Aisea ua avea ai le aoaoina o se vaega taua o le fuafuaga a le Tama Faalelagi?

O se tasi o mafuaaga autu na auina mai ai e le Tama Faalelagi i tatou i le lalolagi o le tuuina mai lea ia i tatou o poto masani ia o le a mafai ona fesoasoani ia i tatou ia aoaoina, ma sili atu ai ona avea faapei o Ia.Afai o le a tatou usiusitai ma aoaoina gofie, o le a Ia fesoasoani ia i tatou e aoaoina mea e tatau ona tatou iloaina, o lea fuaitau i luga o lea fuaitau, i o tatou olaga atoa.Ua faamoemoe mai le Tama Faalelagi ia i tatou e faaaoga le malamalama tatou te mauaina e faamanuia ai isi ma fausia ai Lona malo.

Saunia oe lava ia faaleagaga

O a ni ou avanoa o i ai e faaauau ai pea le aoaoina? Na faapefea ona faamanuiaina lou olaga i le faia pea?

E mafai faapefea ona e fesoasoani e faamalamalama i le autalavou le taua o le faaauau ai pea o le aoaoina i o latou olaga atoa? O le a se mea e mafai ona e faia e fesoasoani ia i latou ia iloa ai le taua o a latou aoaoga faalepoto salalau ma faaletalalelei?

Ia suesue ma le agaga tatalo ia mau ma punaoa nei. O le a se mea na uunaia oe ina ia avea ma se tagata aoao i le olaga atoa?

2 Nifae 28:27–30; MF&F 98:11–12 (Ua folafola mai le Alii o le a Ia aoaoina i tatou “i lea fasifuaitau ma lea fasifuaitau” a o tatou suesue ma ola i mea ua tatou aoaoina)

Alema 12:9–11; MF&F 50:40 (Afai tatou te usiusitai ma aoaoina gofie, o le a faaauau ona tatou aoaoina mai i o tatou olaga atoa)

MF&F 88:77–80 (E finagalo le Alii ia aoaoina i tatou, ina ia mafai ai ona tatou saunia e faalautele o tatou valaauga)

Dieter F. Uchtdorf, “Le Alii e, O Au Ea?” Ensign po o le Liahona, Nov. 2014, 56-59

Dallin H. Oaks ma Kristen M. Oaks, “O Le Aoaoina ma le Au Paia o Aso e Gata Ai,” Ensignpo o le Liahona, Ape. 2009, 22–27

“Aoga,” Mo Le Malosi o le Autalavou (2011), 22–24

“Ata o le Faaolataga,” Faamaoni i le Faatuatua (2004), 27–29

Ata Vitio: “You Know Enough” (Ua aoao mai Elder Neil L. Andersen faapea o le aoaoina e tupu mai i lea fasifuaitau ma lea fasifuaitau)

9:55

Aoao atu i le ala a le Faaola

O le Faaola sa avea ma faataitaiga atoatoa o mea uma sa Ia aoaoina mai. Sa Ia aoaoina Ona soo i le tatalo e ala i le tatalo faatasi ma i latou. Sa Ia aoaoina i latou e alolofa atu ma auauna atu e ala i le auala sa Ia alofa atu ai ma auauna atu ai ia te i latou. O le a se mea e mafai ona e faia e faaalia ai le fiafia i le aoaoina o le autalavou o loo e faiaoga ai?

Ia fai fesootaiga

I nai uluai minute o vasega taitasi, fesoasoani i le autalavou e faia fesootaiga i le va o mea o loo latou aoaoina i tulaga eseese (e pei o se suesuega faaletagata lava ia, seminare, isi vasega a le Ekalesia, po o aafiaga ma a latou uo). E mafai faapefea ona e fesoasoani ia i latou ia iloa le faatatauga o le talalelei i le olaga o aso faisoo? Atonu e mafai ona fesoasoani manatu o loo i lalo ia te oe:

O a mea ua aoaoina e le autalavou e uiga i vaega o le ata o le faaolataga (e pei o feagaiga, usiusitai, o le Togiola, po o le olaga pe a mavae le oti)? O a mea atonu e mafai ona latou fefaasoaai ai le tasi ma le isi?
Tusi i luga o le laupapa, “Aisea ua avea ai le aoaoina o se vaega taua o le fuafuaga a le Tama Faalelagi? Tuu atu i le autalavou se taimi i le lesona atoa e mafaufau loloto ai i lenei fesili, ma tusi i lalo nisi o tali talafeagai. I le faaiuga o le vasega, valaaulia i latou e faasoa mai mea na latou tusia.

Aoao faatasi

O le a fesoasoani gaoioiga taitasi nei e musuia le autalavou ia avea ma tagata aoao i le olaga atoa. I le mulimuli ai i le taitaiga a le Agaga, filifili se tasi pe sili atu o le a aoga mo lau vasega:

Tusi i luga o le laupapa Aisea e avea ai le aoaoina o se vaega taua o le fuafuaga a le Tama Faalelagi? Fai atu i le autalavou e mafaufau e uiga i le fesili lenei ao latou faitauina le vaega e faaulutalaina “O Le Olaga Suesueina” i le saunoaga a Peresitene Dieter F. Uchtdorf “Le Alii e, O Au Ea?” Tuu atu se taimi ia i latou e faasoa mai ai lo latou malamalama: Valaaulia i latou e tau mai ni suiga sa latou faia i o latou olaga o se taunuuga o a latou suesuega o tusitusiga paia po o aoaoga a perofeta soifua.
Fai atu i talavou taitasi e faitau se tasi o mau o i lenei otootoga, tagai mo mataupu faavae mo le aoaoina. Fai atu ia i latou e tusi se ata faigofie e faatusa i mataupu faavae o loo i fuaitau o mau. Fai atu i le autalavou e faaaoga a latou ata e aoao atu ai le tasi ma le isi e uiga i mea sa latou faitaua. O a ni mea o aoao mai e nei mau e uiga i le taua o le aoaoina i le fuafuaga a le Tama Faalelagi?
Valaaulia le autalavou e faitau le vaega o “Aoga” i le Mo le Malosi o le Autalavou, e aofia ai mau faasino. Fai atu i le afa o le vasega e tagai mo mea e finagalo le Tama Faalelagi ia i tatou e fai, ma fai atu i le isi afa e faailoa mai faamanuiaga na Ia folafola mai. Valaaulia i latou e faasoa mai mea sa latou mauaina ma filifili se mea latou te lagona e manaomia ona latou galulue ai. Talanoa faatasi o se vasega ni auala e mafai ona latou faaleleia ai i na eria, ma uunaia le autalavou e seti ni sini patino e faaaoga ai le fautuaga a le Alii.
Faaali le vitio “You Know Enough,” ma valaaulia le autalavou e faasoa mai mea sa latou aoaoina mai le lauga a Elder Neil L. Andersen e uiga i le auala tatou te maua ai le malamalama. O le a se latou tala e fai atu i se uo o le o loo tauivi ona na te le malamalama i mea uma e uiga i le talalelei. O le a se auala latou te fesoasoani ai i la latou uo ia malamalama i le matafaioi o le aoaoina i le fuafuaga a le Tama Faalelagi?

9:55
Fai i le autalavou e faitau le “Ata o le Faaolataga” i le Faamaoni i le Faatuatua (itulau 27-29), e aofia ai mau na ta'ua, ma saili se mea latou te lei iloaina muamua. Valaaulia i latou e faasoa mai na latou aoaoina, ma talanoaina pe aisea e finagalo ai le Tama Faalelagi ia i tatou e faaauau ona aoaoina.

Fai atu i le autalavou e faasoa mai mea ua latou aoaoina i le aso. Pe o latou malamalama i le taua o le aoaoina i le fuafuaga a le Tama Faalelagi. O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Valaaulia e faatino

Valaaulia le autalavou e manatunatu e uiga i se vaega o le ata o le faaolataga atonu latou te mananao e aoao atu i se uo, po o se tasi o le aiga.O le a le mea e mafai ona latou faia e aoao ai e uiga i lena autu?
Tuu atu lau molimau e uiga i faamanuiaga tatou te maua, pe a tatou sailia le aoaoina i o tatou olaga atoa.