiuta, ma isi tamalii polofesa ua faamaonia aloaia.
E faavae i luga o suegatusi ua uma ona fai, ua i ai nei i le Matagaluega Suetusi a le Ekalesia le manatu, o mea uma, o saofaga na tauaaoina, o tupe na faaalu, ma aseta a le Ekalesia mo le tausaga 2010, sa tusi faamaumau ma faatautaia e tusa ai ma faiga faatausitusi talafeagai, o paketi sa faamaonia, ma aiaiga ma faiga faavae a le Ekalesia.
E tuuina atu ma le faaaloalo lava,
Matagluega Suetusi a le Ekalesia
Robert W. Cantwell
Pule Faatonusili