E mafai faapefea ona ou mauaina tali i au lava fesili faaletalalelei?

O se vaega o le ola tutoatasi faaleagaga o le aoao lea e tali a tatou lava fesili faaletalalelei. O faaaliga e masani ona oo mai pe afai tatou te saili ma le filiga tali i fesili faamaoni ma ia i ai le faatuatua i le folafolaga na fai e le Faaola: “Ia outou ole atu, ona foaiina mai ai lea ia te outou; ia outou saili ona outou maua ai lea; ia outou tuitui atu, ona toina ai lea ia te outou” (Mataio 7:7). Tatou te maua tali i a tatou lava fesili faaletalalelei a o tatou tatalo, suesue i usitusiga paia ma upu a perofeta soifua, ma saili le taitaiga a le Agaga Paia.

Saunia oe lava ia faaleagaga

O le a le matafaioi na faatinoina e le sailia o tali i fesili i lau aoaoina o le talalelei? O a auala na e maua ai ni tali i au fesili?

O a ni fesili na fai mai e le autalavou e uiga i le talalelei? O le a se mea e mafai ona e fai e faamalosia ai le autalavou e saili tali i a latou fesili faaletalalelei?

Ia suesue ma le agaga tatalo ia mau ma punaoa nei. O le a se mea o le a uunaia ai le autalavou e saili tali i a latou lava fesili faaletalalelei?

1 Nifae 15:2–11 (Na i ai fesili a Lamana ma Lemuelu ae le’i fesili atu i le Alii)

Alema 40:1–12; Eteru 2:18–23; Iosefa Samita—Talafaasolopito 1:10–18 (Faataitaiga o tagata na saili tali i a latou fesili)

MF&F 6:14–15 (E mafai e le Agaga ona faamalamalamaina o tatou mafaufau pe afai tatou te fesili atu i le Alii)

MF&F 9:8–9 (A i ai ni a tatou fesili, e tatau ona tatou suesueina i o tatou mafaufau ona fesili lea i le Alii pe ua sao)

W. Mark Bassett, “Mo Lo Tatou Alualu i Luma ma le Aoaoina Faaleagaga,” Ensign po o le Liahona, Nov. 2016, 52–54

Jeffrey R. Holland, “Le Alii e, Ua Ou Faatuatua,” Ensign po o le Liahona, Me 2013

“ O Le Tusi a Mamona e Taliina ai Fesili a le Agaga,” Tala'i La’u Talalelei (2004), 111–13

James B. Martino, “Liliu Atu ia te Ia ma o le a E Mauaina Tali,” Ensign po o le Liahona, Nov. 2015, 58–60

Ia fai fesootaiga

I nai minute muamua lava o vasega taitasi, fesoasoani i le autalavou e faia fesootaiga i le va o mea latou te aoaoina i nofoaga eseese (e pei o suesuega faaletagata lava ia, seminare, isi vasega faale-Lotu, po o aafiaga ma a latou uo). E mafai faapefea ona e fesoasoani ia i latou ia iloa le taua o le talalelei i o latou olaga i aso taitasi?

Valaaulia le autalavou e faasoa mai se mea na latou aoaoina i se tasi o nofoaga (suesuega faaletagata lava ia, afiafi faaleaiga, seminare, ma isi) na fesoasoani ia i latou e malamalama ai i se mea na latou aoaoina i se isi nofoaga.
Valaaulia le autalavou e fai se lisi o fesili e masani ona fai e tagata e uiga i le olaga po o le lotu (mo se faataitaiga, tagai i le Tala'i La'u Talalelei,itulau 111). O le a le mea ua faamoemoe le Alii tatou te faia pe a i ai ni a tatou fesili? Fautuaina le vasega e mafaufau i nei fesili i le taimi o le lesona. Aua le faaaluina le tele o le taimi i le vasega e taumafai ai e tali nei fesili, nai lo o lena tulimatai atu i le aoaoina o le autalavou i mataupu faavae o le a fesoasoani ia i latou e saili tali e i latou lava ia.

Aoao faatasi

O gaoioiga taitasi nei o le a fesoasoani i le autalavou e aoao ai pe faapefea ona maua tali i a latou lava fesili o le talalelei. I le mulimuli ai i le taitaiga a le Agaga, filifili se tasi pe sili atu o le a aoga mo lau vasega:

Fai atu i le autalavou e fai se lisi o fesili atonu latou te fesiligia i le Initoneti ma maua ni tali vave i ai, e pei o le, “Pe faapei le tau taeao?” Fesoasoani atu ia i latou e mafaufau i faataitaiga o fesili i se tulaga faaleagaga lea e manaomia ai se taumafaiga ma le onosai atili, e pei o le, “Pe moni ea le Tusi a Mamona?” I le saunoaga a Elder W. Mark Bassett “Mo Lo Tatou Alualu i Luma ma le Aoaoina Faaleagaga,” faitau faatasi ia parakalafa e tolu lea e amata i le fuaitau “Ina ia malamalama i mealilo a le Atua.” Valaaulia le autalavou e faitau le 1 Nifae 2:16 ma le 1 Nifae 10:17 ma faailoa mai le auala na faatino ai e Nifae ia laasaga taitasi e fitu mo le sailia o le malamalama lea na ta’ua i le saunoaga a Elder Bassett. Tuu atu se lui i le autalavou ina ia mulimuli i le faataitaiga a Nifae pe a i ai ni a latou fesili e uiga i le talalelei.
Valaaulia tagata o le vasega e suesue i le lauga a Elder James B. Martino “Liliu Atu ia te Ia ma o le a E Mauaina Tali.” O le a se mea ua tatou aoao e uiga i le mauaina o tali i a tatou fesili mai lana faamatalaga e uiga i atalii o Mosaea ma Lamana ma Lemuelu? E mafai ona e valaauliaina tagata o le vasega e faatusatusa ia tala nei e lua i le faia o se lisi o eseesega i le va o amioga a tagata ma taunuuga o a latou amioga. E mafai foi ona e valaauliaina tagata o le vasega e faasoa mai o latou aafiaga i le mauaina o tali i a latou fesili.
Valaaulia le autalavou e faitau mau nei: Mataio 7:7; MF&F 6:14–15; 9:7–9. Fai se lisi faatasi o se vasega, o mataupu faavae ua aoao mai e nei fuaiupu e uiga i le faia o fesili ma le mauaina o tali. Aisea e le masani ai ona tali mai e le Alii a tatou fesili i le atoatoa po o le vave foi? Mafaufau e tau atu i le autalavou se taimi na i ai sau fesili e uiga i le talalelei ma mauaina se tali. Fai atu i le autalavou e faasoa mai ni aafiaga faapena.
Fai atu i le autalavou e mafaufau i ni tagata i tusitusiga paia na fai ni fesili na taitaiina atu ai i se faaaliga (afai e manaomia, e mafai ona e faasino i latou i mau ua fautuaina atu i lenei otootoga). Valaaulia le autalavou e faitau e uiga i nei tagata i mau ma faailoa mai fesili na latou faia, pe na faapefea ona latou saili tali i a latou fesili, ma tali na latou maua. Valaaulia i latou e faasoa mai i le vasega mea ua latou aoaoina. O a isi mataupu faavae e uiga i le faia o fesili e mafai ona latou aoao mai nei aafiaga? E faapefea ona faaaoga e le autalavou nei mataupu faavae i a latou lava fesili?
Fai atu i se tagata o le vasega e sau saunia e faamatala mai le tala i le Mareko 9:14–27, pe faitau faatasi le tala o se vasega. Vaevae le vasega i ni vaega se tolu, ma tuu atu i vaega taitasi se tasi o mea e tolu na mataituina e Elder Jeffrey R. Holland e uiga i le tala i lana lauga, “ Le Alii e, Ua Ou Faatuatua.” E faapefea ona latou faaaoga manatu o Elder Holland pe afai o i latou po o se tasi latou te iloa e i ai ni fesili po o ni masalosaloga e uiga i le talalelei?
Faitau faatasi o se vasega, parakalafa muamua e fa o “ O Le Tusi a Mamona e Taliina ai Fesili a le Agaga,” i le Tala'i La'u Talalelei (itulau 113). Valaaulia tagata taitoatasi o le vasega e filifili se tasi o fesili ua lisiina a i latou po o se tasi latou te iloa na tau mafaufau i ai. Tuu atu i le autalavou se taimi e faitau ai le fuaitau mai le Tusi a Mamona e faatatau i fesili na latou filifilia. Fai atu ia i latou e faasoa mai tali ua latou maua ma faamatala mai pe faapefea ona mafai ona latou faaaogaina le Tusi a Mamona e fesoasoani ai i isi e tali fesili faapena.

A maea ona faataunuu se tasi o gaoioiga nei, valaaulia le autalavou e iloilo fesili na latou tusia i lalo i le amataga o le vasega. Tuu atu ia i latou le avanoa e fuafua ai auala o le a latou saili ai tali i a latou fesili. Afai e mafai, faataga i latou e amata ona vaai mo tali i tusitusiga paia, upu a perofeta soifua, Mo le Malosi o le Autalavou, ma isi punaoa o le Ekalesia.

Fai atu i le autalavou e faasoa mai mea ua latou aoaoina i le aso. Pe ua latou malamalama pe faapefea ona maua tali i a latou lava fesili o le talalelei? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Motugaafa faafaiaoga

Mafaufau e faafesootai se tasi o le vasega i ni nai aso a o lumanai le vasega ma valaaulia o ia e aoao atu le lesona atoa po o se vaega. Fautuaina le autalavou e faaaoga nei otootoga faaleaoaoga e saunia ai e aoao atu.

Valaaulia e faatino

Valaaulia le autalavou e faasoa mai soo se lagona sa latou maua i le taimi o le vasega. O le a le mea o le a latou faia ina ia maua ai ni tali i a latou lava fesili o le talalelei? Uunaia i latou e faasoa mai mea na latou maua i se vasega o i le lumanai.