E mafai faapefea ona ou aoao atu i isi le auala e faatino ai le galuega o talafaasolopito o aiga?

Ua saunia e le Alii i lo tatou vaitaimi ni tekinolosi ofoofogia ina ia mafai ai ona tatou aoao e uiga i o tatou tuaa ma faataunuu ia sauniga mo i latou i totonu o le malumalu. I lea lava ala e tasi, ua Ia saunia ai le autalavou o lenei augatupulaga ma se tomai ina ia aoao ai i le auala e faaaoga ai nei tekinolosi ma mafai ai ona latou saofaga atu i lenei galuega taua. E le gata i le sailiga o o tatou lava talafaasolopito o aiga, ae o le a mafai ona tatou fesoasoani atu ai i isi o e e le lava le tomai i punaoa o talafaasolopito o aiga. O lenei auala, ua tatou fesoasoani atu ai ia i latou ina ia lagonaina le taua o lenei galuega ma o le a tatou fesoasoani foi i le aumaia o le faaolataga i o latou tuaa ua maliliu.

Saunia oe lava ia faaleagaga

O a avanoa na e maua e fesoasoani atu ai i isi ia aoao e uiga i le talafaasolopito o aiga? O a aafiaga na e mauaina lea sa aoao ai oe e se tagata i le auala e faia ai le galuega o talafaasolopito o aiga?

O a tomai ma gafatia ua e vaaia i talavou lea e mafai ona latou faaaogaina e fesoasoani atu ai i isi ina ia iloa le auala e faatino ai le galuega o talafaasolopito o aiga? O le a se faamaoniga ua e vaaia o le sauniaina o i latou e le Alii mo lenei galuega taua?

Ia suesue ma le agaga tatalo ia punaoa nei. O le a se mea o e lagona o le a musuia ai le autalavou ina ia fesoasoani atu ai i isi ia aoao e uiga i o latou talafaasolopito o aiga?

MF&F 128:16–18 (O sauniga mo e ua maliliu e fatuina se sooga mau i le va o augatupulaga)

MF&F 138:46–48 (O se galuega sili o le a faia i totonu o malumalu i lo tatou vaitaimi)

Russell M. Nelson, “O Tupulaga e Sosoo i le Alofa, ” Ensign po o le Liahona, Me 2010, 91–94

David A. Bednar, “O Le a Liliu Atu Loto o Fanau i o Latou Tama,” Ensign po o le Liahona, Nov. 2011, 24–27

Aoao atu i le ala a le Faaola

I soo se tulaga lava, o le Faaola sa avea ma o tatou faataitaiga ma lo tatou faiaoga sili. Na Ia aoaoina Ona soo e aoao atu i le ala na Ia aoaoina ai i latou. E mafai faapefea ona fesoasoani lau faataitaiga e saunia ia talavou e aoao atu isi?

Ia fai fesootaiga

Tagai i isi manatu e aoao mai ai ma aoao atu.

I nai minute muamua o vasega taitasi, fesoasoani i le autalavou e fai ni fesootaiga i le va o mea o loo latou aoaoina i tulaga eseese (e pei o suesuega faaletagata, seminare, isi vasega i le Lotu, po o aafiaga ma a latou uo). E faapefea ona e fesoasoani ia i latou ia iloa le manaomia o le talalelei i aso taitasi o le olaga? O manatu nei e ono fesoasoani ia te oe:

• Valaaulia le autalavou e faasoa mai ni aafiaga sa latou mauaina i le faaaogaina o se mea sa latou aoaoina mai se lesona ua tea.

• Valaaulia le autalavou e faasoa mai ni aafiaga lea sa latou fesoasoani ai i se tagata ia aoao i le auala e faaaoga ai tekinolosi (e pei o se komepiuta, se telefoni feaveai, po o se masini faapena). Faasoa atu le saunoaga lea mai ia Elder David A. Bednar: “Ua outou iloa auina atu feau feaveai i telefoni ma komepiuta e faatelea’i ai ma faalautele le galuega a le Alii—e le na ona fesootai vave ai ma a outou uo” (“O Le a Liliu Atu Loto o Fanau i o Latou Tama,” Ensign po o le Liahona, Nov. 2011, 26). O a nisi o auala o lagona e le autalavou e mafai ona latou faaaoga ai lo latou iloa o tekinolosi e fesoasoani ai i isi i le faia o le galuega o talafaasolopito o aiga?

Aoao faatasi

Tagai i isi manatu e aoao mai ai ma aoao atu.

O gaoioiga taitasi nei o le a fesoasoani i talavou ia iloa le auala e fesoasoani atu ai i isi ina ia auai i le galuega o talafaasolopito o aiga. I le mulimuli ai i le musumusuga a le Agaga, filifili se tasi pe sili atu o le a sili ona aoga mo lau vasega:

• Valaaulia le autalavou e faitau le vaega o faaulutalaina “O Se Valaaulia i le Tupulaga Faia’e” i le saunoaga a Elder David A. Bednar “ O Le a Liliu Atu Loto o Fanau i o Latou Tama .” Fai atu ia i latou e sue ia vaega o le lauga lea o loo valaaulia ai e Elder Bednar le autalavou e fesoasoani atu i isi i le galuega o talafaasolopito o aiga. O a mea o loo faagaeetia ai le autalavou e uiga i nei valaaulia? Fai faatasi o se vasega se lisi o ni auala e mafai ona tali atu ai le autalavou i valaaulia a Elder Bednar, ma valaaulia i latou e filifili se mea mai le latou lisi e mafai ona latou faia faatasi o se vasega.

• Valaaulia le autalavou e vaai faalemafaufau faapea o loo latou fesoasoani atu i se tagata e lei faia muamua lava se galuega o talafaasolopito o aiga. Vaevae le saunoaga a Elder Russell M. Nelson “Augatupulaga Fesootai i le Alofa” i le autalavou, ma fai atu ia i latou e faitau a latou vaega, ma vaavaai mo ni mea e mafai ona latou faasoa atua i le tagata o loo latou fesoasoani i ai i le aoaoina o le galuega o talafaasolopito o aiga. O a ni mau latou te ono faasoaina atu? (Mo ni faataitaiga, tagai i mau o loo lisiina atu i lenei otootoga.) Fai atu ia i latou e faasoa mai se mea sa latou mauaina ma mafaufau i se tagata e mafai ona latou fesoasoani i ai ina ia amata ona galue i le talafaasolopito o aiga.

Fai atu i le autalavou e faasoa mai mea ua latou aoaoina i le aso. Pe o latou malamalama i le auala e fesoasoani ai i isi i le faia o le galuega o talafaasolopito o aiga? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Motugaafa faafaiaoga

“Aua le fefe pe a leai se tali. E masani ona manaomia e tagata le taimi e mafaufau ai ma tali fesili po o le faaleoina o o latou lagona. Atonu e mafai ona e taofi mo se taimi pe a uma ona fai atu se fesili, pe a maea ona faasoa atu se aafiaga faaleagaga, pe afai foi ua faigata i se tagata ona faaleo mai ona lagona” (O Le Aoao Atu, e Leai Se Valaauga e Sili ai [1999], 67).

Vitio: “Sueina o Tali i Lauga o le Konafesi”

Matamata atili

Valaaulia e faatino

Tagai i isi manatu e aoao mai ai ma aoao atu.

Fesili i le autalavou po o a ni mea ua musuia i latou e fai ona o mea sa latou aoaoina i le aso. Fautuaina i latou e faatino na lagona. Mafaufau i ni auala e mafai ai ona e tulitataoina.