E mafai faapefea ona ou aoao e fai au lava filifiliga?

O se vaega taua o le ola tutoatasi o le aoao lea pe faapefea ona fai filifili mo i tatou lava. O loo naunau mai le Tama Faalelagi e taitai i tatou, ae peitai e le masani ona Ia tauina mai ia i tatou le mea tonu e fai. Ua Ia tuuina mai ia i tatou le saolotoga ma ua faamoemoe ia i tatou e faaaoga lo tatou malamalama, poto masani, ma le faatuatua e taitaia a tatou lava filifiliga. Ona mafai ai lea ona tatou fesili atu i a te Ia e faamaonia mai ia i tatou pe ua sao la tatou filifiliga.

Saunia oe lava ia faaleagaga

O a ni filifiliga taua na e faia? Na faapefea ona e faia na filifiliga? Na faapefea ona fesoasoani le Alii ia te oe?

O a filifiliga taua o loo feagai ma le autalavou? O a mataupu faavae o le talalelei e mafai ona fesoasoani ia i latou e fai ai nei filifiliga?

Ia suesue ma le agaga tatalo ia mau nei ma isi punaoa. O le a le mea o le a fesoasoani i le autalavou ia aoao ai mataupu faavae o le talalelei e faatatau i le faia o filifiliga?

Alema 37:37 (Filifili ma le Atua)

MF&F 9:7–9 (E taitaia i tatou e le Tama Faalelagi i a tatou filifiliga pe a uma ona tatou suesueina i o tatou lava mafaufau)

MF&F 58:26–29 (E le tatau ona poloaiina i tatou i mea uma; e tatau ona tatou auai ma le naunautai i se faamoemoega lelei)

Dallin H. Oaks,“ Lelei, Lelei Tele, Lelei Silisili,” Ensign po o le Liahona, Nov. 2007, 104–8.

Robert D. Hales, “Mo Le Au Perisitua Arona: Sauniuni mo le Vaitau o Faaiuga,”Ensign po o le Liahona, Me 2007, 48–51.

Richard G. Scott, “Faaaogaina o le Meaalofa Faalelagi o le Tatalo,” Ensign po o le Liahona, Me 2007, 8–11

Vitio: “Auala Sese”

3:52

Aoao atu i le ala a le Faaola

Na saunia e le Faaola o Ia lava e faataunuu Lana misiona e ala i le tatalo, anapogi, ma saili le fesoasoani a le Tama Faalelagi. E faapefea ona e mulimuli i le faataitaiga a le Faaola a o e saunia e aoao atu?

Ia fai fesootaiga

I nai minute muamua lava o vasega taitasi, fesoasoani i le autalavou e faia fesootaiga i le va o mea latou te aoaoina i nofoaga eseese (e pei o suesuega faaletagata lava ia, seminare, isi vasega faale-Lotu, po o aafiaga ma a latou uo). E mafai faapefea ona e fesoasoani ia i latou ia iloa le taua o le talalelei i o latou olaga i aso taitasi? E mafai ona fesoasoani manatu nei:

Valaaulia le autalavou e mafaufau i mea o loo tutupu i le lalolagi ua faaalia mai ai le taua o le ola tutoatasi faaleagaga po o le faaletino.
Faitau faatasi le Mataupu Faavae ma Feagaiga 58:26–29. Aisea e le finagalo ai le Alii e “poloai atu [tatou] i mea uma”? Fai atu i le autalavou e lisi i le laupapa filifiliga taua e mafai ona latou faia i le isi 10 tausaga. Valaaulia i latou e mafaufau pe faapefea e mea ua latou aoaoina i le taimi o lenei lesona ona mafai ona fesoasoani ia i latou i le faia o nei filifiliga.

Aoao faatasi

O gaoioiga taitasi nei o le a fesoasoani i le autalavou e malamalama ai pe faapefea ona fai a latou lava filifiliga. I le mulimuli ai i le taitaiga a le Agaga, filifili se tasi pe sili atu o le a aoga mo lau vasega:

Valaaulia le autalavou e faitau le Mataupu Faavae ma Feagaiga 9:7–9 ma le Alema 37:37, ma fai ia i latou e mafaufau loloto pe faapefea ona latou faaaogaina le fautuaga a le Alii i nei fuaiupu i filifiliga taua o le a latou faia i nai isi tausaga o i le lumanai. O le a le uiga o le “filifili faatasi ma le Atua” i nei filifiliga? O le a le uiga o le “suesue i ai i o[tatou] mafaufau”? Valaaulia le autalavou e faasoa mai o latou manatu ma soo se aafiaga na latou maua i le filifili ma le Atua i le faia o filifiliga. Faasoa atu foi ou lava aafiaga ma lau molimau.
Fai i le vasega e mafaufau i mea ua latou aoaoina e uiga i le faia o filifiliga a o latou faitauina le tala a Elder Robert D. Hales e uiga i le avevaalele na le auai i aoaoga faaletaitai (i lana saunoaga “ Mo Le Au Perisitua Arona: Sauniuni mo le Vaitau o Faaiuga ”). Fai i ai e faasoa mai mea ua latou maua. Valaaulia talavou taitasi e faitau se tasi o parakalafa o loo amata i “O le taimi lenei” i le lauga a Elder Hales, ma fai atu ia i latou e faasoa mai i le vasega le fautuaga a Elder Hales ia i latou i le mea e fai ma pe faapefea e filifiliga latou te faia nei ona aafia ai filifiliga e mafai ona latou faia mulimuli ane i o latou olaga.
Valaaulia le autalavou e faitau le vaega I i le saunoaga a Elder Dallin H. Oaks “Lelei, Lelei Tele, Lelei Silisili” ma faasoa mai le mea ua aoao mai ai i latou e uiga i le faia o filifiliga. O a mea e mafai e le autalavou ona faaaoga e iloa ai le eseesega i mea e lelei, lelei tele ma lelei silisili? (E mafai ona e faasino atu ia i latou le fuaitau mai ia Elder Oaks: “E ao ona tatou tuuese nisi o mea lelei ina ia filifili ai mea e lelei tele pe sili atu le lelei aua latou te atiina ae ai le faatuatua i le Alii o Iesu Keriso ma faamalolosia ai o tatou aiga.”) Tusi i le laupapa autu Lelei, Lelei Tele, ma Lelei Silisili, ma valaaulia le autalavou e tusi filifiliga o le a fetaui i lalo o nei autu (afai latou te manaomia ni faataitaiga, faasino i latou i le vaega IV o le lauga a Elder Oaks). O le a faapefea e le autalavou ona faaaoga mea ua latou aoaoina mai lenei gaoioiga i filifiliga latou te faia?
Vaevae le vasega i ni vaega se lua.Valaaulia le vaega e tasi e faitau le vaega ua faaautuina “E Faapefea ona E Tatalo?” mai le saunoaga a Elder Richard G. Scott “ Faaaogaina o le Meaalofa Faalelagi o le Tatalo, ” ae valaaulia le isi vaega e faitau le vaega ua faaautuina “E Faapefea Ona Tali Mai Tatalo?” Fai i le autalavou e sue tali i fesili o loo i autu o vaega o loo latou faitauina ma talanoaina mea ua latou maua faatasi ma a latou vaega. Ona valaaulia lea o vaega taitasi e aoao atu le isi vaega i mea ua latou aoaoina e uiga i le sailia o le taitaiga a le Alii a o latou faia filifiliga. E mafai foi ona latou matamata i le vitio “Auala Sese” ma faasoa mai po o le a se mea o faaopoopoina e lenei tala i lo latou malamalamaaga i le auala e mafai ai e le Alii ona taitaiia i tatou. Fai atu ia i latou e faasoa mai mea o le a latou faia e faaaoga ai lenei fautuaga i a latou lava faiga filifiliga.

3:52

Fai atu i le autalavou e faasoa mai mea ua latou aoaoina i le aso. Pe ua latou malamalama pe faapefea ona latou faia a latou lava filifiliga? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Valaaulia e faatino

Fesili i le autalavou po o le a le mea ua latou lagona ua uunaia i latou e fai e tusa ai ma mea ua latou aoaoina i le aso. Fautuaina i latou e faatino nei lagona. Mafaufau i auala e mafai ona e tulitataoina ai.