E faapefea e le faalagolago i le alofa tunoa o le Faaola ona fesoasoani e avea au ma faiaoga sili atu?

Ia tatou taumafaiga e aoao atu le talalelei, atonu tatou te lagona i nisi taimi le le agavaa. Ae peitai e mafai ona tatou maua le faamalosiauga mai le folafolaga a le Alii o Lona “alofa tunoa ua lava ... [ia] faia lea o mea vaivai ia avea ma mea malolosi” (Eteru 12:27). A o tatou faalotomaualaloina i tatou lava, taliaina o tatou vaivaiga, ma faaalia lo tatou faatuatua ia Iesu Keriso, o le a Ia faamalosia i tatou e aoao atu Lana talalelei i se ala e tusa ai ma Lona finagalo.

Saunia oe lava ia faaleagaga

Na faapefea ona e maua tali i au fesili o le talalelei? O a metotia tau suesuega na fesoasoani ia te oe?

O a metotia tau suesuega e masani ai le autalavou? Pe o i ai se metotia tau suesuega e mafai e se tasi o le autalavou ona aoao atu i le vasega?

Ieremia 1:5–9; Mose 6:31–34 (O perofeta na lagona le le agavaa ae na maua le malosi mai le Alii)

1 Korinito 1:27–31; MF&F 1:19–23 (E folafola atu le talalelei e e vaivai ma e faatauvaa)

Iakopo 4:7; Eteru 12:23–29 (Ua lava le alofa tunoa o le Faaola e faamalosia ai e lotomaualalo)

Alema 17:9–11; 29:9 (E mafai ona avea i tatou ma auupega i aao o le Alii e aumai ai isi ia Keriso)

David A. Bednar, “I le Malosiaga o le Alii,” Ensign po o Liahona, Nov. 2004, 76–78

David M. McConkie, “Aoaoina Mai ma le Aoao Atu o le Talalelei,” Ensign po o le Liahona, Nov. 2010, 13–15

Aoao atu i le ala a le Faaola

Na saunia e le Faaola o Ia lava e aoao atu e ala i le faaaluina o le taimi na o Ia i le tatalo ma le anapogi ma le saili atu i le taitaiga mai Lona Tama. E faapefea ona e mulimuli i Lana faataitaiga a o e saunia e aoao le autalavou?

Ia fai fesootaiga

I nai minute muamua o vasega taitasi, fesoasoani i talavou e fai ni fesootaiga i le va o mea o loo latou aoaoina i tulaga eseese (e pei o suesuega faaletagata, seminare, isi vasega i le Lotu, po o aafiaga ma a latou uo). E faapefea ona e fesoasoani ia i latou ia iloa le manaomia o le talalelei i aso taitasi o le olaga? O manatu nei e ono fesoasoani ia te oe:

Fai atu i talavou e faasoa mai mea na latou aoaoina e uiga i le Togiola ma po o a ni a latou fesili e uiga i mea na latou aoaoina.

Aoao faatasi

O gaoioiga taitasi nei e mafai ona faamalosia le autalavou e faalagolago i le alofa tunoa o le Faaola e fesoasoani ia i latou e avea ma ni faiaoga sili atu. I le mulimuli ai i le taitaiga a le Agaga, filifili se tasi pe sili atu o le a sili ona aoga i lau vasega:

Fai atu i talavou e faasoa mai se aafiaga na latou maua ai se tofiga na foliga faigata pe mamafatu. O a ni tofiga i le lumanai latou te ono maua atonu o le a latou lagona ai le mamafatu? Ia faitau faatasi, parakalafa muamua e 11 o le lauga a Elder David A. Bednar “I Le Malosiaga o le Alii,” ma fesili atu i le autalavou e sii o latou lima pe a latou faalogo pe faitau i se mea e ono faamalosia pe uunaia ai i latou pe a latou maua ia ituaiga tofiga ma faasoa mai mea na latou aoaoina ma le vasega. E faapefea ona latou faaaogaina mea na latou aoaoina i avanoa latou te maua e aoao ai isi i le talalelei? Mafaufau e faasoa atu se aafiaga patino na e maua ai le malosiaga mai le Alii e faataunuu ai se tofiga na foliga faigata.
A o lei amataina le vasega, valaaulia se tasi o le autalavou e taina se mea faifaaili e aumai lana mea faifaaili i le vasega (pe faaali se ata o le mea faifaaili). Fesili atu i le talavou e faamatala po o le a le mea na te faia ia mautinoa ai o loo lelei le mea faifaaili. Valaaulia le vasega e faitau Alema 17:9–11 ma faamatala pe faapefea e se tasi e taina se mea faifaaili ona pei o le Alii i le faaaogaina o i tatou e pei o ni mea faifaaili e aoao atu Lana talalelei. O le a le mea na fai e le fanau a Mosaea e saunia ai i latou lava e avea ma ni mea faigaluega aoga i aao o le Alii? E faapefea e le autalavou ona mulimuli i a latou faataitaiga ao latou aoao atu?
Valaaulia le autalavou e faitau le lauga a David M. McConkie, “Aoaoina Mai ma le Aoao Atu o le Talalelei.” Fautuaina i latou e lisi i le laupapa mea ua tau mai e Brother McConkie e taua i le aoaoina atu o le talalelei ma mea ua ia fai mai e le taua. Fautuaina i latou e faasoa pe faapefea e tala a Brother McConkie ona faaalia ai mea ua latou lisiina i le laupapa. Valaaulia le autalavou e fuafua ni auala e mafai ona latou faaaoga ai mea na latou aoaoina mai le lauga e maua ai le malosi mai le Alii ao latou aoaoina isi.
Fai atu i le autalavou e vaai faalemafaufau faapea o se uo na maua se tofiga mai le epikopo e aoao se vasega pe fai se lauga, ma ua lagona e le uo le le agavaa ma e le manao e talia le tofiga. E faapefea ona faamalosia e le autalavou le latou uo? O a ni mau e mafai ona latou faaaogaina e fesoasoani ai ia te ia? (Tagai, mo se faataitaiga, i mau o loo fautuaina atu i lenei otootoga.) Valaaulia i latou e faatino se tala e faaaoga ai nei mau e fesoasoani i se tasi o loo i lenei tulaga.

Fai atu i le autalavou e faasoa mai mea na latou aoaoina i le aso. Pe ua latou malamalama pe faapefea ona fesoasoani le alofa tunoa ia avea ai i latou ma ni faiaoga sili atu? Pe o i ai nisi a latou fesili? Pe mata e aoga le toe faaalu o se isi taimi i lenei autu?

Motugaafa faafaiaoga

“Aua lava nei ulagia pe faitioina se fesili po o se manatu, ae ia faaalia le faaaloalo ma le alofa a o e faia le mea sili e tali atu ai. A lagona e tagata le taua o o latou manatu, o le a atili ai ona saoloto le faasoa mai o o latou aafiaga, lagona, ma molimau” (O Le Aoao Atu, E Leai Se Isi Valaauga e Sili Ai [1999], 64).

Valaaulia e faatino

Fesili i le auatalavou po o a ni mea ua musuia i latou e fai ona o mea sa latou aoaoina i le aso. Fautuaina i latou e faatino na lagona. Mafaufau i ni auala e mafai ai ona e tulitataoina.
Molimau atu i le malosiaga ma le fesoasoani na tuuina mai e le Alii ia te oe i lou tofiga o le aoao atu.