E mafai faapefea ona ou avea ma se faiaoga e sili atu ona lelei?

O le lelei o le aoao atu o se vaega taua lea o le fausiaina o le malo o le Alii, ma o i tatou uma lava e tele avanoa e aoao atu ai. E ui lava atonu tatou te le maua se valaauga aloaia e aoao atu ai, e i ai o tatou avanoa e aoao atu ai i o tatou aiga ae faapea foi i le avea ai ma ni tuaoi ma ni uo. E mafai ona avea i tatou ma ni faiaoga e sili atu ona lelei e ala i le iloiloina ma le faamaoni o o tatou lava malosiaga ma vaivaiga, i le sailia ma le lotomaualalo o le fesoasoani a le Alii, ma sailia ma le filiga ia atiae ia tomai ma lelei ia e sili atu ona taua i le aoaoina atu o le talalelei.

Saunia oe lava ia faaleagaga

Na faapefea ona faamanuiaina oe e ni faiaoga lelei? O le a se mea ua e faia ia avea ai ma se faiaoga e sili atu ona lelei?

O a avanoa ua e saunia mo le autalavou e aoao atu ai? O a o latou malosiaga ma vaivaiga i le avea ai ma ni faiaoga?

Ia suesue ma le agaga tatalo ia mau ma punaoa nei. O le a se mea o le a fesoasoani i le autalavou ia malamalama ai pe faapefea ona avea i latou ma ni faiaoga e sili atu ona lelei?

Eteru 12:27 (O le a fesoasoani le Alii ia i tatou ia avea mea vaivai ma mea malolosi)

MF&F 42:14 (E tatau ona tatou maua le Agaga e aoao atu ai)

MF&F 88:78 (Aoao atu ma le filiga)

Robert D. Hales, “‘Sau, Mulimuli Mai ia te A’u’ e ala i le Ola i le Alofa ma le Auaunaga FaaKeriso,” Ensign po o le Liahona, Nov. 2016, 22–24

“Faatomuaga: Aoao Atu i le Ala a le Faaola,” Aoao Atu i le Ala a le Faaola (2016), 4–5

“Alualu i Luma o se Faiaoga e Faapei o Keriso: O Se Iloiloga Faaletagata Lava Ia,” Aoao Atu i le Ala a le Faaola (2016), 37

Dallin H. Oaks, “Aoaoina Atu o le Talalelei,”Liahona,Ian. 2000, 94–98.

David M. McConkie, “Aoao Atu i le Mana ma le Pule a le Atua,” Ensign po o le Liahona, Nov. 2013

“Aoaoina atu o le Talalelei,” Faamaoni i le Faatuatua (2004), 168–70.

Aoao atu i le ala a le Faaola

Na tuuina atu e le Faaola i Ona soo ni tiutetauave taua e aoao atu ai, faamanuia, ma auauna atu ai i isi. O le a faapefea ona faamanuiaina le autalavou i le mauaina o avanoa e aoao atu ai i isi i mea ua latou aoaoina?

Ia fai fesootaiga

I nai minute muamua lava o vasega taitasi, fesoasoani i le autalavou e faia fesootaiga i le va o mea latou te aoaoina i tulaga eseese (e pei o suesuega faaletagata lava ia, seminare, isi vasega faale-Ekalesia, po o aafiaga ma a latou uo). E mafai faapefea ona e fesoasoani ia i latou ia iloa le taua o le talalelei i o latou olaga i aso taitasi? E mafai ona fesoasoani manatu nei:

Fai atu i le autalavou ia faamatala faapuupuu mai se afiafi faaleaiga, seminare, po o se lesona i le lotu na sili ona fiafia i ai.
Valaaulia le autalavou e mafaufau e uiga i se faiaoga e sili ona fiafia i ai na uunaia i latou e ola i le talalelei. O le a se mea na sili ai ona lelei lenei faiaoga? O a tomai na i ai ia te ia e fia faataitai i ai le autalavou? Fai atu i le autalavou e faitau le vaega ua faaulutalaina “Aoao Atu i le Ala a le Faaola” i le itulau e 4 o le Aoao Atu i le Ala a le Faaola ma vaavaai mo ni uiga lelei o ni faiaoga e faapei o Keriso. E faapefea e faiaoga lelei o le talalelei ona fesoasoani e fausia le malo o le Atua?

Aoao faatasi

O gaoioiga taitasi nei e mafai ona fesoasoani i le autalavou e aoao ai pe faapefea ona avea i latou ma ni faiaoga e sili atu ona lelei. I le mulimuli ai i le taitaiga a le Agaga, filifili se tasi pe sili atu o le a aoga mo lau vasega:

Vaevae le vasega i ni vaega se tolu, ma fai atu i vaega taitasi e faitau se tasi o mau nei: Eteru12:27; MF&F 42:14; MF&F 88:78. Fai atu ia i latou e manatunatu loloto ma talanoaina mea o loo aoao mai i nei mau e uiga i le avea ma ni faiaoga e sili atu ona lelei. Fautuaina i latou e sue mau i vaefaamatalaga mo nei fuaiupu ina ia maua ai ni vaaiga faaopoopo e uiga i le avea ma ni faiaoga e sili atu ona lelei, ma fai atu ia i latou e faasoa mai mea na latou maua. Valaaulia le autalavou e faitau le vaega ua faaautuina “Aoaoina Atu o Le Talalelei” i le Faamaoni i le Faatuatua (24–26) ma fai se lisi o auala e mafai ai ona sili atu lo latou filiga i le avea ai ma faiaoga.
Valaaulia le autalavou e sue ma lisi i le laupapa mataupu faavae autu e ono o le aoao atu i le vaega III o le lauga a Elder Dallin H. Oaks “Aoaoina Atu O Le Talalelei.” Fai atu ia i latou e iloilo pe o faapefea ona latou faaaogaina nei mataupu faavae a o latou aoao atu. Valaaulia i latou e filifili se tasi o nei mataupu faavae latou te fia aoao atili i ai pe faaleleia i tulaga o latou aoao atu ai. Fai atu ia i latou e suesue lena mataupu faavae i le saunoaga a Elder Oaks ma faasoa mai mea na latou aoaoina ma mea ua latou fuafuaina e fai e faaaoga ai lenei mataupu faavae i le isi taimi latou te aoaoina ai isi.
Fai atu i tagata o le vasega e faamaea le “Alualu i Luma o se Faiaoga e Faapei o Keriso: O Se Iloiloga Faaletagata Lava Ia” i le itulau e 37 o le Aoao Atu i le Ala a le Faaola. Fai atu ia i latou e talanoaina mea na latou aoaoina i ni vaega toalaiti ma faasoa atu i isi vaega ni manatu taua i la latou talanoaga. Fai atu i le autalavou e mafaufau e uiga i se aafiaga talu ai nei na latou maua a o aoao atu (mo se faataitaiga, i se afiafi faaleaiga, i se vasega i le Lotu, po o le avea ai ma se faiaoga o aiga). Valaaulia ia talavou taitasi e fai se fuafuaga ina ia faaleleia o se faiaoga o le talalelei.
Tusi i le laupapa, “O le a se mea e mafai ona ou faia e avea ai ma se faiaoga e sili atu ona lelei?” Fai atu i le autalavou e faitau parakalafa e tolu e amata i le fuaitau “[Aoaoina o le tasi o le isi i] mataupu faavae o le malo” i le saunoaga a Elder Robert D. Hales “‘Sau, Mulimuli Mai ia te A’u’ e ala i le Ola i le Alofa ma le Auaunaga FaaKeriso.” E mafai foi ona latou faitau i le “Faatomuaga: Aoao Atu i le Ala a le Faaola” i le Aoao Atu i le Ala a le Faaola. Valaaulia i latou e saili ia tali i le fesili lenei ma faasoa mai mea sa latou mauaina. E faapefea ona latou faaaogaina mea sa latou aoaoina ia latou lava aoaoga?
Valaaulia le autalavou e faitau le “Auala e Aoao atu Ai” i le Faamaoni i le Faatuatua ma lisi i le laupapa auala faafaiaoga na latou maua. O anafea na vaaia ai e le autalavou o faaaoga nei auala? Fai atu i talavou taitasi e filifili se mataupu faavae o le faatuatua se tasi ma faaalu ni nai minute i le vasega e saunia ai e aoao atu i se vaega o tamaiti, le faaaogaina o se tasi o auala o i le laupapa. Fai atu i le autalavou e faasoa mai mea ua latou saunia.

Fai atu i le autalavou e faasoa mai mea ua latou aoaoina i le aso. Pe ua latou malamalama i le auala e mafai ai ona avea i latou ma faiaoga e sili atu ona lelei? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Valaaulia e faatino

Fai atu i le autalavou e faasoa mai soo se lagona sa latou maua i le taimi o le vasega. O le a se mea o le a latou faia ia faaleleia ai i le avea ai ma ni faiaoga? Uunaia i latou e faasoa mai o latou aafiaga i vasega o i le lumanai.