Kerisimasi: E mafai faapefea ona ou faasoa atu la'u molimau o Iesu Keriso o le Alo o le Atua?

O le Kerisimasi o se taimi e manatua ai le soifua mai o le Faaola ma toe faafou ai lo tatou talisapaia o le meaalofa sili o Lona soifuaga atoatoa ma le taulaga togiola. I tala faatusi paia e uiga i Lona soifua mai, ua tatou maua ai ni mamanu faalesoo—mai ia Samuelu le sa Lamana, lea na valoia ma le lototoa Lona afio mai, ia sa Nifae o e na vaavaai pea mo se faailoga o Lona soifua mai, i leoleo mamoe o e na faasoaina le savali ua fanau mai le Alo o le Atua, i le au makoi o e na iloaina le faataunuuina o le valoaga ma faimalaga ai i se nofoaga mamao e vaai i le Tupu o Tagata Iutaia. Faapei o Au Paia faamaoni anamua, tatou te lagona le naunautaiga e faasoa atu a tatou molimau i isi e uiga ia Iesu Keriso ma le “tala lelei e olioli tele” lea ua tatou maua i Lana talalelei toefuataiina (Luka 2:10).

Saunia oe lava ia faaleagaga

O a mau po o aoaoga a perofeta o aso e gata ai na faamalosia lau molimau i le tulaga paia o Iesu Keriso? Na faapefea ona aafia e lenei molimau lou olaga? O anafea na e faaaoga ai nei mau po o aoaoga e fesoasoani atu ai i isi e faamalosia a latou molimau?

O anafea na e faalogo ai i le autalavou o molimau i le Faaola? O le a se mea e mafai ona e faia e uunaia ai i latou e faasoa atu a latou molimau ma isi?

Suesue ma le agaga tatalo ia punaoa nei. O le a se mea e te lagona o le a uunaia ai le autalavou e tuu atu se molimau e uiga i le Faaola?

Mataio 2; Luka 2 (Ua soifua mai Iesu Keriso)

Helamana 14 (Valoia e Samuelu le sa Lamana le soifua mai o Iesu Keriso)

3 Nifae 1:4–22 (Ua molimauina e sa Nifae le faailoga o le soifua mai o Keriso)

Henry B. Eyring, “O Le Meaalofa Atoatoa,” mai le Faigalotu o le Kerisimasi a le Au Peresitene Sili i le 2012

“O Le Keriso Soifua: O Le Molimau a Aposetolo,” Ensign, Ape. 2000, 2–3.

Vitio: “O Ia o le Meaalofa”, “Ua Soifua Mai Se Faaola—Vitio o le Kerisimasi”, “Faamalamalama le Lalolagi: 25 Aso o le Auaunaga”

2:28

2:0

Aoao atu i le ala a le Faaola

Na faaaoga e le Faaola ia tusitusiga paia e aoao atu ai ma molimau atu e uiga i Lana misiona. Na ia aoaoina tagata e mafaufau i tusitusiga paia mo i latou lava ma faaaoga [tusitusiga paia] e saili ai tali o a latou lava fesili. E mafai faapefea ona e fesoasoani i le autalavou ia iloa molimau malolosi o loo i ai i tusitusiga paia?

Ia fai fesootaiga

I nai minute muamua o vasega taitasi, fesoasoani i le autalavou e fai ni fesootaiga i le va o mea o loo latou aoaoina i tulaga eseese (e pei o suesuega faaletagata lava ia, seminare, isi vasega faaleLotu, po o aafiaga ma a latou uo). E faapefea ona e fesoasoani ia i latou ia iloa le manaomia o le talalelei i aso taitasi o le olaga? O manatu nei e ono fesoasoani ia te oe:

Valaaulia le autalavou e faasoa mai le auala na latou faaaoga ai mea sa latou aoaoina i le vasega o le vaiaso ua tea i le aluga o le vaiaso.
Fai atu i le autalavou e faasoa mai le auala na latou faamanatu ai le soifua mai o le Faaola. O a ni aga masani na fesoasoani ia i latou e faalatalata atili atu ai ia Keriso?

Aoao faatasi

O gaoioiga taitasi nei o le a fesoasoani e uunaia le autalavou e faasoa atu o latou molimau e uiga ia Iesu Keriso. I le mulimuli ai i le taitaiga a le Agaga, filifili se tasi pe sili atu e aoga mo lau vasega:

Faaali se tasi o vitio o loo fautuaina atu i lenei otootoga, ma valaaulia le autalavou e faasoa atu i le tasi ma le isi o latou manatu ma lagona e uiga i le Faaola. Fai sau molimau e uiga i le paia o le Faaola, ma valaaulia le autalavou latou te faia lea lava mea e tasi. Uunaia le autalavou e faasoa atu se tasi o nei vitio i se afiafi faaleaiga pe i se ala faasalalau faaagafesootai. I se vasega o i le lumanai, fai atu ia i latou e faamatala mai ni o latou aafiaga i le faasoaina o nei savali.
Iloilo faatasi o se vasega, ia tala o le soifua mai o le Faaola, mai le Feagaiga Fou ma le Tusi a Mamona, e ala i le faitau faatasi o nisi o mau o loo lisiina atu i lenei otootoga. O le a se mea na iloa e le autalavou mai nei mau na uunaia i latou e faasoa atu a latou molimau i isi, e pei ona faia e Samuelu le Sa Lamana ma leoleo mamoe? O a nisi malamalamaaga ua latou maua? Fai atu i le autalavou e mafaufau loloto ma talanoa i ni auala e mafai ona latou faasoa atu ai a latou molimau e uiga ia Iesu Keriso i lenei vaitau o le Kerisimasi.
Usu faatasi ni pese paia o le Kerisimasi, ma fai atu i le autalavou e uiga i savali o i pese latou te iloa e musuia. O a ni mau e mafai ona latou fefaasoaai e fesootai ai ma nei pese? Afai e talafeagai, e mafai ona e saili mo ni avanoa e usu ai ni pese Kerisimasi faatasi o se vasega mo tagata o i le nuu.

Fai atu i le autalavou e faasoa mai mea ua latou aoaoina i le aso. Pe o latou lagona le musuia e faasoa atu ai a latou molimau e uiga ia Iesu Keriso i isi? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Motugaafa faafaiaoga

”A'o tatou aoaoina atu le talalelei, e tatau ona tatou iloaina ma le lotomaualalo o le Agaga Paia o le faiaoga moni lea. O lo tatou faamanuiaga o le auauna atu lea o ni meafaigaluega e mafai ona auala mai ai le aoaoga, molimau, faamafanafanaga, ma le musumusuga a le Agaga Paia” (O Le Aoao Atu, E Leai Se Isi Valaauga E Sili Ai [1999], 43).

Valaaulia e faatino

Fai atu i le autalavou po o le a se mea ua uunaia ai i latou e fai ona o mea na latou aoaoina i le aso. Uunaia i latou e usitai i nei lagona. Mafaufau i auala e mafai ona e toe tulitataoina ai.