E mafai faapefea ona ou saofaga lelei i aufono i le Ekalesia?

O le Ekalesia a le Alii e faatautaia e ala i aufono. I lalo o le taitaiga a le au taitai perisitua, e fono faatasi ai taitai mo le manuia o tagata taitoatasi, aiga ma le Ekalesia. O aufono lelei e valaaulia manatu atoa mai tagata uma o le aufono, o e saili ia aufaatasi ma taialaina e le Agaga Paia e fausia le malo o le Atua. O le iloa o le ala e maua ai faaaliga i aufono e mafai ona fesoasoani ia i tatou e saofaga lelei ai i fonotaga a aufono, e aofia ai fonotaga a au peresitene, fonotaga a komiti talavou a le au epikopo, ma fonotaga faaleaiga.

Saunia oe lava ia faaleagaga

O anafea na avea ai oe ma se vaega o se aufono? O a ni aafiaga ua fesoasoani e te malamalama ai i le taua o aufono i le galuega a le Alii?

O a aufono sa auai le autalavou (mo se faataitaiga, au peresitene o vasega ma korama po o le komiti talavou a le au epikopo)? O le a le lelei o le malamalama o le autalavou i faamoemoega o aufono?

Faaaoga punaoa o loo i lalo e te malamalama ai m oe lava i mataupu faavae o aufono lelei i le Ekalesia. Ona fuafua lea po o a auala e mafai ona fesoaoani atu ai gaoioiga o loo i lenei otootoga atoa e te fuafuaina ai ni auala e auai ai i le autalavou i le aoaoina. O ou lava aafiaga i le auai i aufono o le a fesoasoani foi i lou aoao atu ma le mataalia.

Mataio 18:20 (O le a i ai le Alii faatasi ma i latou o e faapotopoto faatasi i Lona igoa)

Moronae 6:4–5 (E fono soo e le aunoa tagata o le Ekalesia e talanoaina le manuia o agaga)

MF&F 38:27 (Ua poloaiina i tatou ia lotogatasi)

MF&F 88:122 (O le faagaeetia e tupu pe a maua e tagata uma le avanoa e tautala ma faalogo ai)

Henry B. Eyring, “Aoaoina i le Perisitua,” Ensign po o le Liahona, Me 2011, 62–65.

Dieter F. Uchtdorf, “Faatino i Luga o Upumoni o le Talalelei a Iesu Keriso” fonotaga faaleaoaoga a le au taitai i le lalolagi atoa, Fep. 2012

Vitio: “Auai i Aufono,” Potutusi o Aoaoga Faaleautaitai

4:48

Aoao atu i le ala a le Faaola

Sa tuuina atu e le Faaola ia i latou sa Ia aoaoina ni avanoa e fai atu ai a latou lava fesili ma faasoa atu o latou manatu (tagai i le Luka 10:25–37). Sa tali atu o ia i a latou fesili ma faafofoga atu i o latou aafiaga. E mafai faapefea ona e uunaia le autalavou e fai ni fesili ma faasoa atu o latou manatu?

Ia fai fesootaiga

I nai minute muamua o vasega taitasi, fesoasoani i le au talavou e fai ni fesootaiga i le va o mea o loo latou aoaoina i tulaga eseese (e pei o suesuega faaletagata, seminare, isi vasega i le Lotu, po o aafiaga ma a latou uo). E faapefea ona e fesoasoani ia i latou ia iloa le manaomia o le talalelei i aso taitasi o le olaga? O manatu nei e ono fesoasoani ia te oe:

Fai atu i le autalavou e faasoa mai se aafiaga lea sa latou aoaoina ai se mea e uiga i le talalelei i se auala anoa. E mafai ona aofia ai aafiaga mai le lotu, seminare, afiafi faaleaiga, suesuega patino o tusitusiga paia, po o le olaga i aso uma.
Fai atu i le autalavou e faasoa mai o latou aafiaga o le auai i se tulaga o se fonotaga i le Ekalesia, e pei o se au peresitene o le vasega ma le korama po o fonotaga a le komiti talavou a le au epikopo. O a ni mea sa latou faia e sauniuni ai mo le fonotaga? O a ni mea sa latou faia e saofaga ai? Na faapefea ona fesoasoani le aufono e faataunuu le galuega a le Alii?

Aoao faatasi

O le a fesoasoani gaoioiga taitasi nei i le autalavou e malamalama ai i mataupu faavae o aufono lelei i le Ekalesia. I le mulimuli ai i le musumusuga a le Agaga, filifili se gaoioiga se tasi pe sili atu o le a sili ona aoga mo lau vasega: Tuu se taimi mo le autalavou e auai ai i le faatinoina o le aufono faataitai i le faaiuga o le vaega lenei,

Tusi i luga o le laupapa ia mau ua fautuina atu i le otootoga lenei. Fai atu i tagata taitoatasi o le vaega e filifili se mau e suesue ona mafaufau lea pe aisea ua faaaoga ai e le Alii ia aufono ia faataunuu ai Lana galuega. Aisea o le a faalemanuia ai pe afai e fai toatasi e se tagata ia faaiuga e aunoa ma le soalaupuleina faatasi ma isi? E mafai faapefea ona faaaoga e le autalavou nei mataupu faavae i a latou mafutaga ma o latou aiga?
Vaevae i ni vaega le lauga a Peresitene Dieter F. Uchtdorf “Faatino i Luga o Upumoni o le Talalelei a Iesu Keriso”, ma tuu atu i talavou taitasi se vaega e faitau. Fai atu i le autalavou e tusi se fesili e uiga i le saofaga atu i aufono lea e mafai ona taliina e a latou vaega. Valaaulia i latou e fesuia’i a latou fesili ma a latou vaega o le lauga ma le isi tagata o le vasega ma vaavaai mo tali i fesili a le tasi ma le isi. O le a se mea ua latou aoao mai ia Peresitene Uchtdorf e mafai ona latou faaaogaina a o latou auai i aufono a le aiga ma le Ekalesia?
Faaali le vitio “ Auai i Aufono.” Valaaulia le autalavou e vaavaai mo elemene autu o se aufono faamanuiaina ma tusi i lalo (o ni faataitaiga e aofia ai le mulimuli i le Agaga, faalogo i le tasi ma le isi, ma le faia ma le taliaina o tofiga). Valaaulia i latou e faasoa mai ni aafiaga na latou vaaia ai le faaaogaina o nei mataupu faavae i se aufono po o isi nofoaga.

4:48
Valaaulia ni isi o le autalavou e faitau le aafiaga o Peresitene Henry B. Eyring a o talavou i lana korama a ositaulaga (i lana lauga “Aoaoina i le Perisitua”), ma valaaulia isi e faitau i lona 20 tausaga mulimuli ane a o avea ma se epikopo (i le lauga lava lena). Fai i ai e toe faamatala atu ia tala i le tasi ma le isi. O a ni mea ua latou aoaoina mai nei tala e uiga i aufono? O le a se mea ua avea ai aufono o se auala lelei e fai ai le galuega a le Alii? O a nisi o avanoa o loo i ai i le autalavou e fefautuaai faatasi ai?

O le gaoioiga o loo i lalo e tuu atu ai i talavou se avanoa e iloa ai ona auai ma saofaga i se aufono. O lenei mea o le a faalolotoina ai lo latou malamalama ma saunia ai i latou e faaaoga mea ua latou aoaoina i fafo atu o le vasega.

A uma ona fai se gaoioiga e tasi o loo i luga, valaaulia le autalavou e faaaoga ia mataupu faavae ua latou aoaoina e ala i le faatinoina o se aufono faataitai. Tofi atu i tagata taitasi o le vasega e vaega e fai, ma fai atu ia i latou e filifili se autu latou te talanoaina faatasi, e pei o le auala e fesoasoani ai i tagata o le uarota ia malamalama i le taua o le faaaloalo po o le tauagafau.

Fai i le autalavou e faasoa mai mea ua latou aoaoina i le asō. Pe ua latou malamalama i le auala e auai ai ma le mataalia i aufono i le Ekalesia? O a ni o latou lagona po o ni manatu? E i ai nisi a latou fesili faaopoopo? Mata e aoga le faaaluina o se isi taimi i lenei autu?

Motugaafa faafaiaoga

“O fesili e tusi i luga o le laupapa a o lei amataina le vasega, o le a fesoasoani i le au a’oa’o e amata ai ona mafaufau i autu a o le’i amataina le lesona” (O Le Aoao Atu, E Leai Se Isi Valaauga E Sili Ai, 93).

Valaaulia e faatino

Fai atu i le autalavou e faaaoga mea ua latou aoaoina ma ola ai nei a o latou auai i fonotaga (e faatatau i o latou valaauga, o latou aiga, po o o latou tiute faaleautaitai i le seminare). I le amataga o le vasega e sosoo ai, fai atu i nisi o i latou e faasoa mai o latou aafiaga.