E mafai faapefea ona ou faia ia sili atu le taua o le faamanatuga ia te au?

I taimi o le faamanatuga i vaiaso taitasi, e tatau ona tatou iloiloina o tatou olaga, manatunatu loloto i le Togiola a le Faaola, ma mafaufau po o le a le mea e tatau ona tatou faia e salamo ai ia tatou agasala.E le manaomia ina ia tatou atoatoa e fetagofi atu ai i le faamanatuga, ae e tatau ona tatou mauaina le agaga o le lotomaualalo ma le salamo i totonu o tatou loto.E mafai ona avea le faamanatuga o se puna o le malosi ma se avanoa e toe faapaiaina ai i tatou lava ia ola i le talalelei.

Saunia oe lava ia faaleagaga

O le a se mea e mafai ona e faia ia atili anoa ai le faamanatuga? Na i ai sou aafiaga ma le faamanatuga e mafai ona e faasoa atu i le autalavou?

O a ni faamanuiaga e mafai ona maua e le autalavou pe a latou malamalama i le natura paia o le faamanatuga? O a nisi o faafitauli mo le autalavou ao lei faia po o faagasolo foi le faamanatuga? E mafai faapefea ona latou manumalo i nei faafitauli?

Ia suesue ma le agaga tatalo ia mau ma punaoa nei. O a mea e mafai ona e faasoa atu i le autalavou e fesoasoani ai ia i latou ina ia maua se aafiaga e sili atu le taua i le faamanatuga?

Mataio 26:26–28; 3 Nifae 18:1–13 (Na amatalia e le Faaola le faamanatuga)

1 Korinito 11:23–29; 3 Nifae 9:20; MF&F 20:37; 59:8–12 (E faapefea ona saunia e fetagofi atu i le faamanatuga ma le agavaa)

Peter F. Meurs, “E Mafai ona Fesoasoani le Faamanatuga ia i Tatou ia avea ma Tagata Paia,” Ensign po o le Liahona, Nov. 2016, 85–87

Dale G. Renlund, “Ina Ia Mafai Ona Ou Aumai o Tagata Uma ia te Au,” Ensign po o le Liahona, Me 2016, 39–42

Cheryl A. Esplin, “O Le Faamanatuga—o se Toefaafouina o le Agaga,” Ensign po o le Liahona, Nov. 2014, 12–14

“Faamanatuga,” Faamaoni i le Faatuatua (2004), 45–47

Vitio: “E Fesoasoani le Faamanatuga Ia I Tatou e Faalatalata Atili ia Iesu Keriso”

2:25

Aoao atu i le ala a le Faaola

Na fesoasoani Iesu Keriso ia i latou sa Ia aoaoina ia iloa lesona faaletalalelei i o latou lava aafiaga faapea ma le lalolagi o loo siomia ai i latou. Sa ia fetalai mai e uiga i fagotaga, e uiga i le fanau mai, ma i le galueaina o fanua. E faapefea ona e faaaogaina ni aafiaga masani e fesoasoani ai i le autalavou ina ia malamalama i mataupu faavae o le talalelei?

Ia fai fesootaiga

I nai minute muamua lava o vasega taitasi, fesoasoani i le autalavou e faia ni fesootaiga i le va o mea latou te aoaoina i nofoaga eseese (e pei o suesuega faaletagata, seminare, isi vasega faale-Ekalesia, po o aafiaga ma a latou uo). E mafai faapefea ona e fesoasoani ia i latou ia iloa le taua o le talalelei i o latou olaga i aso taitasi? E mafai ona fesoasoani manatu nei:

Fai atu i le autalavou e faasoa mai se taimi na aoao atu ai ma le totoa e se faiaoga se mataupu faavae o le talalelei.
Fai atu i le autalavou e faauma le fuaiupu “E mafai ona ou faia le faamanatuga e avea ma mea e sili ona taua ia te au i le___________.” Valaaulia i latou e lisi a latou tali i le laupapa ma faaopoopo i le lisi a o faia le lesona.

Aoao faatasi

O le a fesoasoani gaoioiga taitasi nei i le autalavou e aoao ai i le auala e avea ai le faamanatuga ma mea e sili ona anoa ia i latou. I le mulimuli ai i le taitaiga a le Agaga, filifili se tasi pe sili atu e aoga mo lau vasega:

Valaaulia le autalavou e mafaufau i se taimi sa faia ai e se tagata latou te iloa se mea faapitoa mo i latou. O a ni o latou lagona e uiga i ai? Ina ia fesoasoani i le autalavou ina ia malamalama sa faamaeaina e le Faaola le Togiola mo i latou taitoatasi, atonu e te manao e valaaulia i latou e faitau faatasi le parakalafa e amata i le “Po o fea lava le itu o tatou agai i ai i le taimi nei” mai le lauga a Elder Dale G. Renlund “Ina Ia Mafai Ona Ou Aumai o Tagata Uma ia te Au.” O le a se mea sa iu ina iloaina e le fafine i le lauga? O le a se mea e mafai e le autalavou ona faia e avea ai le faamanatuga ma se aafiaga sili ona paia? Atonu o le a tuu atu ia tofu tagata o le vasega ma se kata laitiiti. Ona fai atu lea i tagata o le vasega e lisi mai ni mea sa latou manatu i ai i le taimi mulimuli sa latou aai ai ma feinu i le faamanatuga. E mafai foi ona latou lisiina ni mea e mafai ona latou mafaufau i ai e fesoasoani ai ia i latou e taulai atu i le Faaola i le isi taimi latou te aai ai ma feinu i le faamanatuga.
Faaali atu se ata o le Faaola o loo faataunuuina le faamanatuga (tagai Tusi Ata o le Talalelei,54). Ao e faitaua le Mataio 26:26–28, fai atu i le autalavou e tagai i le ata ma mafaufau pe faapei se lagona pe ana i ai iina. Faasoa atu ni auala na faamalosia ai e le faamanatuga lou alofa mo le Faaola ma le molimau i le Togiola. Valaaulia le autalavou e faasoa mai a latou molimau. Uunaia le autalavou e mafaufau loloto i mea sa latou talanoaina i le asō i le isi taimi latou te aai ai ma feinu i le faamanatuga. O a nisi mea na tutupu mai le soifuaga o le Faaola e mafai ona latou mafaufau i ai i le taimi o le faamanatuga?
Valaaulia le autalavou e faasoa mai se viiga o le faamanatuga e sili ona latou fiafia i ai (afai e manaomia, e mafai ona latou vaai i le faasino upu o autu i le pito i tua o le tusipese) ma faamatala mai pe aisea e anoa ai ia i latou. Usu, faalogologo i ai, pe faitau se tasi po o le sili atu o nei viiga, ma faitau mau o loo lisiina atu i le faaiuga o viiga taitasi. O le a se mea ua tatou aoaoina e uiga i le faamanatuga mai viiga? E faapefea ona fesoasoani viiga e saunia ai i tatou mo le faamanatuga?
Valaaulia ia tagata taitasi o le vasega e filifili se tasi o mau o i lenei otootoga ma faitau i ai, tagai mo mea o loo talosaga mai le Alii ia i tatou e fai e saunia ai mo le faamanatuga. Fai atu i le autalavou e faasoa mai mea ua latou maua. Aisea e finagalo ai le Alii ia tatou saunia mo le faamanatuga i nei auala? Valaaulia i latou e faasoa mai nisi mea latou te faia ina ia atili anoa ai aafiaga o le faamanatuga. Fai atu i le autalavou e filifili se mea o le a latou faia ao latou saunia e aai ma feinu i le faamanatuga i le vaiaso a sau.
Valaaulia le autalavou e faitau le saunoaga a Elder Peter F. Meurs “E Mafai ona Fesoasoani le Faamanatuga ia i Tatou ia avea ma Tagata Paia” po o le tala e uiga i le taitai o Tamaitai Talavou i le saunoaga a Sister Cheryl A. Esplin “O Le Faamanatuga—o se Toefaafouina o le Agaga.” Fai atu ia i latou e saili mo tali i le fesili “E faapefea ona ou faia ia avea le faamanatuga ma mea e sili ona anoa ia te au?” Valaaulia i latou e tusi a latou tali i le laupapa ma faasoa mai se mea latou te fuafua e fai e faaaoga ai le fautuaga mai le lauga sa latou faitauina.
Afai e mafai, asiasi atu i le laulau ma le potu e sauniuni ai le faamanatuga faatasi o se vasega. Valaaulia e e umia le Perisitua Arona (aoao po o ositaulaga) po o le epikopo e faamatalaina le auala o saunia ai le faamanatuga ma tuu atu se molimau e uiga i le paia o lenei sauniga. Valaaulia isi tagata o le vasega e faasoa mai a latou molimau ma o latou manatu e uiga i mea e mafai ona latou faia e taulimaina ai le faamanatuga ma le migao atili.

Fai atu i le autalavou e faasoa mai mea ua latou aoaoina i le aso. O a ni o latou lagona po o ni uunaiga o i ai? Pe ua latou malamalama i le ala e fai ai ia anoa atili le faamanatuga ia i latou? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Valaaulia e faatino

Fesili i le autalavou po o a ni mea ua musuia i latou e fai ona o mea sa latou aoaoina i le aso. Fautuaina i latou e faatino na lagona. Saili le Agaga a o e mafaufau ma le agaga tatalo i ni auala e mafai ai ona e tulitataoina.