Aisea e taua ai sauniga i lo’u olaga?

O se sauniga o se faatinoga aloaia paia lea, e i ai se uiga faaleagaga. O sauniga e faia i le pule o le perisitua ma i lalo o le taitaiga a i latou o e umia ki o le perisitua. E fesoasoani sauniga ia i tatou e manatua ai po o ai i tatou ma faamanatu mai ia i tatou lo tatou tiute i le Atua. Latou te fesoasoani ia i tatou e o mai ia Keriso ma maua le ola faavavau.

Saunia oe lava ia faaleagaga

O a sauniga o le talalelei ua e mauaina? O faapefea ona faamanuiaina lou olaga e nei sauniga? Aisea e taua ai i latou ia te oe?

O a sauniga ua mauaina e alii talavou? O a sauniga o latou sauniuni ina ia mauaina? Aisea e manaomia ai lo latou malamalama i le taua o sauniga o le talalelei?

Ia suesue ma le agaga tatalo ia mau ma punaoa nei. O a mea ua musuia ai oe e faasoa atu i alii talavou ina ia fesoasoani ia i latou ia malamalama i le taua o sauniga?

Mataio 3:13–17 (Papatisoga o Iesu Keriso)

Galuega 19:1–6 (Ua toe papatiso e Paulo tagata na le sao ona papatisoina)

3 Nifae 11:21–26 (Ua tuu atu e Iesu Keriso le pule e papatiso ai ma faatonu atu le auala sao e fai ai)

Moronae 8:10–12 (Ua aoao atu Mamona e uiga i le papatisoga)

MF&F 84:19–21 (O le mana faaleatua o loo faaalia e ala mai sauniga o le perisitua)

Mataupu Faavae o le Faatuatua 1:3–5 (E manaomia sauniga mo le faaolataga)

David A. Bednar, “[Faatumauina] Pea le Faamagaloina o a Outou Agasala,” Ensign po o le Liahona, Me 2016, 59–62

Gary E. Stevenson, “O Lau Fa Minute,” Ensign po o le Liahona, Me 2014, 84–86

“Sauniga ma Faamanuiaga o le Perisitua,” Tusitaulima 2: Taitaiina o le Ekalesia (2010), 20.1

“Sauniga,” Faamaoni i le Faatuatua (2004), 154–155

Vitio: “Fa'atuatua i le Mana o le Perisitua”

1:38

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi Tiute i le Atua ), uunaia i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Faaali i le autalavou se ata po o se mea fai tino e fesootai ma le lesona o le vaiaso ua tea, ma fai atu i alii talavou e faamatala mai pe faapefea ona fesootai ma lena lesona. Na faapefea ona latou faaaogaina mea na latou aoaoina?
Fai atu i alii talavou e lisi uma i lalo sauniga o le talalelei e mafai ona latou mafaufau i ai. Ona fesoasoani atu lea ia i latou e faailoa mai po o fea o sauniga o loo i le lisi e taua mo le faaolataga. Aisea na tuuina mai ai ia i tatou e le Tama Faalelagi nei sauniga? E faapefea ona tali atu alii talavou i se tasi o le a fai mai e le manaomia na sauniga? (Afai e manaomia e alii talavou ni manatu, e mafai ona latou faasino i le vaega o “Sauniga” i le Faamaoni i le Faatuatua po o le vaega o loo faaulutalaina “O Le Agaga Paia ma Sauniga Faaleperisitua” i le saunoaga a Elder David A. Bednar “[Faatumauina] Pea le Faamagaloina o a Outou Agasala.”)

Aoao faatasi

O le a fesoasoani gaoioiga taitasi nei i tagata o le korama e malamalama ai i le taua o sauniga. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

I le saunoaga a Elder David A. Bednar “[Faatumauina] Pea le Faamagaloina o a Outou Agasala,” o le vaega o loo faaulutalaina “Mauaina ma le Faatumauina o se Faamagaloga o Agasala e Auala mai i Sauniga” o loo faamatala ai faamanuiaga o sauniga o le papatisoga, faaee o lima mo le meaalofa o le Agaga Paia, ma le faamanatuga. Ina ia fesoasoani i alii talavou e aoao e uiga i le auala e mafai ai ona fesoasoani nei sauniga ia i tatou, fai atu i alii talavou taitasi e piki se sauniga se tasi ma lisi uma mai mea sa ia aoaoina e uiga i ai mai lenei vaega. Ona fai atu lea i alii talavou e aoao atu mea sa latou aoaoina i le vaega atoa o le korama i se auala ola pe sogasoga—atonu e ala i le faaoagaina o ni ata po o le faia o se taaloga.
Valaaulia se malo faaaloalogia e avea ma failauga po o se alii talavou sa ausia se mea taua e faasoa mai po o a ni tulaga manaomia o le mea sa ia ausiaina ma le auala sa ia faataunuuina ai (atonu sa ia mauaina se taui o le Sikauti, mauaina se faailoga faaakatemia, po o le mauaina o se vaega i se tala faatino). Ona fai atu lea i alii talavou e faitau le parakalafa e amata i le “I lea auala lava lea e tasi” mai le saunoaga a Elder Gary E. Stevenson “O Lau Fa Minute.” E faapefea ona pei sauniga o tulaga manaomia lea na faasoa mai e le malo faaaloalogia po o le alii talavou? E mafai foi ona e faitauina le vaega o totoe o le saunoaga a Elder Stevenson, tagai mo nisi mea sa ia aoaoina e uiga i sauniga.
Valaaulia ia alii talavou e matamata i le vitio “Fa'atuatua i le Mana o le Perisitua.” Fai atu ia i latou e lisi i luga o le laupapa ia sauniga o loo taua ma faamanuiaga tatou te mauaina mai le auai atu i sauniga taitasi. Valaaulia le autalavou e faasoa mai ni aafiaga sa latou mauaina po o le molimauina o se tasi o nei sauniga (po o nisi sauniga, e pei o se faamanuiaga faatama po o se faamanuiaga o le faamalologa). Na faapefea e nei sauniga ona faamanuiaina ma faamalosia i latou?

1:38
Iloilo faatasi o se korama le lisi o mea e manaomia e fa mo le faataunuuina o sauniga i le vaega 20.1 o le Tusitaulima 2. Valaaulia ia alii talavou e faitau le 3 Nifae 11:21–26 ma faailoa mai pe na faapefea ona ausia nei tulaga manaomia i le faamatalaga a le Faaola o le papatisoga. Na faapefea e le latou taulimaina o le faamanatuga ona ausia ai nei tulaga manaomia? O le a le mea e tupu pe a faataunuuina se sauniga e aunoa ma le ausiaina o nei tulaga manaomia? Fesili atu i alii talavou pe aisea e taua ai le iloa e uiga i nei tulaga manaomia ao latou saunia e aoao atu i le tasi ma le isi ia sauniga.
Valaaulia ia alii talavou e vaai faalemafaufau atu faapea o loo latou aoao atu se tasi o se isi tapuaiga e uiga i le papatisoga, ma o loo ia fai mai, “Ua uma ona papatisoina au i lau lotu.” E faapefea ona fesoasoani atu ia alii talavou i lenei tagata ina ia malamalama, i se auala maaleale, i le mafuaaga e tatau ai ona ia toe papatiso? O a ni mau po o ni aafiaga latou te faasoa atu? E mafai ona e faasino i latou i le lisi o mea e manaomia i le vaega 20.1 o le Tusitaulima 2; Mataio 3:13–17; Galuega 19:1–6; 3 Nifae 11:21–26; po o le Moronae 8:10–12. Afai e mafai, valaaulia ni faifeautalai faamisiona e faasoa atu i le korama pe faapefea ona la faamatalaina i a laua tagata sailiili le taua o sauniga (ia tapa muamua se faatagaga a le epikopo).
Faasoa atu i le korama le faamatalaga lenei mai ia Peresitene Spencer W. Kimball: “O sauniga e avea o ni faamanatu. O le faamoemoega moni lava lena o le faamanatuga, ia taofia mai i tatou mai le faagaloina, ina ia fesoasoani ia i tatou ia manatua” (Teachings of Spencer W. Kimball, ed. Edward L. Kimball [1982], 112). Fai atu i alii talavou e lisi mai ia sauniga o le talalelei (e pei o [sauniga] ia o loo lisiiina i itulau 109–10 o le Faamaoni i le Faatuatua) ma talanoa po o a mea o loo fesoasoani ai nei sauniga ia i tatou ina ia manatua.

Fai atu i alii talavou e faasoa mai mea na latou aoaoina i le aso. Pe ua latou malamalama i le taua o sauniga? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Motugaafa faafaiaoga

“Ao e sauniuni e aoao atu, ia mautinoa o loo e faaaogaina ni auala eseese mai lea lesona i lea lesona. O lona uiga o lenei faiga e faaaoga i ai se mea faigofie e pei o se pepa lautele felanulanuai po o se siata i le puipui i le tasi lesona ae o se lisi o fesili i luga o le laupapa i le isi lesona” (O Le Aoao Atu, E Leai Se Isi Valaauga E Sili Ai [1999], 96).

Valaaulia e faatino

O le alii talavou o loo taitai e faaiuina le fonotaga. E mafai ona ia:

Faasoa atu ona lagona e uiga i sauniga o le talalelei.
Taitaia se talanoaga puupuu e uiga i le ala e tatau ona latou saunia ai faaleagaga e faatautaia sauniga paia.