E mafai faapefea ona ou saunia ia maua sauniga o le malumalu?

E tusa lava pe tatou te lei maua sauniga o le malumalu, e mafai ona tatou saunia i tatou lava e ala i le ola agavaa e ulu atu i le malumalu, tausia feagaiga ua uma ona tatou osia, ma ia avea le malumalu ma se vaega o o tatou olaga. E mafai foi ona tatou suesue i tusitusiga paia ma saunoaga a perofeta e aoao atili ai e uiga i sauniga o le malumalu.

Saunia oe lava ia faaleagaga

Afai ua e mauaina sauniga o le malumalu, na faapefea ona e saunia oe lava ia e faia lenei mea?

O le a se mea na e faalogo i ai pe na matauina mai le autalavou na fesoasoani ia te oe ia malamalama ai i o latou lagona e uiga i le malumalu? O le a se mea o latou faia e saunia ai ina ia maua sauniga o le malumalu?

Manatua: Mafaufau e fautuaina lou epikopo ina ia aumai e le uarota ni kopi o le tamai tusi Malumalu o le Ekalesia a Iesu Keriso o le Au Paia o Aso e Gata Ai (09339) mo le autalavou ina ia fesoasoani ia i latou e saunia e ulu atu i le malumalu.

Ia suesue ma le agaga tatalo ia mau ma punaoa nei. O le a se mea o e lagona o le a fesoasoani i le autalavou a o latou tulimatai atu i le mauaina o sauniga o le malumalu?

Salamo 24:3–4; MF&F 97:15–17 (E tatau ona tatou mama ina ia mafai ona ulu atu i le maota o le Alii)

Quentin L. Cook, “Vaai ia Oe Lava ia i Totonu o le Malumalu,” Ensign po o le Liahona, Me 2016, 97–101

Quentin L. Cook, “To’a le Tai ma Sitaili Faa-Bristol: Ia Agavaa mo le Malumalu—i Taimi Lelei ma Taimi Leaga,” Ensign po o le Liahona, Nov. 2015, 39–42

Russell M. Nelson, “Ia Saunia mo Faamanuiaga o le Malumalu,” Ensign po o le Liahona, Oke. 2010, 41–51

Linda K. Burton, “Saunia i se Ala Sa Le'i Iloa Lava,” Ensign po o le Liahona, Nov. 2014, 111–14

“Avea o le Malumalu ma se Vaega o Lou Olaga,” Ensign po o leLiahona, Oke. 2010, 77–78

“O Fesili e Masani ona Fesiligia,” Ensign po o le Liahona, Oke. 2010, 79–80

“Savali i le Autalavou mai le Au Peresitene Sili,” Mo Le Malosi o le Autalavou (2011), ii–iii

Vitio: “E I La Tatou Vaaiga E Le Aunoa”

3:50

Ia fai fesootaiga

I nai minute muamua o vasega taitasi, fesoasoani i le au talavou e fai ni fesootaiga i le va o mea o loo latou aoaoina i tulaga eseese (e pei o suesuega faaletagata, seminare, isi vasega i le Lotu, po o aafiaga ma a latou uo). E faapefea ona e fesoasoani ia i latou ia iloa le manaomia o le talalelei i aso taitasi o le olaga? O manatu nei e ono fesoasoani ia te oe:

Valaaulia le autalavou e faasoa mai soo se manatu na latou maua talu ai nei a o latou aoao e uiga i sauniga ma feagaiga i isi a latou vasega po o a latou lava suesuega patino.
Valaaulia le autalavou e faitau le “Savali i le Autalavou mai le Au Peresitene Sili,” i le Mo Le Malosi o le Autalavou (ii-iii). A uma ona latou faitauina le savali, fai atu ia i latou e faasoa mai pe aisea latou te talitonu ai na filifilia se ata o le malumalu mo le faavaa o le tamaitusi.

Aoao faatasi

O le a fesoasoani ia gaoioiga nei e saunia le autalavou e auai i sauniga o le malumalu. I le mulimuli ai i le taitaiga a le Agaga, filifili se tasi pe sili atu e aoga mo lau vasega:

O se tasi o auala aupito sili ona taua e saunia ai le autalavou e ulu atu i le malumalu o le ola agavaa i le taimi lenei. Faaali le vitio o minute muamua e tolu o le lauga a Elder Quentin L. Cook “To’a le Tai ma Sitaili Faa-Bristol: Ia Agavaa mo le Malumalu—i Taimi Lelei ma Taimi Leaga.” Fai atu i le autalavou e faasoa mai pe faapefea e le faatusatusaga a Elder Cook ona fesootai i le agavaa mo le malumalu. Vaevae le autalavou i ni vaega se tolu ma valaaulia vaega taitasi e iloilo se tasi o mataupu faavae e tolu a Elder Cook mo le ola agavaa. Ona fai atu lea i vaega taitasi e aoao mai mea na latou aoaoina i le vaega o totoe o le vasega. Saunia le taimi mo le autalavou e seti ai sini e ola ai i mataupu faavae na fautuaina mai e Elder Cook.
Faaali le vitio “E I La Tatou Vaaiga E Le Aunoa,” ma valaaulia tagata taitoatasi o le vasega e mafaufau i se mau na te lagona e fesootai i le savali a le vitio (faaali ia i latou pe faapefea ona sue mau i le Taiala i Tusitusiga Paia po o le faasinoupu i le fusi tolu). . Fai atu i le autalavou e faasoa mai a latou mau ma faamatala mai po o le a le mea o aoaoina ai i latou e uiga i le saunia e alu i le malumalu. Fesoasoani i le autalavou e mafaufau i ni auala e “vaai ai ia i latou lava i le malumalu,” e pei ona fautuaina e Elder Quentin L. Cook i lana lauga “Vaai ia Oe Lava ia i Totonu o le Malumalu.” Atonu o le a latou faia ni kata teuteu ma tuu i ai mau ia sa latou mauaina ma tuu kata i luga o a latou faata po o se nofoaga e iloa lelei i le fale e faamanatu atu ia i latou la latou sini ina ia maua faamanuiaga o le malumalu. O a ni folafolaga ma ni valaaulia e mafai e le autalavou ona maua i le lauga a Elder Cook?

3:50
Faitau faatasi o se vasega le Salamo 24:3–4, ma fesili atu i le autalavou po o le a so latou manatu o le uiga o le i ai o ni lima mama ma loto mama. Aisea e avea ai le mama faaleagaga ma se tulaga manaomia mo le ulufale atu i le malumalu? (tagai i le MF&F 97:15-17). Valaaulia se sui o le au epikopo e asiasi atu i le vasega e talanoa e uiga i le mea e tatau ona faia e se tagata ina ia agavaa ai mo se pepa faataga o le malumalu. O le a se mea na te fautuaina ai le autalavou e faia ina ia saunia ai mo le mauaina o sauniga o le malumalu? Uunaia le autalavou e fai ni fesili.
Tofi ia talavou taitasi e faitau se vaega o le tusiga a Peresitene Russell M. Nelson “Ia Saunia mo Faamanuiaga o le Malumalu.” Valaaulia le autalavou e faasoa mai mea sa latou aoaoina mai a latou vaega e uiga i le saunia e auai atu i le malumalu. O a nisi mea sa faagaeetia ai i latou e uiga i le savali a Peresitene Elder Nelson?
Filifili ni fesili mai le tusiga “O Fesili e Masani Ona Fesiligia” e te lagona e sili ona talafeagai mo le autalavou i lau vasega, ma tusi nei fesili i luga o le laupapa. Saunia ni fasi pepa o i ai ni tali mai le tusiga. Tuu atu e filifili e talavou taitasi se fesili mai le laupapa ma saili le tali mai fasi pepa ia sa e saunia. Valaaulia le autalavou e faasoa mai soo se malamalamaaga fou sa latou mauaina.
I lana lauga ua faaulutalaina “Saunia i se Ala Sa Le'i Iloa Lava,” sa uunaia ai i tatou e Sister Linda K. Burton ina ia saunia mo le malumalu i “lea mataua ma lea mataua.” Aisea e sili ai ona lelei le saunia mo sauniga o le malumalu i “lea mataua i lea mataua” nai lo le faia uma i le taimi e tasi? Valaaulia le autalavou e lisi mai nisi o faatinoga faifai pea o le a fesoasoani ia i latou e saunia ai mo le malumalu. Mo nisi o manatu, e mafai ona latou toe iloiloina le saunoaga a Sister Burton.

Fai atu i le autalavou e faasoa mai mea ua latou aoaoina i le aso. O a ni o latou lagona po o ni uunaiga o i ai? Pe ua latou malamalama i le auala e saunia ai mo sauniga o le malumalu? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Tomai e suesue ai le talalelei

Faaaogaina o le Taiala i Tusitusiga Paia. O le gaoioiga muamua lava i lenei vaega o le uunaia lea o le autalavou ina ia sailia mau e faaaoga ai le Taiala i Tusitusiga Paia (tagaiO Le Aoao Atu, E Leai Se Isi Valaauga E Sili Ai, itulau 58). Fesoasoani atu ia i latou ia lagona le toafimalie i le Taiala i Tusitusiga Paia ma isi fesoasoaniga tau suesuega ina ia mafai ona latou faaaogaina soo i a latou suesuega faaletagata lava ia o le talalelei.

Valaaulia e faatino

Valaaulia le autalavou e manatunatu loloto i mea na latou faalogo i ai ma lagonaina i le aso ma filifili se mea o le a latou faia e saunia ai e maua sauniga o le malumalu.
Faasoa atu lau molimau e uiga i le taua o sauniga o le malumalu.