E mafai faapefea ona ou faaaogaina faatusatusaga e aoao ai isi e uiga i le Togiola a Iesu Keriso?

Ina ia fesoasoani i isi ia malamalama i se mataupu faigata, faaleagaga e pei o le Togiola, e fesoasoani le faatusatusa o lena mataupu i se mea moni ma ua masani ai. E masani ona faaaoga e le Alii ma Ana perofeta mea masani po o poto masani e fesoasoani ai ia i latou o loo latou aoaoina ia malamalama i mataupu faavae faaleagaga. A o tatou suesueina nei faatusatusaga, e mafai ona sili atu lo tatou lava malamalama i le Togiola, ma o le a sili atu ona lelei le aoaoina atu i isi.

Saunia oe lava ia faaleagaga

O a faatusatusaga po o lesona faatino na fesoasoani ia te oe e malamalama atili ai i le Togiola?

O a avanoa e maua e le autalavou e aoao ai isi e uiga i le Togiola? E faapefea e le faaaogaina o faatusatusaga ona fesoasoani i le autalavou ia atili lelei ai le aoao atu?

Isaia 1:18 (Ua faaaoga e Isaia le kiona ma le fulufulu mamoe e aoao ai le salamo)

Mataio 11:28–30 (Ua faatusa e le Faaola le fesoasoani Na te tuuina mai ia i tatou i se amo)

Luka 15:11–32 (Faataoto i le uii faamaumau oa)

2 Nifae 1:15 (Ua faatusa e Liae le togiolaina i le siomia i aao o le alofa o le Atua)

Jeffrey R. Holland, “Pe a Faatasia le Faamasino Tonu, Alofa ma le Alofa Mutimutivale, ” Ensign po o le Liahona, Me 2015, 104–6

Dallin H. Oaks, “O Le Togiola ma le Faatuatua,” Ensign, Ape. 2008, 30–34

Vitio: “O le Puluvaga”; tagai foi Aoaoga i le Tusi a Mamona

10:45

Aoao atu i le ala a le Faaola

Na faasoa mai e le Faaola tala faigofie, faataoto, ma faataitaiga moni o le olaga na fesoasoani ia i latou na Ia aoaoina ia latou iloa ai lesona o le talalelei i le lalolagi o siomia ai i latou. E faapefea ona e fesoasoani i le autalavou ia latou aoao atu i le ala a le Faaola? (Tagai Aoao Atu o le Talalelei i le Ala a le Faaola, 4–5.)

Ia fai fesootaiga

I nai minute muamua o vasega taitasi, fesoasoani i le autalavou e faia ni fesootaiga i le va o mea o loo latou aoaoina i tulaga eseese (e pei o suesuega faaletagata, seminare, isi vasega i le Lotu, po o aafiaga ma a latou uo). E faapefea ona e fesoasoani ia i latou ia iloa le manaomia o le talalelei i aso taitasi o le olaga? O manatu nei e ono fesoasoani ia te oe:

Fesili i talavou pe o a mea na fai e o latou faiaoga, taitai, ma matua e fesoasoani ai ia i latou ina ia malamalama i le Togiola.

Aoao faatasi

E mafai e gaoioiga taitasi nei ona fesoasoani i le autalavou e aoao pe faapefea ona faaaoga faatusatusaga e aoao ai isi e uiga i le Togiola. I le mulimuli ai i le taitaiga a le Agaga, filifili se tasi po o le sili atu o le a sili ona aoga i lau vasega:

Faaali le vitio “O le Puluvaga.” Valaaulia talavou e galulue taitoatasi e lisiina vaega eseese o le faatusatusaga sa faaaogaina e Peresitene Boyd K. Packer (e pei o le tagata o loo aitalafu ai, o le tagata aitalafu, o le aitalafu, ma faasolo ai lava) ma tusi i lalo po o a mea o faatatau i ai nei faatusatusaga taitasi.Vaevae taitoalua le vasega, ma fesili atu i ai e aoao e le tasi le isi e uiga i le Togiola e ala i le faaaogaina o faatusatusaga a Peresitene Packer. E faapefea e lena faatusatusaga ona fesoasoani i le autalavou ia malamalama atili i le Togiola?

10:45
Fai atu i talavou e mafaufau ma faasoa mai faataitaiga o faatusatusaga i tusitusiga paia e mafai ona faaaoga e aoao atu ai le Togiola (tagai, mo se faataitaiga, i mau i lenei otootoga). O a ni mea ua latou aoao e uiga i le Togiola mai nei faatusatusaga? Tusi i le laupapa, “__________ e pei __________.” Valaaulia talavou e faatumu le avanoa muamua i se mataupu faavae e fesootai ma le Togiola (e pei o le salamo, faamagalo, po o le toetu) ma le avanoa lona lua i se mea masani e mafai ona latou aoao atu ai isi e uiga i lena mataupu faavae. Tuu atu i talavou ni avanoa e faataitai ai lenei auala o le aoao atu.
Vaevae le vasega i ni vaega se lua. Tofi se vaega se tasi e faitau ma talanoaina le tala a Elder Jeffrey R. Holland e uiga i ona uso sa feaei i se pa tifato (i lana lauga “Pe a Faatasia le Faamasino Tonu, Alofa ma le Alofa Mutimutivale”). Fai atu i le isi vaega e faitau ma talanoaina le faataitaiga a Elder Dallin H. Oaks o se laau e lolou i le matagi (i lana tusiga “O Le Togiola ma le Faatuatua ”). Fai atu i vaega taitasi e aoao atu i isi vaega mea ua latou aoaoina e uiga i le Togiola mai le faatusatusaga na latou suesueina.

Fai atu i talavou e faasoa mai mea na latou aoaoina i le aso. Pe ua latou malamalama pe faapefea ona faaaoga faatusatusaga e aoao ai isi e uiga i le Togiola? Pe o i ai nisi a latou fesili? Pe mata e aoga le toe faaalu o se isi taimi i lenei autu?

Motugaafa faafaiaoga

“O se faiaoga mataalia e le manatu faapea, ‘O le a le mea o le a ou faia i le vasega i le aso?’ ae fesili, ‘O le a le mea o le a fai e au tamaiti aoga i le vasega i le aso?’; e le, ‘O le a le mea o le a ou aoao i le aso?’ ae peitai, ‘E faapefea ona ou fesoasoani i au tamaiti aoga ia iloa le mea e ao ona latou iloa?’” (Virginia H. Pearce, i O Le Aoao Atu, e Leai se Valaauga e Sili ai [1999], 61).

Valaaulia e faatino

Fesili atu i le autalavou e mafaufau i mea na latou aoaoina i le aso. O a ni mea ua uunaia ai i latou e aoao ai isi e uiga i le Togiola? Afai e mafai, tuu atu ia i latou e aoao e le tasi le isi i le vasega, pe faatulaga nisi taimi mo i latou e aoao atu ai.
Tuu atu lau molimau i faamanuiaga e mafai e le autalavou ona tuuina atu i isi a o latou aoao atu le Togiola.