E faapefea ona ou faaaogaina tala e aoao ai isi e uiga i le perisitua?
O tala e mafai ona faatamaoaigaina ai a tatou aoaoga ma puepuemau mai ai le fiafia o i latou tatou te aoaoina. O tala e tuuina mai ai ia i tatou ni faataitaiga amiotonu ma faaalia ai faamanuiaga ia e oo mai i le mulimuli i aoaoga a Iesu Keriso. O loo tele tala i tusitusiga paia, i tuleiga a perofeta soifua, ma mai o tatou lava olaga e mafai ona tatou faaaogaina e aoao atu ai isi e uiga i le perisitua.
Saunia oe lava ia faaleagaga
O a ni aafiaga ua faamalosia ai lau molimau i le perisitua? O a ni tala mai tusitusiga paia ma saunoaga a perofeta soifua ua fesoasoani e te malamalama ai i le mana o le perisitua?
O a ni aafiaga ua maua e le autalavou i le perisitua? O a ni tala e uiga i le perisitua o le a fesoasoani e faamalolosia ai a latou molimau?
Ia suesue ma le agaga tatalo ia mau ma punaoa nei. O le a se mea o le a fesoasoani i le autalavou e malamalama ai i le auala e faaaoga ai tala e aoao ai isi e uiga i le perisitua?
Mataio 10:1 (Ua faauu e le Faaola ia fitugafulu)
Galuega 3:1–9 (Ua faamalolo e Peteru se tagata pipili)
Galuega 8:14–24 (Ua taumafai Simona e maua le perisitua i tupe)
3 Nifae 18:1–9 (Ua faataunuu e Iesu le faamanatuga)
Dieter F. Uchtdorf, “E Faatatau i le Faamaoni,” Ensign po o le Liahona, Me 2015, 80–83
David A. Bednar, “O Mana o le Lagi,” Ensign po o le Liahona, Me 2012, 48–51
L. Tom Perry, “O Le Perisitua o Arona,” Ensign po o le Liahona, Nov. 2010, 91–94.
Vitio: “Faapaiaina Outou Lava,” “O se Vavega i le Taimi o Taua”
Aoao atu i le ala a le Faaola
Sa faasoa atu e le Faaola ni tala faigofie, faataoto, ma ni faataitaiga moni i le olaga sa malamalama i ai i latou sa Ia aoaoina. O a ni tala e mafai ona e faasoa atu i le autalavou e fesoasoani ai ia latou malamalama i le mana o le perisitua? O a ni tala e iloa e le autalavou o le a fesoasoani ia i latou e aoao atu ai i isi e uiga i le perisitua?
Ia fai fesootaiga
I nai minute muamua o vasega taitasi, fesoasoani i le au talavou e fai ni fesootaiga i le va o mea o loo latou aoaoina i tulaga eseese (e pei o suesuega faaletagata, seminare, isi vasega i le Lotu, po o aafiaga ma a latou uo). E faapefea ona e fesoasoani ia i latou ia iloa le manaomia o le talalelei i aso taitasi o le olaga? O manatu nei e ono fesoasoani ia te oe:
-
Valaaulia le autalavou e faasoa mai pe faapefea ona latou faaaogaina mea ua latou aoaoina i a latou suesuega paitno, suesuega faaleaiga, seminare, po o isi vasega o le Lotu.
-
Fai atu i le autalavou e faasoa mai ni aafiaga ua faamalosia ai a latou molimau e uiga i le perisitua. Fuafua e faasoa mai sou lava aafiaga. Fesili atu i le autalavou pe aisea e avea ai le faasoa mai o tala ma se auala lelei e aoao ai isi e uiga i le peristiua.
Aoao faatasi
O le a fesoasoani gaoioiga taitasi nei i le autalavou e malamalama ai i le auala e faaaoga ai tala e aoao atu ai isi e uiga i le perisitua. I le mulimuli ai i le musumusuga a le Agaga, filifili se gaoioiga se tasi pe sili atu o le a sili ona aoga mo lau vasega:
-
Valaaulia le autalavou e vaai faalemafaufau faapea ua talosagaina i latou e tuuina atu se lauga i se sauniga faamanatuga e uiga i le perisitua. Fai atu ia i latou e sue se tala i tusitusiga paia o aoao mai ai e uiga i le perisitua e mafai ona latou faaaofia i a latou lauga (e pei o faataitaiga o sauniga o le faamalologa po o le taitaiga). Afai e manaomia, e mafai ona latou faasino i mau ua fautuaina i le otootoga lenei. Uunai i latou e faamatala atu le tala ua latou maua i le vasega ma faamatala po o le a se mea ua aoao mai e le tala ia i tatou e uiga i le perisitua ma pe o a ni auala latou te ono faaaogaina ai i a latou lauga.
-
Tofi ia talavou taitasi e faitau se tala e uiga i le perisitua mai le konafesi aoao (e pei o le tala i tamai nuu a Potemikini i le lauga a Peresitene Dieter F. Uchtdorf “E Faatatau i le Faamaoni,” o le tala e uiga i le tama o Elder David A. Bednar i le lauga a Elder Bednar “O Mana o le Lagi,” po o tala mai le molimau a le faufautua a le au Perisitua Arona i le lauga a Elder L. Tom Perry “O Le Perisitua o Arona”). Fai atu i le autalavou e aotele le tala sa latou faitauina ma faamatala mea o loo aoao mai ai e uiga i le perisitua. O a ni avanoa e ono maua e le autalavou e aoao atu ai isi e uiga i le perisitua e faaaoga ai nei tala?
-
Faaali se vitio se tasi po o vitio uma o loo fautuaina atu i le otootoga lenei. Fai atu i le autalavou po o a mea o aoao mai e tala e uiga i le perisitua. Fai atu i le autalavou e faasoa atu le vitio i se tasi latou te iloa e mafai ona faamalosia e le savali. Uunai i latou e fautua atu ni auala e mafai ona latou faasoa atu ai le vitio i se uo po o se tagata o le aiga, ma tuu atu i le autalavou se avanoa e faasoa mai ai o latou aafiaga i se vasega i le lumanai.
Fai atu i le autalavou e faasoa mai mea ua latou aoaoina i le aso. O a ni o latou lagona po o ni uunaiga? Pe o latou malamalama i auala e mafai ona latou faaaoga ai tala e aoao atu ai isi e uiga i le peristiua? E i ai nisi a latou fesili faaopoopo? Mata e aoga le faaaluina o se isi taimi i lenei autu?
Tomai e suesue ai le talalelei
Sailia o mataupu faavae. O se mataupu faavae o se upumoni faavavau lea e taiala ai a tatou faatinoga. O nisi taimi e manino lava le faaupuina mai o mataupu faavae i tusitusiga paia po o upu a perofeta, a o isi taimi e faaiteite mai i tala po o faataitaiga. I le gaoioiga muamua i le vaega lenei, o loo valaaulia ai talavou e sue se tala o loo faapupula mai ai mataupu faavae e fesootai ma le perisitua. Fesoasoani ia latou iloa pe faapefea ona faailoa mai nei mataupu faavae e ala i le fai atu i ai o fesili e pei o: “O a mea ua ou aoao mai nei mau ua fesoasoani ai ia ou malamalama i lenei mataupu faavae? Pe o i ai se mea ii o loo aoao mai ai au pe faapefea ona ou avea atili e faapei o le Faaola?” Fautuaina i latou e vaavaai mo mataupu faavae i a latou suesuega o le talalelei, faaletagata lava ia ma faaleaiga.
Valaaulia e faatino
Fesili i le autalavou po o a ni mea ua musuia i latou e fai ona o mea sa latou aoaoina i le aso. Fautuaina i latou e faatino na lagona. Saili le Agaga a o e mafaufau ma le agaga tatalo i ni auala e mafai ai ona e tulitataoina.