E faapefea ona ou maua le meaalofa o le Agaga Paia?

A uma ona tatou papatiso, ona tatou maua lea o le sauniga o le faamauga. I le avea ai o se vaega o lenei sauniga, ua tau mai ia i tatou e “talia le Agaga Paia.” O lona uiga e mafai ona avea le Agaga Paia ma a tatou soa tumau pe afai tatou te manaomia ma valaaulia Lana mafutaga i o tatou olaga ma tausia faamaoni poloaiga.

Saunia oe lava ia faaleagaga

Na faapefea ona faamafanafanaina pe fesoasoani le meaalofa o le Agaga Paia ia te oe lava ia? O anafea na e lagona ai le latalata i le Agaga? O a ni aafiaga e mafai ona e faasoa atu i alii talavou?

Pe na maua e alii talavou ni aafiaga o le meaalofa o le Agaga Paia? Pe ua latou malamalama i mea e tatau ona latou faia ia agavaa ai mo le mafutaga a le Agaga Paia?

O a mau ma lauga o le a fesoasoani i alii talavou e malamalama ai i le ala e fesoasoani ai le meaalofa o le Agaga Paia ia i latou ma faamanuiaina i latou i o latou olaga atoa?

Galuega 8:14–17; MF&F 33:15; Mataupu Faavae o le Faatuatua 1:4 (E tuuina atu le meaalofa o le Agaga Paia e ala i le faaee o lima)

1 Nifae 2:9–20 (O le faataitaiga a Nifae o le faalogo i le Agaga Paia)

1 Nifae 15:1–11 (O le le usitaia o poloaiga e taofia ai i tatou mai le mauaina o le Agaga Paia)

1 Nifae 16:14–29; 18:8–22; Alema 37:38–46 (Faataitaiga o le Liahona)

MF&F 20:77 (E ala atu i le tagofia o le faamanatuga, tatou te faafouina ai a tatou feagaiga ma o le a mafai ai pea ona tatou maua le Agaga e faatasi ma i tatou)

MF&F 121:45–46 (Afai tatou te amio mama ma alofa mama, o le a avea pea le Agaga Paia ma a tatou soa tumau)

Henry B. Eyring, “O Le Agaga Paia e fai ma Au Soa,” Ensign po o le Liahona, Nov. 2015, 104–7

David A. Bednar, “Ia Maua le Agaga Paia,” Ensign po o le Liahona, Nov. 2010, 94–97.

“O le Meaalofa a le Agaga Paia,” Faamaoni i le Faatuatua (2004), 8,9

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi Tiute i le Atua ), uunaia i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Valaaulia alii talavou e faasoa mai aafiaga mai le vaiaso talu ai e fesootai ma le lesona o le vaiaso ua tea.
Fai atu i alii talavou e mafaufau i le taimi mulimuli na latou vaaia ai se tasi o loo faamauina o se tasi o le Ekalesia. O a upu na faia e avea o se vaega o lenei sauniga? O le a le uiga o le ia “talia le Agaga Paia?“ Valaaulia alii talavou e faaauau ona mafaufau e uiga i lenei fesili i le taimi atoa o lenei lesona.

Aoao faatasi

O gaoioiga taitasi nei e mafai ona fesoasoani i uso o le korama ia malamalama ai i le auala e maua ai le Agaga Paia. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

Valaaulia alii talavou e suesue le lauga a Peresitene Henry B. Eyring “O Le Agaga Paia e fai ma Au Soa,” ma vaavaai mo faamatalaga e fesoasoani ia i latou e malamalama ai i le auala e mafai ai ona latou maua e le aunoa le mafutaga o le Agaga Paia. Uunaia i latou e mafaufau e uiga i le mafuaaga tatou te manaomia ai le mafutaga o le Agaga Paia ma le auala e tatau ona tatou tali atu ai pe a tatou lagona Ana musumusuga. E faapefea e mea e vaaia e alii talavou, ma faia i aso taitasi ona aafia ai lo latou gafatia e lagona le Agaga? Fai atu ia latou e mafaufau loloto i soo se suiga latou te manaomia ona faia i o latou olaga. Valaaulia i latou e faasoa mai o latou manatu pe afai e latou te lagona le logolelei e faia ai.
Fai atu i alii talavou e faitau 1 Nifae 2:9–19 ma 1 Nifae 15:1–11 taitoatasi. Valaaulia le afa o le korama e sue ma talanoaina le mea na fai e Nifae ina ia maua le Agaga Paia. Valaaulia le isi afa e sue ma talanoaina le mea na fai e Lamana ma Lemuelu na taofia ai i laua mai le mauaina o le Agaga Paia. Fai atu ia i latou e tusi i le laupapa mea ua latou maua. O a mea ua aoaoina e alii talavou mai nei faataitaiga o le a fesoasoani ia i latou e maua le Agaga Paia i o latou olaga?
Ia mautinoa ua tofu alii talavou taitoatasi ma se kopi o Mo le Malosi o le Autalavou. Valaaulia alii talavou taitasi e filifili se tasi o vaega i Mo le Malosi o le Autalavou, faitau, ma faailoga mea e tatau ona latou faia ma mea e le tatau ona faia ina ia maua ai le Agaga Paia. Valaaulia i latou e faasoa mai mea ua latou aoaoina e uiga i le Agaga Paia mai mea na latou faitauina. E faapefea e lenei mea ona fesoasoani ia i latou e maua le Agaga Paia i o latou olaga?
Faitau faatasi o se korama, parakalafa mulimuli e tolu o le vaega ua faaautuina “O le Meaalofa o le Agaga Paia” i le lauga a Elder David A. Bednar “Ia Maua le Agaga Paia.” Fai atu i se uso o le korama e aotele le manatu autu a Elder Bednar. Tofi alii talavou taitasi e faitau se tasi o vaega e tolu o loo sosoo ai o le lauga, ma vaai mo tali i fesili faapenei: E faapefea ona tatou agavaa ina ia maua le mafutaga a le Agaga Paia? O a mea e mafai ona taofia i tatou mai le mauaina o le Agaga Paia? Fai atu ia i latou e faasoa mai mea ua latou maua ma mea ua latou fuafuaina e faatino ai le fautuaga a Elder Bednar.
Faaali atu se ata o Liae ma le Liahona (tagai Tusi Ata o le Talalelei,68), ma fai atu i alii talavou e faasoa mai mea ua latou iloa e uiga i le Liahona. Valaaulia le afa o le korama e faitau 1 Nifae 16:14–29, ae valaaulia le isi afa e faitau 1 Nifae 18:8–22. Fai atu ia i latou e vaai mo tali i le fesili lenei: “E faapefea ona pei le Liahona o le Agaga Paia?” Valaaulia i latou e faasoa mai o latou manatu. O a mea ua aoaoina e alii talavou mai aafiaga o le aiga o Liae e mafai ona fesoasoani ia i latou e maua ai le Agaga Paia? I le avea ai o se vaega o lenei talanoaga, faitau faatasi Alema 37:38–46.

Fai atu i alii talavou e faasoa mai mea na latou aoaoina i le aso. Pe ua latou malamalama i le uiga o le maua o le Agaga Paia? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Motugaafa faafaiaoga

“E mafai e le Agaga Paia ona musuia se toatasi po o le sili atu foi o i latou o loo e aoaoina ina ia tuu atu o latou tomai o loo moomia ona faalogo i ai isi. Ia malamalama i uunaiga e te maua ina ia valaauina ni tagata faapitoa. E te lagona foi lava le faagaeetia e talosagaina se tagata e lei ofo mai e faaali mai ona manatu” (O Le Aoao Atu, E Leai Se Isi Valaauga E Sili Ai [1999], 66).

Valaaulia e faatino

O le alii talavou o loo taitai e faaiuina le fonotaga.E mafai ona ia:

Valaaulia uso o le korama e faitau Mataupu Faavae ma Feagaiga 121:45–46 ia latou suesuega patino ona faasoa atu lea i se sauniga i le lumanai a le korama mea ua latou aoaoina mai nei fuaiupu e uiga i le mauaina o le Agaga Paia.
Tuu atu se lui i uso o le korama e mafaufau i se mea se tasi o le a latou faia i le vaiaso lenei ina ia sili atu ai lo latou agavaa mo le mafutaga a le Agaga Paia.