Faasaga Atu ma le Faatuatua i le Lumanai
Russell M. Nelson
O Le Korama a Aposetolo e Toasefululua
O upumoni, feagaiga, ma sauniga e mafai ai ona tatou faatoilalo le fefe ae faasaga atu ma le faatuatua i le lumanai!
O’u uso e ma tuafafine pele, faafetai atu mo la outou uunaiga lagolago, e le gata i le sii o outou aao, ae faapea foi i la outou auaunaga siitia i aiga, i le Ekalesia, ma o outou nuu. Matou te fia vaai atu lava ia te outou ma o outou aiga ma uo. Po o fea lava o outou nonofo ai matou te iloa a outou taumafaiga ia avea lenei lalolagi ma nofoaga e sili atu. Matou te lagolagoina outou! Matou te alolofa ia te outou. E pei ona outou tatalo mo i matou, o loo matou tatalo foi mo outou!
Ua matou vaaia faalemafaufau o outou aiga o loo faapotopoto i le televise po o le initoneti e matamata i le fale ia taualumaga o le konafesi aoao. Sa auina mai e se tina ma se tamā mataala se kopi o se ata na pueina i le taimi o le konafesi. Sa la matauina aga a le la atalii e 18-masina le matua, sa na iloaina foliga ma le leo o le failauga. Sa amata e le tamaitiiti ona feula atu kisi i le TV. Sa manao o ia e soso latalata mai. O lea na vave si’i ai e lona tuafafine matua magafagafa le tuagane laitiiti i ona tauau ma faalatalata mai ai o ia. O le ata lea.
Ioe, o le ata i le TV o a’u, ma o fanau na a le ma fanau. I ni nai tausaga, o le a avea lenei alii o se toeaina, ua faaeeina i le malumalu, ma saunia ai mo lana misiona. Mulimuli ane o le a faamauina ai o ia i se soa e faavavau na te filifilia. Pe ua mafai ea ona outou vaai atu ia te ia i se aso, o se tane ma se tamā, ma ana lava fanau? O le a i ai se aso, o le a faatofa ai i ona tamamatutua, ma se iloa mautinoa o le oti o se vaega o le olaga.
E moni lava. Tatou te ola ina ia oti, ma e tatou te oti foi ina ia toe ola ai. Mai se vaaiga e faavavau, na pau lava le oti e le atoatoa moni o le oti lea o se tasi e le’i saunia e fetaia’i ma le Atua.
I le avea ai o ni aposetolo ma ni perofeta ua matou popole ai e le gata i a matou fanau ma fanau a fanau, ae faapena foi—ia outou fanau, ma fanau taitoatasi a le Atua. O mea uma o loo faapolopoloina i le lumanai mo fanau paia taitoatasi a le Atua, o le a mamanuina e ona matua, aiga, uo, ma faiaoga. O lea la, o o tatou faatuatua i le taimi nei e avea ma se vaega o faatuatua o a tatou fanau mulimuli ane.
O le a uia e tagata taitoatasi lona lava ala i se lalolagi e fesuisuia’i pea—o se lalolagi o manatu faatautavā. O le a tumau pea ona tetee mai au a le tiapolo i au o le lelei. O loo taumafai pea Satani e faatosina i tatou ia mulimuli atu i ona ala ma ia tatou malaia ai, e pei lava o ia.1 Ma o tulaga masani o le olaga e lamatia ai e pei o gasegase, manuaga, ma faalavelave faafuasei o le a tumau pea ona i ai.
Ua tatou ola i se vaitaimi faigata. O mafuie ma galulolo ua afua ai faatafunaga, ua faaletonu faigamalo, ua ogaoga tele le atuatuvale ona o le tamaoaiga, ua osofaia aiga, ma ua tele faaipoipoga e tatalaina. Ua i ai se pogai tele tatou te popole ai. Ae e le tatau ona tatou faatagaina o tatou popolega e suitulaga i lo tatou faatuatua. E mafai ona tatou faafetoaia na popolega e ala i le faamalosia o lo tatou faatuatua.
Amata i lau fanau. Ua ia te outou matua le tiutetauave autu o le faamalolosia o o latou faatuatua. Ia latou lagonaina o outou faatuatua, e tusa lava pe oo atu ai i o outou luga ni tofotofoga faigata. Ia taulai atu o outou faatuatua i lo tatou Tama Faalelagi agalelei ma Lona Alo Pele, o le Alii o Iesu Keriso. Ia aoao atu e uiga i lena faatuatua ma le talitonuga maumaututu. Aoao ia alii po o tamaitai faapelepele taitoatasi, o ia o se atalii/afafine o le Atua, na foafoaina i Lona faatusa, ua i ai se faamoemoega paia ma gafatia. Ua fananau mai i latou taitoatasi ma ni luitau e faatoilalo ma atiina ae le faatuatua.2
Aoao atu e uiga i le faatuatua i le ata o le faaolataga a le Atua. Ia aoao atu o la tatou malaga i le olaga nei o se taimi faataitai, o se taimi e su’e ma tofotofo ai pe o le a tatou faia soo se mea e poloai mai ai le Alii tatou te faia.3
Aoao atu e uiga i le faatuatua e tausi ai poloaiga uma a le Atua, ma ia iloa ua tuuina mai e faamanuia ai Lana fanau ma aumai ai ia i latou le olioli.4 Lapatai atu ia i latou o le a latou fetaui i ni tagata o le a latou filifili po o le fea poloaiga latou te tausia ae le ano i isi poloaiga latou te filifili e soli. Ou te ta’ua lenei mea o le ‘ai filifili i poloaiga e usitai i ai. O lenei faiga o le ilo ma filifili o le a le manuia. O le a oo atu ai i le faanoanoa. Ina ia saunia e fetaia’i ma le Atua, o lea e tausi ai e se tagata ia Ana poloaiga uma E manaomia ai le faatuatua e usitaia ai, ma o le tausia o Ana poloaiga o le a faamalosia ai lena faatuatua.
O le usiusitai e mafai ai ona tafe mai faamanuiaga a le Atua e aunoa ma le tau taofiofia. O le a Ia faamanuiaina Ana fanau usiusitai i le saoloto mai le saisaitia ma le faanoanoa. Ma o le a Ia faamanuiaina i latou i le malamalama e sili atu. Mo se faataitaiga, e tausia e se tagata le Upu o le Poto ma le iloa o le usiusitai o le a le gata ina saoloto ai mai mea e fai ma vaisu, ae o le a faapea foi ona faaopoopo ai faaamanuiaga o le atamai ma oa sili o le malamalama.5
Aoao atu e uiga i le faatuatua e iloa ai o le usiusitai i poloaiga a le Atua o le a aumaia ai le puipuiga faaletino ma le faaleagaga. Ma ia manatua, e avanoa pea agelu paia a le Atua e fesoasoani mai ia i tatou. Ua tautino mai e le Alii: “Ou te muamua atu i o outou luma. Ou te i ai foi i lo outou itu taumatau ma lo outou itu tauagavale, a o lo’u Agaga o le a i o outou loto, e siomia foi outou e a’u agelu, e lagolagoina outou.”6 Se folafolaga ina a matagofie! A tatou faatuatua, o le a fesoasoani mai o Ia ma Ana agelu ia i tatou.
O le faatuatua e le vaivai e faamalosia e ala i le tatalo. E taua ia te Ia a outou aioiga faatauanau. Mafaufau i tatalo faatauanau ma le faamaoni a le Perofeta o Iosefa Samita i aso matautia o le faafalepuipuiina i le Falepuipui o Liperate. Sa tali mai le Alii i le suia o le vaaiga a le Perofeta. Na Ia fetalai, “Ia e iloa ai, lo’u atalii e, e tuuina atu ia te oe le poto masani ona o ia mea uma, ma avea mou lelei.”7
Afai tatou te tatalo ma se vaaiga e faavavau, tatou te le tau mafaufau pe o faafofogaina mai a tatou aioiga aupito sili ona faanoanoa ma loloto. O loo faamaumauina lenei folafolaga mai le Alii i le vaega e 98 o le Mataupu Faavae ma Feagaiga:
“O a outou tatalo ua oo mai i taliga o le Alii … ma ua tusia faatasi ma lenei faamaufaailoga ma molimau—ua tauto le Alii ma poloaiina o le a talia lava.
“O lea, ua ia tuuina atu ai lenei folafolaga ia te outou, ma se feagaiga le maliliuina o le a faataunuuina; o mea uma foi na puapugatia ai outou o le a galulue faatasi mo lo outou lelei, atoa ma le mamalu o lo’u igoa ua faapea mai ai le Alii.”8
Na filifilia e le Alii Ana fetalaiga aupito malolosi e faatoafilemu ai i tatou! Faamaufaailoga! Molimau! Tauto! Poloaiina! Feagaiga le maliliuina! Uso e ma tuafafine, talitonu ia te Ia! O le a faafofogaina e le Atua au tatalo faamaoni ma faatauanau, ma o le a faamalosia ai lou faatuatua.
Ina ia atiina ae le faatuatua tumau, e taua ai se tautinoga tumau ia avea ma se tagata e totogi atoa le sefuluai. O le mea muamua lava, e manaomia le faatuatua i le totogiina o le sefuluai. Ona atiina ae ai lea e le tagata totogi sefuluai le faatuatua sili atu e oo lava ina avea le totogiina o le sefuluai o se faamanuiaga faapelepele. O le sefuluai o se tulafono anamua mai le Atua.9 Sa Ia faia se folafolaga i Lana fanau o le a Ia toina “pupuni o le lagi, ma sasaa atu … le manuia mo outou, ina seia silisili ona tele.”10 E le gata i lena, o le totogiina o le sefuluai o le a tumau ai ona tusia lou igoa i le nuu o le Atua ma puipuia oe i le “aso o le taui ma sui ma le faamuina.”11
Aisea tatou te manaomia ai se faatuatua le maluelue faapena? Aua foi o loo i luma atu aso faigata. I le lumanai, o le a seāseā lava faigofie pe lauiloa le avea ma se tagata faatuatua o le Au Paia o Aso e Gata Ai. O le a tofotofoina i tatou uma taitoatasi. Na lapatai mai le Aposetolo o Paulo e faapea, o aso e gata ai, o i latou o e mulimuli ma le filiga i le Alii “e sauaina i latou.”12 O lena lava sauaga e mafai ona olopala ai oe seia e matua vaivai ai lava, pe faaosofia ai foi oe ia e avea ma faataitaiga lelei ma lototele atili i lou olaga i aso uma.
O le auala e te taulimaina ai tofotofoga o le olaga, o se vaega o le atinaega o lou faatuatua. E oo mai le malosi pe a e manatua o loo i ai sou natura paia, o se tofi e le uma lona taua. Ua faamanatu mai e le Alii ia te oe, lau fanau, ma fanau a lau fanau, o oe o se suli moni, ma sa faapolopoloina oe i le lagi mo lou taimi ma le nofoaga faapitoa e te fanau mai ai, e te ola ae ai ma avea ma Ana ave fu’a ma tagata o le feagaiga. A o outou savavali i le ala o le amiotonu a le Alii, o le a faamanuiaina outou e faaauau pea i Lona agalelei ma avea ma se malamalama ma se faaola i Lona nuu.13
E mafai ona maua e outou taitoatasi o uso ma tuafafine ia faamanuiaga e maua mai e ala i le mana o le Perisitua paia Mekisateko. O nei faamanuiaga e mafai ona suia ai tulaga o lou olaga, i tulaga e pei o le soifua maloloina, mafutaga a le Agaga Paia, fegalegaleaiga patino, ma avanoa mo le lumanai. O le pule ma le mana o lenei perisitua ua i ai ki i faamanuiaga faaleagaga uma o le Ekalesia.14 Ae o le mea e sili ai ona matagofie, ua tautino mai e le Alii o le a Ia lagolagoina na faamanuiaga, e tusa ai ma Lona finagalo.15
O le faamanuiaga silisili o faamanuiaga uma o le perisitua, e tuuina mai i totonu o malumalu paia o le Atua. O le faamaoni a’ia’i i feagaiga e osia iina o le a e agavaa ai ma lou aiga mo faamanuiaga o le ola faavavau.16
O lou taui o le a lē na o le olaga a sau e maua ai. E tele faamanuiaga o le a fai mo oe i le olaga lenei, faatasi ai ma lau fanau ma fanau a lau fanau. O outou le Au Paia faatuatua, tou te le tauivi na o outou i o outou luitau. Mafaufau i lena mea! Na folafola mai e le Alii, “Ou te finau atu foi a’u i e ua finau atu ia te oe, ou te faaolaina foi au fanau.”17 Mulimuli ane, na oo mai ai le folafolaga lenei i Lona nuu faatuatua: “O a’u foi, le Alii, ou te tau mo i latou, ma a latou fanau, ma fanau a a latou fanau, … e oo i le tupulaga e tolu ma le fa.”18
Ua tuuina mai e lo tatou peresitene pele o Peresitene Thomas S. Monson lana molimau faaperofeta. Na saunoa o ia, “Ou te molimau atu ia te outou, e le mafuatiaina o tatou faamanuiaga folafolaina. E ui ina foufou mai afa, e ui ina to mai uaga i o tatou luga ae o lo tatou malamalama o le talalelei ma lo tatou alolofa i lo tatou Tama Faalelagi ma lo tatou Faaola o le a faamafanafanaina ma lagolagoina i tatou ma aumaia le olioli i o tatou loto a o tatou savavali ma le amiosao ma tausi poloaiga.”
Na faaauau le saunoaga a Peresitene, “Ou uso e ma tuafafine pele, aua tou te fefefe. Ia outou lototetele. E i ai le faamoemoe i le lumanai, pei foi o o outou faatuatua.”19
E faaopoopo atu la’u lava tautinoga i le tautinoga mamana a Peresitene Monson. Ou te molimau atu o le Atua o lo tatou Tama. O Iesu o le Keriso. Ua toefuatai mai Lana Ekalesia i le lalolagi. O Ana upumoni, feagaiga, ma sauniga e mafai ai ona tatou faatoilalo le fefe ae faasaga atu ma le faatuatua i le lumanai! Ou te molimau atu ai i le suafa paia o Iesu Keriso, amene.