O le a se mea ua aoao mai e le faataitaiga a Iosefa Samita ia te a’u e uiga i le aoaoina o le talalelei?

Sa sailia e Iosefa Samita le poto faaleagaga a o galue ai o se tufugaaao o le Alii i le toefuataiina o le talalelei. Sa mafaufau loloto o ia i tusitusiga paia, fesili atu ni fesili musuia, ma galue loa i mea sa ia aoaoina. A o tatou mulimuli i faataitaiga a le Perofeta, e mafai ona tatou maua tali i a tatou fesili ma musumusuga e taiala ai o tatou lava olaga.

Saunia oe lava ia faaleagaga

Mafaufau i aafiaga sa e oo i ai i le suesueina o le talalelei. E faapefea ona musuia oe e le faataitaiga a Iosefa Samita i le avea ai ma se tagata e aoao i le talalelei?

E faapefea ona taulima e le autalavou i lau vasega le aoaoina? E mafai faapefea e le faataitaiga a Iosefa Samita ona faatamaoaigaina lo latou aoaoina o le talalelei?

Suesue i le soifuaga o Iosefa Samita. O le a se mea o aoao mai e lana faataitaiga e uiga i le aoaoina o le talalelei? O le a se mea e mafai ona e faasoa atu i le autalavou?

MF&F 76:15–21 (Sa mafaufau loloto Iosefa Samita i mau)

Iosefa Samita—Talafaasolopito (Sa faatatau e Iosefa Samita ia tusitusiga paia ia te ia lava, fesili atu ni fesili musuia, ma faatino loa le mea sa ia aoaoina)

Jairo Mazzagardi, “O Le Nofoaga Paia o le toefuataiga,” Ensign po o le Liahona, Me 2016, 56–58

Craig C. Christensen, “Ua Ou Iloa Nei Mea Mo Au Lava Ia,” Ensign po o le Liahona, Nov. 2014, 50–52

“Mauaina o le Atamai o Mea Moni e Faavavau,” Aoaoga a Peresitene o le Ekalesia: Iosefa Samita (2007), 279–85

“O Le Talosaga Muamua a Iosefa Samita,” Viiga,nu. 14

Video: “Amataga”

4:53

Ia fai fesootaiga

I nai minute muamua lava o vasega taitasi, fesoasoani i le autalavou e faia fesootaiga i le va o mea latou te aoaoina i nofoaga eseese (e pei o suesuega faaletagata lava ia, seminare, isi vasega faale-Ekalesia, po o aafiaga ma a latou uo). E mafai faapefea ona e fesoasoani ia i latou ia iloa le taua o le talalelei i o latou olaga i aso taitasi? E mafai ona fesoasoani manatu nei:

Fai atu i le autalavou e fai mai ni a latou fesili o i ai e uiga i se aoaoga faavae sa latou suesueina.
Fai atu i talavou taitoatasi e tusi se ata faigofie i luga o le laupapa e faatusa i ai se mea o ia iloa e uiga i le soifuaga o Iosefa Samita (pe faaali ma talanoa i ata o mea na tutupu mai lona soifuaga; tagai i le Tusi Ata o le Talalelei, 89–97). Tusi i luga o le laupapa, “O le a se mea ua aoao mai e le faataitaiga a Iosefa Samita ia te au e uiga i le aoaoina o le talalelei?” Fai atu i le autalavou e fautua mai ni tali ma ia faaauau ona mafaufau i lenei fesili i le taimi atoa o le lesona.

Aoao faatasi

O le a fesoasoani gaoioiga taitasi nei i le autalavou e aoao mai le faataitaiga a Iosefa Samita i le avea ai o se tagata aoao o le talalelei. I le mulimuli ai i le taitaiga a le Agaga, filifili se tasi pe sili atu o le a aoga mo lau vasega:

I le aluga o le vaiaso, valaaulia se tasi o le autalavou i lau vasega e toe suesue i le Iosefa Samita—Talafaasolopito 1:5–17 ma sau saunia e faasoa mai mea na faia e Iosefa Samita na maua ai tali i ana fesili. Toe suesue faatasi o se vasega le lauga a Elder Jairo Mazzagardi “O Le Nofoaga Paia o le Toefuataiga,” ma vaavaai mo le auala na faia e Elder Mazzagardi e saili ai le tali i lana fesili. Na faapefea ona talitutusa aafiaga a Elder Mazzagardi ia Iosefa Samita? O a fesili o i ai a le autalavou e uiga i le talalelei? E faapefea ona latou taliaina le lui a Elder Mazzagardi ia “mulimuli i le faataitaiga a le Perofeta a Iosefa Samita” pe a i ai ni a latou fesili?
Fai atu i tagata o le vasega e faitau le vaega o loo faaulutalaina “Ina Ole Atu Ia i le Atua” mai le lauga a Elder Craig C. Christensen “Ua Ou Iloa Nei Mea Mo Au Lava Ia.” Fai atu ia i latou e lisi i luga o le laupapa ni tali talafeagai i le fesili a Elder Christensen “O e vaaia i aafiaga o Iosefa se mamanu e mafai ona e faaaogaina e maua ai pe faamalosia ai lau oe lava molimau?” Uunaia i latou e suesue i le Iosefa Samita—Talafaasolopito 1:5–17 mo tali i lenei fesili.
Fesoasoani i le autalavou e fai se lisi o mataupu faavae ma uiga e fesoasoani tatou te aoao ai le talalelei (e pei o le lotomaualalo, mafaufau loloto, faatusatusaina o mau, ma le faia o fesili musuia). Tuu atu i talavou taitasi se tasi o fuaitau nei mai le Iosefa Samita—Talafaasolopito: fuaiupu 10–20, 21–26, 28–33, 34–47, 48–54, 68–75. Fai i le autalavou e suesue nei fuaiupu mo mataupu faavae faaopoopo o le aoaoina ma faataitaiga a Iosefa Samita i le faaaogaina o nei mataupu faavae. E mafai faapefea e le autalavou ona faaaoga nei mataupu faavae i a latou lava taumafaiga e aoao i le talalelei?
Faitau faatasi ia upu o le “O Le Talosaga Muamua a Iosefa Samita” (Viiga, nu. 14), ma saili ia upu o loo faamatala ai ia uiga o Iosefa Samita ao ia sailiili mo le upumoni. Fesoasoani i le autalavou e faamalamalama soo se upu e le masani ai. E mafai faapefea ona mulimuli le autalavou i le faataitaiga a Iosefa Samita i lo latou aoaoina o le talalelei? I le avea ai ma se vaega o lenei gaoioiga, mafaufau e faaali atu le vitio “Origin.”

4:53
Vaevae le vasega i vaega, ma tuu atu i vaega taitasi se vaega o le mataupu “Mauaina o le Atamai o Mea Moni e Faavavau” mai Aoaoga a Peresitene o le Ekalesia: Iosefa Samita. Valaaulia le autalavou e tusi se ata o se mea e faatusa i ai aoaoga a Iosefa Samita e uiga i le auala e faaleleia ai a latou suesuega o le talalelei.

Fai atu i le autalavou e faasoa mai mea ua latou aoaoina i le aso. O latou malamalama i le mea na aoao mai e aafiaga o Iosefa Samita e uiga i le aoaoina o le talalelei? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Tomai e suesue ai le talalelei

Suesuega mo mataupu faavae. O se mataupu faavae o se upumoni lea e taiala ai a tatou faatinoga. O nisi taimi e manino lava le faaupuina mai o mataupu faavae i tusitusiga paia po o upu a perofeta, a o isi taimi e faaiteite mai i tala. I le gaoioiga muamua i lenei vaega, ua talosagaina le autalavou e lisi ni mataupu faavae o le aoaoina. A o latou suesue i tusitusiga paia, e ono fesoasoani ia fesili nei: O a ni mataupu faavae ou te aoao mai lenei fuaitau? Pe ese na mataupu faavae mai na sa ou manatu ai pe na aoaoina foi i le taimi ua tuanai? Po o latou uunaia au e fai se suiga i lou olaga? Fautuaina i latou e vaavaai mo mataupu faavae i a latou suesuega o le talalelei, faaletagata lava ia ma faaleaiga.

Valaaulia e faatino

Fai atu i talavou taitasi e tusi i lalo se mea se tasi o le a ia faia e avea ai ma se tagata sili atu e aoaoina le talalelei e faavae i le faataitaiga a Iosefa Samita. Valaaulia le autalavou e faasoa mai i le tasi ma le isi mea sa latou tusia.