E mafai faapefea ona ou fesoasoani atu i isi ia malamalama i le aoaoga faavae a Keriso?

O le “aoaoga faavae a Keriso” e faapea e tatau i tagata uma i soo se nofoaga ona faatuatua ia Iesu Keriso, salamo mai a latou agasala, ia papatisoina, maua le meaalofa o le Agaga Paia, ma tumau e oo i le iuga. O le aoaoga faavae a Keriso ua na o le pau lea o le auala e faaolaina ai i le malo o le Atua. O le faavae lea o le Ekalesia ma o le savali tutotonu o ana faifeautalai.

Saunia oe lava ia faaleagaga

Ao e suesue i le aoaoga faavae a Keriso i le 2 Nifae 31 ma soo se mea i tusitusiga paia, o a ni manatu po o ni musumusuga na oo mai ia te oe? Na faapefea ona taitaia ma faamanuiaina lou olaga e Lana aoaoga faavae?

Aisea e manaomia ai e le autalavou ona aoao e uiga i le aoaoga faavae a Keriso? E mafai faapefea e lenei malamalama ona lava tapena ai i latou e faasoa atu ma isi lenei savali autu e uiga i le Toefuataiga?

Ao e sauniuni, ia suesue ma le agaga tatalo ia mau ma punaoa nei. O le a se mea e te lagona ua uunaia ai oe e faasoa atu i le autalavou?

2 Nifae 25:26 (Ua matou talai atu Keriso)

2 Nifae 31 (Ua faamatalaina e Nifae le aoaoga faavae a Keriso)

3 Nifae 11:32–41; 27:13–21 (Ua folafola atu e Keriso Lana aoaoga faavae)

Mataupu Faavae o le Faatuatua 1:4 (O uluai mataupu autu ma sauniga o le talalelei)

“O Le Talalelei a Iesu Keriso,” Talai Lau Talalelei (2004), 67–73

Brian K. Ashton, “O Le Mataupu Faavae a Keriso,” Ensign po o le Liahona, Nov. 2016, 106–9

D. Todd Christofferson, “O Le Mataupu Faavae a Keriso,” Ensign po o le Liahona, Me 2012, 86–90

Aoao atu i le ala a le Faaola

Na faaaoga e le Faaola ia tusitusiga paia e aoao atu ai ma molimau atu e uiga i Lana misiona. Sa Ia aoaoina tagata e mafaufau e uiga i tusitusiga paia mo i latou lava ma faaaoga e sue ai tali i a latou lava fesili. E mafai faapefea ona e faaaogaina tusitusiga paia e fesoasoani ai i le autalavou ia malamalama i le aoaoga faavae a Keriso?

Ia fai fesootaiga

I nai minute muamua o vasega taitasi, fesoasoani i le autalavou e fai ni fesootaiga i le va o mea o loo latou aoaoina i tulaga eseese (e pei o suesuega faaletagata, seminare, isi vasega i le Lotu, po o aafiaga ma a latou uo). E faapefea ona e fesoasoani ia i latou ia iloa le manaomia o le talalelei i aso taitasi o le olaga? O manatu nei e ono fesoasoani ia te oe:

Valaaulia le autalavou e faasoa mai se aafiaga na latou maua talu ai nei na faamanatu mai ai ia i latou se mea o loo latou aoaoina ia latou vasega i le Lotu.
Tusi i le laupapa, “O le a le aoaoga faavae a Keriso?” Tuu atu ia tofu tagata o le vasega ma se kopi o le parakalafa o i le amataga o lenei lesona ma fai atu ia i latou e faitau i ai, tagai mo se tali i le fesili o loo i luga o le laupapa. Valaaulia i latou e faasoa mai o latou manatu i le vasega. Valaaulia le afa o le vasega e faitau le 3 Nifae 11:39–41, ma valaaulia le isi afa e faitau le “O Lo’u Faamoemoega” i le itulau 1 o le Talai Lau Talalelei. E tusa ai ma nei punavai, aisea e taua ai le malamalama o le autalavou i le aoaoga faavae a Keriso?

Aoao faatasi

O gaoioiga taitasi o i lalo e mafai ona fesoasoani i le autalavou e aoao ai e uiga i le aoaoga faavae a Keriso ina ia latou lava saunia e faasoaina atu ma isi. I le mulimuli ai i le taitaiga a le Agaga, filifili se tasi pe sili atu o le a aoga mo lau vasega:

Iloilo faatasi o se vasega po o le a le mataupu faavae a Keriso, e pei ona aoao mai i le saunoaga a Brother Brian K. Ashton “O Le Mataupu Faavae a Keriso.” Vaevae tagata o le vasega i ni vaega toalaiti, ma valaaulia vaega taitasi e tusi se ata po o se siata e faaalia ai pe faapefea ona galulue faatasi le faatuatua, salamo, papatisoga ma le faamanatuga, le meaalofa o le Agaga Paia, ma le tumau seia oo i le iuga e fesoasoani ai ia i tatou ina ia alualu i luma e agai i le atoatoa. O a fautuaga na tuuina mai e Brother Ashton e uiga i le auala e mafai ona tatou “faaaogaina [ai] ma le atoatoa le mataupu faavae a Keriso i o tatou olaga”? O a nisi manatu e mafai ona fautuaina mai e le autalavou?
Valaaulia tagata o le vasega e galulue faatasi i ni paga, ma atofaina ia tofu paga taitasi ma se tasi po o le sili atu o vaega nei o le mataupu faavae a Keriso: faatuatua, salamo, papatisoga, o le meaalofa o le Agaga Paia, ma le tumau seia oo i le iuga. Valaaulia paga taitasi e faitau le 2 Nifae 31 ma saili ni mau e mafai ona latou faaaogaina e aoao atu ai e uiga i vaega na atofaina atu ia i latou assigned. O a nisi o mau e mafai ona latou faaaogaina? Fai atu i paga taitasi e aoao atu le vaega o totoe o le vasega, e faaaoga ai mea sa latou mauaina i tusitusiga paia.
Tofi tagata taitasi o le vasega e faitau se tasi o vaega nei o le mataupu 3 o le Talai Lau Talalelei: “Faatuatua ia Iesu Keriso,” “Salamo,” “O Le Papatisoga, O La Tatou Uluai Feagaiga,” “O Le Meaalofa o le Agaga Paia,” ma “Tumau e oo i le Iuga.” Fai atu ia i latou e aoao atu i le vasega atoa se mea sa latou aoaoina, faaaoga se mau ma se faataitaiga po o se aafiaga faaletagata lava ia.
Fai i tagata taitasi o le vasega e faitau le 2 Nifae 31 ma vaavaai i mea sa aoaoina e Nifae e uiga i le aoaoga faavae a Keriso (faatuatua, salamo, papatisoga, mauaina o le Agaga Paia, ma tumau e oo i le iuga). Vaevae le vasega i ni “soa” taitoalua pe taitoatolu, ma tuu atu ia i latou se taimi e fuafua ai ni auala e mafai ona latou aoao atu ai le aoaoga faavae a Keriso i se tasi e lei faalogo muamua i ai. Valaaulia ia soa taitasi e faataitai le aoao atu o se isi soa.

Fai atu i le autalavou e faasoa mai mea ua latou aoaoina i le aso. O latou iloa le auala e mafai ona latou fesoasoani atu ai i isi ia malamalama i le aoaoga faavae a Keriso? O a ni lagona po o uunaiga o latou maua e uiga i le tiutetauave o le faasoa atu o lenei aoaoga faavae i isi? Pe o i ai ni a latou fesili faaopoopo?

Motugaafa faafaiaoga

“Afai tatou te mananao e faa-aafia tagata o loo aoao mo le lelei, e le tatau ona tatou na ona fiafia e aoao atu; ae tatau ona tatou alolofa i tagata uma tatou te aoaoina” (O Le Aoao Atu, E Leai Se Isi Valaauga E Sili Ai [1999], 34).

Valaaulia e faatino

Fesili i le autalavou po o a ni mea ua musuia i latou e fai ona o mea sa latou aoaoina i le aso. Fautuaina i latou e faatino na lagona. Mafaufau i ni auala e mafai ai ona e tulitataoina.