O a feagaiga na ou osia i le papatisoga?

Ina ua tatou papatiso, na tatou osia se feagaiga ma le Atua. Sa tatou folafola atu e ave i o tatou luga le suafa o Iesu Keriso, tausi Ana poloaiga, ma auauna atu ia te Ia seia oo i le iuga. Na folafola mai e Tama Faalelagi se faamagaloina o agasala ma, e ala mai le sauniga o le faamauga, le meaalofa o le Agaga Paia. Tatou te faafouina lenei feagaiga i taimi uma tatou te fetagofi atu ai i le faamanatuga.

Saunia oe lava ia faaleagaga

O le a se mea o e manatua i lou papatisoga? Na faapefea ona uunaia lou olaga e au feagaiga o le papatisoga?

E mafai faapefea ona e fesoasoani i alii talavou ia malamalama atili ia latou feagaiga o le papatisoga? E faapefea ona e fesoasoani ia i latou e faamalosia lo latou naunau e tausia nei feagaiga?

O a mau po o isi punaoa o le a fesoasoani i alii talavou e manatua ai ma tausia a latou feagaiga o le papatisoga?

Ioane 3:5; 2 Nifae 31:4–13, 17 (E manaomia le papatisoga mo le ola faavavau)

Mosaea 18:8–10; MF&F 20:37 (O feagaiga tatou te osia pe a tatou papatiso)

Hugo Montoya, “Tofotofoina ma Faaosoosoina—ae o le a Maua le Fesoasoani,” Ensign po o le Liahona, Nov. 2015, 53–55

Robert D. Hales, “ O Le Feagaiga o le Papatisoga: O le i ai i le Malo ma ni o le Malo” Liahona, Ian. 2001, 6–9

Carole M. Stephens, “E iai se Mafuaaga Sili mo i Tatou e Olioli Ai,” Ensign or Liahona, Nov. 2013

“O Lau Feagaiga o le Papatisoga,” “O Faamanuiaga Folafolaina o le Papatisoga,” Faamaoni i le Faatuatua (2004), 125–28

Vitio: “O le Ofu Taalo e Tasi”

5:2

Aoao atu i le ala a le Faaola

Sa saunia o Ia lava e aoao atu e ala i le faaaluina o le taimi e tatalo ma anapogi ai na o Ia lava. I taimi paganoa, na Ia saili atu i le taitaiga a Lona Tama (tagai 3 Nifae 19:19–23). E faapefea ona ou mulimuli i le faataitaiga a le Faaola i le saunia e aoao atu alii talavou?

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi Tiute i le Atua ), uunaia i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Tuu atu i uso taitasi o le korama e faauma le fuaiupu lenei: O le mea na ou aoaoina i le lesona talu ai na taua ia te au aua ________. Na faapefea ona latou faaaogaina mea na latou aoaoina?
Faaali atu se ata o se papatisoga (e pei Tusi Ata o le Talalelei, 103–4). Faasoa atu ni mea e te manatua i le aso na e papatiso ai, e aofia ai le lagona na e maua. Valaaulia alii talavou e faasoa mai aafiaga na latou maua i le auai po o le molimauina o se papatisoga. Fai atu ia i latou e lisi i le laupapa feagaiga na latou osia ina ua latou papatiso. Valaaulia i latou e faaopoopo i le lisi i le taimi o le lesona a o latou aoao atili e uiga ia latou feagaiga o le papatisoga.

Aoao faatasi

O gaoioiga taitasi nei o le a fesoasoani i uso o le korama e malamalama ai i feagaiga na latou osia i le papatisoga. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

Valaaulia alii talavou e faitau le Mosaea 18:8–10. O a mea ua latou aoao e uiga i le auala tatou te folafola atu e taulimaina ai isi pe a papatiso i tatou? Ina ia fesoasoani i alii talavou e aoao e uiga i le auala tatou te siitia ai avega a le tasi, vaevae i latou i ni vaega ma atofa atu i vaega taitasi e suesue se vaega o le lauga a Elder Hugo Montoya “Tofotofoina ma Faaosoosoina—ae o le a Maua le Fesoasoani.” Valaaulia vaega taitasi e faasoa mai mea ua latou aoaoina ma le vasega. Atonu e faia e vaega taitasi se pepa lautele o i ai se savali o mea ua latou aoaoina, faasoa mai aafiaga patino pe a talafeagai, pe faamatala ni tala faatusipaia e fesoasoani e aoao le mataupu faavae e tasi.
Valaaulia se uso o le korama e aoao atu se vaega o lenei lesona. E mafai ona ia faia o se vaega o lana fuafuaga o le Tiute i le Atua e aoao mai ma aoao atu e uiga i feagaiga ma sauniga (tagai “Malamalama i le Aoaoga Faavae,” itulau 12, 18, po o le 31).
Valaaulia alii talavou e suesue mau ua fautuaina atu i lenei otootoga. Fai atu ia i latou e faailoga folafolaga tatou te osia i le papatisoga ma tusi mea ua latou maua i le laupapa. E faapefea ona tatou tausia nei folafolaga? Fai atu i alii talavou e faasoa mai faataitaiga o ni tagata ua avea ma faataitaiga o folafolaga o loo tusia i le laupapa (e aofia ai tagata i mau). Ua faapefea e le tausia o nei folafolaga ona faamanuiaina alii talavou?
Valaaulia alii talavou e faitau “Au Feagaiga o le Papatisoga” I le Faamaoni I le Faatuatua ama faailoa folafolaga na tatou faia ina ua papatisoina. Valaaulia alii talavou e matamata le vitio “O le Ofu Taalo e Tasi” pe o le faitauina o le tala o loo I le amataga o le lauga ā Carole M. Stephens “E iai se Mafuaaga Sili mo i Tatou e Olioli Ai.” Fai atu iai e vaavaai mo faataitaiga o tagata o loo faamamaluina ā latou feagaiga o le papatisoina . Tuu atu le avanoa i tagata o le korama e faasoa ai mea ua latou aoaoina. Ia valaaulia le peresitene o le korama e taitaiina se talanoaga e uiga i le pe faapefea ona sili atu ona latou tausia i le atoatoa ā latou feagaiga o le papatisoga i taimi uma ma nofoaga uma.

5:2
Faaali atu se ata o le papatisoga o le Faaola (tagai Tusi Ata o le Talalelei,35), ma fai atu i se uso o le korama e faitau 2 Nifae 31:4–10. Valaaulia alii talavou e faasoa mai ni faataitaiga o loo i mau e faaalia ai le ala na tausia ai e Iesu Keriso Ana feagaiga ma le Tama (e mafai ona latou vaai i ata i Tusi Ata o le Talalelei, 36–48, mo manatu). Fai atu ia i latou e faasoa mai aafiaga na latou taumafai ai e mulimuli i le faataitaiga a le Faaola.
Valaaulia alii talavou e faitau parakalafa e tolu o le lauga a Elder Robert D. Hales “O Le Feagaiga o le Papatisoga: O le i ai i le Malo ma ni o le Malo,” e amata i “I le papatisoga tatou te osia ai se feagaiga ma lo tatou Tama Faalelagi.” Fai atu ia i latou e vaai mo feagaiga tatou te osia pe a tatou papatiso, ma valaaulia i latou e tusi mea ua latou maua i le laupapa. O a auala e tatau ai ona suia o tatou olaga pe a papatiso? Na faapefea ona ia suia olaga o alii talavou?

Fai atu i alii talavou e faasoa mai mea na latou aoaoina i le aso. Pe ua latou malamalama atili ea ia latou feagaiga o le papatisoga? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Valaaulia e faatino

O le alii talavou o loo taitai e faaiuina le fonotaga.E mafai ona ia:

Faasoa atu ona lagona pe faapefea e le tausia o lana feagaiga o le papatisoga ona fesoasoani ia te ia e faamamalu le perisitua.
Valaaulia uso o le korama e iloilo o latou olaga e iloa ai pe o i ai se mea latou te manaomia ona taofia le faia po o le amata ona faia ina ia sili atu ai le faamaoni ia latou feagaiga o le papatisoga.