E mafai faapefea ona ou iloa le eseesega i le va o le mea moni ma le mea sese?

I le taimi o le Liliuese Tele, e tele upumoni o le talalelei sa suia pe leiloloa. O nei upumoni sa toefuataiina mai i o tatou aso e ala i le Perofeta o Iosefa Samita. O le suesueina o le afioga a le Atua ma le faalogo i le Agaga paia e mafai ona fesoasoani tatou te iloa ai le eseesega i le va o upumoni o le talalelei toefuataiina ma mea sese ua aoao mai e le lalolagi.

Saunia oe lava ia faaleagaga

E faapefea ona e iloatino le va o le mea moni ma le mea sese? O a ni faamanuiaga ua oo mai i lou olaga ona sa mafai ona e iloatino le va o le mea moni ma le mea sese?

O a nisi o mea sese ua taatiafua mai i le autalavou? E mafai faapefea ona e uunaia i latou e iloilo le moni o faamatalaga latou te maua? Aisea e taua ai lo latou iloa o le auala e fai ai lenei mea?

Faaaoga punaoa o loo i lalo ia malamalama ai mo oe lava i le auala e iloa ai le eseesega i le va o le mea moni ma le mea sese. O ou lava aafiaga o le ola ai i lenei mataupu faavae o le a fesoasoani e te aoao atu ai ma le mataalia. Ona fuafua lea pe mafai faapefea e gaoioiga o i lenei otootoga ona fesoasoani ia te oe e fuafua ai auala e faaaofia ai le autalavou i le aoaoina.

Ioane 8:31–32; Iosefa Samita—Mataio 1:37 (O le suesueina o le afioga a le Atua e fesoasoani tatou te iloa ai le mea moni)

Isaia 5:20; Mose 4:3–4 (E taumafai Satani e taufaasese)

Moronae 7:12–19 (O le mea e tauanauina i tatou e fai mea lelei ma talitonu ia Keriso e a le Atua lea)

Moronae 10:5; MF&F 46:7–8 (O le Agaga Paia e molimau i le mea moni)

Iosefa Samita—Talafaasolopito 1:8–20 (Na tatalo Iosefa Samita ia iloa le mea moni)

Boyd K. Packer, “O Nei Mea Ua Ou Iloa,” Ensign po o le Liahona, Me 2013, 6–8

Neil L. Andersen, “Iosefa Samita,” Ensign po o le Liahona, Nov. 2014, 28–31

Marcos A. Aidukaitis, “Ae Afai Ua Leai Se Poto i So Outou,” Ensign po o le Liahona, Me 2014, 108-10

Vitio: “O Le A Faasaolotoina Oe

2:53

Ia fai fesootaiga

I nai minute muamua o vasega taitasi, fesoasoani i le autalavou e fai ni fesootaiga i le va o mea o loo latou aoaoina i tulaga eseese (e pei o suesuega faaletagata lava ia, seminare, isi vasega faaleLotu, po o aafiaga ma a latou uo). E faapefea ona e fesoasoani ia i latou ia iloa le taua o le talalelei i aso taitasi o le olaga? O manatu nei e ono fesoasoani ia te oe:

Ia talanoa i fesili o loo i ai a le autalavou e uiga i le Liliuese ma le Toefuataiga i isi a latou vasega. E mafai faapefea ona e fesoasoani ia i latou ia maua tali?
Faaali le minute muamua ma sekone e 30 o le vitio “O Le A Faasaolotoina Oe“ I lenei vaega o le vitio, o loo lapatai mai ai Elder M. Russell Ballard e uiga i auala atamamai a Satani e taumafai e faasese i tatou. Fai atu i le autalavou ia talanoaina mea sa latou aoaoina e uiga i le le gauai atu i pepelo a Satani.

2:53

Aoao faatasi

O le a fesoasoani gaoioiga taitasi nei i le autalavou e iloa ai auala e iloa ai le eseesega i le va o le mea moni ma le mea sese. I le mulimuli ai i le taitaiga a le Agaga, filifili se tasi pe sili atu o le a aoga mo lau vasega:

Tuu atu ia tofu tagata o le vasega ma se kopi o parakalafa mulimuli e iva o le saunoaga a Peresitene Boyd K. Packer “O Nei Mea Ua Ou Iloa.” Valaaulia le autalavou e vaavaai mo upu autu o le a fesoasoani ia i latou ia iloa le eseesega i le va o mea moni ma mea sese. Fai atu ia i latou e tusi ni upu latou te mauaina i luga o le laupapa ma faamatala mai pe aisea na latou filifili ai nei upu.
Vaevae le vasega i ni vaega se lua, ma tuu atu i vaega taitasi se kopi o le saunoaga a Elder Neil L. Andersen “Iosefa Samita.” Fai atu i le tasi vaega e faitau le tala e uiga i le tusi pepelo lea na faaseseina nisi o tagata o le Ekalesia. Fai i le isi vaega e faitau le tala e uiga i le ata o Elder Russell M. Nelson. Fai atu i vaega taitasi e faasoa mai mea sa latou aoaoina mai la latou tala e uiga i le iloatino o le va o le mea moni ma le mea sese.
Fai i le autalavou e suesue i le Iosefa Samita Talafaasolopito1:8–20 ma fai se lisi o laasaga sa fai e Iosefa Samita e iloa ai le mea moni mai le mea sese. E mafai faapefea ona mulimuli le autalavou i le faataitaiga a Iosefa pe afai latou te fia iloa pe moni se mea?
Fai i le autalavou e suesue i le Moronae 7:12–19 mo vaega e mafai ona latou faaaogaina e iloatino ai le va o le lelei ma le leaga. Fai atu i talavou taitoatasi e fai se lisi o filifiliga o loo feagai ma ia ma ia faaaoga nei vaega e taiala ai ia faaiuga taitasi. Fai i ai e faasoa mai aitema mai a latou lisi pe afai e le afaina ia te i latou pe a faasoa mai.
Fai atu i le autalavou e vaai faalemafaufau i se tulaga faapea ua latou tau i ni faamatalaga e ono mafua ai ona fesiligia a latou molimau i le talalelei. O le a se mea e mafai ona latou faia e iloatino ai le va o le mea moni ma le mea sese i se tulaga faapena? Ina ia fesoasoani ia i latou e saili ni tali i lenei fesili, fai i ai e suesue i mau o loo i lenei otootoga po o laasaga e tolu na fautua mai e Elder Marcos A. Aidukaitis i lana lauga “Ae Afai Ua Leai Se Poto i So Outou.” Fai i ai e faasoa mai mea ua latou maua. Fai atu ia i latou e faasoa mai ni aafiaga sa latou mauaina lea na mafai ai ona latou iloatino le mea moni mai le mea sese.

Fai atu i le autalavou e faasoa mai mea ua latou aoaoina i le aso. Pe ua latou malamalama i le auala e iloa ai le eseesega i le va o le mea moni ma mea sese? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Tomai e suesue ai le talalelei

Iloatino o le va o aoaoga faavae moni ma aoaoga faavae pepelo. O nisi taimi pe a tatou iloa pe aoao ni malamalamaaga o faamatalaga fou, e mafai ona tatou iloaina lona moni e ala i le taliina o fesili e pei o le fesili lenei: Pe na sili atu nai lo le faatasi ona aoaoina le manatu lenei i tusitusiga paia? Pe e aoaoina e perofeta soifua ma aposetolo? Pe ua ogatusa ma faatinoga o i ai nei ma aiaiga faavae ua faamaonia a le Ekalesia? E molimau mai e le Agaga ia te au lona moni?

Valaaulia e faatino

Fai atu i le autalavou e faasoa mai soo se lagona sa latou maua i le taimi o le vasega. O le a se mea sa musuia i latou e fai? O le a se mea e mafai ona e faia e uunaia ai i latou ia ola i mea ua latou aoaoina?