E mafai faapefea ona ou saunia nei e avea ma se tane ma se tamā amiotonu?

“I le fuafuaga paia, e tatau ona pulefaamalumalu tama i o latou aiga i le alofa ma le amiotonu ma o i latou e tuuina atu mea e manaomia o le olaga ma le puipuiga mo o latou aiga” (“O Le Aiga: O Se Folafolaga i le Lalolagi,” Ensign po o le Liahona, Nov. 2010, 129). E mafai ona tatou saunia mo nei matafaioi e ala i le faataunuuina ma le faamaoni o o tatou tiute faaleperisitua, aoao i auala e maua ai faaaliga patino, alolofa ma auauna atu i o tatou aiga i le taimi nei, mauaina o se aoaoga, ma aoao auala e faigaluega ai.

Saunia oe lava ia faaleagaga

Na faapefea ona saunia e lau auaunaga faaleperisitua o se alii talavou oe ina ia avea ma se tane ma tama amiotonu? O a nisi mea ua e faia e saunia ai? O a nisi mea e te moomoo maimau pe ana ua e faia?

O a ni aafiaga e mafai ona maua e alii talavou i le taimi nei e mafai ona fesoasoani ia i latou e sauniuni ai e avea o ni tane ma ni tama amiotonu? O le a faapefea ona faamanuiaina o latou aiga i le lumanai i a latou sauniuniga?

Ia suesue ma le agaga tatalo ia mau ma punaoa nei. O le a se mea e te lagona o le a talafeagai i alii talavou e te aoaoina?

Aperaamo 1:1–4, 18–19 (Ua vaai Aperaamo i faamanuiaga e mafai ona maua e ia ma ana fanau e ala i le i ai o le perisitua i lona olaga)

1 Nifae 2:1–3 (Ua maua e Liae faaaliga mai le Alii mo le saogalemu o lona aiga)

1 Nifae 16:14–32 (Ua fesoasoani ma faaali atu e Nifae le faaaloalo i lona aiga ina ua latou fiaaai i le vao)

MF&F 42:22 (E tatau i se tane ona faamaoni i lana avā)

MF&F 58:26–28; 107:99–100 (O mau o loo faamatala ai le taua o le galue)

Joy D. Jones, “O Se Tupulaga e Mafai Ona Tetee Atu i le Agasala,” Ensign po o le Liahona, Me 2017, 87–90

K. Brett Nattress, “E Leai Se Olioli Sili Atu Nai lo le Iloa ua Latou Iloa,” Ensign po o le Liahona, Nov. 2016, 119–21

D. Todd Christofferson, “O Tamā,” Ensign po o le Liahona, Me 2016, 93–97

“O Le Aiga: O Se Folafolaga i le Lalolagi,” Ensign po o le Liahona, Nov. 2010, 129

Vitio: “E Mafai e Tama Ona Faaaoga le Perisitua e Faamanuia ai o Latou Aiga”; “Tama Faalelalolagi, Tama Faalelagi”

2:4

3:55

Aoao atu i le ala a le Faaola

Na alofa le Faaola i Ona soo, tatalo mo i latou, ma faaauau ona auauna atu ia i latou. Sa silafia e Ia mea sa latou fiafia i ai, faamoemoe, ma naunautaiga, ma mea sa tutupu i o latou olaga. O le a se mea o e iloaina e uiga i alii talavou o loo e auauna atu i ai? O le a se mea e mafai ona e faia e fesoasoani ia i latou ina ia avea ma ni tane ma ni tama amiotonu i le lumanai?

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama.Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi Tiute i le Atua ), uunai i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei.E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Fai atu i tagata o le korama e fefaasoaai taitoalua i se mea latou te manatua mai le lesona o le vaiaso ua te’a.
Valaaulia ia uso o le korama e faitau le Aperaamo 1:1–2 ma tusi ni a latou lava faauigaga o nei mau, e faamatala ai ia ituaiga tane ma tama e fia avea ai i latou. Valaaulia i latou e faasoa mai ni mea sa latou tusia pe afai latou te mananao e fai. Uunaia i latou e faaopoopo i a latou faamatalaga i le faagasologa o le lesona.

Aoao faatasi

O gaoioiga taitasi nei e mafai ona fesoasoani i uso o le korama e malamalama ai pe faapefea ona avea ma ni tane ma ni tamā amiotonu. I le mulimuli ai i le taitaiga a le Agaga, filifili se tasi po o le sili atu o le a sili ona aoga mo lau korama:

E mafai ona e mafaufau i se lesona o meafaitino o le a fesoasoani i alii talavou e malamalama ai i le uiga o le tetee atu i le agasala? Mo se faataitaiga, e mafai ona e aumaia se faamalu ma se momi i le vasega ma faaali atu le auala e tetee ai e le tasi meafaitino le vai ae o le isi na te mimitiina. E faapefea la ona faatatau lenei faatusatusaga i le teteeina o le agasala? Valaaulia alii talavou e suesue i le lauga a Sister Joy D. Jones “O Se Tupulaga e Mafai ona Tetee Atu i le Agasala” ma fai se lisi o mea e mafai ona latou faia pe a avea i latou ma tamā e tausi a’e se fanau e tetee atu i le agasala. E mafai faapefea e le faia o mea i luga o a latou lisi ona saunia i latou i le taimi nei e avea ma ni tane ma ni tama amiotonu?
Valaaulia alii talavou e faitau e uiga i le tina o Elder K. Brett Nattress i lana saunoaga “E Leai Se Olioli Sili Atu Nai lo le Iloa ua Latou Iloa.” O a ni uiga o ia Sister Natress e mananao alii talavou e faataitai a o latou sauni mo le tulaga faaletama? O le a lana mea sa fai e tausia ai se aiga amiotonu? O a nisi faataitaiga o ni matua amiotonu na vaaia e alii talavou? O a mea e mafai ona latou faia e mulimuli ai i lena faataitaiga?
Fai atu i alii talavou e suesue i le lauga a Elder D. Todd Christofferson “O Tamā,” vaavaai mo ni uiga o ni tamā amiotonu. Valaaulia ia alii talavou taitoatasi e mafaufau i se taimi sa faataitaia ai e lona tamā po o se tagata na te faatusaina o se tamā se tasi o uiga na faasoa mai e Elder Christofferson. Atonu e mafai ona e fesoasoani atu i alii talavou e faasoa mai nei aafiaga i le valaauliaina o i latou e tusi ni ata o aafiaga ua latou mafaufau i ai ma faasoa mai ia ata i le vasega. E mafai foi ona e tusia ni fuaiupu mai le lauga a Elder Christofferson i luga o le laupapa, ma tuu ni avanoa e suitulaga i nisi o upu. Fai i alii talavou e mate mai upu e tatau ona tuu i avanoa ia. E mafai faapefea ona mulimuli alii talavou i le fautuaga lea na tuu mai e Elder Christofferson? (Mo ni manatu, tagai i le “Galue ma le Faalagolago o le Tagata ia te Ia Lava” ma le “Aoga” i le Mo le Malosi o le Autalavou.)
Valaaulia ia alii talavou e faitau le parakalafa lona fitu o le “O Le Aiga: O Se Folafolaga i le Lalolagi” (pe matamata i le ata vitio “E Mafai e Tama ona Faaaoga le Perisitua e Faamanuia ai o Latou Aiga”) ma vaavaai po o a ni o latou tiute pe a avea i latou ma ni tane ma ni tama. Vaevae le korama i ni vaega toaitiiti, ma fai atu i vaega taitasi e mafaufau i ni auala e mafai ona latou saunia ai i le taimi nei mo se tasi o nei tiutetauave. Fai atu i se tagata e toatasi o vaega taitasi e faasoa mai i le korama mea sa talanoaina i lana vaega.

2:4
Faitau faatasi o se korama, le 1 Nifae 2:1–3, lea na maua ai e Liae se faaaliga e o ese mai le amioleaga o Ierusalema. O le a se mea na aoao e alii talavou mai le faataitaiga a Liae e uiga i le avea ma se tama amiotonu? O le a se mea e mafai ona latou faia i le taimi nei e atiina ae ai ia uiga ia sa ia Liae? Fai atu i alii talavou e faitau le 1 Nifae 16:14–32 ma vaavaai mo le auala na taulimaina ai e Nifae lona aiga. Na faapefea ona fesoasoani lenei mea e saunia ai Nifae mo ana matafaioi o se tane ma se tama? Fesili atu i alii talavou po o a ni mea o latou faia i totonu o latou aiga i le taimi nei e saunia ai ina ia avea ma ni tane ma ni tama.

Fai atu i alii talavou e faasoa mai mea na latou aoaoina i le aso. Pe ua latou malamalama i le auala e saunia ai mo o latou matafaioi i le lumanai o ni tane ma ni tama? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Valaaulia e faatino

O le alii talavou o loo taitai e faaiuina le fonotaga. E mafai ona ia:

Valaaulia tagata o le korama e fai se mea e faamalolosia ai o latou aiga.
Faasoa atu ni sini ua ia faatutuina e saunia ai e avea ma se tane ma se tama amiotonu.