E faapefea ona fesoasoani mai le Agaga Paia ia te au e aoao atu le talalelei?

A o tatou aoao atu le talalelei, e tatau ona tatou iloaina ma le lotomaualalo o le Agaga Paia o le faiaoga moni lea. O lo tatou avanoa o le auauna atu e fai ma meafaigaluega lea e mafai ai e le Agaga Paia ona aoao atu, molimau atu, ma faamafanafana atu, ma musuia isi. E tatau ona tatou ola agavaa e maua le Agaga, tatalo mo Lana taitaiga a o tatou saunia ma aoao atu, ma fatuai se siosiomaga lea e mafai ai e i latou tatou te aoaoina ona lagonaina Ana uunaiga.

Saunia oe lava ia faaleagaga

E faapefea ona e iloaina o loo e aoao atu e ala i le Agaga? Pe sa i ai sou aafiaga faaleagaga i le aoao atu e mafai ona e faasoa atu ma le talafeagai i le autalavou?

O a ni avanoa o i ai i le autalavou e aoao atu ai isi e uiga i le talalelei? Pe ua latou malamalama i le uiga o le aoao atu e ala i le Agaga? E mafai faapefea ona e fesoasoani ia i latou ia lagonaina le taua o le mulimuli i le Agaga a o latou aoao atu?

Ia suesue ma le agaga tatalo nei mau ma punaoa. O a ni mea ua musuia oe e faasoa atu i le autalavou?

Ioane 15:26; MF&F 50:13–22; 52:9 (Ua auina mai Le Faamafanafana e aoao mai le upumoni)

2 Nifae 33:1–2 (E molioo e le Agaga Paia a tatou upu i loto o le fanauga a tagata)

Alema 17:3 (Sa saunia e atalii o Mosaea i latou lava e aoao atu i le mana ma le pule)

MF&F 11:21; 84:85 (O le a fesoasoani le Agaga ia i tatou ia iloa mea e tau atu pe a tatou saili atu ia maua le afioga a le Atua)

MF&F 42:11–17 (A tatou le mauaina le Agaga, e le tatau ona tatou aoao atu)

Dallin H. Oaks, “Aoao Atu ma le Aoaoina i le Agaga,” Liahona, Me 1999, 14–24

Matthew O. Richardson, “Aoao Atu e Tusa ai ma le Agaga,” Ensign po o le Liahona, Nov. 2011, 94–96

“O Le Mana o le Agaga i le Liuaina,” Talai La’u Talalelei (2004), 96–97

Aoao atu i le ala a le Faaola

Sa faia e le Faaola ni fesili na faaosofia ai e na Ia aoaoina ia lagonaina ma mafaufau loloto. Na Ia tuu atu ia i latou ni avanoa e fai mai ai ni a latou lava fesili ma faasoa mai ni o latou lava malamalamaaga. Ona sa Ia alofa ia i latou, sa latou lagonaina ai le saogalemu e faasoa mai o latou mafaufauga ma lagona patino. E mafai faapefea ona e fesoasoani i le autalavou ia lagonaina le saogalemu e faasoa mai o latou mafaufauga ma lagona patino?

Ia fai fesootaiga

I nai minute muamua lava o vasega taitasi, fesoasoani i le autalavou e faia fesootaiga i le va o mea latou te aoaoina i nofoaga eseese (e pei o suesuega faaletagata lava ia, seminare, isi vasega faale-Ekalesia, po o aafiaga ma a latou uo). E mafai faapefea ona e fesoasoani ia i latou ia iloa le taua o le talalelei i o latou olaga i aso taitasi? E mafai ona fesoasoani manatu nei:

Fai atu i le autalavou e mafaufau i se taimi sa latou lagonaina ai le Agaga i se vasega i le Lotu, i le seminare, po o le afiafi faaleaiga. O le a se mea na faia e le faiaoga na valaaulia ai le Agaga?
Valaaulia le autalavou e lisi ni avanoa latou te maua e aoao atu ai le talalelei i isi. Uunai i latou e faaaofia ai ni taimi le aloaia, le fuafuaina e aoao atu ai, faapea foi ni galuega atofaina aloaia faafaiaoga. Tusi i luga o le laupapa, “O le a le uiga o le aoao atu e ala i le Agaga?” Valaaulia le autalavou e mafaufau loloto, i le lesona atoa, pe faapefea ona latou taliina lenei fesili e pei ona fesootai i avanoa faafaiaoga ua latou lisiina. I le faaiuga o le lesona, valaaulia i latou e faasoa mai o latou manatu.

Aoao faatasi

O gaoioiga taitasi o loo i lalo o le a fesoasoani i le autalavou ia malamalama po o le a le uiga o le aoao atu i le Agaga. Mulimuli i le musumusuga a le Agaga Paia, filifili se tasi pe sili atu o mea nei o le a sili ona aoga mo lau vasega:

Tuu atu i le autalavou e filifili se tasi o fesili nei: Aisea e taua ai le aoao atu e ala i le Agaga? E faapefea ona faamanuiaina e le Agaga i tatou o ni faiaoga? E faapefea ona faamanuia e le Agaga i latou tatou te aoaoina? O le a se mea e tatau ona tatou faia e valaaulia ai le Agaga i a tatou aoaoga? Fai atu i tagata taitoatasi o le vasega e faitau se mau e uiga i le aoao atu e ala i le Agaga (e pei o mau na fautua mai i lenei otootoga) ma saili i tusitusiga paia se tali i le fesili na ia filifilia. Tuu atu i tagata o le vasega se avanoa e faasoa mai ai a latou mau atoa ai ma tali na latou maua.
Ia filifili ma le agaga tatalo ni vaega mai le lauga a Elder Dallin H. Oaks “Aoao Atu ma le Aoaoina i le Agaga” pe mai le O Le Aoao Atu, E Leai Se Isi Valaauga e Sili Ai, itulau 42–50, e te lagonaina o le a fesoasoani i le autalavou e malamalama ai i le uiga o le aoao atu e ala i le Agaga. Vaevae le vasega i ni vaega laiti, ma fai atu i vaega taitasi e faitau faatasi se tasi o na vaega ma fai se lisi o mea e mafai ona latou faia e aoao atu ai i le Agaga. Valaaulia vaega e fefaasoaai le tasi ma le isi i mea na latou aoaoina, ma uunaia i latou e faaopoopo atu ia latou lisi a o latou faalogologo atu i isi vaega. Fai atu ia i latou e mafaufau loloto pe mafai faapefea ona latou faaaoga mea na latou aoaoina i se avanoa faafaiaoga i le lumanai.
Valaaulia le autalavou e faitau le lauga a Matthew O. Richardson “Aoao Atu e Tusa ai ma le Agaga,” ma tagai mo ni tali i fesili “E faapefea ona aoao mai le Agaga?” ma le “E faapefea ona tatou mulimuli ia te Ia a o tatou aoao atu?” Fai atu ia i latou e fefaasoaai le tasi ma le isi i mea latou te maua. O a ni aafiaga na latou maua ina ua aoao atu se faiaoga “e tusa ma le Agaga”? E mafai faapefea ona latou mulimuli i le faataitaiga a le faiaoga i le isi taimi latou te aoao atu ai?
Tuu atu i tagata taitoatasi o le vasega se kopi o le “O Le Mana o le Agaga i le Liuaina” mai le Tala’i Lau Talalelei (itulau 96–97). Fai atu ia i latou e faitau e le tagata lava ia, ma tagai mo ni tali i le fesili “O le a le uiga o le aoao atu e ala i le Agaga?” Valaaulia i latou e faasoa mai mea latou te maua. Fai atu i le autalavou pe aisea latou te lagona ai e taua le iloaina o lenei mea i le taimi nei, ae latou te lei auauna atu i ni misiona. Uunaia i latou e faauma ia gaoioiga o le “Suesuega Faaletagata Lava Ia” ma le “Mau Suesueina” i o latou lava taimi (pe a mafai, e mafai ona e tuu atu ia i latou se taimi i le vasega e amata ai). Valaaulia i latou e tusi se faamatalaga o soo se mea e musuia ai i latou a o latou faitauina nei mau ma faasoa mai i le vasega i se lesona i le lumanai.

Fai atu i le autalavou e faasoa mai mea na latou aoaoina i le asō. O a ni lagona po o ni uunaiga ua latou maua? Pe ua latou malamalama i le auala e aoao atu ai e ala i le Agaga? E i ai nisi a latou fesili faaopoopo? Pe aoga le toe faaalu o se isi taimi i lenei autu?

Motugaafa faafaiaoga

“Aua e te fefe i le leai o se pisa. E masani ona mananao tagata i nisi taimi e mafaufau e uiga i fesili ma tali atu i ai pe faailoa atu ai po o a o latou lagona. Atonu e te faatali pe a mavae ona tuuina atu se fesili, pe a maea ona fetufaai mai se [aafiaga] faaleagaga na oo i ai, pe i ai foi ni faafaigata i se tagata e faamatala mai ai ona lagona” (O Le Aoao Atu, E Leai Se Isi Valaauga e Sili Ai [1999], 70).

Valaaulia e faatino

Fesili i le autalavou po o a ni mea ua musuia i latou e fai ona o mea sa latou aoaoina i le aso. Fautuaina i latou e faatino na lagona. Saili le Agaga a o e mafaufau ma le agaga tatalo i ni auala e mafai ai ona e tulitataoina.