“Ou te Talitonu ia Faamaoni ma Amiotonu”
Ann M. Dibb
Fesoasoani Lua i le Au Peresitene o Tamaitai Talavou
O le faamaoni i o tatou talitonuga, e ui ina lē aloa’ia ai, faigofie, pe malie ia i tatou ona o le faia, ae tatou te saogalemu ai i luga o le ala lea e tau atu i le ola e faavavau faatasi ma lo tatou Tama Faalelagi.
A’u tamaitai talavou pele, o se faamanuiaga ma se avanoa sili mo a’u le tu atu i o outou luma i lenei afiafi. O outou o se vaaiga ofoofogia ma le musuia.
O le Mataupu Faavae Lona Sefulutolu o le Faatuatua o le Autu lea o le Mutuale i le 2011. A o ou auai i faapotopotoga ma sauniga faamanatuga i lenei tausaga, ou te faalogo lava i alii talavou ma tamaitai talavou o faamatala le uiga ia i latou o le Mataupu Faavae lona sefulutolu o le Faatuatua, ma pe faapefea ona faatatau i o latou olaga. E toatele e fai mai o le Mataupu mulimuli o le Faatuatua, o le mataupu aupito umi, e sili ona faigata ona tauloto, ma o le Mataupu o le Faatuatua latou te faamoemoe e le fesili atu le epikopo ia i latou e tauloto. Peitai, e toatele foi outou ua malamalama e tele atu isi mea o i ai i le mataupu lona sefulutolu o le faatuatua.
O le Mataupu lona sefulutolu o le Faatuatua o se taiala mo le ola amiotonu Kerisiano. Manatu mo sina minute pe o a foliga o lo tatou lalolagi pe afai e filifili tagata uma e ola i aoaoga o loo maua i le mataupu lona sefulutolu o le faatuatua:“Matou te talitonu ia faamaoni, amiotonu, nofo mama, agalelei, amio mama, ma le faia o mea lelei i tagata uma: e moni, matou te faapea atu matou te tausisi i le apoapoaiga a Paulo—Matou te talitonu i mea uma, matou te faamoemoe i mea uma, ua uma ona matou onosai i mea e tele, ma matou te faamoemoe o le a mafai ona matou onosai i mea uma. Afai o i ai nisi mea mama, matagofie, logoleleia, ma tauleleia, matou te saili ia mea uma.”
I le taeao o le Aso Sa muamua o le konafesi aoao lea na faatoa saunoa ai Peresitene Monson o le perofeta, na ia ta’ua ai le apoapoaiga a Paulo o loo maua i le Filipi 4:8, lea na musuia ai le tele o mataupu faavae o le mataupu lona sefulutolu o le faatuatua. Na faailoa mai e Peresitene Monson ia taimi faigata o loo tatou o ola ai ma ia aumaia ai se faamalosiauga. Fai mai a ia, “I lenei malaga taumalualua i nisi taimi i le olaga, ia tatou … mulimuli i le fautuaga mai le Aposetolo o Paulo lea o le a fesoasoani tatou te saogalemu ai ma tumau ai i luga o le ala.”1
O le po nei, ou te fia taulai atu i ni mataupu faavae se lua e felata’i o i ai i le mataupu faavae lona sefulutolu o le faatuatua, lea o le a matuai fesoasoani “tatou te saogalemu ai ma tumau i luga o le ala.” E i ai la’u molimau malosi o lena mea ma la’u tautinoga i mataupu faavae taua o le faamaoni ma le amiotonu.
Muamua, “[Ou te] talitonu ia faamaoni.” O le a le uiga o le, ia faamaoni? O loo aoao mai e le tamaitusi o le Faamaoni i le Faatuatua, “Ia faamaoni o lona uiga ia moni, amiosa’o, ma ia leai se taufaasese i taimi uma.”2 O se poloaiga mai le Atua ia faamaoni,, 3 ma “e manaomia le faamaoni atoatoa mo lo tatou faaolataga.”4
Na aoao mai e Peresitene Howard W. Hunter e tatau ona tatou naunau ia matua faamaoni a’ia’i. Na Ia saunoa:
I le tele o tausaga ua mavae, sa i ai ni pepa e tusia ai ni savali i faapaologa ma faitotoa o o tatou falesa sa faaigoaina, ‘Ia E Faamaoni ia te Oe Lava. ’ O le tele lava e faatatau i nai mea iti, masani o le olaga. O i lea e faato’a ai le mataupu faavae o le faamaoni.
“E i ai nisi o le a faapea mai e matua’i sese lava le le faamaoni i mea tetele, ae e talitonu e le afaina mea e le taua tele. Pe e i ai moni ea se eseesega i le va o le le faamaoni i le afe tala ma se mea e aafia ai na o se sefulu sene? … Pe e i ai moni ea ni tulaga faavasegaina o le le faamaoni, e faalagolago i le telē po o le laitiiti o le mataupu?”
Na faaauau le saunoaga a Peresitene Hunter, “Afai tatou te fia maua le mafutaga a le Alii ma le Agaga Paia, e tatau ona tatou faamaoni ia i tatou lava, faamaoni i le Atua, ma o tatou uso a tagata. E afua ai ona maua o le olioli moni.”5
A tatou faamaoni i mea uma, o mea tetele ma mea iti, ona tatou maua lea o le filemu o le mafaufau ma se lotofuatiaifo e manino. E faamauoaina a tatou fegalegaleaiga aua ua faavae i luga o le faatuatuaina. Ma o le faamanuiaga aupito sili e maua mai i le faamaoni, o le a mafai ona tatou maua le mafutaga ma le Agaga Paia.
Ou te fia faamatala atu se tala faigofie sa faamalosia ai la’u tautinoga ia ou faamaoni i mea uma:
“Sa i ai se tamaloa … na alu i se tasi afiafi e gaoi mai sana i le faatoaga a lona tuaoi. Na ia aveina lona atalii laitiiti e nofo i luga o le aupa e autilo ne’i alu atu se tasi, ona ia avatu lea o se lapataiga. Sa oso le tamaloa i totonu o le pa ma se taga tele i lona lima, ma a o le’i amata ona tauina sana, sa ia autilo solo i le tasi itu ma le isi, ma talu ai na te le’i iloa atu se isi, sa punou loa o le a amata ona faatumu lana taga. … [Ona valaau ane lea o le tamaitiiti]:
Papa, toe tasi le itu lena e te le’i autilo i ai! … Ua galo ona e autilo i luga.’”’”6
A faaosoosoina i tatou ina ia le faamaoni, ma e oo mai lenei faaosoosoga ia i tatou uma lava, atonu tatou te manatu e leai lava se tasi o le a iloaina. Ua faamanatu mai e lenei tala e silafia i taimi uma e lo tatou Tama Faalelagi, ma e oo mai lava le taimi tatou te tali atu ai ia te Ia. Ua fesoasoani lenei iloa ia te au ina ia ou taumafai pea lava pea e ola ai i lenei poloaiga: “[Ou te] talitonu ia faamaoni.”
O le mataupu faavae lona lua o loo aoao mai i le mataupu faavae lona sefulutolu o le faatuatua o le “[Ou te] talitonu i le… amiotonu.” O loo faamatala mai e le lomifefiloi le upu amiotonu o le “mausali”, “lotonuu”, “sa’o”, po o le “aunoa ma le faatafa ese.”7
O se tasi o tusi masani Peretania, o le Jane Eyre, na tusia e Charlotte Bronte i le 1847. O le tagata e autu i ai o Jane Eyre, o se teineitiiti matuaoti ma e matua mativa lava, ae na ia faaalia le uiga o le ia faamaoni. I lenei talafatu, ua alofa se tamaloa e igoa ia Mr. Rochester ia Miss Eyre ae e le mafai ona faaipoipo ia te ia. Ae, na ia aioi ia Miss Eyre la te nonofo e aunoa ma le faaipoipoina. E alofa foi Miss Eyre ia Mr. Rochester, ma sa tofotofoina o ia, ma sa fesili ifo ai ia te ia lava, “O ai o i le lalolagi e popole mai ia te oe?? po o le, o ai o le a manu’a ona o mea e te faia?”
Na vave ona tali le lotofuatiaifo o Jane: “Ou te manatu mo a’u lava. O le tele o lou tuuatoatasi, o le tele o le leai o ni a’u uo, o le tele o le le lagolagoina o a’u, o le tele foi lea ou te faaaaloalogia ai a’u lava. O le a ou tausia le tulafono na tuuina mai e le Atua. … E lei aumaia tulafono ma mataupu faavae mo taimi e leai ai ni tofotofoga: na aumai mo taimi faapenei …Afai ou te solia i soo se taimi e mafai ai … o le a la le aoga? E i ai lo latou aoga—o lea la ou te talitonu ai pea lava … o mua’i manatu, o mea na ou muai filifili e fai, ua pau ia o mea o ia te au i lenei taimi ou te tiu ai: o iina foi e tu ai o’u vae.”8
I se taimi atuatuvale o faaosoosoga, sa faamaoni Jane Eyre i ona talitonuga, sa ia faatuatua i le tulafono na tuuina mai e le Atua ma sa ia “tumau ai” e tetee atu i le faaosoosoga.
O le faamaoni i o tatou talitonuga, e ui ina lē aloa’ia ai, faigofie, pe malie ia i tatou ona o le faia, ae tatou te saogalemu ai i luga o le ala lea e tau atu i le ola e faavavau faatasi ma lo tatou Tama Faalelagi. Ou te fiafia lava i le ata lea na tusia e se tamaitai talavou e faamanatu ai ia te ia lona naunauga ia iloa le olioli o le ola ai e faavavau ma lona Tama Faalelagi.
O le faamaoni foi e mafai ai ona tatou faia se aafiaga lelei i olaga o isi. Sa ou faalogo talu ai nei i le tala musuia lenei i se tamaitai talavou, e faapea o lana tautinoga ia faamaoni i ona talitonuga, na i ai se aafiaga tele i le olaga o se tamaitai talavou.
I ni nai tausaga talu ai, sa i ai ia Kristi ma Jenn i le aufaipese a le vasega i Hurst, Texas. E ui e le’i iloa lelei e le tasi le isi, ae sa faalogo Jenn o talanoa ia Kristi i se tasi aso i ana uo e uiga i lotu, o latou talitonuga eseese, ma tala e fiafia i ai i le tusi paia. Talu ai nei, ina ua toe fesootai ma Kristi, sa faamatala ai e Jenn le tala lenei:
“Sa ou lagona le faanoanoa ona sa ou le iloaina se mea e uiga i mea sa outou talanoa ai ma au uo, ma o lea sa ou fai ai i o’u matua ou te manao i se Tusi Paia i le Kerisimasi. Na ou maua le Tusi Paia ma amata loa ona faitau. O iina na amata ai la’u malaga faalelotu ma la’u sailiga mo le ekalesia moni. … Na mavae le sefululua tausaga. O le taimi lena, sa ou asiasi ai i le tele o ekalesia ma auai soo i lotu ae ou te lei lagonaina lava le i ai o se isi mea. I se tasi po, sa ou tootuli ai ma ole atu ia ou iloa le mea e fai. O le po lena, sa ou miti ai ia te oe, Kristi. Ou te lei toe vaai ia te oe talu mai le aoga maualuga. Sa ou manatu e ese a la’u miti, ae sa ou le manatu e i ai se mea taua. Sa ou toe miti foi ia te oe i isi po e tolu na sosoo ai. Sa tele se taimi ou te mafaufau ai e uiga i a’u miti. Sa ou manatuaina o oe o se Mamona. Sa ou su’ea le uepisaite a Mamona. O le mea muamua na ou mauaina o le Upu o le Poto. Na maliu lo’u tina ona o le kanesa o le mama, i le lua tausaga talu ai. O ia o se tagata ulaula ma na matua taua lo’u faitau e uiga i le Upu o le Poto. Mulimuli ane, sa ou asiasi ai i le fale o lo’u tama. Sa ou nofonofo i le potu malolo, ma sa amata ona ou tatalo. Sa ou fesili e fia iloa po o fea ou te alu i ai ma po o le a foi le mea e fai. O le taimi lena, na sau ai se faasalalauga a le Ekalesia i le televise. Sa ou tusia le numera ma ou telefoni ai lava i le po lena. Sa valaau mai faifeautalai ina ua mavae aso e tolu, ma fesili mai pe mafai ona latou aumaia se Tusi a Mamona i lo’u fale. Sa ou fai tau, ‘Ua lelei.’Sa papatisoina a’u i le tolu ma le afa masina mulimuli ane. Na mavae le lua tausaga, sa ou feiloai i lo’u toalua i le lotu. Sa ma faaipoipo i le Malumalu o Dallas. O le taimi nei, o i ma’ua o matua o se fanau laiti aulelei e toalua.
“Ou te fia faafetai atu ia te oe, Kristi. Na faia se faataitaiga matagofie i le taimi atoa i le aoga maualuga. Sa e agalelei ma amio mama. Sa faia e faifeautalai a’u lesona ma valaaulia a’u ou te papatiso, peitai o oeo lo’u faifeautalai lona tolu. Sa e totoina se fatu e ala i au taga, ma na e faaleleia moni lava lo’u olaga. Ua i ai nei so’u aiga e faavavau. O le a ola a’e la’u fanau ua iloa le atoaga o le talalelei. O le faamanuiaga silisili e mafai ona maua e soo se tasi o i tatou. Sa e fesoasoani e aumaia lena mea i lo’u olaga.”
Ina ua ou faafesoota’ia o ia, na faamatala ai e Kristi, “O nisi taimi tatou te manatu tatou te faalogo i le lisi o uiga faaleatua o loo otooto mai i le mataupu faavae lona sefulutolu o le faatuatua, ma tatou lagona ai le lofituina. Peitai, ou te iloa a tatou ola ai i nei tulaga faatonuina ma taumafai e mulimuli i le faataitaiga a Keriso, e mafai ona tatou faia se eseesega. …Ou te lagona e faapei o Amona i le Alema 26:3 ina ua ia fai mai, ‘O le manuia foi lenei ua foaiina mai ia te i tatou, aua ua faia i tatou ma tufugaaao o le Atua e faataunuu a’i lenei galuega tele.’”
Ou te tatalo ia le gata ina tofu faaupu mai e outou “Ou te talitonu ua faamaoni ma amiotonu,” ae o le a outou tautino atu foi e ola ai i lena folafolaga i aso taitasi ma aso uma. Ou te tatalo a outou faia lenei mea, o le a lagolagoina outou e le malosi, alofa ma faamanuiaga a le Tama Faalelagi, e faia ai mea sa auina mai outou iinei e fai. Ou te fai atu ai nei mea i le suafa o Iesu Keriso, amene.