E mafai faapefea ona ou aoao ia iloa le aao o le Tama Faalelagi i mea uma?

Sa aoao mai le perofeta o Alema, “Ua faailoa mai i mea uma o loo i ai se Atua” (Alema 30:44). E alofa le Tama Faalelagi ia i tatou ma faamanuia i tatou i aso taitasi. Afai tatou te mataala, e mafai ona tatou vaaia faamaoniga o Lona mana ma uunaiga i o tatou olaga ma le lalolagi o siomia ai tatou. E ui tatou te le vaai tino ia te Ia, ae o le iloaina o Lona aao i mea uma e mafai ona faamalolosia ai a tatou molimau o loo soifua o Ia.

Saunia oe lava ia faaleagaga

O le a se taimi na e matauina ai le uunaiga a le Tama Faalelagi i lou olaga? O le a se mea e te faia e iloa ai Lona alofa mutimutivale agamalu?

O a ni auala na e vaaia ai le aao o le Tama Faalelagi i olaga o le autalavou? O le a se mea e ono taofia le autalavou mai le iloaina o uunaiga a le Tama Faalelagi i o latou olaga? O le a faapefea e le aoaoina ia iloaina Ana uunaiga ona faamanuia ai i latou i le taimi nei ma le lumanai?

Suesue ma le agaga tatalo nei mau ma punaoa. O le a se mea o le a fesoasoani i le autalavou latou te iloa ai le aao o le Atua i o latou olaga?

Salamo 145:9; 1 Nifae 1:20 (O le alofa mutimutivale agamalu o le Alii o loo i ai i Ana galuega uma)

Alema 30:44; Mose 6:63 (E molimau mai mea uma o loo i ai se Atua)

MF&F 59:21 (E le fiafia le Atua pe a tatou le iloaina Lona aao i mea uma)

M. Joseph Brough, “O Lona Aao Taitai i Aso Uma,” Ensign po o le Liahona, Me 2017, 23–26

Dieter F. Uchtdorf, “E, le Silisiliese Na’ua o le Fuafuaga a lo Tatou Atua!” Ensign po o le Liahona, Nov. 2016, 19–22

Kim B. Clark, “O Mata e Vaai ma Taliga e Faalogo,” Ensign po o le Liahona, Nov. 2015, 124–26

Vitio: “O Le Atua o lo Tatou Tama,” “Sa Tatou Ola ma le Atua” “O Le Finagalo o le Atua” “The Tender Mercies of the Lord” “Ia Manatua, Ia Manatua Lava”

3:6

3:59

2:59

3:50

1:34

“Ua Sili Oe,” Viiga, nu. 46

Aoao atu i le ala a le Faaola

Na faasoa atu e le Faaola ni tala faigofie ma ni faataitaiga moni o le olaga. Na Ia fesoasoani i Ona soo ia iloa ni lesona o le talalelei i o latou olaga o aso uma ma i le lalolagi na siomia i latou. Pe o i ai ni faataitaiga po o ni aafiaga mai lou olaga e mafai ona fesoasoani i le autalavou ia iloa le auala o loo molimau mai ai mea uma e faapea o loo i ai se Atua? Pe o i ai i le autalavou ni aafiaga e mafai ona latou fefaasoaaia i le tasi ma le isi?

Ia fai fesootaiga

I nai minute muamua lava o vasega taitasi, fesoasoani i le autalavou e faia fesootaiga i le va o mea latou te aoaoina i nofoaga eseese (e pei o suesuega faaletagata lava ia, seminare, isi vasega faale-Ekalesia, po o aafiaga ma a latou uo). E mafai faapefea ona e fesoasoani ia i latou ia iloa le taua o le talalelei i o latou olaga i aso taitasi? E mafai ona fesoasoani manatu nei:

Fai atu i le autalavou e faasoa mai ni aafiaga na latou maua i le faaiuga o le vaiaso na tea nei ia na faamalolosia ai a latou molimau i le talalelei.
Faasoa atu se aafiaga na e iloaina ai se faamaoniga o le taialaina e le Atua o lou olaga, puipuia oe, pe o loo faamanuiaina oe. Tuu atu lau molimau e uiga i le Tama Faalelagi.

Aoao faatasi

O gaoioiga taitasi nei o le a fesoasoani i le autalavou ia malamalama ai i le auala e iloa ai le aao o le Atua i o latou olaga. E ala i le mulimuli i le musumusuga a le Agaga Paia, filifili se tasi pe sili atu o mea nei o le a sili ona aoga mo lau vasega:

Faatumu se “afifi o le tausiga” i ni mea faitino e fai ma sui o faamanuiaga na tuuina mai e le Tama Faalelagi ia i tatou, e pei ona faailoa mai e Brother M. Joseph Brough i lana lauga “O Lona Aao Taitai i Aso Uma.” Vaevae mea faitino i le autalavou, ma valaaulia i latou e toe iloilo le lauga a Brother Brough ma faasoa mai mea na ia aoao atu e uiga i le vaega a le Tama Faalelagi i le afifi o le tausiga. Ina ia fesoasoani i le autalavou ia iloa le alofa ma le agalelei o le Tama Faalelagi mo i latou, valaaulia i latou e tusi [se ata] ma faasoa atu i le vasega se tasi o faamanuiaga na latou maua mai le Tama Faalelagi.
Mafaufau i se mea e faaaoga i aso uma lea e manatu faatauvaa i ai le autalavou i lau vasega, e pei o seevae. Valaaulia i latou e talanoaina pe faapefea ona ese le olaga pe a leai lea mea I le faaaoga ai o le saunoaga a Peresitene Dieter F. Uchtdorf “E, le Silisiliese Na’ua o le Fuafuaga a lo Tatou Atua!” fai atu i le autalavou e fai se lisi i luga o le laupapa o mea tatou te maua mai le Atua i le avea ai ma tagata o le Ekalesia ma atonu tatou te manatu faatauvaa i ai. Mafaufau e valaaulia se tagata faatoa liliu mai e faamatala mai ia lagona sa ia mauaina i le taimi na ia aoao ai e uiga i upumoni o le talalelei mo le taimi muamua ma le auala na suia ai ona olaga e na upumoni. O le a se mea e mafai ona tatou faia ia iloa lelei atili ai ia aao o le Atua i o tatou olaga ma ia lotofaafetai ai?
Ina ia fesoasoani i le autalavou ia aoao e vaai i le aao o le Atua i o latou olaga, valaaulia i latou e faitau le lauga a Elder Kim B. Clark “O Mata e Vaai ma Taliga e Faalogo.” O le a se mea ua latou aoao mai lenei lauga e uiga i le auala e vaai ai i le aao o le Tama Faalelagi ma faalogo i Lona siufofoga? I le avea ai ma se vaega o la outou talanoaga, e mafai ona tou talanoa e uiga i faamanuiaga o le vaai ma le faalogo faaletino faapea foi ma faafitauli o le le mafai ona vaai po o le faalogo. E faapefea ona e faataitaia le taua o le vaai ma faalogo faaleagaga? O a ni faataitaiga e mafai ona tou fefaasoaai ai ma le autalavou e uiga i le faalogo ma le vaai faaleagaga?
Faaali atu se tasi o vitio ua fautuaina mai i lenei otootoga. Fai atu i le autalavou e faalogologo mo ni mafuaaga ua talitonu ai tagata o loo i le vitio i le Atua. O a ni faamaoniga o Lona aao o loo vaaia e nei tagata i le lalolagi o siomia ai i latou? O a nisi faamaoniga o loo vaaia e le autalavou? Valaaulia le autalavou e faasoa mai a latou molimau e uiga i uunaiga a le Tama Faalelagi i o latou olaga.
Valaaulia le autalavou e usu, faalogologo, pe faitau le viiga “Ua Sili Oe.” Fai atu ia i latou e fai se lisi pe tusi ni ata i luga o le laupapa o ni mea o i totonu o lenei viiga o loo faailoa mai ai le silisiliese o le Atua (e mafai foi ona latou faitauina mau o loo ta’ua mai i le faaiuga o le viiga). O a nisi o mea e mafai ona faaopoopo atu e le autalavou i lenei lisi lea o loo molimau atu ia i latou e uiga i le mana ma le alofa o le Atua? Valaaulia le autalavou e mafaufau i ala fatufatuai e mafai ona latou faailoa atu ai a latou molimau e uiga i le Tama Faalelagi. Mo se faataitaiga, e mafai ona latou faaaogaina a latou lisi e tusi ai sa latou lava viiga puupuu, pe mafai foi ona pue ni ata ma saunia se ata faasolosolo. Uunaia i latou e faasoa mai mea na latou fatuina i se vasega i le lumanai.
Tusi fuaiupu nei e lē o uma, i luga o le laupapa: “O le a ou faauigaina se alofa mutimutivale agamalu o le _______. O se tasi faataitaiga o se alofa mutimutivale agamalu o le ________. Atonu ou te le matauina se alofa mutimutivale pe afai _______.” Valaaulia le autalavou e mafaufau e uiga i le auala o le a latou faamaea ai nei fuaiupu a o latou faitauina le vaega ua faaulutalaina “O A ni Alofa Mutimutivale Agamalu o le Alii?” i le lauga a Elder David A. Bednar “O Le Alofa Mutimutivale o le Alii” (pe latou te matamata foi i le vitio o le autu lava lea e tasi). Valaaulia i latou e faasoa mai o latou manatu. O a ni faataitaiga o le alofa mutimutivale agamalu ua matauina e le autalavou i o latou lava olaga? O faapefea ona faamalolosia e nei aafiaga a latou molimau e uiga i le Tama Faalelagi? Valaaulia i latou e mafaufau i se tasi e ono mafai ona faasoa atu i ai o latou aafiaga e fesoasoani ai e faamalosia lona faatuatua.

Fai atu i le autalavou e faasoa mai mea na latou aoaoina i le asō. O a ni lagona po o ni uunaiga ua latou maua? Pe o latou malamalama i le auala e iloa ai le aao o le Tama Faalelagi i o latou olaga? O i ai nisi a latou fesili? Pe aoga le toe faaalu o se isi taimi i lenei autu?

Motugaafa faafaiaoga

“Pe a faitau leotele e le tasi tagata, e tatau ona e uunaia isi e mulimuli i le faitauga ia latou tusitusiga paia. Valaaulia i latou e faalogo ma vaavaai mo ni mataupu faavae po o ni manatu patino. Faataga se taimi mo i latou e sue ai i fuaitau o mau taitasi a o lei faitauina” (O Le Aoao Atu, E Leai Se Isi Valaauga e Sili Ai [1999], 56).

Valaaulia e faatino

Uunaia le autalavou e taumafai ia iloa le aao o le Atua i o latou olaga i le gasologa o le vaiaso a sau. I le amataga o le lesona o le vaiaso a sau, valaaulia i latou e faasoa mai o latou aafiaga.