E faapefea ona faaatoatoa e matafaioi a alii ma tamaitai ia le tasi ma le isi i totonu o aiga?

I le fuafuaga paia, ua tuuina mai ai e le Tama Faalelagi i alii ma tamaitai ni tiutetauave eseese e fesoasoani ia i latou i le faataunuuina o matafaioi faifaatasi o se tane ma se ava. “E tatau ona pulefaamalumalu tama i o latou aiga i le alofa ma le amiotonu ma o i latou e tuuina atu mea e manaomia o le olaga ma le puipuiga mo o latou aiga. O le uluai matafaioi a tina o le faafaileleina lea o a latou fanau. O nei matafaioi paia, e ao i tama ma tina ona fesoasoani le tasi i le isi o se paaga tutusa” (“O Le Aiga: O Se Folafolaga i le Lalolagi,” Ensign po o le Liahona, Nov. 2010, 129).

Saunia oe lava ia faaleagaga

O a ni faataitaiga sa e vaaia o ni tina ma ni tama o e na faaatoatoaina e le tasi le isi i o latou matafaioi? Na faapefea ona aafia lou aiga e le iloaina o nei matafaioi faavavau?

E faapefea ona e fesoasoani i alii talavou ia malamalama i o latou matafaioi paia o ni tama o i le lumanai? O le a se mea e mafai ona latou faia i le taimi nei e saunia ai mo lenei matafaioi?

Ia suesue ma le agaga tatalo ia mau ma punaoa nei. O le a se mea ua uunaia ai oe e faasoa atu i alii talavou?

MF&F 121:41–43 (Mataupu faavae e faaaoga ai ma le amiotonu le perisitua)

Mose 3:21–24; 5:1–4 (Sa galulue faatasi Atamu ma Eva o se paaga tutusa)

Linda K. Burton, “O Le A Tatou O Ae Faatasi i Luga,” Ensign po o le Liahona, Me 2015, 29–32

L. Tom Perry, “Mauaina o le Filemu Tumau ma le Fausiaina o Aiga e Faavavau,” Ensign po o le Liahona, Nov. 2014, 43–45

D. Todd Christofferson, “O Le Malosiaga Amiotonu o Tamaitai,” Ensign po o le Liahona, Nov. 2013, 29-32

“O Le Aiga: O Se Folafolaga i le Lalolagi,” Ensign po o le Liahona, Nov. 2010, 129

Vitio: “Ia Tatou Faatamatane,” “O Tamaitai i o Tatou Olaga”

3:12

2:43

Aoao atu i le ala a le Faaola

Na alofa le Faaola i Ona soo, tatalo mo i latou, ma faaauau ona auauna atu ia i latou. Sa silafia e Ia mea sa latou fiafia i ai, faamoemoe, ma naunautaiga, ma mea sa tutupu i o latou olaga. O le a se mea o e iloaina e uiga i alii talavou o loo e auauna atu i ai? O le a se mea e mafai ona e faia i lenei vaitaimi e fesoasoani ai ia i latou ina ia saunia e pulefaamalumalu, ma puipuia o latou aiga o i le lumanai?

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi Tiute i le Atua ), uunai i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Faaali atu i tagata o le korama se mea faitino po o se ata ma fai atu ia i latou e faamatala pe faapefea ona fesootai ma le lesona o le vaiaso ua tea.
Aumai ni mea faitino se lua e faaaoga faatasi ia ausia ai se sini fai faatasi (e pei o se penitala ma se pepa po o se samala ma se fao). Fai atu i alii talavou e faamatala le eseesega o le va o mea faitino ma auala e faaaoga faatasi ai. Ia faamalamalama atu o alii ma tamaitai ua tuuina i ai ni tiutetauave eseese lea e paleni (pe “faaatoatoa”) ai e le tasi le isi ina ia faataunuu ai faamoemoega o le Atua. Fai atu i alii talavou e faamatala ni auala e faaatoatoa ai e alii ma tamaitai ia le tasi ma le isi.

Aoao faatasi

O le a fesoasoani gaoioiga taitasi nei i tagata o le korama i matafaioi felagolagomai o alii ma tamaitai i totonu o aiga. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

Tusi ulutala nei i luga o le laupapa: Tiutetauave a Tama ma le Tiutetauave a Tina. Fai atu i alii talavou e fai se lisi o tiutetauave e faamoemoe le Alii e faataunuuina e tama ma tina. Ina ia fesoasoani ia i latou i le faiga o lenei lisi, valaaulia i latou e suesue i le parakalafa lona fitu o le “O Le Aiga: O Se Folafolaga i le Lalolagi” (tagai i le Tiute i le Atua, 107)ma ni vaega talafeagai o le saunoaga a Elder L. Tom Perry “Mauaina o le Filemu Tumau ma le Fausiaina o Aiga e Faavavau” ma le saunoaga a Elder D. Todd Christofferson “O Le Malosiaga Amiotonu o Tamaitai.” O le a se mea e mafai ona latou aoao mai nei punavai e uiga i matafaioi paia o tama ma tina? E faapefea ona faaatoatoaina e nei matafaioi le tasi ma le isi? E faapefea ona ese nei aoaoga mai mea o loo aoaoina e le lalolagi? Valaaulia ia alii talavou e faasoa mai ni faataitaiga o taimi na latou molimauina ai le faataunuuina e matua o o latou mataifaioi felagolagomai.
Valaaulia ia alii talavou e suesue i le Mose 5:1–12 ma lisi i le laupapa mea uma na faia faatasi e Atamu ma Eva o se ulugalii (mo se ata, tagai Tusi Ata o le Talalelei, 5). Valaaulia ia alii talavou e faaopoopo atu i le lisi nisi o mea e faatatau i le auala o galulue faatasi ai tane ma ava o ni paaga tutusa.
Faaali le vitio “O Tamaitai i o Tatou Olaga” po o le “Ia Tatou Faatamatane.” O le a se mea na aoaoina e alii talavou mai le vitio e uiga i le auala o loo faamanuia ai e tane a latou ava? Fai atu i alii talavou e mafaufau e uiga i le ituaiga o tane latou te fia mananao e avea ai i se aso. O le a se mea e mafai ona e faia nei ia avea ai ma lena ituaiga o tagata?

2:43

3:12
Faatasi ai ma se faatagaga mai le epikopo, valaaulia se ulugalii ua faaipoipo e asiasi atu i le fonotaga a le korama. Faitau faatasi le vaega ua faaulutalaina “Siitiaina ma Fesoasoani i o Tatou Matafaioi e Faaatoatoa ai Isi” mai le lauga a Linda K. Burton “O Le a Tatou O Ae Faatasi i Luga.” O le a se mea ua aoaoina e alii talavou e uiga i le lagolagoina e alii ma tamaitai o le tasi ma le isi i totonu o aiga? Talosaga atu i le ulugalii o loo asiasi mai ina ia talanoa e uiga i le auala sa la tau fesoasoani ai i le tasi ma le isi e faataunuu o laua matafaioi. Mafaufau e faasoa atu le auala na fesoasoani ai le faaipoipoga ia te oe po o tagata o lou aiga ina ia lelei atili atu.
Valaaulia ia alii talavou e lisi mai ni uiga auau mama na fesoasoani i tamaitai ia avea ma ni tina lelei po o tagata faifaalele lelei. E faapefea ona taumafai Satani e faavaivaia le faatosinaga a tamaitai? O le a se mea e mafai ona faia e alii talavou e lagolagosua ai ma uunaia le faatosinaga a tamaitai amiotonu i le lalolagi? E faapefea ona taialaina e faatosinaga a tamaitai amiotonu ia alii talavou ao latou saunia e avea ma tane ma tama? Ina ia avea ma se vaega o lenei talanoaga, e mafai ona faitau e alii talavou ni vaega filifilia mai le saunoaga a Elder D. Todd Christofferson “O Le Malosiaga Amiotonu o Tamaitai.” Tagai, mo se faataitaiga, i parakalafa muamua e lua ma faiga e tolu e tau faamatauina ai le malosiaga amiotonu o tamaitai.

Fai atu i alii talavou e faasoa mai mea na latou aoaoina i le aso. Pe ua latou malamalama i matafaioi felagolagomai o alii ma tamaitai i aiga? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Valaaulia e faatino

O le alii talavou o loo taitai e faaiuina le fonotaga. E mafai ona ia:

Fai atu i tagata o le korama e faafetai atu i o latou tina ma tama mo auala faapitoa ua faamanuiaina ai i latou ona o le faataunuuina e o latou matua o o latou matafaioi paia.
Fai atu i alii talavou e sue ni auala e fesoasoani ai e faataunuu o latou matafaioi i le lumanai o le pulefaamalumalu i, tuuina atu mea e faaaoga mo, ma puipuia o latou aiga.