O a faamanuiaga o folafola mai e le Tama Faalelagi pe a ou usiusitai i poloaiga?

Toetoe lava o poloaiga taitasi ua tatou maua mai le Tama Faalelagi ua tuuina faatasi mai ma se faamanuiaga folafolaina. O le usiusitai i poloaiga e aumai ai le saolotoga, tuputupu ae patino, puipuia mai faigata, ma le tele o isi faamanuiaga faaletino ma le faaleagaga. I lona taunuuga lava o lo tatou usiusitai e mafai ona taitai atu ai i le ola e faavavau i le afioaga o le Tama Faalelagi. O le iloaina o nei faamanuiaga e mafai ona musuia i tatou ma isi e usiusitai i poloaiga.

Saunia oe lava ia faaleagaga

Aisea e taua ai ona iloa faamanuiaga folafolaina —i le avea ai ma se tasi o aoaoina ma aoao atu le talalelei? O faapefea e lou naunau e ola ai i le talalelei ona aafia e faamanuiaga ua folafola mai e le Tama Faalelagi ia te oe?

O le a faapefea ona faamanuiaina le autalavou e ala i le aoao ia iloa folafolaga a le Atua o i tusitusiga paia ma saunoaga a perofeta?

O a mau ma lauga o le a fesoasoani i le autalavou e aoao ai ia iloa faamanuiaga ua folafola mai e le Atua i e e usiusitai?

Isaia 58:6–11 (O faamanuiaga ua folafola mai mo le usitaia o le tulafono o le anapogi)

Ieremia 7:23–24; MF&F 1:14–15; 58:29–33 (O taunuuga o le le usiusitai)

Malaki 3:10–12 (O faamanuiaga ua folafola mai mo le totogiina o le sefuluai)

MF&F 14:7; 82:10; 130:20–21 (Faamanuiaga o le usiusitai)

MF&F 20:77, 79 (O tatalo o le faamanatuga)

MF&F 59:9–20 (O faamanuiaga folafolaina mo le tausia o le paia o le aso Sapati)

MF&F 89:18–21 (O faamanuiaga folafolaina mo le usiusitai i le Upu o le Poto)

L. Whitney Clayton, “Soo Se Mea Lava E Fai Mai Ai O Ia Ia Te Outou, Ia Outou Faia,” Ensign po o le Liahona, Me 2017, 97–99

Jeffrey R. Holland, “O a Taeao e Faia ai e le Alii o Vavega i o Outou Luma,” Ensign po o le Liahona, Me 2016, 124–27

Von G. Keetch, “E Manuia ma Fiafia i Latou o E Tausi Poloaiga a le Atua,” Ensign po o le Liahona, Nov. 2015, 115–17

“Usiusitai,” Faamaoni i le Faatuatua (2004), 201–2

“ Folafola Atu Faamanuiaga i Tagata, ” Tala’i Atu La’u Talalelei (2004), 214–15

Video: “O Se Taula Mausali”

3:37

Ia fai fesootaiga

I nai minute muamua lava o vasega taitasi, fesoasoani i le autalavou e faia fesootaiga i le va o mea latou te aoaoina i nofoaga eseese (e pei o suesuega faaletagata lava ia, seminare, isi vasega faale-Ekalesia, po o aafiaga ma a latou uo). E mafai faapefea ona e fesoasoani ia i latou ia iloa le taua o le talalelei i o latou olaga i aso taitasi? E mafai ona fesoasoani manatu nei:

Fai atu i le autalavou e faasoa mai ni o latou aafiaga mai le vaiaso ua tea sa fesoasoani ia i latou e malamalama ai i le taua o le usiusitai i poloaiga.
Fesoasoani i le autalavou ia malamalama o poloaiga o loo i tusitusiga paia ma saunoaga a perofeta soifua e masani ona tuuina faatasi mai ma faamanuiaga folafolaina po o lapataiga; o le mafai ona iloa o ia mea mo i tatou lava ma mo i latou ua tatou aoaoina o le a musuia ai i tatou ma isi e tausi ia poloaiga. Ia faasino atu i le autalavou le ala e iloa ai faamanuiaga folafolaina pe a faitau ma le vasega le “Savali i le Autalavou mai le Au Peresitene Sili” i le Mo Le Malosi o le Autalavou (itulau ii–iii). Valaaulia le autalavou e sii o latou lima i taimi uma lava latou te faalogo ai i se faamanuiaga folafolaina. Aisea e taua ai nei folafolaga i le autalavou?

Aoao faatasi

O gaoioiga taitasi o mulimuli mai o le a fesoasoani i le autalavou e iloa ai faamanuiaga o le usiusitai. I le mulimuli ai i le Agaga, filifili se tasi o gaoioiga pe sili atu e aoga mo lau vasega:

Na ta’ua e Elder L. Whitney Clayton le tele o faataitaiga mai tusitusiga paia o tagata o e na mauaina faamanuiaga ina ua mavae le faatinoina o lo latou faatuatua ia usiusitai. Iloilo nisi o tala faatusipaia e te lagona o le a sili ona talafeagai i le autalavou i lau vasega (tagai i mau faasino i faamatalaga i le faaiuga i lana lauga). Na faapefea ona faamanuiaina nei tagata ona o lo latou usiusitai? O le a le matafaioi o loo faia e le faatuatua ia usiusitai ai? Valaauli le autalavou e iloilo le lauga a Elder Clayton, vaavaai mo faamanuiaga ia na ia fai mai e mulimuli mai i nai faatinoga faigofie o le usiusitai. O le a se mea ua latou lagona ua musuia ai i latou e fai ina ia faatino ai ma le faatuatua atili ni “faatinoga faigofie o le faatuatua”?
Valaaulia le autalavou e mafaufau i se uo o loo tauivi ina ia lagona le “ausiaina.” Atonu o lagona e le uo faapea ua foliga maualuluga tele tulaga faatonuina o le talalelei ma e le mafai ona ia ausia le atoatoa. O le a se fautuaga o tuuina mai e Elder Holland i lana lauga “O a Taeao e Faia ai e le Alii o Vavega i o Outou Luma” e mafai ona latou faasoa atu i le latou uo? O a ni faamanuiaga o loo folafola mai e Elder Holland ia i latou o e o taumafai e faia le mea sili latou te mafaia e usiusitai ai i poloaiga? Valaaulia ia tagata o le vasega e faasoa mai ni mea sa latou maua ma le tasi ma le isi. E mafai foi ona latou faasoa atu se fautuaga mai le lauga i se uo pe tuu i luga o se ala faasalalau faagafesootai.
Matamata i se tasi o vitio o loo fautuaina atu i le otootoga lenei. Fai atu i le autalavou e aotele mai i se fuaiupu se tasi mea sa latou aoaoina mai le vitio e uiga i faamanuiga o le usiusitai. Valaaulia le autalavou e faasoa mai a latou fuaiupu i le vasega ma talanoa i mea mai le vitio lea na uunaia i latou ia usiusitai i poloaiga. Valaaulia i latou e mafaufau i se tasi e mafai ona latou faasoa i ai le vitio ma faia se sini ina ia faia.
Valaaulia ni nai tagata o le vasega e tusi i le laupapa se papupuni po o se faasa e puipuia ai i tatou mai tulaga lamatia, ma valaaulia isi tagata o le vasega e mate po o a mea e suitulaga ai ata. E faapefea e nei papupuni ona pei o poloaiga? Fai atu i se tagata o le vasega e sau saunia i le vasega e faasoa atu le tala e uiga i le papupuni i le matafaga e pei ona faamatalaina e Elder Von G. Keetch i lana lauga “E Manuia ma Fiafia i Latou o E Tausi Poloaiga a le Atua” (pe faaali se vaega o le lauga a Elder Keetch o loo faamatalaina le tala). Valaaulia le autalavou e galulue faatasi i ni paga e sue ai nisi faatusatusaga e mafai ona fesoasoani ia i latou e malamalama i le faapefea e le tausia o poloaiga ona latou saogalemu ai. E faapefea ona faamanuiaina ma puipuia i latou e ala i le tausia o poloaiga?
I le tasi itu o le laupapa, tusi ai “Poloaiga,” ae o le isi itu tusi ai “Faamanuiaga Folafolaina” Valaaulia le autalavou e saili mo vaega o mau o loo folafola mai ai e le Alii faamanuiaga mo i latou o e usiusitai i Ana poloaiga. Mo se faataitaiga, e mafai ona latou saili i totonu o mau o loo fautuaina mai i lenei otootoga. Pe a talafeagai ai, faaali ia i latou le ala e faaaoga ai le Faasino Upu e sue ai mau e faatatau i se poloaiga. Valaaulia i latou e tusi i luga o le laupapa le poloaiga sa latou faitau i ai ma faamanuiaga folafolaina sa latou maua. O le a so latou lagona e uiga i poloaiga ona o le faitau ai i nei faamanuiaga?
Valaaulia le autalavou e filifili soo se tautalaga lata mai o le konafesi aoao po o se vaega o le Mo Le Malosi o le Autalavou ma faitau e saili ai faamanuiaga ua folafolaina mai e auauna a le Alii mo i tatou pe a tatou usiusitai i poloaiga. Tuu atu i talavou taitasi le avanoa e faasoa mai ai mea na ia maua. Uunaia i latou e faasoa mai ni aafiaga sa latou maua ai se tasi o nei faamanuiaga folafolaina.
Faitau faatasi o se vasega le “Folafola Atu Faamanuiaga i Tagata” mai le Tala’i La’u Talalelei (itulau 214–15). Fai i le autalavou e mafaufau i se poloaiga latou te manaomia ona aoao atu i se isi tagata, ma valaaulia i latou e faataitai ona aoao atu se tasi i le vasega e uiga i lena poloaiga, e mulimuli i taiala o i le “Folafola Atu Faamanuiaga i Tagata.”Valaaulia nisi o le autalavou e talanoa ia latou aafiaga.

Fai atu i le autalavou e faasoa mai mea ua latou aoaoina i le aso. Pe latou te iloa ona faaali mai ia faamanuiaga ua folafolaina mai e le Tama Faalelagi mo e usiusitai? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Tomai e suesue ai le talalelei

Faaaogaina o le Taiala i Tusitusiga Paia. I le gaoioiga muamua i lenei vaega, ua valaaulia ai le autalavou e faaaoga le Taiala i Tusitusiga Paia e sue ai mau e faatatau i se poloaiga. Fesoasoani i le autalavou e faamasani ma le Taiala i Tusitusiga Paia ina ia o latou lagona le toafimalie i le faaaogaina ia latou suesuega patino. Faasino ia i latou le ala e sue ai se ulutala i le lisi o le faasologa o mataupu ua faaalafapetaina ona saili lea o le mataupu i lalo o ulutala taitasi e maua ai mau talafeagai. Uunaia i latou e saili ma suesue i mau faasino e maua ai le malamalamaaga atoatoa.

Valaaulia e faatino

Valaaulia le autalavou e tepa taulai mo ni faamanuiaga folafolaina ia latou suesuega patino o le talalelei. Uunaia i latou e faasoa mea na latou maua i se vasega o i le lumanai.