E mafai faapefea ona ou faaaogaina musika a le Ekalesia e aoao ai e uiga i le ata o le faaolataga?

Na aoao mai le Au Peresitene Sili: “O nisi o timaiga musuia tele lava e tuuina atu lea i le lagiina o viiga. E uunaia i tatou e viiga ia tatou salamo ma faia galuega lelei, atiina ae le molimau ma le faatuatua, faamafanafana i e vaivai, faamafanafana i e faanoanoa, ma uunaia i tatou e tumau seia oo i le iuga.” (Viiga, ix). O le tele o mataupu faavae o le talalelei, e aofia ai i latou e fesootai ma le ata o le faaolataga, ua sili ona aoaoina ma le mana e ala i viiga ma isi musika a le Ekalesia:

Saunia oe lava ia faaleagaga

O a upumoni o le talalelei ua e aoaoina mai viiga ma isi musika a le Ekalesia? Ua faapefea ona faaaafia e musika lau molimau ma lou faatuatua? O a aafiaga ua aoaoina ai oe i le mana o musika?

O faapefea ona uunaia e musika olaga o talavou o loo e aoaoina? O le fea talavou atonu e mafai ona fesoasoani ia te oe e aoao le isi talavou e uiga i le mana faagaeetia loto o musika?

Suesue ma le agaga tatalo mau nei ma isi punaoa. O a mea ua musuia oe e faasoa atu i le autalavou?

Kolose 3:16 (Aoao e le tasi le isi e ala i viiga po o musika)

MF&F 25: 12 (O le pese a e amiotonu o se tatalo lea i le Alii)

Dallin H. Oaks, “Tapuai e Ala i Musika,” Ensign, Nov. 1994, 10–12

“Musika ma Siva,” Mo Le Malosi o le Autalavou (2011), 22–23

“Tuleiga Tomua a le Au Peresitene Sili,” Viiga, vii–ix

Aoao atu i le ala a le Faaola

Na faatuatuaina e le Faaola i latou na Ia aoaoina. Na Ia saunia i latou ma tuu atu ia i latou tiutetauave taua e aoao atu ai, faamanuia, ma auauna atu i isi. O faapefea i lou valaauga e aoao le autalavou ona faamaonia ai le faatuatuaina o oe e le Faaola? E mafai faapefea ona e faaali atu i le autalavou lou faatuatuaina o lo latou gafatia e aoao atu?

Ia fai fesootaiga

I nai uluai minute o vasega taitasi, fesoasoani i le autalavou e faia fesootaiga i le va o mea o loo latou aoaoina i tulaga eseese (e pei o se suesuega faaletagata lava ia, seminare, isi vasega a le Ekalesia, po o aafiaga ma a latou uo). E mafai faapefea ona e fesoasoani ia i latou ia iloa le faatatauga o le talalelei i le olaga o aso faisoo? Atonu e mafai ona fesoasoani manatu o loo i lalo:

Fai atu i le autalavou e faasoa mai se mea atonu latou te mananao e tau i se uo e uiga i le ata o le faaolataga. O le a se mea atonu e mafai ona latou faia e fesoasoani ai i le uo ia aoaoina le mataupu?
Faitau faatasi o se vasega le “Tuleiga Tomua a le Au Peresitene Sili” i le tusi o viiga (itulau vii–ix). Valaaulia le autalavou e lisi i luga o le laupapa mea ua talosaga mai le Au Peresitene Sili ia i tatou e fai, ma faamanuiaga ua latou folafola mai.

Aoao faatasi

O gaoioiga taitasi o loo i lalo, o le a fesoasoani i le autalavou e faaaoga musika a le Ekalesia e aoao atili ai e uiga i le ata o le faaolataga. E ala i le mulimuli ai i le taitaiga a le Agaga, filifili se tasi po o le sili atu, o le a sili ona aoga mo lau vasega.

Faaali atu i le autalavou le auala e faaaoga ai le faasologa o autu o le tusi o viiga, po o le tusipese a tamaiti e saili ai musika e faatatau i le ata o le faaolataga. Valaaulia talavou taitasi e filifili se viiga po o se pese, ma suesue i upu ma mau e faatatau i ai (o loo maua i le faaiuga o pese taitasi). O a vaaiga loloto ua latou mauaina e faatatau i le ata o le faaolataga mai upu o viiga?
Fai atu i le autalavou e faasoa mai se aafiaga faaleagaga na latou maua i le faaaogaina o musika a le Ekalesia. O le a le mea na taua ai le aafiaga ia i latou? E mafai faapefea e musika ona fesoasoani ia te oe e aoao atu i se tasi se upumoni o le talalelei?
Tusi ulutala nei i luga o le laupapa: “Muai Olaga,” “Olaga Faitino,” ma le “Olaga pe a Mavae le Oti.” Valaaulia le autalavou e usu pe faalogologo i le “Lo’u Tama e” (Viiga, nu. 178). Fai atu ia i latou e saili mea o loo aoao mai e lenei viiga e uiga i nei laasaga e tolu o le ata o le faaolataga ma tusi mea latou te mauaina i lalo o ulutala talafeagai i luga o le laupapa. O a nisi mea ua latou aoaoina mai lenei viiga e uiga i le fuafuaga a le Tama Faalelagi mo i tatou? O a isi viiga po o pese a tamaiti e mafai ona latou manatunatu i ai, o loo faapea ona aoao atu e uiga i le ata o le faaolataga? Uunai i latou e faasoa mai o latou manatu ma lagona e uiga i le auala e mafai ai e le Agaga ona aoao i tatou e ala i musika.

Fai atu i le autalavou e faasoa mai mea na latou aoaoina i le aso. Ua latou malamalama ea i le auala e faaaoga ai musika a le Ekalesia e aoao atu ma aoao mai ai e uiga i le ata o le faaolataga? O a lagona po o uunaiga ua latou mauaina? O i ai nisi a latou fesili? Mata e talafeagai le faaalu o se isi taimi i lenei autu?

Motugaafa faafaiaoga

“Ina ia fesoasoani i tagata o loo aoaoina e tali i fesili, atonu e te manao e tau atu muamua ia i latou se mea, a o le i faitauina pe aoaoina atu, o le a e talosagaina ai ni a latou tali. Mo se faataitaiga, e mafai ona e faapea atu, “Faalogo a o o’u faitauina atu le fuaitau lenei, ina ia mafai ona outou fetufaai mai ni mea e sili ona outou fiafia i ai” po o le “A o faitauina lenei mau, vaai pe mafai ona outou malamalama i le mea o loo ta’u mai e le Alii e uiga i le faatuatua’” (O Le Aoao Atu: E Leai Se Isi Valaauga E Sili Ai [1999], 72).

Valaaulia e faatino

Fai atu i le autalavou e mafaufau loloto i mea ua latou aoaoina i le aso e uiga i le aoao atu ma le aoao mai e ala i musika. O a mea ua musuia ai i latou e fai ona o mea ua latou aoaoina? Faamata o le a faapefea ona aafia ai la latou suesuega o le talalelei? le auala latou te mafaufau ai i musika? o o latou avanoa e aoao atu ai i le lumanai?