E faapefea ona fesoasoani le migao ia te au ia ou maua ai faaaliga?

Pe a tatou migao, ua tatou faaali atu lo tatou alofa mo le Atua ma mafai atili ai ona maua faaaliga patino. O se uiga faaalia o le migao tatou te nofouta ai i le leo lemu, itiiti o le Agaga. Afai tatou te taulimaina mea paia ma le migao, o le a faatuatuaina i tatou e le Tama Faalelagi ma faaali mai ia i tatou upu moni faaopoopo.

Saunia oe lava ia faaleagaga

O le a le uiga ia te oe o le migao? E faapefea ona fesoasoani le migao ia te oe e lagona ai le Agaga? O a aafiaga e mafai ona e faasoa atu i le autalavou?

O le a le uiga o le migao i le autalavou i lau vasega? E faapefea ona fesoasoani ia i latou ia iloa ai le sootaga o le va o le migao ma faaaliga?

Suesue ma le agaga tatalo mau ma punaoa nei. O a mea ua e maua e fesoasoani ai i le autalavou e atiina ae se uiga o le migao?

1 Tupu 19:12; 3 Nifae 11:1–7 (E fesootai mai le Atua i se leo itiiti, ma le filemu)

Salamo 46:10 (“Ina soia, ma ia outou iloa o a’u lava o le Atua”)

MF&F 63:64; 84:54–57 (Taulimaina o mea paia ma le faaaloalo)

Boyd K. Packer, “O Le Migao Na te Valaaulia Faaaliga,” Liahona, Nov. 1992, 24 –26

Paul B. Pieper, “Ia Taofimau i Mea Paia,” Ensign po o le Liahona, Me 2012, 109–11

“Migao,” Faamaoni i le Faatuatua (2003), 145

“Faaaliga,” Faamaoni i le Faatuatua (2003), 32–37

Aoao atu i le ala a le Faaola

I soo se vaega, na avea le Faaola ma faataitaiga ma faufautua i Ona soo. Sa saunia o Ia lava e aoao atu e ala i le faaaluina o le taimi e tatalo ma anapogi ai na o Ia lava. Faasoa atu i le autalavou le ala e fesoasoani ai le migao e saunia oe ia maua faaaliga patino. E faapefea ona e fautuaina le autalavou ia faaalia le faaaloalo mo mea paia?

Ia fai fesootaiga

I nai minute muamua o vasega taitasi, fesoasoani i le au talavou e fai ni fesootaiga i le va o mea o loo latou aoaoina i tulaga eseese (e pei o suesuega faaletagata, seminare, isi vasega i le Lotu, po o aafiaga ma a latou uo). E faapefea ona e fesoasoani ia i latou ia iloa le manaomia o le talalelei i aso taitasi o le olaga? O manatu nei e ono fesoasoani ia te oe:

Valaaulia le autalavou e faasoa mai soo se fesili o loo ia tei latou e uiga i mea na latou aoaoina i isi vasega.
Tusi i le laupapa, “Migao o le __________.” Fai atu i tagata o le vasega e o mai e tusi i le laupapa a latou faauigaga o le migao. Valaaulia le autalavou e talanoaina nei faauigaga ao latou aoao e uiga i le migao i lesona o le aso.

Aoao faatasi

O gaoioiga taitasi o loo i lalo o le a fesoasoani i le autalavou e malamalama ai i le sootaga i le va o le migao ma faaaliga. I le mulimuli ai i le Agaga, filifili se tasi pe sili atu e aoga mo lau vasega:

Fai atu i le autalavou e faitau le “Migao” o i le Faatuatua i le Atua po o vaega o le saunoaga a Elder Paul B. Pieper “Ia Taofimau i Mea Paia,” vaai mo tali i le fesili “E faapefea ona fesoasoani le faaaloalo ia te au ia ou maua ai faaaliga?” Valaaulia le autalavou e faasoa mai mea ua latou maua. O a lagona o le autalavou i mea e mafai ona latou faia ia migao atili ai?
Vavae le vasega i ni vaega laiti, ma fai atu i vaega taitasi e suesue faatasi se mau se tasi pe lua ua fautuaina mai i lenei otootoga. Valaaulia vaega e talanoaina mea na latou aoao mai nei mau i le va o le migao ma faaaliga. Fai atu i vaega taitasi e faasoa mai i le vasega se mea ua latou aoaoina.
Valaaulia le autalavou e suesue i le saunoaga a Peresitene Boyd K. Packer “O Le Migao Na te Valaaulia Faaaliga” ma vaai mo mea e tatau ona faia e valaaulia ai faaaliga i a tatou sauniga Faale-Ekalesia. Fai atu i ai e faasoa mai mea ua latou maua ma fautua mai auala e faaaoga ai fautuaga a Peresitene Packer e uiga i le migao i isi nofoaga po o mea paia (e pei o le malumalu, tusitusiga paia, ma isi).

Fai atu i le autalavou e faasoa mai mea na latou aoaoina i le aso. Pe ua latou malamalama i le ala e fesootai ai le migao i faaaliga? O a ni o latou lagona po o ni manatu? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Motugaafa faafaiaoga

“Pe a tatou feiloai faatasi e aoaoina mataupu o le talalelei, e tatau ona faia i se agaga o le migao. ... O le le migao e fetaui lelei lava ma faamoemoega o le tiapolo e ala lea i le taofiofia o auala o faaaliga e le gata i le mafaufau ae faapea foi i le agaga. ... O le migao e valaaulia ai faaaliga” (Boyd K. Packer, i le O Le Aoao Atu, E Leai Se Isi Valaauga E Sili Ai [1999], 89).

Valaaulia e faatino

Fesili i le autalavou pe o a mea na latou aoao i le aso e uiga i le taua o le migao i le mauaina o faaaliga. E faapefea ona latou suia a latou amioga po o siosiomaga ina ia sili atu ona lelei mo le mauaina o faaaliga patino?