E mafai faapefea ana avea a’u ma se taitai e sili atu ona lelei?

O Iesu Keriso o le faataitaiga sili lea o le taitaiga amiotonu. O taitai o Lana Ekalesia e mulimuli i Lana faataitaiga e ala i le alolofa ma le auauna atu ia i latou o loo latou taitaia. E ala i le tauivi muamua e avea ma ni soo faatuatua, ona mafai lea ona tatou fesoasoani i isi e atiae ni molimau malolosi ma faalatalata atili i le Tama Faalelagi ma Iesu Keriso.

Saunia oe lava ia faaleagaga

Mafaufau i se tasi e te masani ai o se taitai faaKeriso. O a ni tomai faaletaitai o loo i ai i lena tagata? Na faapefea e lana taitaiga ona uunaia oe ma isi?

Aisea e manaomia ai e le autalavou ona aoao pe faapefea ona avea ma taitai? O a avanoa o loo latou maua e taitai ai—i le Ekalesia, i o latou aiga, ma le alalafaga?

Ao e sauniuni, ia suesue ma le agaga tatalo ia mau ma punaoa nei. O le a se mea e te lagona ua uunaia ai oe e faasoa atu i le autalavou?

Esoto 18:13–26 (Ua maua e Mose le fautuaga mai ia Ietero e uiga i le ala e avea ai ma taitai e sili atu ona lelei)

Mataio 20:20–28; 23:11; MF&F 50:26 (O taitai faaKeriso e auauna atu ia i latou o loo latou taitaia)

Ioane 13:4–15; 3 Nifae 18:16; 27:21, 27 (O Iesu Keriso o la tatou faataitaiga o le taitaiga)

Mosaea 2:11–19 (Ua auauna atu le Tupu o Peniamina i lona nuu)

MF&F 121:34–46 (Mataupu faavae o le taitaiga amiotonu)

Stephen W. Owen, “O Taitai Sili o Soo Sili Ia,” Ensign po o le Liahona, Me 2016, 70–76

Thomas S. Monson, “O Faaa’oa’o o le Amiotonu,”Ensign po o le Liahona, Me 2008, 65–68.

Tad R. Callister, “O Le Mana o le Perisitua i le Taulealea,” Ensign po o leLiahona, Me 2013

“Taitaiina o le Ekalesia a Iesu Keriso,” Tusitaulima 2: Taitaiga o le Ekalesia (2010), 12–15

Aoao atu i le ala a le Faaola

Mafaufau mo sina minute i mea ua e iloa e uiga i le Faaola. O le a se mea ua e iloa e uiga i Lana ala o le aoao atu ma le taitaiga? Na faapefea ona Ia fesoasoani i isi e aoao ma tuputupu ae? E faapefea ona e mulimuli i Lana faataitaiga o le aoao atu ma le taitaiga e fesoasoani ai i le autalavou e aoao ma tuputupu ae? E faapefea ona e uunaia i latou ia avea ma taitai faaKeriso?

Ia fai fesootaiga

I nai minute muamua o vasega taitasi, fesoasoani i le autalavou e fai ni fesootaiga i le va o mea o loo latou aoaoina i tulaga eseese (e pei o suesuega faaletagata, seminare, isi vasega i le Lotu, po o aafiaga ma a latou uo). E faapefea ona e fesoasoani ia i latou ia iloa le manaomia o le talalelei i aso taitasi o le olaga? O manatu nei e ono fesoasoani ia te oe:

Valaaulia le autalavou e faasoa mai se aafiaga na latou maua talu ai nei na faamanatu mai ai ia i latou se mea o loo latou aoaoina ia latou vasega i le Lotu.
Faaali atu se ata o le Faaola (tagai, mo se faataitaiga, i le Tusi Ata o le Talalelei), ma tusi le upu taitai i le laupapa. Fai atu i le autalavou e tusi i le laupapa nisi upu e oo mai i le mafaufau pe a latou mafaufau ia Iesu Keriso i le avea ai ma se taitai atoatoa.

Aoao faatasi

O gaoioiga taitasi nei e mafai ona fesoasoani i le autalavou e aoao ai pe faapefea ona avea i latou ma ni taitai e sili atu ona lelei. I le mulimuli ai i le taitaiga a le Agaga, filifili se tasi pe sili atu o le a aoga mo lau vasega:

Faitau faatasi, o se vasega le Mataio 20:20–28. O le a le mea o loo aoao atu e le Faaola i Ona Aposetolo e uiga i le taitaiga i le malo o le Atua? Valaaulia le autalavou e fai se lisi i le laupapa o mea e tutusa ai ma mea e eseese ai le taitaiga i le lalolagi ma le taitaiga i le Ekalesia. E faapefea ona avea se tagata ma taitai i se pisinisi po o se atunuu? i le Ekalesia? O a ni tomai faaletaitai e faatauaina e le lalolagi? i le Ekalesia? I le avea ai ma se vaega o lenei talanoaga, valaaulia le autalavou e faitau mau o loo aoaoina ai le taitaiga faaKeriso (e pei o na o loo fautuaina atu i lenei otootoga). Aisea e taua ai mo le autalavou ona malamalama i nei mataupu faavae? Pe o le a faapefea ona latou faaaoagaina i o latou aiga? i la latou auaunaga i le Ekalesia? i o latou alalafaga?
Filifili vaega mai le mataupu e 3 o le Tusitaulima 2, “Taitaiina o le Ekalesia a Iesu Keriso,” o loo aoaoina ai mataupu faavae o loo faataitaia e le Faaola (e pei o vaega 3.2.1, 3.3.3, 3.3.4, 3.3.5, ma 3.3.6). Fai atu i tagata taitasi o le vasega e faitau se tasi o nei vaega ma mafaufau i se tala mai le soifuaga o le Faaola o loo faaamatalaina ai le mataupu faavae o loo aoaoina i lana vaega (e mafai ona latou vaai i Tusi Ata o le Talalelei, 34–51, mo ni manatu). E mafai foi ona e fai atu ia i latou e suesue i le lauga a Stephen W. Owen, “O Taitai Sili o Soo Sili Ia” ma saili mo ni mataupu faavae po o tala e faatatau i taitaiga faaKeriso. Fai atu i le autalavou e faasoa mai mea ua latou aoaoina mai le tusitaulima faapea ma tala. O a ni faataitaiga o nei mataupu faavae ua latou vaaia i o latou lava olaga?
Faitau faatasi, o se vasega le 3 Nifae 27:21, 27. Fai atu i le autalavou e mafaufau i le savali a nei mau a o e faasoa atu ia i latou le tala a Peresitene Thomas S. Monson e uiga i le faamigoiina o ona taliga, mai lana lauga “O Faaa'oa'o o le Amiotonu” (pe faaali le vaega lenei o lana saunoaga i le vitio). O le a le mea ua aoao mai e lenei tala i le autalavou e uiga i le taitaiga? Valaaulia i latou e manatunatu loloto i savali o loo latou fesootai atu ai i isi e ala i le auala o loo latou ola ai. Uunaia i latou e faasoa mai ni aafiaga na faamanuiaina ai i latou e ala mai se faataitaiga a se tasi tagata o le vasega. O a nisi tomai faaletaitai o loo latou vaaia i le tasi ma le isi?
Fai atu i se tasi o le vasega e fafa se ato faafafa. Tuu ni tusi po o nisi mea i le atofaafafa seia oo ina matua mamafa lava. Fesili atu i le autalavou pe faapefea ona suitulaga lenei atofaafafa i se valaauga faaletaitai. Valaaulia le autalavou e suesue le Esoto 18:13–26 ma vaai mo le fautuaga na maua e Mose mai ia Ietero e uiga i le ala e avea ai ma taitai e sili atu ona lelei. O le a se mea semanu e tupu pe ana faapea e le mulimuli Mose i lana fautuaga? Valaaulia le autalavou e vaai faalemafaufau faapea ua tofia i latou e faatulaga se konafesi faaleautalavou a le siteki. O le a faapefea ona latou faaaogaina le fautuaga a Ietero i lenei tulaga? Tuu atu ia i latou se taimi e fuafua ai la latou konafesi faalemafaufau a le autalavou. O ai o le a latou fesili atu i ai mo se fesoasoani? O le a le mea o le a latou fai atu i nei tagata e fai?
Tusi ni nai mataupu faavae faaletaitai o loo aoaoina mai e Elder Tad R. Callister i “ O Le Mana o le Perisitua i le Taulealea” i ni fasi pepa eseese. Tuu atu se pepa se tasi i tagata taitasi o le vasega, ma fai atu ia te ia e sue le tusiga mo faamatalaga e uiga i le mataupu faavae ua tofia i ai. Valaaulia tagata o le vasega e faasoa mai mea ua latou aoaoina e uiga i le taitaiga mai ia Elder Callister. Fautuaina i latou e faasoa mai soo se faataitaiga patino o nei mataupu faavae.

Fai atu i le autalavou e faasoa mai mea ua latou aoaoina i le aso. Pe ua latou malamalama i le auala e avea ai ma ni taitai e sili atu ona lelei? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Valaaulia e faatino

Fesili atu i le autalavou po o le a se mea ua uunaia ai i latou e fai e faalagolago i mea ua latou aoaoina i le aso. Fautuaina i latou e usitai i nei lagona. Mafaufau i auala e mafai ona e toe tulitataoina ai.