Ua Toe O’o Mai foi le Konafesi

Thomas S. Monson

President of the Church

Faafetai atu i lo outou faatuatua ma lo outou tuuto i le talalelei, mo le alofa ma le agalelei o loo faaalia e le tasi i le isi, ma mo le auaunaga o loo outou tuuina atu.

Ina ua fuafuaina lenei fale, sa matou manatu o le a le faatumuina lava. Ae se’i silasila la nei i ai.

Ou uso e ma tuafafine pele, matuai lelei tele ua tatou toe mafuta faatasi foi a o tatou amataina le konafesi aoao lona selau valusefulu ma le tasi faaletausaga a Le Ekalesia a Iesu Keriso o le Au Paia o Aso e Gata Ai.

E foliga mai ua matuai vave tele ona mavae atu le ono masina ua te’a nei, aua sa ou matua pisi lava i le tele o tiutetauave. O se tasi o faamanuiaga silisili i lenei taimi, o le toe faapaiaina lea o le Malumalu matagofie o Hawaii, lea toeitiiti atoa le lua tausaga o faia ni faafouga tetele. Sa matou malaga i ai ma Peresitene ma Sister Henry B. Eyring, Elder ma Sister Quentin L. Cook, ma Elder and Sister William R. Walker. I le afiafi i luma mai o le toe faapaiaga, lea na faia ia Novema, sa matou matamata ai i le 2,000 tupulaga talavou mai le itulagi o le malumalu, a o latou faatumulia le Cannon Activities Center i le laumua o le BYU-Hawaii sa latou faafiafia ai. Sa faaautuina la latou polokalama “O Le Nofoaga o le Faapotopotoina” ma sa toe fafagu ai ma le fatufatua’i ma le matagofie ia mea na tutupu i le talafaasolopito o le Ekalesia i le lotoifale ma le talafaasolopito o le malumalu. Oka se afiafi ina a matagofie!

O le aso na sosoo ai o se taumafataga faaleagaga a o toe faapaiaina le malumalu i sauniga e tolu. Sa mafutaina i matou e le Agaga o le Alii i se tulaga maoae.

Tatou te faaauau pea ona fausia malumalu. O lo’u avanoa paia lenei i lenei taeao, e faasilasila atu ai isi malumalu e tolu lea ua maua nei nofoaga e fausia ai, ma i masina ma tausaga a sau, o le a fausia ai i nofoaga nei: Fort Collins, Colorado; Meridian, Idaho; ma Winnipeg, Manitoba, Canada. O le a avea moni o se faamanuiaga i o tatou tagata i na eria.

O tausaga taitasi e faitau miliona sauniga e faatino i malumalu. Ia tatou tumau pea i le faamaoni i le faatinoina o na sauniga, e le gata mo i tatou lava, ae faapea foi o tatou aiga ua maliliu o ē ua le mafai ona faia mo i latou lava.

O loo faaauau pea e le Ekalesia ona tuuina atu fesoasoani alofa mo tagata i taimi o mafatiaga. Talu ai nei lava, ua avatu ai o tatou loto ma la tatou fesoasoani i Iapani, ina ua maea le mafuie faataumaoi ma le galulolo ma luitau na tulai mai i le nofoaga o le malosiaga faaniukilia. E silia ma le 70 tone o sapalai ua tatou tuuina atu, e aofia ai meaai, vai, palanikeke, moega, o vailaau faamama, lavalava, ma suauu. Sa ofo mai e o tatou talavou matutua o latou taimi e saili ai tagata o le ekalesia sa misi, e faaaoga ai le Initoneti, faasalalauga faaagafesootai, ma isi auala faaona po nei o fesootaiga. O loo tilivaina atu fesoasoani e le au paia, e ala i uila afi na saunia e le Ekalesia, i vaega e faigata ona o’o atu i ai taavale. Ua faatulagaina galuega faatino e faaputuputu pusa o mea faamama ma mea mo le soifua maloloina, i siteki tuufaatasi ma uarota i Tokyo, Nagoya ma Osaka. E oo mai i le taimi nei, ua silia ma le 40,000 itula o le auaunaga ua ofoina atu e le silia ma le 4,000 volenitia. O le a faifai pea la tatou fesoasoani i Iapani, ma nisi lava eria e manaomia ai.

Ou uso e ma tuafafine, ou te faafetai atu i lo outou faatuatua ma lo outou tuuto i le talalelei, mo le alofa ma le agalelei o loo faaalia e le tasi i le isi, ma mo le auaunaga o loo outou tuuina atu i a outou uarota ma paranesi ma siteki ma itu. Faafetai atu foi, i lo outou faatuatua i le totogiina o a outou sefuluai ma taulaga anapogi, ma lo outou limafoai e tuuina atu a outou saofaga i isi tupe a le Ekalesia.

E oo mai i le faaiuga o le tausaga e 2010 ua 52,225 faifeautalai o loo auauna atu i misiona e 340 i le lalolagi atoa. O le galuega faafaifeautalai o le toto ola lea o le malo. Sei ou fautua atu lava afai e te mafaia, ona e fuafua lea e fai se saofaga i le Tupe Lautele mo Faifeautalai a le Ekalesia.

O lea, uso e ma tuafafine, ua tatou naunau lava e faalogologo i savali o le a tuuina mai ia i tatou i le asō ma ā taeao. O i latou o le a lauga mai ia i tatou sa saili atu i le fesoasoaniga ma le taitaiga a le lagi a o latou saunia a latou savali. Tau ina ia faatumuina i tatou i le Agaga o le Alii ma ia faagaeetia ma musuia a o tatou faalogo ma aoao, o la’u tatalo lea. I le suafa o Iesu Keriso, amene.