O Le Galuega Faapaia a le Uelefea
Saunia e Bishop H. David Burton
Epikopo Pulefaamalumalu
O le galuega o le tausia e le tasi o le isi ma le “agalelei atu i e matitiva” o se galuega o le faapaiaina, na poloai mai ai le Tama.
Talofa uso e ma tuafafine. I le 1897, sa tu ai le alii talavou o Tavita O. MaKei, i se faitotoa ma se tamaitusi i lona lima. A o avea ma se faifeautalai i Stirling, i Sikotilani, sa tele taimi na ia faia ai lenei mea muamua. Peitai, i lena aso, sa tatala atu ai e se olomatua vaivai le faitotoa ma tu atu i ona luma. Sa mataga ona ofu, ua maanuminumi ona alafau ma le ulu ve’uve’ua.
Sa ia aveina le tamaitusi na ofo atu e Elder MaKei, ma sa ia ta’u atua ni upu se ono e le galo lava ia [Elder MaKei]: “Mata e maua ai sa’u falaoa?”
Na tuua e lenei feiloaiga se uunaiga malosi tumau i le faifeautalai talavou. Na ia tusia mulimuli ane, “Mai lava i lena taimi, na ou maua ai se malamalama loloto atu e faapea, e tatau i le Ekalesia a Keriso ona fiafia i le faaolataga faaletino o le tagata. Sa ou savali ese mai le faitotoa ma le lagona e faapea, o lena [fafine], faatasi ai ma … le oona matuitui i [lona] loto i le tagata ma le Atua, [sa] leai se foliga na te talia le feau o le talalelei. [Sa ia] manaomia le fesoasoani faaletino, ae sa leai se faalapotopotoga, i lo’u iloa i Stirling sa mafai ona tuuina atu ia te [ia].”1
I le fiasefulu tausaga mulimuli ane, sa ōi le lalolagi ona o le mamafatu o le Pau Tele o le Tamaoaiga. O le taimi lena, i le aso 6 o Aperila, 1936, na faasilasila mai ai e Peresitene Heber J. Grant ma ona fesoasoani, o J. Reuben Clark ma Tavita O. MaKei, le mea na mulimuli ane lauiloa o le polokalama o le uelefea a le Ekalesia. E lua vaiaso mulimuli ane, ae tofia Elder Melvin J. Ballard e avea ma ona taitaifono muamua ma Harold B. Lee e avea ma uluai pule faatonusili.
Sa le o se taumafaiga faatauvaa lenei. E ui ina sa faatula’i mai e le Alii ni agaga ofoofogia e faatautaiaina, ae na faamanino mai lava e Peresitene J. Reuben Clark e faapea “o le faatulagaina o le polokalama o le [uelefea] o le taunuuga o se faaaliga mai le Agaga Paia ia Peresitene Grant, lea na tauaveina talu mai i le taimi o faaaliga tutusa na oo mai i le usoga sa nafa ma le tiutetauave.”2
O le tautinoga a taitai o le Ekalesia e faamama avega i mafatiaga o le tagata, sa mausali ma lē maufesuia’ia. Sa manao Peresitene Grant i “se faiga o le a aapa atu ai ma tausia tagata tusa lava po o le a le tau.” Fai mai a ia, o le a naunau lava tusa pe faia ai se laasaga matautia o le “tapunia o seminare, tapuni le galuega faifeautalai mo se vaitaimi, pe tapuni ai foi ma malumalu, ae o le a latou le tuuina atu lava tagata e o matelaina.”3
Sa ou tu i autafa o Peresitene Gordon B. Hinckley i Managua, Nicaragua ina ua ia tulei saunoa i tagata e 1,300 o le Ekalesia sa aafia i se afā faataumaoi na uma ai le silia ma le 11,000 soifua. “A i ai lava punaoa a le Ekalesia,” na ia saunoa atu ai, “o le a matou le tuu atu lava outou e o matelaina pe leai ni lavalava, pe leai ni malutaga. O le a matou faia mea uma matou te mafaia e fesoasoani atu ai i le ala ua uma ona atofa mai e le Alii e faia ai.”4
O se tasi o uiga maoae o lenei taumafaiga e taulai i le Talalelei, o lona faamamafa lea i luga o le tiutetauave faaletagata lava ia ma le faalagolago ia te ia lava. Sa faamalamalama mai e Peresitene Marion G. Romney, “E tele polokalama ua faatuina e tagata e i ai o latou faamoemoega lelei, e fesoasoani ai ia i latou e le tagolima. Peitai, o le tele o nei polokalama ua mamanuina ma se faamoemoega mo se taimi puupuu o le ‘fesoasoani i tagata,’ e ese mai i le ‘fesoasoani i tagata ina ia fesoasoani ia i latou lava.’”5
O le faalagolago o le tagata ia te ia lava o se fua lea o le ola faautauta ma le i ai o le amio-pulea faaletamaoaiga. Mai lava i le amataga, sa aoaoina ai e le Ekalesia ia aiga—e tatau ona nafa i latou—ma le tiutetauave i le mea sili latou te mafaia—mo lo latou lava soifua manuia faaletino. E manaomia i tupulaga uma ona aoaoina mo ia lava ia mataupu faavae o le faalagolago o le tagata ia te ia lava: aloese mai le aitalafu, faatino mataupu faavae o le faasoasoa tatau, saunia mo taimi o mafatiaga, faalogologo ma mulimuli i upu a perofeta soifua, atiina ae le atamai e iloa ai le eseesega o mea e manaomia ma le mana’o, ma ola e tusa ai ma na mataupu faavae.
O le faamoemoe, folafolaga, ma mataupu faavae e faamalosia ai la tatou galuega o le tausiga o e matitiva ma e le tagolima, e silia mamao atu ma tuaoi o le olaga nei. O lenei galuega paia ua le na ona faamanuiaina ai i latou o e puapuagatia po o e le tagolima. I le avea ai o ni atalii ma afafine o le Atua, e le mafai ona tatou maua le fuataga atoa o le ola faavavau e aunoa ma lo tatou matua tuuina atu o i tatou atoatoa i le tausiga o le tasi ma le isi a o tatou i ai i lenei lalolagi. O loo i ai i le faatinoga ma le agalelei o le ositaulaga ma le ofoina atu o i tatou lava i isi tatou te iloa ai mataupu faavae faaselesitila ma le faapaiaga.6
Na aoao mai e le Tupu maoae o Peiniamina e faapea, o se tasi o mafuaaga tatou te foai atu ai a tatou mea i e matitiva ma auauna atu mo lo latou toomaga, ina ia mafai ai ona faatumauina se faamagaloga o a tatou agasala mai lea aso i lea aso ma savavali ma le le pona i luma o le Atua.7
Talu mai lava le faavaeina o le lalolagi, o lalagaina nuu amiotonu mai filo auro o le alofa moni. Tatou te naunau mo se lalolagi toafilemu ma ni nuu manuia. Tatou te tatalo mo ni nuu agalelei ma amiomama, lea e lafoa’i ese ai le amioleaga ae faatumauina mea lelei ma mea tonu. Po o le a le tele o malumalu tatou te fauina, po o le a le faatupulaia o o tatou tagata auai, po o le a le lelei o le vaai mai o le lalolagi ia i tatou—ae afai tatou te le faia lenei poloaiga sili ma le taua e “fesoasoani i e ua vaivai, si’i a’e lima ua tautau, ma faamalolosia tulivae ua vaivai,”8 pe liliu ese o tatou loto mai ia i latou o e puapuagatia ma faanoanoa, ua i ai i tatou i le faasalaga ma e le mafai ona faamalieina ai le Alii9 ma o le a taumamao lava le fiafia ma le olioli mai o tatou loto.
I le lalolagi atoa, toeitiiti atoa le 28,000 epikopo o loo sailia ē matitiva ina ia auauna atu i o latou manaoga. Ua fesoasoani i epikopo taitasi se aufono a le uarota e aofia ai taitai perisitua ma ausilali, ma se peresitene tuuto o le Aualofa. E mafai ona latou “faanatinati atu e fesoasoani i se tagata ese; … liligi atu le suauu i le loto mafatia o e faanoanoa; … [ma] soloia loimata o le tamaitiiti matuaoti ma faia ia fiafia le loto o se fafine ua oti lana tane.”10
Ua uunaia lelei loto o le au paia ma taitai o le Ekalesia, ma taialaina e aoaoga faavae ma lagona faalelagi o tuaoi alolofa ma le agalelei.
Sa i ai se taitai perisitua i Amerika i Saute na mafatia ona o tagata matelaina ma le o maua ni mea e moomia, o si ana siteki laitiiti. Ona o lona le manao e pagatia le fanau i le fiaaai, o lea sa ia maua ai se fasi fanua e le o faaaogaina ma faatulagaina loa le au perisitua ina ia faato’a ma totoina. Sa latou maua se solofanua toeaina ma faapipii i ai se suotosina faatauvaa ma amata loa ona galueaiina le eleele. A o le’i mae’a, na tupu se faalavelave ma pe ai le solofanua toeaina.
Nai lo le tuuina o o latou uso ma tuafafine e mafatia i le fia aai, sa fusi e uso o le perisitua le suotosina tuai i o latou lava papatua ma tosoina i le eleele malō. Sa latou tauaveina moni lava i o latou lava luga le amo o mafatiaga ma avega a o latou uso ma tuafafine.11
E i ai se mea na tupu i le talafaasolopito o lo’u lava aiga na avea ma faataitaiga o le tautino atu e tausia i latou e le tagolima. E toatele ua faalogo i le tala i vaega o taavale tosolima a Uili ma Matini, ma le ala na mafatia ai nei paionia faamaoni ma maliliu ai, a o latou onosa’ia tulaga faataumaoi o le taumalulu i la latou malaga sopo i sisifo. O Robert Taylor Burton, o le tamā, o le tamā, o le tamā o lo’u tama, o se tasi o i latou sa faatonuina e Polika Iaga e o e lavea’i mai na Au Paia pele ma le atuatuvale.
Na tusia e Tamamatua i lana api o talaaga e uiga i lea taimi, “Sa loloto le kiona ma matua’i malulu … sa matua’i malulu ua le mafai ona [matou] gaoioi. Sa i lalo ifo o le selo le fua o le malulu … ua matuai malulu ma ua le mafai ai ona feoa’i tagata.”12
Sa tufatufa mea mo le faasaoina o le ola i le Au Paia sa pa’ulia, peitai “e ui i mea uma sa mafai ona [latou] faia, e toatele lava na maliliu ai i tafaala.”13
A o malaga atu le Au Paia ua laveaiina i se vaega o le alasopo e ui atu i Echo Canyon, e tele taavaletoso sa faatafa ese ae fesoasoani i le fanau mai o se pepe teine. Sa iloa atu e Robert e lei lava ni lavalava o le tina talavou e faamafanafana ai lana pepe fou. E ui i le matuai tetele o le malulu, ae sa ia “tatala ese lona ofutino sa su’i i le fale ma tuu atu i le tina e [afifi] ai le pepe.”14 Na faaigoa le pepe ia Echo—Echo Squires—e fai ma faamanatuga o le nofoaga ma tulaga o lona fanau mai.
I tausaga mulimuli na tofia ai Robert i le Au Epikopo Pulefaamalumalu o le Ekalesia, lea na ia galue ai mo le silia ma le tolusefulu tausaga. I le 86 o ona tausaga, sa gasegase ai Robert Taylor Burton. Sa ia faapotopotoina lona aiga i tafatafa o lona moega, ma tuuina atu ia i latou lana faamanuiaga mulimuli. I ana toe upu lava sa i ai se fautuaga faigofie lenei ae maoae: “Ia outou agalelei atu i e matitiva.”15
Uso e ma tuafafine, tatou te faamamaluina na tamalii aoga na tofia e le Alii e faatulaga ma faatautaia le polokalama faatulagaina o le tuuina atu o le auaunaga i tagata lē tagolima o Lana Ekalesia. Tatou te faamamaluina i latou, o ē aapa atu i o tatou taimi i auala e le mafaitaulia ma e tele foi ina lē leoa e “agalelei atu ai i e matitiva,” fafaga i e fia aai, faalavalava i e ua lē lavalavā, auauna atu i e mama’i, ma asiasi atu i e ua saisaitia.
O le galuega paia lenei a le Faaola o loo faamoemoe e fai e Ona soo. O le galuega sa fiafia o Ia i ai, a o femaliuai ai o Ia i le lalolagi. O le galuega ua ou iloa o le a tatou maua atu o Ia o fai pe a na faapea o i ai o Ia ma i tatou i le taimi nei.16
Ua fitusefulu lima tausaga talu ai, ua tulai mai ai se faiga sa tuuto atu i le faaolataga faaleagaga ma le faaletino o tagata, mai se amataga faatauvaa. Talu mai lena taimi ua faaleleia ma faamanuiaina ai olaga o le fiasefulu miliona o tagata i le lalolagi atoa. O le fuafuaga faaperofeta o le uelefea, ua le na o se vaefaamatalaga manaia i le talafaasolopito o le Ekalesia. O mataupu faavae o loo faavae ai, ua faamanino mai ai lo tatou faasinomaga o se nuu. O le fatu lea o lo tatou faasinomaga o ni soo taitoatasi o lo tatou Faaola ma le faaa’oa’o, o Iesu le Keriso.
O le galuega o le tausia e le tasi o le isi ma le “agalelei atu i e matitiva” o se galuega o le faapaiaina, na poloai mai ai le Tama, ma ua mamanuina faalelagi e faamanuia ai, faaatoatoa, ma faaeaina ai Ana fanau. Ia tatou mulimuli i le fautuaga a le Faaola i le faitulafono o i le faataoto i le Samaria Agalelei: “Alu, ma ia faapea ona faia17 Ou te molimau atu ai i nei mea i le suafa o Iesu Keriso, amene.