E mafai faapefea ona ou faamalamalamaina le Liliuese ma le Toefuataiga i isi?

O le toatele o i tatou o le a maua le avanoa e faasoa atu ai upumoni o le talalelei i isi. Ona o le Liliuese ma le Toefuataiga o ni mataupu faavae taua o le talalelei toefuataiina, e taua ai ona tatou iloa le auala e faamalamalama atu ai nei upumoni i isi. E tatau ona tatou molimau atu i se auala e le foliga ai o se faatiga ae faailoa atu ai le taua o le Toefuataiga o le talalelei.

Saunia oe lava ia faaleagaga

O a ni avanoa sa e maua e aoao atu ai isi e uiga i le Liliuese ma le Toefuataiga? O a ni auala tauaogaina ua e vaaia o faaaoga e isi a o latou aoao atu nei manatu faavae?

O a ni mea ua uma ona iloa e le autalavou e uiga i le Liliuese ma le Toefuataiga? O a ni avanoa o i ai e aoao atu ai isi e uiga i nei upumoni i le taimi nei ma i le lumanai?

Ia suesue ma le agaga tatalo ia mau ma punaoa nei. O le a se mea o le a fesoasoani i le autalavou ia iloa ona faamalamalama atu le Liliuese ma le Toefuataiga i isi?

Amosa 8:11–12; Galuega 3:20–21; 2 Tesalonia 2:1–3 (Muai tau mai le Liliuese ma le Toefuataiga)

Efeso 2:20 (Ua faatu le Ekalesia i luga o le faavae o perofeta ma aposetolo)

Dallin H. Oaks, “O Le Ekalesia Moni ma le Ola e Tasi,” New Era, Aok. 2011, 3–5

“Ia Fai Soo atu Molimau,” Talai La’u Talalelei (2004), 198–99

Ina ia aoao atili e uiga i le Liliuese ma le Toefuataiga, fuafua e suesue i le “O Le Liliuese Tele,” “O Le Toefuataiga o le Talalelei a Iesu Keriso e ala ia Iosefa Samita,” Talai La’u Talalelei (2004), 35–38

Aoao atu i le ala a le Faaola

Sa valaaulia e le Faaola i latou sa Ia aoaoina e molimau atu, ma a o latou faia, sa pai atu le Agaga i o latou loto. O le a faapefea ona e fesoasoani i le autalavou ia malamalama i le auala e molimau atu ai i isi e uiga i le Liliuese ma le Toefuataiga?

Ia fai fesootaiga

I nai minute muamua lava o vasega taitasi, fesoasoani i le autalavou e faia fesootaiga i le va o mea latou te aoaoina i nofoaga eseese (e pei o suesuega faaletagata lava ia, seminare, isi vasega faale-Ekalesia, po o aafiaga ma a latou uo). E mafai faapefea ona e fesoasoani ia i latou ia iloa le taua o le talalelei i o latou olaga i aso taitasi? E mafai ona fesoasoani manatu nei:

Fai atu i le autalavou e faasoa atu ni fesili sa fesiligia ai i latou e uiga i le Ekalesia po o o latou talitonuga. Na faapefea ona latou taliina nei fesili?
Fai atu i le autalavou e faasoa mai aafiaga ia sa latou aoao ai e uiga i le Liliuese ma le Toefuataiga. O a ni mea sa fai e i latou o e sa aoaoina i latou ia malamalama i nei upumoni o le talalelei toefuataiina?

Aoao faatasi

O le a fesoasoani gaoioiga taitasi nei i le autalavou ia malamalama i auala e talanoa atu ai i isi e uiga i le Liliuese ma le Toefuataiga. I le mulimuli ai i le taitaiga a le Agaga, filifili se gaoioiga se tasi pe sili atu o le a sili ona aoga mo lau vasega:

Fai atu i le autalavou e faasoa mai soo se mau latou te iloa o muai tau mai ai le oo mai o le Liliuese tele ma le Toefuataiga. Afai latou te manaomia le fesoasoani, fautua atu i ai e mafai ona latou faaaogaina le Taiala i Autu, pe faatatau foi i mau o loo lisiina i le otootoga lenei. Tuu atu i le autalavou e faataitai le faaaogaina o nei mau ma isi mau e mafai ona latou maua e faamalamalama ai le Liliuese ma le Toefuataiga i le tasi ma le isi.
Faitau faatasi o se vasega ia parakalafa muamua e ono o le tusiga a Dallin H. Oaks “O Le Ekalesia Moni ma le Ola e Tasi.” Fesili i le autalavou pe faapefea ona tatou molimau atu e uiga i le Ekalesia moni e tasi i se auala e aloese ai mai le faatiga i isi. Vaevae vaega o loo totoe o vaega o le lauga i le autalavou, ma fai i ai e faitau a latou vaega ma vaavaai po o le a le mea sa fai e Elder Oaks e molimau malosi atu ai e uiga i le talalelei toefuataiina a o faaaloalogia ai foi talitonuga o isi. Vaevae le vasega i paga, ma fai atu ia i latou e auaua’i i le tuuina atu o molimaiu i le Ekalesia moni e faaaoga ai mea ua latou aoaoina.
Fai atu i le autalavou e faitau le vaega ua faaautuina “Ia Fai Soo Atu Molimau” i itulau 215–16 o le Talai La’u Talalelei. I le avea ai o se vasega, fai se lisi o mafuaaga e taua ai le tuuina atu o se molimau pe a tatou aoao atu faapea ma taiala mo le tuuina atu o le molimau. Ina ia faailoa atu le taua o le tuuina atu o le molimau pe a aoao atu e uiga i le Toefuataiga, fai i se tagata faatoa liliu mai e faasoa atu i le vasega le auala sa ia maua ai se molimau e uiga i le Uluai Faaaliga a Iosefa Samita (aumai muamua le faatagaga mai le epikopo). Fai atu i le tagata liliu mai e faasoa mai po o le a le matafaioi a molimau a isi sa faia i lona liliu mai. Fuafua e faasoa atu lau molimau i le Toefuataiga o le talalelei ma valaaulia le autalavou e faasoa atu a latou molimau.
Fai atu i le autalavou e suesue le vaega ua faaautuina “Lesona Faatino” i le itulau e 172 o le Aoao Aoao Atu, E Leai Se Isi Valaauga E Sili Ai. Fai i ai e mafaufau i lesona faatino e ono mafai ona fesoasoani ia i latou e faamatala ai vaega o le Liliuese ma le Toefuataiga i isi. Mo se faataitaiga, ina ia faamalamalamaina le Liliuese, e mafai ona latou fausia se lotu i poloka, ma faaigoa poloka i le pito i lalo “Aposetolo ma Perofeta,” ona faapupula atu lea o le ala e le mafai ai e le ekalesia ona tu e aunoa ma le faavae o aposetolo ma perofeta (tagai i le Efeso 2:20). Valaaulia i latou e faasoa atu manatu mo a latou lesona faatino i le tasi ma le isi. O a ni avanoa latou te aoao atu ai isi e uiga i le Liliuese ma le Toefuataiga?

Fai atu i le autalavou e faasoa mai mea ua latou aoaoina i le aso. O latou malamalama i le auala e faamalamalama atu ai le Liliuese ma le Toefuataiga i isi? O a ni o latou lagona po o ni manatu? E i ai nisi a latou fesili faaopoopo? Mata e aoga le faaaluina o se isi taimi i lenei autu?

Motugaafa faafaiaoga

“Afai e te faaaogaina ni gaoioiga eseese e aoao ai, o le a sili atu foi ona malamalama tagata o loo aoaoina i mataupu faavae o le talalelei ma tele ni mea latou te taofimauina. O se auala e filifilia ma le faaeteete e mafai ona faamanino atili ai se mataupu faavae, o le a sili atu ona lelei, ma faagalo gata” (O Le Aoao Atu, E Leai Se Isi Valaauga e E Sili Ai [1999], 96).

Valaaulia le autalavou e faatino

Fesili i le autalavou po o a ni mea ua musuia i latou e fai ona o mea sa latou aoaoina i le aso. Fautuaina i latou e faatino na lagona. Saili le Agaga a o e mafaufau ma le agaga tatalo i ni auala e mafai ai ona e tulitataoina.