O le a le tautoga ma le feagaiga o le perisitua?

Tatou te maua le perisitua paia e ala i se “tautoga ma se feagaiga.” O lona uiga e tuu mai e le Tama Faalelagi ia i tatou Lana tautoga e mafai ona tatou maua le mana ma le faamanuiaga o le perisitua pe afai tatou te osi feagaiga ma Ia ina ia faalautele o tatou valaauga, ia faamaoni i le tausiga o poloaiga, ma ola i afioga uma e tulei mai le fofoga o le Atua.

Saunia oe lava ia faaleagaga

Mafaufau i taimi na e faalauteleina ai lou valaauga i le avea ai ma se tasi o loo umia le perisitua. O a faamanuiaga na e maua a o e faia lenei mea? O le a le mea e uunaia oe ia faalautele lou valaauga?

O a nisi mea e ono taofia ai alii talavou mai le tausia o le feagaiga na latou osia ina ua latou maua le perisitua? O anafea na e vaaia ai alii talavou o faalautele pe faaaoga lo latou perisitua?

A o e suesue i mau ma isi punaoa e uiga i feagaiga o le perisitua, vaai mo mea na o le a fesoasoani i alii talavou e faalautele o latou valaauga ma tiutetauave i le avea ai ma e umia le perisitua.

MF&F 84:33–44 (E maua e alii le ola faavavau e ala atu i le tautoga ma le feagaiga o le perisitua)

MF&F 121:34–40 (Aisea e toatele ai e valaaulia ae toaitiiti e filifilia)

MF&F 121:41–46 (O le perisitua e tatau ona faatoa faaaoga i le amiotonu )

HenryB. Eyring, “Faatuatua ma le Tautoga ma le Feagaiga o le Perisitua,”Ensign po o le Liahona, Me 2008, 61–64.

Anthony D. Perkins, “Faaeteete mo Outou Lava,” Ensign po o le Liahona, Nov. 2012, 54–56

“Saunia mo le Mauaina o le Perisitua Mekisateko,” Faataunuuina o Lou Tiute i le Atua (2010), 84–87

Vitio: “Faapaiaina Outou Lava”

4:38

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi Tiute i le Atua ), uunaia i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Fai atu i alii talavou taitoatasi e tusi se ata e faatatau i se mea na latou aoaoina mai le lesona o le vaiaso ua tea ma faasoa mai lena mea i le korama. Na faapefea ona latou faaaogaina mea na latou aoaoina?
Aumai se lomifefiloi i le sauniga a le korama, ma valaaulia alii talavou e sue uiga o tautoga ma feagaiga. Fai atu i se tasi o i latou e aotele faapuupuu na uiga i le laupapa. Aisea e manatu ai alii talavou o nei upu e fesootai ma le mauaina o le perisitua? (tagai MF&F 84:40–41).

Aoao faatasi

O gaoioiga taitasi nei o le a fesoasoani i uso o le korama e malamalama ai i le tautoga ma le feagaiga o le perisitua. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

O nisi o uso o lau korama atonu ua faamaeaina le gaoioiga i le saunia mo le Perisitua Mekisateko i Tiute i le Atua (tagai itulau 84–86). Afai o lea, mafaufau e valaaulia i latou e aoao atu i isi uso o le korama mea na latou aoaoina e uiga i le perisitua.
Tusi i le laupapa “O le Tautoga ma le Feagaiga o le Perisitua.” Tusi i lalo ifo “Ua folafola atu e le tagata” ma “Ua folafola mai e le Atua.” Faamatala atu e i ai se feagaiga e osia e le tagata ma le Atua pe a ia mauaina le perisitua. Fai atu i uso o le korama e sue Mataupu Faavae ma Feagaiga 84:33–44 ma faailoga le mea ua folafola atu e i latou e mauaina le perisitua ma le mea ua folafola mai e le Atua o se taui. Fai atu ia i latou e tusi mea ua latou maua i le laupapa i lalo o le autu talafeagai. Faasoa atu aafiaga patino na e maua o le a fesoasoani i uso o le korama ia iloa ai faamanuiaga e oo mai pe a tatou faalautele lo tatou perisitua.
Faaali le vitio “Faapaiaina Outou Lava” ma fai atu i alii talavou e faasoa mai mea ua latou aoaoina e uiga i le taua o le faatuatua i le faalauteleina o le perisitua. Faatasi ai ma le faatagaga mai le epikopo, valaaulia ni nai tuafafine (e pei o tina o alii talavou) e asiasi mai i le sauniga a le korama ma faasoa mai i alii talavou pe na faapefea ona uunaia o latou olaga ma aiga e ni perisitua faamaoni.

4:38
Tuu atu i alii talavou taitoatasi se kopi o le lauga a Peresitene Henry B. Eyring “Faatuatua ma le Tautoga ma le Feagaiga o le Perisitua,” ma valaaulia le korama e faailoa mai faamanuiaga uma ua saunoa mai Peresitene Eyring e maua e tagata e umia le perisitua a o latou faalautele o latou valaauga i le faatuatua. Fai atu i uso o le korama e faasoa mai ni mea ua latou mauaina. O le a le faamanuiaga o loo taua e Peresitene Eyring o le a sili atu lo latou mananao e maua, ma aisea?
Faasoa atu i alii talavou le vaega ua faaautuina “Tautoga ma le Feagaiga o le Perisitua” mai le lauga a Elder Anthony D. Perkins “Faaeteete mo Outou Lava.” Valaaulia se tasi o alii talavou e tusi i le laupapa le “auala faaselesitila” ua faamatalaina e Elder Perkins. Ona valaaulia lea o alii talavou taitasi e faaopoopo i le auala se faailoilo lapatai o se tulaga matautia faaleagaga e tatau ona aloese mai ai i latou o loo umia le perisitua. O le a se mea e mafai ona tatou faia i le avea ai ma e umia le perisitua e aloese ai mai nei tulaga matautia?

Fai atu i alii talavou e faasoa mai mea na latou aoaoina i le aso. Pe ua latou malamalama atili ea i le tautoga ma le feagaiga o le perisitua? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Motugaafa faafaiaoga

“Ia tali atu ma le faaaloalo ma le migao i tali sese. Ia mautinoa o loo lagona pea e le tagata le fiafia e auai. E mafai ona e filifili e te tauaveina le tiutetauave i lou tuuina atu o se faamatalaga faapea, “Ou te faamalie atu. Ou te manatu e le’i manino lo’u tuuina atu o lena fesili. Se’i ou toe taumafai atu’” (O Le Aoao Atu, E Leai Se Isi Valaauga e Sili Ai [1999], 72).

Valaaulia e faatino

O le alii talavou o loo taitai e faaiuina le fonotaga. E mafai ona ia:

Tau atu i le korama le mea ua ia fuafuaina e fai ina ia faalautele ai lona valaauga ma tiutetauave i le perisitua ma valaaulia uso o le korama e fai a latou lava fuafuaga.
Tuu atu se luitau i uso o le korama e vaai mo auala ua faamanuiaina ai i latou e le Tama Faalelagi pe a latou faataunuuina o latou tiute faaperisitua.