Tiute i le Atua

E mafai faapefea ona ou fesoasoani atu i isi ina ia maua se aafiaga anoa ma le faamanatuga?

Na faatulagaina e le Faaola le faamanatuga o se auala mo Ona soo e manatua ai o Ia ma toefaafou ai a latou feagaiga paia faalevaiaso. O le faamanatuga o se faatusa o le ositaulagaina o le tino ma le toto o Iesu Keriso e ala i Lana Togiola mo i tatou. Mo nei mafuaaga, ua avea ai le sauniga faamanatuga ma mea sili ona paia ma e tatau ona avea o se taimi e toe mafaufau ai ma le migao ma toefaafouina ma le mamana faaleagaga. I le avea ai ma e umia le Perisitua Arona, ua tatou maua se avanoa e fesoasoani ai i tagata o le aulotu ina ia maua se aafiaga anoa faaleagaga ma le faamanatuga. O lo tatou agavaa, faataitaiga, ma molimau e mafai ona uunaia ai lo latou aafiaga.

Saunia Faaleagaga.

Uunaia uso o le korama e saunia i latou lava faaleagaga mo lenei lesona e ala i le aoaoina e uiga i le faamanatuga, mafaufau loloto po o le a le uiga o le faamanatuga ia i latou, ma fuafua ni auala e mafai ona latou aoao atu ai isi e uiga le mea sa latou aoaoina. O le a sili ona aoga lenei tulaga pe afai e te tuuina atu se valaaulia ina ia saunia ia le itiiti ifo ma le tasi le vaiaso o i luma ona faafesootai atu lea o uso o le korama i le aluga o le vaiaso e faamanatu atu ia i latou.

O le otootoga a le Aoga Sa “E mafai faapefea ona ou faia ia sili atu le taua o le faamanatuga ia te au?” o loo tuuina mai ai ni sauniuniga lelei mo lenei lesona. Atonu e te manao e feutagai ma le faiaoga o tagata o lau korama o le Aoga Sa ma fuafua e faia la outou talanoaga e uiga i le faamanatuga pe a uma ona latou aoao e uiga i ai i le Aoga Sa.

I ni nai aso ao lei faia le fonotaga a le korama, fai atu i tagata o le korama e saunia se otootoga puupuu e mafai ona latou faaaogaina e aoao atu ai isi e uiga i le faamanatuga ma valaaulia i latou e aumai a latou otootoga i le fonotaga a le korama. (E mafai e uso o le korama ona faaaofia lenei mea i a latou fuafuaga o le Tiute i le Atua ma aoao atu e uiga i feagaiga ma sauniga; tagai Faataunuuina o Lou Tiute i le Atua, itulau 18, 42, po o le 66.)

Ao saunia e uso o le korama a latou otootoga, e mafai ona latou tagai i le vitio “Ia Manatua Pea o Ia.” Fai atu ia i latou e faitau le Mataio 26:26–28, e aofia ia le Faaliliuga a Iosefa Samita e faatatau i ai o i vaefaamatalaga ma i le Taiala i Tusitusiga Paia, ma le 3 Nifae 18:1–12, vaavaai mo le faamoemoega na tuuina atu e le Faaola ina ua Ia faatulagaina le faamanatuga.

5:29

E mafai ona latou mafaufau i fesili nei ao latou fatuina a latou otootoga:

O le a le faamoemoega o le faamanatuga? O le a le mea e faatusa i ai?
E mafai faapefea ona tatou manatuaina pea le Faaola?
Aisea i lou manatu e taua ai mo i tatou le fetagofi atu i le faamanatuga i vaiaso taitasi?
E mafai faapefea ona saunia lelei i tatou lava e aai ma feinu i le faamanatuga?
E mafai faapefea e e umia le Perisitua Arona ona avea ma sui o le Faaola i le faatautaia o le faamanatuga?

Aoao atu i le ala a le Faaola

Na faatuatuaina e le Faaola Ona soo ma tuu atu ia i latou avanoa e auauna atu ai ma aoao atu i isi. O le a faapefea ona faamanuiaina alii talavou i lau korama ao latou aoao atu isi i mea sa latou aoaoina e uiga i le faamanatuga?

Taitai le fonotaga a le korama

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. O le faatumuina o se lisi o mataupu e talanoaina i le fonotaga a le korama e mafai ona fesoasoani.

Amata le aafiaga faaleaoaoga

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

Valaaulia uso o le korama e faaaoga ni nai minute i le amataga o le sauniga e faitau leleoa ai tatalo o le faamanatuga (tagai MF&F 20:77, 79) ma mafaufau e uiga i upu o se pese faamanatuga e sili ona e fiafia i ai.
Iloilo puupuu faatasi o se korama ia mataupu faavae o aoaoga faaKeriso e ala i le iloiloina o mau e pei o le Mataupu Faavae ma Feagaiga 11:21; 12:8; 42:14. Uunaia uso o le korama e mafaufau i nei mataupu faavae ao latou faasoa mai o latou lagona e uiga i le faamanatuga i le aso.

Aoao faatasi

Valaaulia uso o le korama e aoao atu e le tasi le isi e uiga i le faamanatuga (i vaega toalaiti po o le korama atoa) mai otootoga na latou sauniaina. A uma ona latou faia lenei mea, fai atu ia i latou e talanoa e uiga i o latou aafiaga ao latou faasoa maia a latou molimau. Aisea e taua ai le faasoa atu i isi o mea sa tatou aoaoina?

Afai e lei saunia otootoga a nisi o alii talavou, tuu atu ia i latou se taimi e fai ai i le taimi o le fonotaga a le korama, mulimuli i faatonuga o i lalo o le “Saunia faaleagaga” o i luga. Afai e mafai, tuu atu se taimi mo nisi o i latou e faasoa atu ai i le tasi ma le isi mea sa latou aoaoina.

Valaaulia e faatino

Ina ia faamalosiau atu i uso o le korama e faasoa mai se mea sa latou aoaoina, mafaufau i manatu nei:

Fai atu i uso taitasi o le korama e faailoa mai ni tagata e mafai ona ia faasoa atu i ai lona malamalamaaga ma molimau e uiga i le aoaoga faavae o le faamanatuga. Mo se faataitaiga, e mafai ona ia aoao atu lona aiga, se uso o le korama e le o toe toaaga mai, se vasega a Tamaitai Talavou po o le Peraimeri, po o aiga sa ia asia o se faiaoga o aiga. Fai atu i uso taitasi o le korama e tau atu i le korama po o ai sa ia filifilia. Atonu e mafai ona e fautua atu e le gata i le faasoa atu i le tagata lava ia, e mafai foi e uso o le korama ona faasoa atu e ala i faasalalauga faaagafesootai.
Faatulaga se taimi e mafai ai e uso o le korama ona asiasi atu i nai aiga o le uarota ma aoao atu i latou e uiga i le faamanatuga. (O se uso o le au epikopo po o le taitai misiona a le uarota e mafai ona fesoasoani ia te oe e filifili aiga o e o le a manuia mai lea ituaiga asiasiga, e pei o tagata fou liliu mai, aiga e le auai uma tagata, po o aiga e le auai soo i le sauniga faamanatuga). Faatasi ai ma se fesoasoani mai le peresitene o le korama, faatulaga uso o le korama i ni soa ma totofi soa taitasi e asiasi i se tasi o nei aiga. (Afai e mafai, faatulaga se taimi mo nei asiasiga ina ia ogatusa ma se gaoioiga a le korama i le faasologa o le vaiaso; tagai i le “Faasoaina atu o mea ua tatou aoaoina” i luga o le uepisaite o Gaoioiga a le Autalavou). Afai e faatapulaa le feoai, e mafai ona totofi uso o le korama e aoao atu i o latou lava aiga.

I se fonotaga a le korama i le lumanai, fai atu i uso o le korama e faasoa mai ni o latou aafiaga.