Aisea e taua ai le mulimuli i tulaga faatonuina a le Ekalesia e faatatau i tafaoga faamasani?

Ua tuuina mai ia i tatou e perofeta o aso e gata ai ni tulaga faatonuina e uiga i tafaoga faamasani e puipuia ai i tatou mai lamatiaga faaleagaga ma fesoasoani ia i tatou e saunia ina ia i ai se aso o le a maua ai se soa agavaa e faavavau. O nei tulaga faatonuina e aofia ai le aua nei tafao faamasani ao lei atoa le 16 tausaga, aloese mai le tafafao soo ma le tagata lava e tasi, ma ia na o i latou e maualuga o latou tulaga faatonuina o le ola mama e te tafao faamasani i ai.

Saunia oe lava ia faaleagaga

Suesue ma le agaga tatalo mau ma punaoa nei. O a ni mea e te manatu e sili atu ona faatatau i alii talavou a o amata ona latou fegalegaleai ma tamaitai talavou

Teuteronome 7:3–4 (Aua le faaipoipo i fafo atu o le feagaiga)

Mataupu Faavae ma Feagaiga 46:33 (Faataitai le amio mama ma le paia i luma o le Alii)

“Tafaoga Faamasani,” Mo Le Malosi o le Autalavou (2011), 4–5

Gordon B. Hinckley, “Ola Agavaa Mo Le Teine Aupito Lalelei O Le a e Faaipoipo I Ai i se Aso,” Liahona, Iulai 1998, 57–64

Vitio: “O Se Tausaga Fou: Faamasaniga”

12:42

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi Tiute i le Atua ), uunai i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Valaaulia alii talavou taitoatasi e ta’u atu se upu se tasi e faamatala ai le lesona o le vaiaso ua te’a. Fesili atu i alii talavou pe latou te mananao e faasoa atu se aafiaga na latou maua i le vaiaso ua te’a e faatatau i le lesona.
Fai atu i alii talavou e lisi i luga o le laupapa mea ua latou iloa e uiga i tulaga faatonuina a le Alii e uiga i tafaoga faamasani. Faaopoopo atu i le latou lisi a o latou aoao atili e uiga i nei tulaga faatonuina i le faagasologa o le lesona.

Aoao faatasi

O gaoioiga taitasi o loo i lalo e mafai ona fesoasoani i tagata o le korama ia malamalama i tulaga faatonuina a le Ekalesia e uiga i tafaoga faamasani. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

Valaaulia ia alii talavou taitasi e tusi i lalo sana lisi o uiga na te manao ia i ai i sana ava i le lumanai. Valaaulia alii talavou e faasoa mai a latou lisi, pe a talafeagai ai, i le vasega. Fai atu i se tasi o alii talavou e faitau mai le faamatalaga lenei a Elder Robert D. Hales: “Afai e te fia faaipoipo i se tagata lelei, aulelei, faamaoni, fiafia, galue malosi, faaleagaga, ia avea ma lena ituaiga o tagata” (“Fetaiai ma Luitau o le Lalolagi i Lenei Vaitaimi,” Ensign po o le Liahona, Nov. 2015, 46). Ao toe iloilo e alii talavou ia lisi ia sa latou faia, atonu e te manao e fesili atu ia i latou pe faapei ni o latou lagona pe afai na i ai foi i a latou ava i le lumanai se lisi talitutusa e uiga ia i latou. O le a se mea o latou faia i le taimi nei ia avea ai ma le ituaiga tagata e fia faaipoipo i ai a latou ava i le lumanai? Fai atu i alii talavou e talanoa i auala e mafai ai e i latou lava ia ona atiae nei uiga i le taimi nei ma le ala o le a aafia ai e nei uiga le ituaiga tagata latou te tafafao faamasani i ai.
Fai atu i alii talavou e faalogo mo ma talanoa e uiga i fautuaga latou te fiafia i ai a o latou faalogologo pe faitau i le saunoaga a Peresitene Gordon B. Hinckley “Ola Agavaa Mo Le Teine Aupito Lalelei o le a E Faaipoipo I Ai i se Aso.” O le a se mea o aoao mai e Peresitene Hinckley e uiga i filifiliga e fai e alii talavou pe a latou tafafao faamasani? Fai atu ia i latou e tusi i lalo ni uiga latou te mananao ia i ai i o latou toalua i le lumanai, ma filifilia ia le itiiti ma le tasi se uiga mai le lisi e mafai ona latou faaleleia atili ia avea ai ma ituaiga soa o loo latou faamoemoe i ai. E mafai faapefea e o latou aafiaga i le taimi nei i tafaoga faamasani ona faatosina ai le ituaiga tagata o le a iu ina latou faaipoipo i ai?
Faaali ni vaega o le vitio “O Se Tausaga Fou: Faamasaniga,” ma taofi le vitio e tuu atu i alii talavou le taimi e faailoa mai ai tulaga faatonuina ia na taua e tagata i le vitio. Fai atu i tamaitai talavou e toe suesue i le “Tafaoga Faamasani” i le Mo le Malosi o le Autalavou ma vaavaai mo nisi tulaga faatonuina e lei faailoaina mai i le vitio. Fai atu ia i latou e tali mai i fesili e pei o fesili nei: “O a tulaga faatonuina a le Ekalesia e faatatau i tafaoga faamasani?” “Aisea e taua ai mo oe le mulimuli i nei tulaga faatonuina?” ma le “O le a le faamoemoega o tafaoga faamasani?” Fai atu i alii talavou e talanoa i ni auala e mafai ona latou tali atu ai pe a latou lagona le uunaia o i latou e faia se mea e le ogatasi ma tulaga faatonuina a le Ekalesia e faatatau i tafaoga faamasani. Mafaufau e faasoa atu ni faataitaiga o le auala na faamanuiaina ai oe e ala i le tausia o tulaga faatonuina a le Ekalesia e faatatau i tafaoga faamasani, ma fai atu i nisi e faasoa mai ni aafiaaga talitutusa. Valaaulia ia alii talavou e faasoa mai ni mea o le a latou faia e tausia ai nei tulaga faatonuina.

12:42
Fai atu i tagata o le korama e toe iloilo le vaega “Tafaoga Faamasani” i le Mo le Malosi o le Autalavou ma tusi i lalo soo sa latou fesili e i ai e uiga i tafaoga faamasani. Valaaulia se vaega o alii ma tamaitai talavou e matutua atu e tali a latou fesili ma talanoa i tulaga faatonuina o tafaoga faamasani. Ia uunaia tagata o le vaega ia aofia ai faataitaiga o auala na latou ola ai i tulaga faatonuina a o latou tafafao faamasani, e pei o le faiga faalelei o lavalava, filifilia o gaoioiga talafeagai, ma le tafafao faamasani ia i latou e maualuluga o latou tulaga faatonuina.

Fai atu i alii talavou e faasoa mai mea na latou aoaoina i le aso. Pe ua latou malamalama i tulaga faatonuina a le Ekalesia e uiga i tafaoga faamasani? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Valaaulia e faatino

O le alii talavou o loo taitai e faaiuina le fonotaga. E mafai ona ia:

Uunaia tagata o le korama e faatu se sini ia usitai i tulaga faatonuina a le Alii e uiga i tafaoga faamasani.
Tuu atu lana molimau i faamanuiaga e oo mai mai le usiusitai i tulaga faatonuina a le Alii e uiga i tafaoga faamasani.