Aisea e taua ai le aoao e uiga i lo’u talafaasolopito o aiga?

O le fuafuaga tele o le fiafia a le Tama Faalelagi ua mafai ai ona faaauau pea ia mafutaga faaleaiga e oo atu i le faavavau. E ala atu i le galuega o talafaasolopito o aiga, ua mafai ai ona tatou aoao atili e uiga i o tatou tuaa, iloa ma saunia ia igoa o i latou e manaomia ia sauniga o le talalelei, ma faatino le galuega o sauniga mo i latou i totonu o malumalu paia. Ua saunia e le Ekalesia le tele o punaoa e fesoasoani ai ia i tatou ina ia aoao e uiga i o tatou talafaasolopito o aiga ma auai i le galuega o le malumalu mo e ua maliliu.

Saunia oe lava ia faaleagaga

Na faapefea ona e aoao e uiga i lou lava talafaasolopito faaleaiga? O a ni aafiaga na e oo i ai ua faamalosia ai lau molimau i le galuega o talafaasolopito o aiga?

E faapefea ona e uunaia le autalavou ia auai i le galuega o talafaasolopito o aiga? O a ni punaoa o loo maua i la outou eria ina ia fesoasoani ia i latou ia aoao e uiga i o latou tuaa ma faia ia sauniga mo tagata o aiga ua maliliu?

Faaaoga ia punaoa nei ina ia malamalama atili ai e uiga i le galuega o talafaasolopito mo aiga. O le a fesoasoani ou lava aafiaga i le galuega o talafaasolopito o aiga, e aofia ai le faia o gaoioiga o i lenei otootoga, e te aoao atu ai ma le mataalia. Mafaufau pe faapefea ona fesoasoani ia gaoioiga o lenei otootoga e te fuafuaina ai ni auala e faagauai mai ai le autalavou i le galuega o talafaasolopito o aiga. O le a le mea o le a fesoasoani i le autalavou ia malamalama ai i le taua o le aoaoina o a latou talafaasolopito o aiga?

1 Korinito 15:29 (Na faataunuuina e tagata i aso anamua le papatisoga mo e ua maliliu)

1 Peteru 3:18–20; 4:6 (Ua talai atu le talalelei i le lalolagi o agaga)

Malaki 4:5–6; MF&F 2:1–3 (O loto o le fanau o le a liliu atu i o latou tama)

MF&F 110:13–16 (Ua toefuatai mai e Elia ia ki o le faamauga)

MF&F 128:16–18 (O sauniga mo e ua maliliu e fatuina se sooga mau i le va o augatupulaga)

Henry B. Eyring, “Faapotopotoina o le Aiga o le Atua,” Ensign po o le Liahona, Me 2017, 19-22

Richard G. Scott, “O Le Olioli i le Faaolaina o E ua Maliliu,” Ensign po o le Liahona, Nov. 2012, 93–95

David A. Bednar, “O Le a Liliu Atu Loto o Fanau i o Latou Tama,” Ensign po o le Liahona, Nov. 2011, 24–27

“Galuega o Talafaasolopito o Aiga ma Gafa,” Faamaoni i le Faatuatua (2004), 77–81

Vitio: “Ua Saunoa Atu Elder Bednar i le Autalavou,” “O le Agaga o Elia”

3:20

4:17

Aoao atu i le ala a le Faaola

Na faatuatuaina e le Faaola Ona soo. Na Ia saunia i latou ma tuuina atu ia i latou tiutetauave taua e aoao ai, faamanuia ai, ma auauna atu ai i isi. E mafai faapefea ona e saunia le autalavou e faataunuu o latou tiutetauave o le aoaoina o o latou talafaasolopito o aiga ma faia galuega o sauniga mo o latou tuaa?

Ia fai fesootaiga

I nai minute muamua o vasega taitasi, fesoasoani i le autalavou e fai ni fesootaiga i le va o mea o loo latou aoaoina i tulaga eseese (e pei o suesuega faaletagata lava ia, seminare, isi vasega faaleLotu, po o aafiaga ma a latou uo). E faapefea ona e fesoasoani ia i latou ia iloa le manaomia o le talalelei i aso taitasi o le olaga? O manatu nei e ono fesoasoani ia te oe:

Valaaulia nisi o le autalavou e faasoa mai se mataupu faavae o le talalelei sa latou aoaoina talu ai mai se matua, tei, po o se isi tagata o le aiga.
Valaaulia le autalavou e faasoa mai ni aafiaga sa latou mauaina i le faatinoina o le galuega o talafaasolopito o aiga (e pei o le papatisoina mo se tuaa, auai i le faavasegaina o igoa, po o le sauniaina o le igoa o se tuaa mo sauniga o le malumalu). Talanoa faatasi o se vasega le mafuaaga e finagalo ai le Tama Faalelagi ia tatou faia le galuega o talafaasolopito o aiga.

Aoao faatasi

O le a fesoasoani gaoioiga taitasi nei i le autalavou e aoao ai pe faapefea ona auai atu i le galuega o talafaasolopito mo aiga. I le mulimuli ai i le taitaiga a le Agaga, filifili se tasi pe sili atu e aoga mo lau vasega:

Faitau faatasi o se vasega ia parakalafa mulimuli e ono o le lauga a Peresitene Henry B. Eyring “Faapotopotina o le Aiga o le Atua” (pe matamata foi i le ata vitio o Peresitene Eyring o saunoa i nei parakalafa), ma tagai mo faamanuiaga e sau mai le auai ai i le galuega o talafaasolopito o aiga ma le malumalu. E i ai ni talavou i lau vasega e mafai ona fai atu ni a latou molimau e uiga i nei faamanuiaga? Mafaufau e seti se sini o se vasega ina ia auai atili i galuega o talafaasolopito o aiga. Mo se faataitaiga, e mafai e tagata o le vasega ona saunia ni igoa faaleaiga latou te o ma ave i le isi taimi latou te auai ai i le malumalu.
Faitau o se vasega le “O Se Valaaulia i le Tupulaga Faia'e” mai le saunoaga a Elder David A. Bednar “O Le A Liliu Atu Loto o Fanau i o Latou Tama.” Valaaulia le autalavou e saili ni mea e mafai ona latou faia e auai atu ai i le galuega o talafaasolopito mo aiga. Afai e mafai, faaali atu i le autalavou le auala e mafai ona faaaoga ai le FamilySearch.org e saili ai tuua o e manaomia ona fai sauniga. Uunaia i latou e o i le malumalu ma papatisoina ma faamauina mo tuaa sa latou mauaina. Faatasi ai ma se faatagaga mai le epikopo, atonu e te manao e valaaulia se faufautua o talafaasolopito o aiga a le uarota (po o se isi tagata o le ua lava le tomai e faia ai galuega o talafaasolopito mo aiga) e fesoasoani i lenei gaoioiga.
Fai atu i le autalavou e faitau parakalafa e tolu o le saunoaga a Elder Richard G. Scott “O Le Olioli i le Faaolaina o E Ua Maliliu,” e amata i le fuaitau “Soo se galuega e te faia i le malumalu.” Valaaulia i latou e tagai mo, ma faasoa mai ni mafuaaga e taua ai le faia o le galuega o talafaasolopito o aiga. Fai atu ia i latou e faitau ia parakalafa mulimuli e lua o le lauga ma talanoa i ni mea e mafai ona latou “faataatiaese” ina ia mafai ai ona sailia o latou tuua.
Valaaulia le afa o le autalavou e faitau le vaega “Faaolaina o e Maliliu” (itulau 78-79) mai le “Galuega o Talafaasolopito o Aiga ma Gafa” i le Faamaoni i le Faatuatua, ma fai atu i le isi afa e faitau le vaega e ta'ua o “O Ou Tiutetauave i Galuega o Talafaasolopito o Aiga” (itulau 79-81). Fai atu ia i latou e faasoa mai i le tasi ma le isi mea ua latou aooaina. Fesoasoani i le autalavou e amata ona faatumu se siata o le pepa gafa. Uunaia i latou e faaauau ona galulue i a latou pepa gafa i le fale. Valaaulia i latou e talosaga atu i o latou matua po o isi tagata o le aiga mo se fesoasoani.
Valaaulia le autalavou e faitau i mau o loo fautuaina atu i lenei otootoga, mafaufau loloto i le fesili “Aisea tatou te faia ai galuega o talafaasolopito o aiga?” Fai atu ia i latou e faasoa mai ni o latou manatu. Valaaulia i latou e lisi mai ni auala e mafai ona latou auai ai i le galuega o talafaasolopito o aiga. Valaaulia i latou e filifili se mea mai le lisi latou te fia mananao e galulue ai i le aluga o le vaiaso a sau. Uunaia i latou e faasoa mai o latou aafiaga i se vasega i le lumanai.

Fai atu i le autalavou e faasoa mai mea ua latou aoaoina i le aso. Pe ua latou malamalama i le taua o le aoaoina e uiga i o latou talafaasolopito o aiga? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Valaaulia e faatino

Fesili i le autalavou po o a ni mea ua musuia i latou e fai ona o mea sa latou aoaoina i le aso. Fautuaina i latou e faatino na lagona. Mafaufau i ni auala e mafai ai ona e tulitataoina.