Aisea e taua ai feagaiga i lou olaga?

Tatou te osia feagaiga pe a tatou maua sauniga e pei o le papatisoga, faauuga i le perisitua, ma sauniga o le malumalu. O se feagaiga o se maliega paia lea e faia i le va o le Atua ma Ana fanau. E faatulaga e le Atua ni aiaiga faapitoa, ma ua Ia folafola mai e faamanuia i tatou pe a tatou usiusitai i nei aiaiga. O le osia ma le tausia o feagaiga e faaagavaaina i tatou e maua faamanuiaga ua folafola mai e le Atua. Pe afai tatou te filifili e le tausia feagaiga, e le mafai ona tatou maua faamanuiaga. O a tatou feagaiga e taitaia filifiliga tatou te faia ma fesoasoani ia i tatou e tetee atu i faaosoosoga.

Saunia oe lava ia faaleagaga

Ua faapefea ona faamanuiaina oe ona o le osia ma le tausia o feagaiga? Pe mafai ona e mafaufau i se aafiaga na taitaia ai e au feagaiga se filifiliga na e faia?

E faapefea ona e fesoasoani i alii talavou e malamalama i feagaiga na latou osia ma o le a osia i le lumanai? O le a faapefea e le malamalama i le natura ma le taua o feagaiga ona uunaia alii talavou ia sili atu le ola amiotonu?

Ia suesue ma le agaga tatalo ia mau ma punaoa nei. E faapefea ona e fesoasoani i alii talavou ia mananao e osia ma tausia feagaiga?

Esoto 19:5; MF&F 35:24; 90:24 (E oo mai faamanuiaga pe a tatou tausia feagaiga)

Mosaea 5; Alema 46:10–37 (O faataitaiga i le Tusi a Mamona o tagata na osia ma tausia feagaiga)

MF&F 82:10 (E noatia le Alii pe a tatou usiusitai)

Russell M. Nelson, “Feagaiga,” Ensign po o Liahona, Nov. 2011, 86–89

Jeffrey R. Holland, “Tausia o Feagaiga: O Se Savali mo i Latou o le a Auauna Atu i se Misiona,” New Era, Ian. 2012, 2–5; po o le Liahona, Ian. 2012, 48–51

D. Todd Christofferson, “O Le Mana o Feagaiga,” Ensign po o Liahona, Me 2009, 19–23.

“Feagaiga,” Faamaoni i le Faatuatua (2004), 67

Video: “Fetaomi Atu i Luma”

4:12

Aoao atu i le ala a le Faaola

Na valaaulia e le Faaola Ona soo e faaaoga le faatuatua e faatino ai upumoni na Ia aoao atu (tagai Luka 18:18-25). E faapefea ona e fesoasoani i alii talavou ia maua se manao ia auai i sauniga ma feagaiga ma faamamalu a latou feagaiga e ala i faatinoga amiotonu?

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi Tiute i le Atua ), uunaia i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Fai atu i alii talavou e mafaufau i le lesona talu ai ma feauauai i le faasoaina mai o se fuaiupu se tasi e aotele ai mea na latou aoaoina mai lena lesona. Na faapefea ona latou faaaogaina mea na latou aoaoina?
Valaaulia se alii talavou e sau i luma o le vasega. Faamatala po o le a le feagaiga e ala i le faia o se folafolaga ia te ia e sui ai mo se faatinoga faigofie mai ia te ia (mo se faataitaiga, folafola atu e tuu atu ia te ia se taui laitiiti pe afai na te taulotoina se mataupu faavae o le faatuatua). Faataga le alii talavou e faamaea le faatinoga pe afai na te filifilia, ma faataunuu la oe foi folafolaga. Fesoasoani i alii talavou e faamatala le feagaiga (tagai i le parakalafa lona tolu o le lauga a Peresitene Russell M. Nelson “Feagaiga”), ma fai atu ia i latou e faamatala pe faapefea e lenei faataitaiga ona tutusa i ma eseese mai feagaiga tatou te osia ma le Atua.

Aoao faatasi

O gaoioiga taitasi nei o le a fesoasoani i uso o le korama e malamalama ai pe aisea tatou te osi ai feagaiga. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

Valaaulia se uso o le korama e aoao atu se vaega o lenei lesona. E mafai ona ia faia o se vaega o lana fuafuaga o le Tiute i le Atua e aoao mai ma aoao atu e uiga i feagaiga ma sauniga (tagai “Malamalama i le Aoaoga Faavae,” itulau 18, 42, po o le 66).
Valaaulia alii talavou e vaai faalemafaufau o loo latou taumafai e fesoasoani i se uo o se isi lotu ia malamalama i feagaiga. Valaaulia i latou e suesue “Feagaiga” i Faamaoni i le Faatuatua po o mau o loo lisiina i lenei otootoga ma saunia auala e faamatala ai feagaiga i la latou uo. Valaaulia i latou e faatino le aoaoina e le tasi o le isi. Fai atu ia i latou e faaaofia i la latou faamatalaga mafuaaga e taua ai a latou feagaiga ia i latou.
Valaaulia alii talavou e suesue taitoatasi Mosaea 5, ma faailoga upu po o fuaitau e uunaia i latou e uiga i le osia ma le tausia o feagaiga. Ona fai atu lea ia i latou e tusi i le laupapa mea ua latou maua. Tusi, i le laupapa, “O le tausia o au feagaiga e taua ia te au aua ________.” Valaaulia alii talavou taitasi e faauma le fuaiupu.
Faaali atu se ata o Moronae le Taitaiau o loo sisiina ae le fua o le saolotoga (tagai Tusi Ata o le Talalelei,79). Fai atu i alii talavou e faailoa mai nisi o auiliiliga i le ata ma faamatala faapuupuu mai le tala o loo faamatala mai ai (tagai Alema 46:10–37). O a feagaiga na osi e sa Nifae (tagai fuaiupu 20–22)? Aisea na filifili ai le nuu e osi nei feagaiga e ui lava i puapuaga na latou feagai? Na faapefea e a latou feagaiga ona uunaia le taunuuga o le taua? Fai atu i alii talavou e lisi feagaiga ua latou osia. E faapefea e nei feagaiga ona fesoasoani ia i tatou e manumalo i luitau ma faaosoosoga?
Faitau faatasi, o se korama, matamata, pe faalogo i le tala i le amataga o le lauga a Elder D. Todd Christofferson “O Le Mana o Feagaiga.” Na faapefea ona fesoasoani feagaiga a Pamela ia te ia e onosai i le puapuaga na ia feagai? Tofi alii talavou taitasi e faitau se tasi o vaega o totoe o le lauga, ma vaai mo tali i le fesili “E mafai faapefea ona faamalosia ma puipuia au e au feagaiga?” Fai atu i alii talavou e faasoa mai mea latou te maua. Valaaulia i latou e talanoaina ni tulaga faapitoa e mafai ona latou feagai i le vaiaso a sau ae mafai ai ona latou maua le malosi po o le puipuiga ia latou feagaiga.
Tusi i le laupapa ia upu “Feagaiga” ma “Galuega Faafaifeautalai”. Valaaulia ia alii talavou ia taitasi ma faitau se vaega o le saunoaga a Elder Jeffrey R. Holland “Tausia o Feagaiga: O Se Savali mo i Latou o le a Auauna Atu i se Misiona.” Fai atu ia i latou e tagai mo le sootaga i le va o feagaiga ma le galuega faafaifeautalai. Valaaulia ia alii talavou e fefaasoaai ma le tasi ma le isi mea sa latou aoaoina mai le savali a Elder Holland. O faapefea ona aafia e lenei fautuaga mea o le a latou faia ao latou saunia e auauna atu faafaifeautalai faamisiona?

Fai atu i alii talavou e faasoa mai mea na latou aoaoina i le aso. Pe ua latou malamalama atili ea i feagaiga? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Valaaulia e faatino

O le alii talavou o loo taitai e faaiuina le fonotaga.E mafai ona ia:

Faasoa atu po o le a le uiga ia te ia o le osia o feagaiga.
Fautuaina isi uso o le korama e faasoa mai o latou lagona e uiga i mea na latou aoaoina faatasi ma se tasi o le aiga.