E mafai faapefea ona ou aoao e auauna ia sili atu ona lelei i le Ekalesia?

Afai e valaaulia e le Alii i tatou e auauna atu, Na te faaagavaaina foi i tatou e auauna atu ma le faamaoni. A o tatou aoao po o a o tatou tiutetauave ona faataunuuina lea ma le filiga, e faalauteleina e le Alii a tatou taumafaiga. E faamanuiaina foi i tatou i o tatou valaauga pe afai tatou te mulimuli i fautuaga a o tatou taitai faaleEkalesia. I lenei auala, ua tatou auai faatasi ma Ia i le fausiaina o Lona malo ma auauna atu i Ana fanau.

Saunia oe lava ia faaleagaga

E faapefea ona fesoasoani le Alii ia te oe a o e tauivi e faataunuu ou valaauga? O a aafiaga e mafai ona e faasoa atu i le autalavou?

I le autalavou o loo e aoaoina, o ai o loo auauna atu i ni valaauga? Aisea e taua ai mo i latou le aoao nei pe faapefea ona auauna atoatoa i le Ekalesia?

Ao e sauniuni, ia suesue ma le agaga tatalo ia mau ma punaoa nei. O le a se mea e te lagona ua uunaia ai oe e faasoa atu i le autalavou?

Ieremia 1:5–9; Mosaea 2:11; Mose 6:31–34 (O Perofeta na mauaina le malosiaga mai le Alii e faataunuu ai o latou valaauga)

Ioane 15:16; Mataupu Faavae o le Faatuatua 1:5 (E valaau i tatou e le Alii e auauna atu e ala mai faaaliga)

Iakopo 1:17–19; MF&F 4; 107:99; 121:34–36 (E tatau ona tatou galulue i le filiga uma e faataunuu o tatou valaauga)

MF&F 25 (Ua maua e Ema Samita le fautuaga e uiga i le faataunuuina o ona tiutetauave)

Dieter F. Uchtdorf, “O Lē Sili ia te Outou,” Ensign ma le Liahona, Me 2017, 78–81

Dieter F. Uchtdorf, “Aoao mai ia Alema ma Amoleka,” Ensign po o le Liahona, Nov. 2016, 71–74

Carl B. Cook, “Auauna Atu,” Ensign po o le Liahona, Nov. 2016, 110–12

Ia fai fesootaiga

I nai minute muamua o vasega taitasi, fesoasoani i le autalavou e fai ni fesootaiga i le va o mea o loo latou aoaoina i tulaga eseese (e pei o suesuega faaletagata lava ia, seminare, isi vasega faaleLotu, po o aafiaga ma a latou uo). E faapefea ona e fesoasoani ia i latou ia iloa le manaomia o le talalelei i aso taitasi o le olaga? O manatu nei e ono fesoasoani ia te oe:

Fai i le autalavou e faasoa mai se aafiaga lata mai sa latou mauaina i le aoaoina atu o le talalelei. O le a se mea na latou iloa na lelei ona fai? O le a se mea latou te fia faaleleia?
Fai atu i le autalavou e talanoa e uiga i soo se valaauga na latou maua i le Ekalesia. O a ni o latou tiutetauave? O a ni mea na latou iloa na faigata pe na avea ma luitau i le valaauga? Na faapefea ona fesoasoani le Alii ia i latou? Faasoa atu so oe lava aafiaga, ma tuu atu lau molimau.

Aoao faatasi

O gaoioiga taitasi nei o le a fesoasoani i le autalavou e aoao ai pe faapefea ona auauna atu atoatoa i le Ekalesia. I le mulimuli ai i le musumusuga a le Agaga, filifili se gaoioiga se tasi pe sili atu o le a sili ona aoga mo lau vasega:

Fatu se lisi o fesili lea e mafai e le autalavou ona sue ia tali i le saunoaga a Peresitene Dieter F. Uchtdorf “O Lē Sili ia te Outou,” e pei o le “O le a le valaauga sili ona taua i le Ekalesia?” Auauai taitasi atu fesili i le autalavou ma vaai po o ai e muamua ona maua le tali i le saunoaga. A o maua e le autalavou ia tali taitasi, faaalu se taimi e talanoa ai i mea ua aoao mai ia i tatou e uiga i le auauna atu i le Ekalesia.
Fatu se siata e lua koluma ua faailogaina “Alema” ma “Amoleka” i luga o le laupapa. (Atonu e fiafia foi e sui Alema ma Amoleka i ni nai atatusi faigofie.) Fai atu i tagata o le vasega e suesue i le saunoaga a Peresitene Dieter F. Uchtdorf “Aoao mai ia Alema ma Amoleka,” tagai i auala na auauna atu ai Alema ma Amoleka i isi. A maua e se tagata o le vasega se mea, fai atu i ai e tusi i luga o le siata. E mafai faapefea e le autalavou ona mulimuli i faataitaiga a Alema ma Amoleka. Talanoaina le siata o se vasega.
Fai atu i le autalavou e faasoa mai ni tala mai tusitusiga paia na tuuina atu ai i se tasi se tofiga faigata ma na maua e ia le fesoasoani mai le Alii (mo nisi manatu, tagai i mau o loo fautuaina atu i lenei otootoga). Afai e mafai, fesoasoani ia i latou e sue ata o nei tala i le Tusi Ata o le Talalelei. O le a se mea ua uunaia ai i latou e uiga i nei tala? O a ni mea ua latou aoaoina mai nei tala e uiga i le faataunuuina o valaauga?
Valaaulia le autalavou e faitau le saunoaga a Elder Carl B. Cook “Auauna Atu,” saili mo se upusii e mafai ona latou faasoa atu e uiga i le auala e auauna atu ai ma le faamaoni i valaauga a le Ekalesia. Fai atu i tagata o le vasega e faasoa mai a latou upusii ma pe aisea na latou lagona ai le taua o lenei fautuaga. O le a faapefea ona latou faaaogaina mea na latou aoaoina i o latou valaauga i le taimi nei ma le lumanai?
Tusi i le laupapa le autu Fautuaga ma Folafolaga. Valaaulia le autalavou e sue le Mataupu Faavae ma Feagaiga 25 ma faailoa mai le fautuaga ma folafolaga a le Alii na tuuina atu ia Ema Samita e tusa ai ma lona valaauga. Fai atu ia i latou e tusi i le laupapa mea na latou mauaina. E mafai faapefea e lenei fautuaga ma nei folafolaga ona aoga i valaauga e maua e le autalavou? Fai atu i le autalavou na umia ni valaauga e faasoa mai soo se mea latou te manatua e uiga i fautuaga ma folafolaga na tuuina atu ia i latou ina ua vaetofia i latou. E mafai foi ona e faasoa atu mea e te manatuaina. Na faapefea ona faataunuuina nei valoaga?

Fai atu i le autalavou e faasoa mai mea ua latou aoaoina i le aso. O a ni o latou lagona po o ni uunaiga? Pe ua latou malamalama i le auala e auauna atu ai i le Ekalesia ma le atoatoa? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Tomai e suesue ai le talalelei

Sailia o mataupu faavae. O le gaoioiga muamua i lenei vaega e valaaulia ai le autalavou e suesue tusitusiga paia, ma vaai mo mataupu faavae (po o upumoni faavavau) e uiga i le auauna atu i le malo o le Atua. Uunaia ia latou latou te fesili ifo ia i latou lava ia fesili nei “O a mataupu faavae ua ou aoaoina mai lenei fuaitau? Pe ese na mataupu faavae mai na sa ou manatu ai pe na aoaoina foi i le taimi ua tuanai? Po o latou uunaia au e fai se suiga i lou olaga?” Uunaia le autalavou e faaaoga fesili faapena i le taimi o a latou suesuega patino faaletusitusiga paia.

Valaaulia e faatino

Fai atu i le autalavou po o le a se mea ua uunaia ai i latou e fai e tusa ai ma mea na latou aoaoina i le aso. Uunaia i latou e usitaia nei lagona. Saili le agaga a o e mafaufau ma le agaga tatalo i auala e mafai ona e tulitataoina ai.