E faapefea ona ou tausia lau feagaiga ia manatua pea le Faaola?

Pe a tatou fetagofi atu i le faamanatuga, tatou te folafola atu ia manatua pea le Faaola. O lona uiga tatou te vaai atu pea i Ana faataitaiga ma aoaoga e taialaina ai a tatou filifiliga e fai. Tatou te faamuamua o Ia i o tatou olaga ma saili ia iloa o Ia ma mulimuli i Lona finagalo. Pe a tatou feagai ma faigata, tatou te vaai atu ia te Ia mo le faamafanafanaga ma le malosi. Ua folafola mai e le Tama Faalelagi afai tatou te tausia lenei feagaiga, o le a tatou maua pea Lona Agaga e faatasi ma i tatou.

Saunia oe lava ia faaleagaga

O a ni mea o le a outou faia ina ia manatua ai pea le Faaola? Na faapefea ona faamanuiaina lou olaga ona o le manatuaina o Ia?

Aisea e manaomia ai ona aoao le autalavou i ala e manatua ai le Faaola i mea uma latou te faia? E faapefea ona fesoasoani lena mea ia i latou e aloese ai mai faaosoosoga ma feagai ma faigata?

Ao e sauniuni, ia suesue ma le agaga tatalo ia mau ma punaoa nei. O le a se mea e te lagona ua uunaia ai oe e faasoa atu i le autalavou?

Ioane 8:29 (Ua faia e Iesu Keriso le faataitaiga o le manatuaina ma le sailia ina ia faapei o Lona Tama)

Ioane 14:26; 3 Nifae 11:32 (E mafai ona fesoasoani le Agaga Paia ia i tatou ina ia manatua le Faaola)

Alema 37:36–37 (E tatau ona tatou faaautu o tatou manatu ma faatinoga uma i le Alii)

Helamana 12:1–5 (E tele lava ina faatuai ona manatua e tagata le Alii)

MF&F 6:36 (Vaai atu i le Alii i mafaufauga uma)

MF&F 20:77, 79 (O tatalo o le faamanatuga)

Gerrit W. Gong, “Ia Manatua Pea o Ia,” Ensign po o le Liahona, Me 2016, 108–10

Claudio R. M. Costa, “Latou Te Manatua Pea o Ia,” Ensign po o le Liahona, Nov. 2015, 101–3

D. Todd Christofferson, “Ia Manatua Pea o Ia,” Liahona, Ape. 2011, 21–27

Aoao atu i le ala a le Faaola

Mafaufau mo se taimi i mea ua e iloa e uiga i le Faaola. Na faapefea ona Ia faaalia Na te manatuaina pea Lona Tama? E mafai faapefea ona e mulimuli i Lana faataitaiga o le fesoasoani atu i le autalavou ina ia aoao i le ala e maua ai le malosi lea e oo mai i le manatuaina pea o le Faaola?

Vitio: “Valaaulia i Matou e Molimau Atu”

Matamata atili

Ia fai fesootaiga

Tagai i isi manatu e aoao mai ai ma aoao atu.

I nai minute muamua o vasega taitasi, fesoasoani i le au talavou e fai ni fesootaiga i le va o mea o loo latou aoaoina i tulaga eseese (e pei o suesuega faaletagata, seminare, isi vasega i le Lotu, po o aafiaga ma a latou uo). E mafai faapefea ona e fesoasoani ia i latou ia iloa le taua o le talalelei i aso taitasi o le olaga? O manatu nei e ono fesoasoani ia te oe:

• Valaaulia le autalavou e faasoa mai se aafiaga na latou maua talu ai nei na faamanatu mai ai ia i latou se mea o loo latou aoaoina ia latou vasega i le Lotu.

• Faaali atu se ata o le Faaola o loo faamanuia le faamanatuga (tagai Tusi Ata o le Talalelei,54). Fai atu i le autalavou e faitau mai ia tatalo o le faamanatuga o i le Mataupu Faavae ma Feagaiga 20:77, 79, ma fai se lisi i le laupapa o folafolaga tatou te faia pe a tatou fetagofi atu i le faamanatuga. O a mea e fai e le autalavou ina ia manatua ai pea le Faaola?

Aoao faatasi

Tagai i isi manatu e aoao mai ai ma aoao atu.

O gaoioiga taitasi nei e mafai ona fesoasoani i le autalavou ia iloa ai le auala e mafai ai ona faamanuiaina atili i latou i a latou taumafaiga ina ia manatua le Faaola i mea uma latou te faia. I le mulimuli ai i le taitaiga a le Agaga, filifili se tasi [o gaoioiga nei] pe sili atu foi o le a aoga mo lau vasega:

• Fai atu i tagata taitoatasi o le vasega e faitau se tasi o mau o loo fautuaina mai i lenei otootoga ma faasoa mai po o le a se mea o aoao mai ia te ia e uiga i le manatuaina pea o le Faaola. Aisea e taua ai lo tatou manatuaina pea o Ia? E faapefea e le manatuaina pea o Ia ona aafia ai o tatou olaga i aso taitasi (mo se faataitaiga, i filifiliga tatou te faia po o faigata tatou te feagai ai)? Valaaulia le autalavou e faasoa mai ni aafiaga na faamanuiaina ai i latou ona sa latou tauivi e manatua Iesu Keriso.

• Fai atu i le autalavou e faitau le Helamana 12:1–5 ma faasoa mai mafuaaga e masani ai ona faigofie i tagata ona faagalo le Alii. E faapefea ona tatou aloese mai le faaosoosoga o le faagalo le Alii? Fai atu i le autalavou e faasoa mai mea latou te faia ina ia mautinoa ai ua avea le Faaola o se vaega o o latou olaga.

• Tusi i luga o le laupapa “E faapefea ona ou manatua pea le Faaola?” Tofi ni tagata taitasi o le vasega e faitau se tasi o vaega o le lauga a D. Todd Christofferson “Ia Manatua Pea o Ia,” po o le lauga a Elder Gerrit W. Gong “Ia Manatua Pea o Ia,” vaavaai ai mo ni tali o le fesili o loo i le laupapa. Fai atu i ai e faasoa mai ni malamalamaaga ma ni tala mai nei lauga lea o loo aoao mai ai ia i tatou ni auala e manatua ai Iesu Keriso. O le a se mea sa latou aoaoina lea o le fesoasoani ia i latou ina ia faataunuuina lelei a latou feagaiga ina ia “manatuaina pea o Ia”? 

• Fai atu i le autalavou e faaalu ni nai minute ma iloilo i o latou mafaufau tala latou te iloa e uiga i le Faaola mai i tusitusiga paia. (E mafai ona e valaaulia i latou e vaai i ata 30–61 i le Tusi Ata o le Talalelei pe ia iloilo le amataga o le lauga a Elder Claudio R. M. Costa “Latou Te Manatua Pea o Ia” mo ni manatu.) Valaaulia i latou e mafaufau e uiga i le faapefea e le manatuaina o nei tala ona mafai ona fesoasoani ia i latou i o latou olaga o aso uma, ma fai atu ia i latou e faasoa mai o latou manatu. Tuu atu i le autalavou ni kopi o le lauga a Elder Costa ma valaaulia i latou e faitau i lana lisi o auala e mafai ona tatou manatua ai le Faaola (tagai i le lisi ua faailogaina e latalata i le faaiuga o le lauga). Fai atu ia i latou e faasoa mai soo se mea e faafiafiaina ai i latou ma faamatala le pogai latou te manatu ai e aoga. Fautua atu ia tausia e le autalavou a latou kopi o le lauga e fesoasoani ia i latou e mafaufau ai e uiga i le Faaola i le isi taimi latou te aai ma feinu ai i le faamanatuga. 

Fai atu i le autalavou e faasoa mai mea ua latou aoaoina i le aso. Pe o latou malamalama ea i le auala latou te tausia ai a latou feagaiga o le manatua pea o le Faaola? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Tomai e suesue ai le talalelei

Vaavaai mo aoaoga e uiga ia Keriso. Uunaia le autalavou e vaavaai mo aoaoga e uiga ia Iesu Keriso i taimi uma latou te suesue ai i tusitusiga paia. E tusa lava pe o le a se mea o latou faitauina, e mafai ona latou fesiligia i latou lava i ni fesili faapea “O le a se mea o ou aoaoina mai lenei fuaitau e uiga ia Iesu Keriso, Lona natura ma uiga, Lona soifuaga, po o Lana Togiola?”

Valaaulia e faatino

Tagai i isi manatu e aoao mai ai ma aoao atu.

Fesili i le autalavou po o a ni mea ua musuia i latou e fai ona o mea sa latou aoaoina i le aso. Fautuaina i latou e faatino na lagona. Saili le Agaga a o e mafaufau ma le agaga tatalo i ni auala e mafai ai ona e tulitataoina.