O a mea e mafai e tusitusiga paia ona aoaoina ai au e uiga i le Togiola a Iesu Keriso?

O le faamoemoega autu o tusitusiga paia o le molimau lea ia Iesu Keriso, fesoasoani ia tatou o mai ia te Ia ma faaaoga Lana Togiola. A o tatou suesueina tusitusiga paia ma le filiga, o le a tatou aoao e uiga i le Faaola e ala i aoaoga, tala, ma faatusa.

Saunia oe lava ia faaleagaga

O a ni mau e uiga ia Iesu Keriso e taua ia te oe? O a faatusa o Iesu Keriso na e mauaina i tusitusiga paia? O a ni mau na fesoasoani e te malamalama atili ai i le Togiola?

Na faapefea ona maua e talavou o loo e faiaoga ai Iesu Keriso i tusitusiga paia? O a faatusa o Iesu Keriso e mafai ona e fesoasoani i ai latou te sailia?

Ia suesue ma le agaga tatalo ia mau ma punaoa nei. O le a se mea e te lagona ua uunaia ai oe e faasoa atu i le autalavou?

Kenese 22:1–14 (O Aperaamo ua ofoina atu lona atalii o Isaako o se faatusa o le taulaga a le Alo o le Atua; tagai Iakopo 4:5)

2 Nifae 11:4; Mose 6:63 (O mea uma ua tuuina mai e le Atua ia i tatou ua aoao mai e uiga i Lona Alo)

Mosaea 13:33–35 (Ua molimau mai perofeta uma ia Iesu Keriso)

Boyd K. Packer, “O Le Mafuaaga mo lo Tatou Faamoemoe,” Ensign po o le Liahona, Nov. 2014, 6-8

Ia fai fesootaiga

I nai minute muamua o vasega taitasi, fesoasoani i le au talavou e fai ni fesootaiga i le va o mea o loo latou aoaoina i tulaga eseese (e pei o suesuega faaletagata, seminare, isi vasega i le Lotu, po o aafiaga ma a latou uo). E faapefea ona e fesoasoani ia i latou ia iloa le manaomia o le talalelei i aso taitasi o le olaga? O manatu nei e ono fesoasoani ia te oe:

Tulitatao mea na aoaoina e le autalavou i le Aoga Sa i le vaiaso ua tuanai. Na faapefea ona latou faaaogaina mea na latou aoaoina i le gasologa o le vaiaso?
Valaaulia talavou e faasoa mai se mau na latou faitauina talu ai nei e uiga ia Iesu Keriso po o Lana Togiola.

Aoao faatasi

O le a fesoasoani gaoioiga taitasi nei i le autalavou e aoao ai pe faapefea ona sailia Iesu Keriso i tuistusiga paia. I le mulimuli ai i le taitaiga a le Agaga, filifili se tasi pe sili atu o le a aoga mo lau vasega:

Faitau faatasi o se vasega ia parakalafa muamua e lima o le saunoaga a Peresitene Boyd K. Packer “O Le Mafuaaga mo lo Tatou Faamoemoe.” Valaaulia tagata o le vasega e tagai i le O Le Taiala i Tusitusiga Paia i ulutala o autu o loo faasesega atu lea e amata ia “Iesu Keriso.” Fai atu ia i latou e faitau ni nai mau o loo lisi atu i lalo o ulutala lea latou te fiafia i ai ma faasoa mai mea sa latou aoaoina e uiga i matafaioi o le Faaola ma e uiga i Lana Togiola. I le avea ma se vaega o lenei gaoioiga, e mafai foi ona latou suesue i mau e uiga ia Iesu Keriso lea na faasino i ai Peresitene Packer i lana lauga.
Valaaulia ia talavou taitasi e aumai i le vasega se mau e fiafia i ai e uiga ia Iesu Keriso ma Lana Togiola. Fai i tagata o le vasega e tusi ni mau faasino i luga o le laupapa, ma faitau i ai faatasi o se vasega. Fai atu i le autalavou e faasoa mai pe aisea e taua ai nei fuaitau ia i latou. Fesoasoani atu ia i latou e fatu se filifili o mau i mau faasino nei.
Suesue faatasi se tala po o se mea na tutupu i tusitusiga paia o se faatusa o le Faaola ma Lona Togiola. Afai e mafai, faaali ni ata o le tala (tagai i le Tusi Ata o le Talalelei). Valaaulia le autalavou ia iloa le auala na avea ai lena tala po o le mea na tutupu ma faatusa o le misiona a le Faaola. Tuu atu i le autalavou ni avanoa e saili ai nisi tala o tusitusiga paia lea e aoao atu faafaatusa e uiga i le Togiola a Iesu Keriso.
Valaaulia le autalavou e tagai i le Tusi Ata o le Talalelei ma saili ni ata o tala faatusipaia lea e mafai ona faaaoga e aoao atu ai e uiga i le Togiola. Mo se faataitaiga, o le tala i le vaa o Noa lea e mafai ona faatusa i ai le auala e saunia ai e le Togiola le malupuipuiga mai lologa o le agasala. Uunaia i latou e faitau ia mau e faatatau i ata sa latou mauaina (o loo maua mau faasino i le amataga o le tusi) ma faasoa atu mea sa latou aoaoina e uiga i le Togiola.
Fai atu i le autalavou e faitau le Mose 6:63 ma fai se lisi o mea “o i le lagi i luga,” ma ”o i totonu o le lalolagi” lea e molimau mai ia Iesu Keriso. Fesoasoani atu ia i latou e faaaoga le Topical Guide e sue ai ni mau lea e faatusalia ai Iesu Keriso i nisi o mea nei (mo se faataitaiga, ua faatusalia o Ia i se papa i le Helamana 5:12).

Fai atu i le autalavou e faasoa mai mea ua latou aoaoina i le aso. Pe ua latou malamalama i le auala e aoao ai e uiga ia Iesu Keriso ma Lana Togiola mai tusitusiga paia? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Motugaafa faafaiaoga

“Aua e te fefe i le leai o se pisa. E masani ona mananao tagata i nisi taimi e mafaufau e uiga i fesili ma tali atu i ai pe faailoa atu ai po o a o latou lagona. Atonu e te faatali pe a mavae ona tuuina atu se fesili, pe a maea ona fetufaai mai se tulaga faaleagaga na oo i ai, pe i ai foi ni faafaigata i se tagata e faamatala mai ai ona lagona” (O Le Aoao Atu, E Leai Se Isi Valaauga E Sili Ai [1999], 70).

Valaaulia e faatino

Faasoa mai se mea na e aoaoina talu ai nei e uiga ia Iesu Keriso i tusitusiga paia.
Valaaulia le autalavou e faasoa mai so o se uunaiga na latou maua i le vasega. O le a le mea o le a latou faia ia latou suesuega faaletagata o tusitusiga paia ia taulai atili ai i le aoaoina e uiga ia Iesu Keriso? Fautuaina i latou e faasoa mai mea latou te mauaina i vasega i le lumanai.