E mafai faapefea ona ou faaleleia lo’u suesue i tusitusiga paia?

O le poloaiga faatusitusiga paia ia “taumamafa i afioga a Keriso” (2 Nifae 32:3) ua faatatau i mea sili atu nai lo le na o le faitauina o tusitusiga paia. E tatau ona tatou saili i ai ma le filiga, mafaufau loloto i mea o loo aoao mai ai ma faatatau nei aoaoga ia i tatou lava. E tatau ona tatou tatalo mo le malamalama ma mulimuli i soo se uunaiga tatou te maua mai le Agaga Paia. O suesuega anoa i tusitusiga paia e mafai ona fausia ai lo tatou faatuatua, puipuia i tatou mai faaosoosoga, ma fesoasoani e latalata atili atu ai i le Tama Faalelagi.

Saunia oe lava ia faaleagaga

Ua faapefea ona uunaia lou olaga e tusitusiga paia? O le a se mea e mafai ona e faia ia atili anoa ai lou suesueina o tusitusiga paia?

O maua ea e autalavou o lau vasega aafiaga anoa mai tusitusiga paia? E faapefea ona e fesoasoani ia i latou ia faaleleia lo latou suesue i tusitusiga paia?

Suesue ma le agaga tatalo mau ma punaoa nei. O a mea ua e maua e fesoasoani ai i le autalavou ia faaleleia lo latou suesue i tusitusiga paia?

1 Nifae 10:19; MF&F 88:63, 118 (Afai tatou te saili, o le a tatou maua)

1 Nifae 19:23 (E tatau ona tatou faatatauina tusitusiga paia ia i tatou lava)

2 Nifae 4:15–16; MF&F 138:1–11; Iosefa Samita—Talafaasolopito 1:11–13 (Mafaufau loloto i tusitusiga paia e oo mai ai faaaliga)

2 Nifae 32:3 (E tatau ona tatou taumamafa i afioga a Keriso)

Devin G. Durrant, “Ua Manatunatu Pea Lo’u Loto I Ai,” Ensign po o le Liahona, Nov. 2015, 112–15

Henry B. Eyring, “O se Talanoaga i le Suesueina o Tusitusiga Paia,” Ensign, Iulai 2005, 8–12

David A. Bednar, “A Se Faatanoa o le Vai Ola,” faeasaite o le CES mo talavou matutua matutua, Fep. 4, 2007

Aoao atu i le ala a le Faaola

Sa faaaoga e le Faaola ia tusitusiga paia e aoao atu ai ma molimau atu ai. Sa ia aoao tagata ia mafaufau loloto ma faaaoga tusitusiga paia e saili ai tali. E faapefea ona e fesoasoani i le autalavou i le faaaogaina o tusitusiga paia e saili ai a latou tali?

Ia fai fesootaiga

I nai minute muamua o vasega taitasi, fesoasoani i le au talavou e fai ni fesootaiga i le va o mea o loo latou aoaoina i tulaga eseese (e pei o suesuega faaletagata, seminare, isi vasega i le Lotu, po o aafiaga ma a latou uo). E faapefea ona e fesoasoani ia i latou ia iloa le manaomia o le talalelei i aso taitasi o le olaga? O manatu nei e ono fesoasoani ia te oe:

Fai i le autalavou e faasoa mai se mea sa latou aoao mai i tusitusiga paia i a latou suesuega faaletagata lava ia i lenei vaiaso. O le a le latou fuafuaga mo le suesueina o tusitusiga paia? O le a so latou lagona e mafai faapefea ona faaleleia lo latou suesue i tusitusiga paia?
Tusi i le laupapa, “O le faatofuina i tusitusiga paia e taua lea mo le faafaileleina faaleagaga” (Quentin L. Cook, “E Mafai Ea Ona Outou Lagonaina Nei?” Ensign po o le Liahona, Nov. 2012). Fai atu i le autalavou po o le a lo latou manatu e uiga i le faatofuina o i tatou lava i tusitusiga paia. E faapefea ona ese mai i le na o le faitau i ai? Ia uunaia i latou e mafaufau i lenei faamatalaga a o latou aoao e uiga i le suesueina o tusitusiga paia i lenei lesona.

Aoao faatasi

O gaoioiga taitasi o loo i lalo o le a fesoasoani i le autalavou e faaleleia lo latou suesue i tusitusiga paia. I le mulimuli ai i le uunaiga a le Agaga, filifili se tasi pe sili atu o le a aoga mo lau vasega:

O se tasi o auala e faaleleia ai suesuega i tusitusiga paia o le sue lea o se mau i le taimi o suesuega patino e taulai atu i ai i le aluga o le vaiaso (tagai i le lauga a Devin G. Durrant “Ua Manatunatu Pea Lo’u Loto I Ai.”) I le vaiaso ao lumanai le vasega, valaaulia ni nai tagata o le vasega e faitau le lauga a Elder Durrant ma “manatunatu loloto” i se mau. I le vasega, tuu atu ia i latou se taimi e faasoa mai ai o latou aafiaga. Tusi i luga o le laupapa le [fesili] “E faapefea ona faaleleia a tatou suesuega faaletusitusiga paia?” ma valaaulia le autalavou e faasoa mai ni fautuaga mai le lauga a Brother Durrant ma mai a latou lava suesuega a le tagata lava ia ma faaleaiga.
Tusi i le laupapa upu o le saili, mafaufau loloto, ma le tatalo. Valaaulia le autalavou taitasi ia faitau se tasi o mau ua fautuaina i lenei otootoga ma faasoa mea ua latou aoao mai le mau. Fai atu i talavou e tusi a latou mau faasino i autafa o upu o i le laupapa o loo faamatala ai le mataupu faavae ua aoao mai ai. O a nisi mataupu faavae o le suesue ma le mataalia i tusitusiga paia e mafai ona mafaufau i ai le autalavou? Pe latou te iloa nisi mau o loo faapupula mai ai na mataupu faavae?
Tusi i le laupapa nisi o fesili mai le saunoaga a Peresitene Henry B. Eyring “O Se Talanoaga i le Suesueina o Tusitusiga Paia” e sili ona aoga i le autalavou o loo e faiaoga ai. Valaaulia le autalavou e faasoa mai a latou tali i nei fesili, ma tuu atu i ai latou le taimi e faitau ai tali a Peresitene Eyring. O le a se mea sa latou aoao mai i tali a Peresitene Eyring ua mafai ona fesoasoani ia i latou e faaleleia ai lo latou suesue i tusitusiga paia?
Faailoa atu i le autalavou ia fesoasoaniga mo le suesueina o loo maua i le lomiga o tusitusiga paia a le AAG (e pei o vaefaamatalaga, faaulutala o mataupu, Taiala o Autu, ma le Lomifefiloi o le Tusi Paia). Fesoasoani ia latou iloa nei fesoasoaniga mo le suesueina e faalautele ai lo latou suesue i tusitusiga paia. Pe a faatagaina e le epikopo, valaaulia tagata o le uarota e o mai i le vasega ma faatalanoaina e le autalavou pe o faapefea ona latou faia ia anoa lo latou suesue i tusitusiga paia.
Fai i le autalavou e filifili se mataupu i tusitusiga paia e faaalu ai ni nai minute e faitau i ai, e faaaoga mataupu faavae o suesueina o tusitusiga paia na latou aoaoina i le aso. Valaaulia i latou e faasoa ni malamalamaaga na latou maua a o latou suesue.

Fai i le autalavou e faasoa mea na latou aoaoina i le aso. Pe ua latou malamalama i le ala e faaleleia ai lo latou suesue i tusitusiga paia? O a ni o latou lagona po o ni manatu? Pe o i ai ni a latou fesili faaopoopo? Mata e aoga le faaalu o se isi taimi i lenei autu?

Motugaafa faafaiaoga

“Ia faatulaga nofoa i totonu o le potu ina ia mafai ai ona e vaai atu i mata o tagata taitoatasi ma ia mafai e tagata taitoatasi ona vaai mai i ou foliga” (O Le Aoao Atu, E Leai Se Isi Valaauga E Sili Ai[1999], 75).

Valaaulia e faatino

Valaaulia le autalavou e mafaufau i a latou fuafuaga patino mo le suesueina o tusitusiga paia. O a mea na latou aoaoina i le aso e mafai ona fesoasoani e faaleleia ai a latou fuafuaga?