E mafai faapefea ona ou fesoasoani atu i isi ina ia malamalama i o’u tulaga faatonuina?

O le a fesili pea nisi ia i tatou e uiga i o tatou tulaga faatonuina. E mafai ona saunia i tatou e tali atu ia latou fesili ma molimau i faamanuiaga e maua mai le usitaia o poloaiga a le Atua. I lenei ala e mafai ona fai i tatou ma malamalama i le lalolagi.

Saunia oe lava ia faaleagaga

O a fesili ua fesiligia ai oe e nisi e faatatau i ou tulaga faatonuina? E faapefea ona e fesoasoani ia latou malamalama i le mafuaaga e te ola e tusa ai ma nei tulaga faatonuina?

O a tulaga o feagai ma le autalavou e alagatatau ai ona latou faamatala atu o latou tulaga faatonuina i isi? Aisea atonu e faigata ai i nisi o taimi lenei mea mo i latou? O a mea e te mafai ona fai e fesoasoani e saunia ai i latou mo nei aafiaga?

Ia suesue ma le agaga tatalo ia mau ma punaoa nei. O le a se mea e fesoasoani i le autalavou e malamalama ai i le auala e tali ai fesili e faatatau i tulaga faatonuina o le Ekalesia?

Roma 1:16; 2 Timoteo 1:7–8; 2 Nifae 8:7 (Aua nei ma i le talalelei a Iesu Keriso)

1 Timoteo 4:12 (Fai ma faaa’oa’o i e ua faatuatua)

3 Nifae 11:29 (O le agaga o le finauga e mai le tiapolo)

MF&F 11:21; 84:85; 100:5–8 (O le a fesoasoani le Alii ia i tatou ia iloa upu e tautatala atu ai)

Thomas S. Monson, “O le Usiusitai e Aumaia ai Faamanuiaga,” Ensign po o le Liahona, Me 2010, 65.

“Usiusitai,” Faamaoni i le Faatuatua (2004), 201–2

Aoao atu i le ala a le Faaola

Na silafia e le Faaola e na mulimuli mai ia te Ia, o mea latou te fiafia i ai, ma o latou faamoemoega ma naunautaiga. E mafai faapefea ona e iloa le autalavou o e aoaoina? O le a faapefea ona aafia e lenei mea le auala e te aoao ai i latou?

Ia fai fesootaiga

Tagai i isi manatu e aoao mai ma aoao atu ai.

I nai minute muamua lava o vasega taitasi, fesoasoani i le autalavou e faia fesootaiga i le va o mea latou te aoaoina i nofoaga eseese (e pei o suesuega faaletagata lava ia, seminare, isi vasega faale-Ekalesia, po o aafiaga ma a latou uo). E mafai faapefea ona e fesoasoani ia i latou ia iloa le taua o le talalelei i o latou olaga i aso taitasi? E mafai ona fesoasoani manatu nei:

• Fai atu i le autalavou e faasoa mai se aafiaga sa le i mamao atu ona latou maua e faamalosia ai se mea o loo latou aoaoina e uiga i le talalelei.

• Valaaulia le autalavou e fai se lisi o ni fesili na fesiligia ai i latou e uo po o tagata o le aiga e uiga i tulaga faatonuina po o poloaiga a le Alii. Na faapefea ona faamatala e le autalavou o latou tulaga faatonuina? O le a se mea o latou moomoo maimau pe ana ese se auala na latou faia ai?

Aoao faatasi

Tagai i isi manatu e aoao mai ai ma aoao atu.

O gaioiga taitasi nei o le a fesoasoani i le autalavou e aoao le ala e faamatala atu ai o latou tulaga faatonuina i isi. I le mulimuli ai i le musumusuga a le Agaga, filifili se gaoioiga se tasi pe sili atu o le a sili ona aoga mo lau vasega: Tuu atu se taimi i le autalavou e faataitai ai ona faamatala o latou tulaga faatonuina i le tasi ma le isi.

• Aumai i le vasega ni kopi o le New Era po o le Liahona. Valaau atu i le autalavou e sailiili i nei mekasini mo ni tala o loo faamatala ai ni tagata o loo puipui pe o faamatala o latou tulaga faatonuina i isi. Fai atu ia i latou e faasoa mai mea ua latou aoaoina mai nei tala. (I le faasologa o le vaiaso a o le i amataina le vasega, atonu o le a e manao e sailiili i nisi o lomiga o mekasini a le Ekalesia e sue ai kopi o loo i ai tala e talafeagai ma le autalavou o loo e aoaoina.) E i ai nisi aafiaga faapea a le autalavou mai o latou lava olaga e mafai ona latou faasoa mai? O a mea ua latou aoao mai nei aafiaga e mafai ona fesoasoani ia i latou e faamatala ai o latou tulaga i isi?

• Tuu atu i talavou taitasi kopi o le saunoaga a Peresitene Thomas S. Monson “O Le Saunia e Maua ai Faamanuiaga. Fesili i tagata o le vasega e faasolo vave le vaai i le saunoaga, maitau ia tulaga o le Ekalesia o loo ia faamatala (e pei o le laei talafeagai, amiotonu, ma le Upu o le Poto). Valaaulia talavou taitasi e filifili se tasi o tulaga faatonuina nei, faitau le saunoaga a Peresitene Monson e faatatau i ai, ma faasoa atu i le vasega le auala o faamalamalama mai ai e Peresitene Monson le tulaga faatonuina ma soo se mea ua latou maua e mafai ona latou faaaogaina e fesoasoani ai i isi ina ia malamalama atili ai i lenei tulaga faatonuina.

• Fai i tagata taitasi o le vasega e faitau se tasi o mau o loo i le otootoga lenei.Valaaulia le autalavou e sue upu ma fuaitau o faailoa mai ai a tatou amioga e tatau ona i ai pe a tatou faamatalaina o tatou tulaga faatonuina i isi.Ia mautinoa ua tofu talavou taitasi ma se kopi o le Mo Le Malosi o le Autalavou. Fai atu ia i latou filifili se tasi o tulaga faatonuina i totonu o le tamaitusi, faitau i ai, ma fuafua le tala latou te fai pe a talosagaina i latou e se uo e fai se mea e solia ai lena tulaga faatonuina. E faapefea ona fesoasoani le autalavou ia latou uo ina ia malamalama pe aisea ua latou filifili ai e ola i tulaga faatonuina a le Alii?

• Valaaulia le autalavou e faitau le palakalafa lona lua o le “Usiusitai” i le Faamaoni i le Faatuatua (itulau 201–2). E faapefea ona latou faaaogaina le faamatalaga i lenei parakalafa e tali atu ai i se uo ua faapea mai ua faigata tele poloaiga? O a mau, faataitaiga, po o aafiaga faaletagata e mafai ona latou faasoa atu i la latou uo ina ia fesoasoani ia te ia e malamalama ai i le faamoemoega o poloaiga a le Atua?

A maea ona auai le autalavou i se tasi po o le sili atu o nei gaoioiga, tuu atu le taimi latou te faataitai ai e faamatala o latou tulaga faatonuina. Mo se faataitaiga, e mafai ona latou faatinoina i se tala ni tulaga latou te ono feagai ai, po o lo latou tusi i lalo le ala latou te fesoasoani ai ia latou uo ia malamalama pe aisea ua latou filifili ai e ola i tulaga faatonuina a le Alii.

Fai atu i le autalavou e faasoa mai mea ua latou aoaoina i le aso. Pe ua latou iloa le ala e fesoasoani ai i isi ina ia malamalama i o latou tulaga faatonuina? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Motugaafa faafaiaoga

“O lou popolega sili lava e tatau ona i ai o le fesoasoani atu lea i isi e aoaoina le talalelei, ae le o le tuuina atu o ni lesona e maoae le matagofie. E aofia ai le tuuina atu o avanoa mo tagata o loo aoaoina e aoao ai e le tasi le isi” (O Le Aoao Atu: E Leai Se Isi Valaauga E Sili Ai [1999], 67).

Vitio: “Taliina o se Fesili a se Tagata o le Vasega”

Matamata atili

Valaaulia e faatino

Tagai i isi auala e aoao mai ma aoao atu ai.

Valaaulia le autalavou e mafaufau i se aafiaga o le a feagai ma i latou ma o le a maua ai le avanoa latou te faamatala atu ai o latou tulaga faatonuina i isi. O le a faapefea ona fesoasoani a latou aafiaga i le lesona o le aso latou te faia ai ma le atoatoa lenei mea?