Na faapefea ona faatusaina e le Faaola ia upumoni o le talalelei i mea faitino masani ma aafiaga?

O Iesu Keriso o le Faiaoga o Faiaoga. Na Ia faasoaina mai ni tala faigofie, faataoto, ma ni faataitaiga moni o le olaga lea o le a fesoasoani ia i latou ua Ia aoaoina ia malamalama i mataupu faavae o le talalelei. E mafai ona tatou faaaogaina tala e aoao atu ai faapei o le Faaola ao tatou faatatauina o tatou aafiaga faaletagata lava ia ma mataupu faavae i le lalolagi o siomia ai i tatou.

Saunia oe lava ia faaleagaga

O fea o faataoto a Iesu e sili ona taua ia te oe, ma pe aisea? O a nisi faatusatusaga na fesoasoani ia te oe ina ia malamalama ai i mataupu faavae o le talalelei?

O a fea o faataoto a Iesu e ono taua tele i le autalavou? O a nisi faatusatusaga e ono fesoasoani ia i latou ina ia malamalama ai i mataupu faavae o le talalelei? O le a se mea e mafai e le autalavou ona aoaoina e uiga i le aoao atu i le ala na faaaoga ai e le Faaola ia faatusatusaga ma tala?

Ia suesue ma le agaga tatalo ia tusitusiga paia ma punaoa o loo lisiina atu i lalo. O le a se mea e te lagona ua uunaia ai oe e faasoa atu i le autalavou?

Mataioa 20:1–15; 25:1–13, 14–30; Luka 8:4–15; 15:1–7, 8–10, 11–32 (Faataitaiga o faataoto)

Mataio 18:1–6 (Na faaaoga e le Faaola se tamaitiiti e aoao atu ai e uiga i le malo o le lagi)

Mataio 5:13–16; tagai foi i le vitio “Lauga on i le Mauga: Faaamuia” (Na faatusatusa e le Faaola Ona soo i le masima ma le malamalama o lamepa)

1:59

L. Tom Perry, “O Aoaoga Faavae ma Mataupu Faavae o Loo I Ai i Mataupu Faavae o le Faatuatua,” Ensign po o le Liahona, Nov. 2013

Jeffrey R. Holland, “O Le Au Faigaluega i le Tovine,” Ensign po o le Liahona, Me 2012, 31–33

David A. Bednar, “E Ao Ina Toe Fanau Mai Outou,” Ensign po o le Liahona, Me 2007, 19–22

Ia fai fesootaiga

I nai minute muamua lava o vasega taitasi, fesoasoani i le autalavou e faia fesootaiga i le va o mea latou te aoaoina i nofoaga eseese (e pei o suesuega faaletagata lava ia, seminare, isi vasega faale-Ekalesia, po o aafiaga ma a latou uo). E mafai faapefea ona e fesoasoani ia i latou ia iloa le taua o le talalelei i o latou olaga i aso taitasi? E mafai ona fesoasoani manatu nei:

Valaaulia le autalavou e faamatala mai se afiafi faaleaiga po o se isi lesona, se lauga i le sauniga faamanatuga, po o se lauga o le konafesi latou te manatuaina ma talanoa i ai pe aisea e avea ai ma se faamanatuaga.
Valaaulia le autalavou e faasoa mai se tala latou te manatuaina mai se lauga o le konafesi aoao talu ai nei. O le a se mea sa latou aoao mai le tala? Aisea latou te manatu ai na filifili le failauga e faaaoga se tala e aoao atu ai?

Aoao faatasi

O gaoioiga taitasi nei o le a fesoasoani i le autalavou ina ia malamalama i le ala e faaaoga ai ia tala faafaataoto ma isi faatusatusaga pe a latou aoao atu. I le mulimuli ai i uunaiga a le Agaga, filifili se tasi pe sili atu e aoga mo lau vasega:

Valaaulia le autalavou e fai se siata e i ai ulutala nei: “Faiga o Piko” ma le “Ia Liua.” Fai i le autalavou e faitau le saunoaga a Elder David A. Bednar “E Ao ina Toe Fanau Mai Outou” ma matau ia faatusatusaga na faia e Elder Bednar e aoao atu ai e uiga i le faagasologa o le liua. Atonu e te mafaufau e valaaulia le autalavou e tusi ni ata e fesoasoani ai ina ia latou iloa ia faatusatusaga. Tuu atu se taimi i le autalavou e faasoa mai ai se faatusatusaga mai o latou lava aafiaga lea e mafai ona latou faaaogaina e aoao atu ai se upumoni o le talalelei.
Fai atu i talavou taitasi e mafaufau i se tala faataoto se tasi e sili ona fiafia i ai ma sueina i totonu o tusitusiga paia. Afai latou te manaomia ni fautuaga, mafaufau e faasoa atu se tasi o faataoto o loo fautuaina atu i lenei otootoga. Valaaulia le autalavou e toe faamatala mai i le vasega ia faataoto na latou filifilia ma faasoa mai pe aisea e aoga ai ia i latou. O le a se mea o avea ai tala faafaataoto ma se metotia faafaiaoga sili ona lelei? Mafaufau e tuu atu se taimi mo le autalavou e fatu ai ni a latou lava tala faataoto o loo aoaoina atu ai se upumoni o le talalelei. Atonu e mafai ona e taitaia i latou e ala i le fautuaina o i latou e amata i le filifiliina po o le a se mataupu faavae o le talalelei latou te fia aoaoina atu. Ona latou mafaufau lea e uiga i se nofoaga e masani ai tagata o loo latou aoaoina mo le latou tala faataoto ma tusi se tala o le a aoaoina atu ai se mataupu faavae o le talalelei.
Faaali atu i le autalavou se telefoni feaveai po o se ata o se telefoni feaveai, ma fai atu ia i latou e faatusatusa le telefoni ma se mataupu faavae o le talalelei. Valaaulia i latou e faitau ia parakalafa mulimuli e lima ao lei oo i le ulutala “Faatulagaga ma le Faasologa o le Perisitua” i le lauga a Elder L. Tom Perry “O Aoaoga Faavae ma Mataupu Faavae o Loo I Ai i Mataupu Faavae o le Faatuatua” ma talanoa i faatusatusaga sa ia faia. I le faaiuga o lana lauga, na valaaulia ai e Elder Perry le autalavou e suesue i aoaoga faavae o i le Mataupu Faavae o le Faatuatua. Faitau lana valaaulia faatasi o se vasega, ma fai atu i talavou taitasi e suesue i le aoaoga faavae na aoaoina i se tasi o Mataupu Faavae o le Faatuatua ma sau saunia i le vaiaso e sosoo ai e aoao puupuu atu e uiga i lena aoaoga faavae e faaaoga ai se faatusatusaga.
Faaali se tasi o vitio o fautuaina mai i lenei otootoga pe valaaulia le autalavou e faitau i tusitusiga paia i faataitaiga o le Faaola o loo faatusatusaina le talalelei i se mea faitino masani. Aisea na aoao atu ai Iesu i lenei auala? Aumai i le vasega ni mea faatino masani o aso taitasi, e pei o se fasimoli, tupe siliva, ki, maa, po o ni meaai. Valaaulia le autalavou e filifili se mea faatino ma aoao atu se mataupu faavae o le talalelei e faaaoga i ai lena mea faatino.
Valaaulia le autalavou e faitau le faataoto i tagata faigaluega i le tovine i le Mataio 20:1–15. Fai atu ia i latou e talanoa i le tele o auala e mafai ai ona faatatau lenei faataoto i o latou olaga. Valaaulia i latou e faitau le saunoaga a Elder Jeffrey R. Holland “O Le Au Faigaluega i le Tovine” ma talanoa i upumoni o le talalelei na ia aoaoina e faaaoga ai lenei faataoto (atonu e te filifili e taulai atu i vaega o le lauga lea e sili ona talafeagai mo le autalavou). Fai i le autalavou e filifili se isi faataoto mai tusitusiga paia ma faamatala atu i le vasega pe o le a so latou lagona pe faapefea ona faatatau ia i latou. Aisea e avea faataoto ma se auala sili ona aoga e fesoasoani ai i isi ia aoao ia mataupu faavae o le talalelei?

Fai atu i le autalavou e faasoa mai mea ua latou aoaoina i le aso. O latou malamalama i le ala e aoao atu ai e faaaoga ai faataoto ma isi faatusatusaga? O a ni o latou lagona po o ni uunaiga?Pe o i ai ni a latou fesili faaopoopo?Mata e aoga le faaaluina o se isi taimi i lenei autu?

Tomai e suesue ai le talalelei

Malamalama i faatusa po o faailoga. Ina ia malamalama i faataoto ma faatusa o i tusitusiga paia, e manaomia e le autalavou le malamalama i faatusa, iloa vaega o faatusa, ma faaliliuna. O se tasi o auala e iloa ai se faatusa o le vaavaai lea mo ni upu e pei o le faatusa, faatusaina, ua faatusaina i, e pei, po o le e pei ona sa i ai. E mafai e le autalavou ona faia se lisi o vaega o le faatusaga. Ina ia faaliliuina ia faatusa, e mafai ona latou faasino i isi punaoa a le Ekalesia (e pei o mekasini a le Ekalesia, lauga o konafesi, po o isi tusitusiga paia) ma mafaufau pe faapefea ona fesoasoani ia faatusa ia i latou e malamalama ai i se mataupu faavae o le talalelei. Uunaia i latou e fai le mea lenei i soo se taimi lava latou te maua ai se faataoto po o se faatusa i a latou suesuega patino o le talalelei.

Valaaulia e faatino

Valaaulia le autalavou e faaaoga faatusatusaga po o faataoto e aoao atu ai se upumoni o le talalelei i se tagata.Fai atu ia i latou e mafaufau i ni nofoaga e mafai ona latou aoao atu ai lenei upumoni, e pei o le afiafi faaleaiga, se lauga i se sauniga faamanatuga, po o se uo.