Aisea e taua ai le aoao atu o le talalelei i le ata o le faaolataga?

Ina ia mafai ona faataunuuina faamoemoega o le fuafuaga o le fiafia, e manaomia e fanau a le Tama Faalelagi ona aoao e uiga i le talalelei.Mo lenei mafuaaga, e manaomia ai e le Atua i tatou taitoatasi e aoao atu le talalelei i o tatou auaiga, i isi tagata o le Ekalesia, ma i latou o e le’i taliaina le talalelei.

Saunia oe lava ia faaleagaga

Na faapefea ona uunaia oe e se faiaoga o le talalelei? O le a se uunaiga o e faia ia i latou o loo e aoaoina?

O ai isi e aoaoina le autalavou i totonu o lau vasega? O faapefea ona uunaia e nei faiaoga olaga o le autalavou?

O anafea na maua ai e le autalavou avanoa e aoao atu ai? O faapefea ona latou fesoasoani i isi?

Suesue ma le agaga tatalo mau ma punaoa nei. O le a se mea ua faaosofia oe e faasoa atu i le autalavou?

Luka 2:46–52 (I lona laitiiti lava, sa aoaoina e le Faaola isi tagata e uiga i upumoni o le talalelei); tagai foi i le Bible video “Ua A'oa'o Atu Iesu le Talavou i le Malumalu”

2:25

2 Nifae 2:8 (O le taua o le faailoaina atu o nei mea, ua matua silisili lava)

MF&F 43:8; 88:77–80 (Ua poloai mai le Alii ia i tatou e aoao e le tasi le isi)

Vitio: “O Le A'oa'o Atu e Fesoasoani e Laveai ai Olaga”

2:44

Ia fai fesootaiga

I uluai minute o vasega taitasi, fesoasoani i le autalavou e faia sootaga i le va o mea o loo latou aoaoina i nofoaga eseese (e pei o se suesuega faaletagata lava ia, seminare, isi vasega a le Ekalesia, po o aafiaga ma a latou uo). E mafai faapefea ona e fesoasoani ia i latou ia iloa le faatatauga o le talalelei i le olaga o aso faisoo? Atonu e fesoasoani manatu o loo i lalo ia te oe:

Tulitatao mea na aoaoina e le autalavou i le Aoga Sa i le vaiaso ua te’a. O a auala na latou faaauau ai la latou aoaoga i le vaiaso atoa?
Fai atu i le autalavou e talanoa e uiga i se aafiaga, na aoaoina ai i latou e se tasi i se auala sili ona aoga. Atonu foi e te manao e faasoa atu sou lava aafiaga.
Valaaulia le autalavou e faamatala se taimi na latou aoao atu ai le talalelei (mo se faataitaiga, i le aiga, i se uo, po o i le ekalesia). Aisea e taua ai le aoao atu i le fuafuaga a le Atua mo Lana fanau?

Aoao faatasi

O gaoioiga taitasi o i lalo, o le a fesoasoani i le autalavou e malamalama ai i le taua o le aoao atu o le talalelei i le fuafuaga a le Tama Faalelagi. I le mulimuli ai i le taitaiga a le Agaga, filifili se gaoioiga se tasi po o le sili atu lea o le a sili ona fetaui ma lau vasega:

Faaalia atu se ata o le Faaolaga o loo aoao atu i le malumalu (tagai Tusi Ata o le Talalelei, 34), ma fai atu i le autalavou e faitau le Luka 2:46–52 (pe faaali le vitio “Ua A'oa'o Atu Iesu le Talavou i le Malumalu”). O le a se lagona o le Faaola, e oo lava i lona tama itiiti, e uiga i le taua o le aoao atu? O le a se isi mea o loo aoao mai i tatou e lenei tala e uiga i le taua o le aoao atu i le fuafuaga a le Tama Faalelagi? Fai atu i le autalavou e mafaufau ma fai se lisi o avanoa uma faafaiaoga o latou mauaina i le taimi nei (faamalosiau atu ia i latou ina ia aofia ai tulaga le aloaia, e pei o le talatalanoa ma uo). Valaaulia le autalavou e filifili se mea mai le lisi ma mafaufau loloto i le fesili lenei: “E mafai faapefea ona ou fesoasoani e faataunuu le fuafuaga a Tama Faalelagi e ala i le faaaogaina o lenei avanoa faafaiaoga?” Fai atu ia i latou e faasoa mai ni o latou manatu.

2:25
Faaali le ata vitio “O le A'oa'o Atu e Fesoasoani e Laveai ai Olaga,” ma fai atu i le autalavou e manatunatu e uiga i faiaoga faamanuiaina o le talalelei na latou maua, e aofia ai matua ma isi tagata o le aiga. Vaevae i latou i paga taitoalua, ma valaaulia e tau atu e le tasi i le isi, faiaoga o loo latou manatunatu i ai. O a mea na avea ai nei faiaoga ma faiaoga faamanuiaina? Na faapefea ona fesoasoani nei faiaoga e faataunuu le fuafuaga a le Tama Faalelagi? O a mea e mafai e le autalavou ona faia e mulimuli ai i a latou faataitaiga?

2:44

Fai atu i le autalavou e faasoa mai mea na latou aoaoina i lenei aso. Ua latou malamalama ea i le matafaioi o le aoaoina o le talalelei i le ata o le faaolataga? O a lagona poo uunaiga ua latou mauaina? O i ai nisi a latou fesili? Faamata e talafeagai le faaaluina o se isi taimi i lenei aoaoga faavae?

Motugaafa faafaiaoga

“O lou popolega sili lava e tatau ona i ai o le fesoasoani atu lea i isi e aoaoina le talalelei, ae le o le tuuina atu o ni lesona e maoae le matagofie. E aofia ai le tuuina atu o avanoa mo tagata o loo aoaoina e aoao ai e le tasi le isi” (O Le Aoao Atu: E Leai Se Isi Valaauga E Sili Ai [1999], 67).

Valaaulia e faatino

Fai atu i le autalavou po o a uunaiga na latou mauaina i le aso e uiga i le aoao atu.O a mea e mafai ona latou faia e faatino ai nei uunaiga?
Faasoa atu lau molimau e uiga i le taua o le aoao atu.