E mafai faapefea ona ou faaaogaina ma le anoa fesili ao ou aoao atu?

O Iesu Keriso, o le Faiaoga o Faiaoga, e masani ona ia tuuina atu fesili e uunaia ai tagata ina ia mafaufau loloto ma faaaoga ia mataupu faavae o le talalelei na Ia aoaoina atu. O Ana fesili na uunaia ai ni manatu, iloiloina o le olaga faaletagata lava ia, ma le tautinoga. Ina ia fesoasoani ia i latou o tatou aoaoina, e mafai ona tatou aoao e faia ni fesili ma o le a fesoasoani ai i isi e mafaufau ai, talanoaina, ma faaaogaina ia mataupu faavae o le talalelei.

Saunia oe lava ia faaleagaga

Na faapefea ona e vaai o faaaogaina e faiaoga mataalia ia fesili e fesoasoani ai i isi ia mafaufau loloto ai ma faaaogaina le talalelei? E faapefea ona e faaaogaina ia fesili pe a e aoao atu?

O le a se mea e manaomia ona malamalama i ai le autalavou e uiga i le faia o ni fesili o le a fesoasoani ia i latou ina ia avea ma ni faiaoga sili ona lelei?

Suesue ma le agaga tatalo ia mau ma punaoa nei. O le a se mea o le a uunaia ai le autalavou o e aoaoina?

Mataio 7:7–11 (Na tuuina atu e le Faaola ni fesili e fesoasoani ai ia i tatou e faaaoga le mataupu faavae o le tatalo)

Mataio 16:13–17 (Na tuuina atu e le Faaola ni fesili e valaaulia ai Peteru ina ia molimau atu)

Mataio 16:24–26 (Na tuuina atu e le Faaola ni fesili o le a uunaia ai le mafaufau loloto)

Alema 5:14–30 (Na faaaogaina e Alema ni fesili e aoao atu ai ia sa Nifae)

Dieter F. Uchtdorf, “O Le e Alofa Atu e Alofaina Mai,” Ensign po o le Liahona, Me 2012, 70–76

Vitio:“O Mea E Pei Ona I Ai Lava”

3:27

Aoao atu i le ala a le Faaola

Na fesili atu le Faaola ia i latou o e na Ia aoaoina ma na mafua ai ona loloto o latou mafaufauga ma lagona. Ona o Lona alofa, sa latou lagona ai le saogalemu o le faasoaina atu o o latou manatu ma lagona patino. E mafai faapefea ona e fatuina se siosiomaga i totonu o lau vasega ina ia lagona ai e le autalavou le toafimalie i le taliina o fesili?

Ia fai fesootaiga

I nai minute muamua lava o vasega taitasi, fesoasoani i le autalavou e faia fesootaiga i le va o mea latou te aoaoina i nofoaga eseese (e pei o suesuega faaletagata lava ia, seminare, isi vasega faale-Lotu, po o aafiaga ma a latou uo). E mafai faapefea ona e fesoasoani ia i latou ia iloa le taua o le talalelei i o latou olaga i aso taitasi? E mafai ona fesoasoani manatu nei:

Valaaulia le autalavou e faasoa mai se aafiaga sa latou mauaina i le aluga o le vaiaso lea na faalauteleina ai lo latou malamalamaaga i se mea o latou aoaoina e uiga i uiga faaKeriso.
Ia le itiiti ifo ma se vaiaso ao lei amataina le vasega, fai atu i le autalavou e tusitusi i lalo ia fesili na fesiligia ai i latou e a latou faiaoga (i le seminare, i le aoga, pe i totonu o vasega a le Ekalesia). Fai atu ia i latou e talanoaina i le vasega ni auala eseese na faaaoga ai e a latou faiaoga ia fesili. O le a se mea na latou iloa na lelei? Aisea e avea ai o se vaega taua o le aoaoina le faia o ni fesili?

Aoao faatasi

O gaoioiga taitasi nei o le a fesoasoani i le autalavou ina ia malamalama i le ala e faaaoga ai ma le mataalia ia fesili ao latou aoao atu isi. I le mulimuli ai i le Agaga, filifili se tasi pe sili atu e aoga mo lau vasega:

Valaaulia ia talavou taitasi e faitau mai se tasi o mau o loo lisiina atu i lenei otootoga ma faailoa mai ia fesili na fesiliina e le Faaola i na mau. Aisea na Ia fesiligia ai nei fesili? Mata o le a se tulaga o le a eseese ai ia aafiaga faafaiaoga pe ana faapea e lei fesiligiaina e le Faaola nei tulaga? Aisea e avea ai le faia o ni fesili ma se auala lelei e aoao atu ai isi? Valaaulia le autalavou e mafaufau e uiga i ni avanoa atonu na latou maua e aoao atu ai (e pei o faiaoga o aiga, lauga i sauniga faamanatuga, afiafi faaleaiga, nofoaga faasamasamanoa, ma isi mea faapena). E faapefea ona faaleleia i le faia o ni fesili a latou aoaoga i nei nofoaga?
Valaaulia le autalavou e faitau le Alema 5:14–30, matamata i le vitio “O Mea E Pei Ona I Ai Lava,” pe toe iloilo le saunoaga a Peresitene Dieter F. Uchtdorf “O Le e Alofa Atu e Alofaina Mai.” Fai atu ia i latou e fai se lisi o nisi o fesili na faaaoga e Alema, Elder Bednar, po o Peresitene Uchtdorf ao latou aoao atu. O faapefea ona fesoasoani nei fesili ia i tatou e aoao? Valaaulia le autalavou e mafaufau i ni auala e mafai ona latou faaaoga ai fesili i se isi taimi e talosagaina ai i latou e fai se lauga.

3:27

Fai atu i le autalavou e faasoa mai mea ua latou aoaoina i le aso. O latou malamalama i le ala e faaaoga ai fesili ao latou aoao atu? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Valaaulia e faatino

Fesili atu i le autalavou po o le a se mea o latou lagona le musuia e fai e faatatau lea i mea sa latou aoaoina i le aso. Uunaia i latou e faatino nei lagona. Mafaufau i ni auala e mafai ona e tulitataoina ai.