Valaauina e Avea ma Tagata Paia

Benjamín De Hoyos

O Le Fitugafulu

E maeu le faamanuiaina o i tatou ina ua aumaia i tatou i le mafutaga ma le Au Paia o Aso e Gata Ai!

Ou uso e ma tuafafine pele, ou te tatalo ia fesoasoani mai le Agaga Paia ia te au e tuuina atu la’u savali.

I au asiasiga i konafesi i siteki, uarota, ma paranesi, e faatumulia au i taimi uma i se lagona maoae o le olioli e feiloai atu i tagata o le Ekalesia, o i latou i le taimi nei faapea foi i le taulotoaiga o taimi, ua valaauina e avea ma Tagata Paia. O le agaga o le filemu ma le alofa ou te lagonaina pea pe a matou mafuta, e fesoasoani ia te au ou te iloa ai o loo ou i ai i se tasi o siteki o Siona.

E ui e toatele e o mai i aiga ua lua pe sili atu foi augatupulaga o avea ma tagata o le Ekalesia, o le toatele o isi o tagata faatoa liliu mai. Ia i latou na, tatou te toe fai atu i ai foi upu faalaeiau a le Aposetolo o Paulo i Efeso:

“O lenei e le toe tagata ese outou, po o e ua aumau, a ua nuu faatasi ma le au paia, o le aiga foi o le Atua;

“O loo ua atiina ae i luga o le faavae o le au aposetolo, atoa ma le au perofeta, o le maa tulimanu o Iesu Keriso lava lea” (Efeso 2:19–20).

I ni nai tausaga ua mavae, a o ou galue ai i le ofisa o le va i fafo o le Ekalesia i Mekisiko, sa valaaulia i matou e auai i le faatinoga o se faaaliga o felafolafoaiga i luga o le leitio. O le faamoemoe o le faaaliga ia faamalamalama ai ma talanoaina ituaiga lotu eseese i le lalolagi. E toalua i ma’ua sa tofia e avea ma sui o le Ekalesia e tali ia fesili e ono fesiliga i le taimi o lea ituaiga o polokalama. Ina ua maea ni nai faasilasilaga pupuu, e pei o se faaupuga a le leitio, sa faia e le faatonu o le polokalama le faamatalaga lenei: “Ua matou faatasi i lenei afiafi ma faifeau mai Le Ekalesia a Iesu Keriso o le Au Paia o aso e Gata Ai.” Ona ia malolo lea ma fesili, “Aisea ua matuai umi ai le igoa o le Ekalesia? Aisea tou te le faaaogaina ai se igoa puupuu po o se igoa faapisinisi?”

Sa ma ataata atu ma la’u soa i le maoae o le fesili ona ma faamatala atu lea e faapea, o le igoa o le Ekalesia e lei filifilia e se tagata. Na tuuina mai e le Faaola i se perofeta o nei aso e gata ai: “Aua e faapea lava ona ta’ua la’u ekalesia i aso e gata ai, O Le Ekalesia a Iesu Keriso o le Au Paia o Aso e Gata Ai” (MFF 115:4). Na vave ona tali mai ma le faaaloalo le faatonu o le polokalama, “O le a matou toe ta’ua ma le agaga fiafia tele.” Ua le mafai ona ou manatua nei pe na faafia ona ia ta’ua le igoa maoae o le Ekalesia, ae ou te manatua le lagona matagofie na i ai ina ua ma faamalamalama atu i ai e le gata i le igoa o le Ekalesia, ae faapea foi le ala o loo faasino atu ai i tagata o le Ekalesia—o le Au Paia o aso e Gata Ai.

Ua tatou faitau i le Feagaiga Fou o tagata o le Ekalesia a Iesu Keriso sa faaigoa o Kerisiano mo le taimi muamua i Anetioka (tagai i le Galuega 11:26), ae sa faaigoaina e le tasi le isi o Tagata Paia. Ai lava se o’oo’o o ni lagona ina ua latou faalogo o ta’ua i latou e le aposetolo o Paulo “ua nuu faatasi ma le au paia, o le aiga foi o le Atua” (Efeso 2:19), ma na faapea atu foi “ua valaauina e fai ma tagata paia” (Roma 1:7; ua faaopoopo le faatusilima).

I le tulaga ua ola ai tagata o le Ekalesia i le talalelei ma mulimuli i apoapoaiga a perofeta, o le a latou faapaiaina i latou, o sia mea itiiti ma sia mea itiiti, e aunoa ma lo latou iloaina. O tagata lotomaulalo o le Ekalesia o e na faia a latou tatalo faaleaiga i aso taitasi ma le suesueina o tusitusiga paia, punouai i le faiga o talafaasolopito o aiga ma faapaiaina o latou taimi e tapuai soo ai i le malumalu, e avea i latou o Tagata Paia. O i latou na ua tuuto atu i le fatuina o aiga e faavavau. O i latou foi ua vaetofiaina se taimi mai o latou olaga pisi, e laveai ai i latou ua faaesea mai le Ekalesia ma faamalosiauina i latou e toe foi mai e saofafai i le lao’ai a le Alii. O i latou na o alii ma tuafafine faifeau ma ulugalii matutua ua tali atu i se valaau ina ia avea ma faifeautalai a le Alii. Ioe, o’u uso e ma tuafafine, e avea i latou ma Tagata Paia i le tulaga latou te iloa ai lena lagona mafanafana ma le matagofie ua ta’ua o le alofa moni, po o le alofa mama o Keriso (tagai i le Moronae 7:42–48).

E oo foi ina iloa e le Au Paia, po o tagata o le Ekalesia lo tatou Faaola e ala i puapuaga ma tofotofoga. Ia aua nei galo ia te i tatou e oo lava ia te Ia na puapuagatia i mea uma. “Na te ave foi le oti i ona luga, ina ia tatalaina e ia noanoaga o le oti o loo ua noanoatia ai nei lona nuu. Na te ave foi o latou vaivai i ona luga, ina ia faatumuina lona alo i le alofa e tusa ma le faaletino, ina ia silafia e ia e tusa ma le tino le ala e tausi a’i lona nuu e tusa ma o latou vaivai” (Alema 7:12).

I nai tausaga ua mavae atu, sa ou molimauina ai le mafatia o le toatele o tagata, e aofia ai le toatele o a tatou Au Paia. Tatou te tatalo pea mo i latou, ma talosagaina le pa’i mai o le Alii ina ia le faavaivaia lo latou faatuatua, ma ia latou fetaomi atu i luma ma le onosai. Mo i latou na, tatou te tuuina atu ai upu faamafanafana a le perofeta o Iakopo mai le Tusi a Mamona:

“O lenei, o’u uso pele, ina o mai ia i le Atua, o Le Paia. Ia manatua e tonu ona ala. Faauta, e vaapiapi le ala mo tagata, a e peitai, e i ai ma le sa’o i ona luma o le leoleo o le faitotoa o Lē Paia o Isaraelu lea, na te le tofia ai se auauna, e leai foi se isi ala, na o le faitotoa, aua e le mafai ona olegia o ia, aua foi, o lona suafa o le Alii le Atua lea.

“Ai se tu’itu’i atu foi e toina ia te ia” (2 Nifae 9:41–42).

E le afaina po o a tulaga, tofotofoga ma luitau e ono siomia ai i tatou; o se malamalama i aoaoga faavae a Keriso ma Lana Togiola o le a avea ma faapogai o lo tatou malosiaga ma le filemu—ioe, uso e ma tuafafine, o lena tofilemu i le loto e aumaia e le agaga lea e tuuina mai e le Alii i Ana Au Paia faamaoni. Na te faafaileleina i tatou, ma ua fetalai mai: “Ou te tuuina atu ia te outou le filemu. … Aua le atuatuvale o outou loto, aua foi tou te matatau” (Ioane 14:27).

E tele tausaga sa avea ai a’u o se molimau i tagata faamaoni o le Ekalesia, le Au Paia o aso e gata ai, o ē na faatoilaloina ma le lototetele ma le naunautai o latou tofotofoga ma mafatiaga e ala i le faatuatua i le fuafuaga a lo tatou Tama Faalelagi ma le Togiola a lo tatou Faaola, o Iesu Keriso, ma o lea ua tumau ai ma faaauau pea i le ala sa’o ma le vaapiapi o le faapaiaga. E le lava a’u upu e faamatala ai lo’u agaga talisapaia mo na Au Paia faamaoni uma, ia sa ou maua le avanoa matou te mafuta ai!

E ui atonu e le tutusa le loloto o lo tatou malamalama i le talalelei e pei o la tatou molimau i lona moni, afai tatou te tuu atu lo tatou talitonuga i le Alii, o le a lagolagoina i tatou i o tatou faigata uma, o o tatou tofotofoga ma o tatou puapuaga (tagai i le Alema 36:3). O lenei folafolaga a le Alii i Ana Au Paia e le o faapea mai ai o le a tuusaunoaina i tatou mai mafatiaga po o tofotofoga, peitai o le a tausisia i tatou i na taimi, ma o le a tatou iloaina o le Alii lava sa tausia ma lagolagoina i tatou.

Ou uso e ma tuafafine pele, e maeu le faamanuiaina o i tatou ina ua aumaia i tatou i le mafutaga ma le Au Paia o Aso e Gata Ai! E maeu le faamanuiaina o i tatou ona o loo i ai a tatou molimau i le Faaola faatasi ma perofeta ua mavae ma ona po nei!

Ou te molimau atu o loo soifua lo tatou Alii, o Lē Paia o Isaraelu, ma o loo Ia taitaia Lana Ekalesia, Le Ekalesia a Iesu Keriso o le Au Paia o Aso e Gata Ai, e ala mai i lana perofeta pele, o Thomas S. Monson. I le suafa o lo tatou Alii, o Iesu Keriso, amene.