O a mea e mafai ona ou aoao mai i perofeta ma aposetolo soifua?

E maua e perofeta ma aposetolo soifua faaaliga e taitai ai le Ekalesia, ma o a latou fautuaga e atagia ai le finagalo o le Alii, o le na te silafia lelei i tatou ma malamalama i o tatou luitau. E mafai ona fesoasoani a latou aoaoga ia i tatou i luitau tatou te fetaiai i aso nei. Ua faamanuiaina i tatou e ala i taitaiga a perofeta ma aposetolo soifua ma maua mai a latou fautuaga i le ta’i ono masina i konafesi aoao.

Saunia oe lava ia faaleagaga

Na faapefea ona fesoasoani aoaoga a perofeta ma aposetolo i lou faatoilaloina o luitau? O a aafiaga e mafai ona e faasoa mai o le a faamalolosia ai le autalavou o loo e faiaoga ai?

O a nisi o luitau o loo feagai ma le autalavou i le aso? E faapefea ona fesoasoani aoaoga a perofeta ma aposetolo ia i latou e feagai ma na luitau?

A o e suesue i nei punaoa, vaavaai mo mea moni o le a fesoasoani i le autalavou e aoao ai le taua o aoaoga a perofeta soifua i o latou olaga.

Mosaea 8:16–18 (O se tagatavaai e mafai ona avea ma se manuia tele i ona uso-a-tagata)

MF&F 1:38; 68:3–4 (Pe a saunoa auauna a le Alii e ala i le Agaga, o a latou saunoaga o ni tusitusiga paia ia)

Henry B. Eyring, “O Le Mea ua Faapotopoto ai se Toalua po o se Toatolu,” Ensign po o le Liahona, Me 2016, 19–22

Ronald A. Rasband, “Ou te Tu ma Ofo,” Ensign po o le Liahona, Nov. 2015, 89–90

Gary E. Stevenson, “O Upumoni Manino ma Taua,” Ensign po o le Liahona, Nov. 2015, 91–92

Dale G. Renlund, “E Ala i Fofoga o le Atua,” Ensign po o le Liahona, Nov. 2015, 93–94

O saunoaga o le konafesi aoao talu ai nei na saunia e uso o le Au Peresitene Sili ma le Korama a Aposetolo e Toasefululua

“Perofeta,” Faamaoni i le Faatuatua (2004), 141–42

Ia fai fesootaiga

I nai minute muamua o vasega taitasi, fesoasoani i le au talavou e fai ni fesootaiga i le va o mea o loo latou aoaoina i tulaga eseese (e pei o suesuega faaletagata, seminare, isi vasega i le Lotu, po o aafiaga ma a latou uo). E faapefea ona e fesoasoani ia i latou ia iloa le manaomia o le talalelei i aso taitasi o le olaga? O manatu nei e ono fesoasoani ia te oe:

Valaaulia le autalavou e faasoa mai se aafiaga lata mai na fesiligia ai i latou e se tasi e uiga i le talalelei. Na faapefea ona latou tali atu?
Fai atu i le autalavou e faasoa mai se tala mai se konafesi aoao lata mai na uunaia ai i latou. Fesili i ai pe aisea na aoga ai ia i latou.

Aoao faatasi

O gaoioiga taitasi o loo i lalo o le a fesoasoani i le autalavou e maua ai tali o o latou luitau e ala i afioga a perofeta soifua. I le mulimuli ai i le taitaiga a le Agaga, filifili se tasi pe sili atu o le a aoga mo lau vasega:

I lana lauga ua faaulutalaina “O Le Mea ua Faapotopoto ai se Toalua po o se Toatolu,” na faaaoga ai e Henry B. Eyring le faataoto i le tagata lulu saito e faamatala ai le taua o le saunia o tatou loto e talia le afioga a le Atua. Valaaulia le autalavou e iloilo le vaega o le saunoaga a Peresitene Eyring lea na ia faasoa mai ai le faataoto ma tusi se ata e suitalaga i mea sa latou aoaoina. O a “fatu” e mafai ona latou totoina i o latou loto mai konafesi aoao talu ai nei? Atonu e te manao e aumai ni kopi o se lauga e te lagona e talafeagai i le autalavou ao e aoao atu ma fai atu ia i latou e faitau ma saili ni fatu o le upumoni e mafai ona latou galulue i ai.
Fesoasoani i le vasega e faia se lisi o luitau o loo feagai ma le autalavou i le aso. Valaaulia talavou taitasi e filifili se tasi o nei luitau ma saili i lauga o konafesi aoao pito i lata mai e maua ai fautuaga e fesoasoani ai i se tasi e faatoilalo ai lena luitau. Fautuaina ia latou faaaoga le “Faasino Autu” o i se lomiga lata mai o le konafesi o le Ensign po o le Liahona.
Faaali atu se lauga o se konafesi aoao pito i lata mai na tuuina mai e Peresitene Thomas S. Monson. Fai atu i le autalavou e faalogo mo fautuaga ma timaiga e sili ona taua mo lo latou vaitausaga ma saunia se lauga mo le lima minute e faaaoga ai fautuaga na latou maua. Tuu atu ia latou faataitaia le tuuina atu o le lauga i le isi tagata i le vasega.
Faalogo pe matamata o se vasega se lauga o le konafesi aoao e mafai ona aoga mo le autalavou o loo e faiaoga ai. Fai atu i le autalavou e faailoa upumoni e faavavau, o tusitusiga paia, valaauliaina e faatino, ma faamanuiaga ua folafola mai i le lauga. (Afai e puupuu le taimi, mafaufau e matamata na o vaega taua o le lauga.)
Valaaulia ia tagata o le vasega e faitau faatasi le [vaega i] “Perofeta” mai le Faamaoni i le Faatuatua. Fai atu ia i latou e tagai i matafaioi a perofeta o loo faamatalaina i mea ua latou faitauina ma tusi matafaioi nei i luga o le laupapa. Tuu atu i talavou taitasi se tasi o lauga nei: “Ou te Tu ma Ofo” saunia e Elder Ronald A. Rasband, “O Upumoni Manino ma Taua” saunia e Elder Gary E. Stevenson, ma le “E Ala i Fofoga o le Atua,” saunia e Elder Dale G. Renlund. Valaaulia le autalavou e tagai mo ma faasoa mai ni faataitaiga o le faataunuuina e Elder Rasband, Elder Stevenson, ma Elder Renlund o nei matafaioi, faapea foi ma nisi matafaioi faaopoopo a perofeta latou te mauaina. Na faapefea ona faamanuiaina le autalavou i le faataunuuina e perofeta o a latou matafaioi?

Fai atu i le autalavou e faasoa mai mea ua latou aoaoina i le aso. Pe ua latou malamalama i mea e mafai ona latou aoao mai mai perofeta ma aposetolo soifua? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Tomai e suesue ai le talalelei

Suesueina o Konafesi Aoao ma isi lauga. I le lesona lenei, o loo valaaulia le autalavou e sue savali o konafesi aoao. O manatu o mulimuli e mafai ona fesoasoani ia i latou e suesue ai: Fautuaina i latou e otooto ia latou lava upu manatu autu. E mafai ona latou fesili ia te i latou lava: O lea le mea e finagalo le alii ina ia ou aoaoina mai lenei savali? O lea lona finagalo i le mea e ao ona ou fai? E iai se mea i lenei savali e ono fesoasoani ia te au i se luitau o iai nei i lou olaga? Faamanatu atu i le autalavou e mafai ona latou faaaogaina fesili faapenei pe a suesueina lauga i taimi o suesuega patino poo faaleaiga o le talalelei.

Valaaulia e faatino

Valaaulia le autalavou e suesue lauga lata mai o le konafesi o se vaega o lo latou suesueina o le talalelei. Fautuaina i latou e faasoa i le vasega mea na latou aoaoina.

A o lata mai le isi konafesi aoao, fautua le autalavou e saunia e ala i le faia o se lisi o fesili o loo ia i latou, ma valaaulia i latou e faalogo ma le agaga tatalo mo tali mai lauga o konafesi.