O a ni auala lelei e faasoa atu ai le talalelei i isi?

O le faasoa atu o le talalelei o le tiutetauave lea o le Au Paia uma lava o Aso e Gata Ai. E tatau ona tatou tatalo ma saili mo avanoa e tau atu ai i isi le talalelei toefuataiina. E mafai ona tatou “saunia pea lava e tali atu ma le agamalu ma le mata’u ia i latou uma o e fesili mai ia te i [tatou] i le uiga o le faamoemoe o loo ia te i [tatou]” (1 Peteru 3:15).

Saunia oe lava ia faaleagaga

O a avanoa na e maua e faasoa atu ai le talalelei i isi? O le a se mea na e faia e faasoa atu ai le talalelei i isi?

O a aafiaga na maua e le autalavou i le faasoaina atu o le talalelei? O a avanoa o loo mafai ona maua e le autalavou e faasoa atu ai le talalelei?

Ia suesue ma le agaga tatalo ia mau ma punaoa nei. O le a se mea o le a fesoasoani i le autalavou e malamalama ai pe faapefea ona faasoa atu le talalelei i isi?

Mataio 28:19–20 (Na poloaiina e le Faaola Ona soo e talai atu le talalelei i nuu uma)

Roma 1:16 (E le ma Paulo i le talalelei a Keriso)

1 Timoteo 4:12 (Fai ma faaa’oa’o i e ua faatuatua)

1 Peteru 3:15 (Ia saunia e tali atu i fesili o le talalelei)

MF&F 1: 23 (E folafola atu le talalelei e e vaivai ma e faatauvaa)

MF&F 11:21 (E tatau ona tatou saunia e talai atu le talalelei e ala i le saili ia maua le upu a le Atua)

MF&F 33:8–10 (E tatau ona tatou tatala o tatou gutu)

MF&F 88:81 (Ua poloaiina i tatou e lapatai i o tatou tuaoi)

MF&F 100:5–8 (O le a ta’u mai e le Agaga Paia ia i tatou upu e fai atu ma molimau i upumoni o le talalelei)

Joaquin E. Costa, “I Uo ma Tagata Sailiili o le Ekalesia,” Ensign po o le Liahona, Me 2017, 112–14

Dieter F. Uchtdorf, “E, le Silisiliese Na’ua o le Fuafuaga a lo Tatou Atua!” Ensign po o le Liahona, Nov. 2016, 19–22

Vitio: “Faasoa Atu Ou Talitonuga” “I’ll Go Where You Want Me to Go”

2:2

5:45

Aoao atu i le ala a le Faaola

Na avea le Faaola ma faataitaiga ma faaaoao ia i latou na Ia aoaoina. E mafai faapefea e lau faataitaiga ona uunaia le autalavou e faasoa atu le talalelei ia latou uo ma tagata o le aiga?

Ia fai fesootaiga

I nai minute muamua lava o vasega taitasi, fesoasoani i le autalavou e faia fesootaiga i le va o mea latou te aoaoina i tulaga eseese (e pei o suesuega faaletagata lava ia, seminare, isi vasega faale-Ekalesia, po o aafiaga ma a latou uo). E mafai faapefea ona e fesoasoani ia i latou ia iloa le taua o le talalelei i o latou olaga i aso taitasi? E mafai ona fesoasoani manatu nei:

Valaaulia le autalavou e faasoa mai se taimi na latou aoaoina ai se mataupu faavae o le talalelei mai upu po o amio a se uo.
Valaaulia le autalavou e faasoa mai soo se aafiaga lata mai sa latou mauaina i le faasoaina atu le talalelei. Atonu e te mafaufau foi e faaali le vitio “I’ll Go Where You Want Me to Go” pe faasoa atu le tala o i le vaega ua faaulutalaina “O Se Savali Masani” mai le saunoaga a Peresitene Dieter F. Uchtdorf “E, le Silisiliese Na’ua o le Fuafuaga a lo Tatou Atua!” O le a se mea ua aoao mai e le autalavou mai nei aafiaga e mafai ona fesoasoani ia i latou ia sili atu ai ona lelei le faasoaina atu o le talalelei?

5:45

Aoao faatasi

O gaoioiga taitasi nei e mafai ona fesoasoani i le autalavou e aoao ai pe faapefea ona lelei le faasoaina atu o le talalelei. I le mulimuli ai i le taitaiga a le Agaga, filifili se tasi pe sili atu o le a aoga mo lau vasega:

I lana saunoaga “I Uo ma Tagata Sailiili o le Ekalesia,” sa faamatala ai e Elder Joaquin E. Costa le tala o lona liua. O le a se mea e mafai ona tatou aoao mai e uiga i le faasoa atu o le talalelei mai le tamaitai talavou lea na faailoa atu ia Elder Costa le talalelei ma faifeautalai ia na aoaoina o ia? Fai atu i le autalavou e galulue faatasi i paga ma fuafua se tala faatino puupuu e suitalaga i se vaega o le tala o le liua a Elder Costa lea e aoao mai ai se auala lelei e faasoa atu ai le talalelei. O a nisi auala lelei e mafai ona tatou faasoa atu ai le talalelei?
Tusi fesili nei i le laupapa: “Aisea e tatau ai ona tatou faasoa atu le talalelei?” ma “E faapefea ona tatou faasoa atu le talalelei?” Vaevae le autalavou i ni vaega se lua ma fai atu ia i latou e sue mau e tali ai fesili nei (tagai i mau ua fautuaina atu i lenei otootoga; afai e manaomia, ia fautuaina le autalavou e faitau mau ia sili atu ma le faatasi ina ia mautinoa ua latou malamalama i mea ua latou faitauina). Valaaulia i latou e faasoa mai mea ua latou maua ma tusi a latou tali i le laupapa i lalo o le fesili talafeagai. Fai atu i le autalavou e filifili se mea mai tali na latou tusia i le laupapa o le a latou taumafai e faaaoga ia latou taumafaiga e faasoa atu ai le talalelei.
Faaali le vitio “Faasoa Atu Ou Talitonuga,” ma fai atu i le autalavou e faasoa mai ni auala na latou vaaia ai tagata o faaaogaina le tekinolosi e faasoa atu ai le talalelei. O a isi auala e mafai ona e mafaufau i ai? Tuu atu ia i latou se taimi i le vasega e fuafua ai auala e mafai ona latou faaaoga ai le tekinolosi e faasoa atu ai le talalelei ia latou uo ma tagata o aiga.

Fai atu i le autalavou e faasoa mai mea ua latou aoaoina i le aso. Pe ua latou malamalama pe faapefea ona faasoa atu le talalelei? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Valaaulia e faatino

Valaaulia le autalavou e tatalo mo avanoa e faasoa atu ai le talalelei i isi e faaaoga ai mea na latou aoaoina i le vasega. I se vasega i le lumanai, valaaulia le autalavou e faasoa mai ni aafiaga na latou maua.