E mafai faapefea ona ou faaalia le alofa mo i latou ou te aoaoina?

Na alofa Iesu Keriso ia i latou na Ia aoaoina. Na Ia tatalo mo i latou ma maua ni avanoa e faaali ai Lona alofa. E mafai ona tatou atinaeina le alofa mo i latou o tatou aoaoina e ala i le tatalo mo i latou ma auauana atu ia i latou ma le le manatu faapito. Pe a lagona e i latou o tatou aoaoina lo tatou alofa faamaoni ia i latou, o le a faamaluluina o latou loto, ma o le a latou taliaina atili ia upumoni o tatou aoaoina.

Saunia oe lava ia faaleagaga

Na faapefea ona uunaia oe e se faiaoga o le sa faaalia le alofa ia te oe? Na faapefea ona e atinaeina le alofa mo i latou o e aoaoina?

O a ni tulaga a le Ekalesia lea e maua ai e le autalavou ni avanoa e aoao atu ai? O a nisi taimi faaleaoaoga o latou mauaina i o latou olaga? E mafai faapefea i le aoao e alolofa atu ia i latou o latou aoaoina ona fesoasoani i talavou ina ia avea ai ma ni faiaoga sili ona lelei?

Ia suesue ma le agaga tatalo ia mau ma punaoa nei. O le a se mea o le a fesoasoani i le autalavou ina ia malamalama i le taua o le alolofa atu ia i latou o latou aoaoina?

Ioane 13:34 (E tatau ona tatou alolofa atu i isi e pei ona alofa mai Iesu Keriso ia i tatou)

Mosaea 28:1–3; Alema 17:21–39; 20:21–27 (Na faaalia e Amona le alofa ia sa Lamana ia na ia aoaoina)

Moronae 7:45–46 (A leai se alofa o ni mea noa i tatou)

Thomas S. Monson, “O Faataitaiga o Faiaoga Maoae,” Ensign po o le Liahona, Iuni 2007, 74–80

Vitio: “Alofa Ia I Latou E Te Aoaoina”

5:0

Aoao atu i le ala a le Faaola

Na alofa Iesu Keriso ia i latou na Ia aoaoina. Na Ia tatalo mo i latou ma faaauau pea ona auauna ia i latou. E mafai faapefea ona e faaalia lou alofa mo le autalavou o e aoaoina?

Ia fai fesootaiga

I nai minute muamua lava o vasega taitasi, fesoasoani i le autalavou e faia fesootaiga i le va o mea latou te aoaoina i nofoaga eseese (e pei o suesuega faaletagata lava ia, seminare, isi vasega faale-Lotu, po o aafiaga ma a latou uo). E mafai faapefea ona e fesoasoani ia i latou ia iloa le taua o le talalelei i o latou olaga i aso taitasi? E mafai ona fesoasoani manatu nei:

Valaaulia le autalavou e faasoa atu i se isi tagata o le vasega se mau sa latou faitauina talu ai nei i a latou suesuega patino. O i ai ni a latou fesili e uiga i mea o latou aoaoina?
Fesili atu i le autalavou pe faapefea ona latou iloa e alofa le faiaoga ia i latou. Aisea e taua ai le faaalia e le faiaoga o le alofa? Na faaalia ea e le autalavou le alofa i se tagata sa latou aoaoina? Faitau le Ioane 13:34, ma talanoa i auala na faaalia ai e le Faaola le alofa ia i latou na Ia aoaoina.

Aoao faatasi

O gaoioiga taitasi nei o le a fesoasoani i le autalavou ina ia malamalama i le ala e alolofa atu ai ia i latou o latou aoaoina i le ala faaKeriso. I le mulimuli ai i uunaiga a le Agaga, filifili se tasi pe sili atu e aoga mo lau vasega:

Valaaulia le autalavou e faitau le Moronae 7:45, matau ia upu ma fuaitau na faaaoga e faamatala ai se tagata o loo i ai le alofa mama, ma faamatala mai ia latou lava upu nei uiga (afai e manaomia, fesoasoani ia i latou e saili uiga o soo se upu e le masani ai). Valaaulia talavou taitasi e filifili le tasi o nei upu po o fuaitau ma faamatala mai pe faapefea ona fesootai i le aoaoga. Fai atu ia i latou e mafaufau i ni tulaga lea o loo latou aoao atu ai e le tasi le isi—i le lotu ma i isi taimi o aoaoga (i le fale, i le aoga, ma i le olaga i aso uma). O a fea o uiga o i le Moronae 7:45 latou te fia atinaeina e fesoasoani ai ia i latou ina ia avea ai ma ni faiaoga sili ona lelei? Valaaulia ni nai talavou e faasoa mai o latou manatu.
Fai i le autalavou e faitau le vaega o faaulutalaina “E Sili le Manuia o Le na te Foai i Lo Manuia o Le na te Talia” i le saunoaga a Peresitene Thomas S. Monson “O Faataitaiga o Faiaoga Maoae,” pe faaali le vitio “Alofa Ia I Latou E Te Aoaoina.” Fesili i le autalavou: O le a se mea na faia e faiaoga i nei faataitaiga na faaali ai le alofa mo i latou na la aoaoina? O a avanoa e maua e le autalavou e aoao atu ai (i nofoaga o le Ekalesia ma i isi taimi faaleaoaoga)? Valaaulia le autalavou e fuafua ni auala e mafai ona latou faaali atu ai le alofa i le avea ai ma ni faiaoga. Valaaulia ni nai talavou e faasoa mai a latou fuafuaga i le vasega.

5:0
Faaali atu se ata o Amona o loo puipuia le lafu a Lamonae (Tusi Ata o le Talalelei,78), ma valaaulia se tagata o le vasega e toe faamatala mai le tala (tagai i le Alema 17:21–39). Fai atu i nisi o le autalavou e faitau le Mosaea 28:1–3, vaavaai mo tali i le fesili “O le a se mea na uunaia ai Amona ma ona uso i le fia mananao e aoao atu le talalelei ia sa Lamana?” Fai atu i le vaega o totoe o le autalavou e faitau le Alema 20:21–27, vaavaai mo tali i le fesili “O le a se aafiaga o le alofa o Amona na i ai i le tama o le Tupu o Lamonae?” Valaaulia i latou e faasoa mai se mea sa latou maua, ma fesili atu ia i latou e mafaufau i ni mea faapitoa e mafai ona latou faia e mulimuli ai i le faataitaiga a Amona.

Fai atu i le autalavou e faasoa mai mea ua latou aoaoina i le aso. O latou malamalama i le ala e faaali atu ai le alofa mo i latou o latou aoaoina? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Valaaulia e faatino

Uunaia le autalavou e mafaufau e uiga i tagata latou te aoaoina. Valaaulia i latou e filifili se mea latou te faia e faaalia ai le alofa mo na tagata.